| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
206-214. இதா³னி அபி⁴த⁴ம்மபா⁴ஜனீயங் ஹோதி. தத்த² ‘‘அரியஸச்சானீ’’தி அவத்வா நிப்பதே³ஸதோ பச்சயஸங்கா²தங் ஸமுத³யங் த³ஸ்ஸேதுங் ‘‘சத்தாரி ஸச்சானீ’’தி வுத்தங் . அரியஸச்சானீதி ஹி வுத்தே அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா ந ஸங்க³ய்ஹந்தி. ந ச கேவலங் தண்ஹாவ து³க்க²ங் ஸமுதா³னேதி, இமேபி அவஸேஸா ச கிலேஸாத³யோ பச்சயா ஸமுதா³னெந்தியேவ. இதி இமேபி பச்சயா து³க்க²ங் ஸமுதா³னெந்தியேவாதி நிப்பதே³ஸதோ பச்சயஸங்கா²தங் ஸமுத³யங் த³ஸ்ஸேதுங் ‘‘அரியஸச்சானீ’’தி அவத்வா ‘‘சத்தாரி ஸச்சானீ’’தி வுத்தங்.
206-214. Idāni abhidhammabhājanīyaṃ hoti. Tattha ‘‘ariyasaccānī’’ti avatvā nippadesato paccayasaṅkhātaṃ samudayaṃ dassetuṃ ‘‘cattāri saccānī’’ti vuttaṃ . Ariyasaccānīti hi vutte avasesā ca kilesā, avasesā ca akusalā dhammā, tīṇi ca kusalamūlāni sāsavāni, avasesā ca sāsavā kusalā dhammā na saṅgayhanti. Na ca kevalaṃ taṇhāva dukkhaṃ samudāneti, imepi avasesā ca kilesādayo paccayā samudānentiyeva. Iti imepi paccayā dukkhaṃ samudānentiyevāti nippadesato paccayasaṅkhātaṃ samudayaṃ dassetuṃ ‘‘ariyasaccānī’’ti avatvā ‘‘cattāri saccānī’’ti vuttaṃ.
நித்³தே³ஸவாரே ச நேஸங் பட²மங் து³க்க²ங் அனித்³தி³ஸித்வா தஸ்ஸேவ து³க்க²ஸ்ஸ ஸுக²னித்³தே³ஸத்த²ங் து³க்க²ஸமுத³யோ நித்³தி³ட்டோ². தஸ்மிஞ்ஹி நித்³தி³ட்டே² ‘‘அவஸேஸா ச கிலேஸா’’திஆதி³னா நயேன து³க்க²ஸச்சங் ஸுக²னித்³தே³ஸங் ஹோதி. நிரோத⁴ஸச்சம்பெத்த² தண்ஹாய பஹானங் ‘‘தண்ஹாய ச அவஸேஸானஞ்ச கிலேஸானங் பஹான’’ந்தி ஏவங் யதா²வுத்தஸ்ஸ ஸமுத³யஸ்ஸ பஹானவஸேன பஞ்சஹாகாரேஹி நித்³தி³ட்ட²ங். மக்³க³ஸச்சங் பனெத்த² பட²மஜ்ஜா²னிகஸோதாபத்திமக்³க³வஸேன த⁴ம்மஸங்க³ணியங் விப⁴த்தஸ்ஸ தே³ஸனானயஸ்ஸ முக²மத்தமேவ த³ஸ்ஸெந்தேன நித்³தி³ட்ட²ங். தத்த² நயபே⁴தோ³ வேதி³தப்³போ³. தங் உபரி பகாஸயிஸ்ஸாம.
Niddesavāre ca nesaṃ paṭhamaṃ dukkhaṃ aniddisitvā tasseva dukkhassa sukhaniddesatthaṃ dukkhasamudayo niddiṭṭho. Tasmiñhi niddiṭṭhe ‘‘avasesā ca kilesā’’tiādinā nayena dukkhasaccaṃ sukhaniddesaṃ hoti. Nirodhasaccampettha taṇhāya pahānaṃ ‘‘taṇhāya ca avasesānañca kilesānaṃ pahāna’’nti evaṃ yathāvuttassa samudayassa pahānavasena pañcahākārehi niddiṭṭhaṃ. Maggasaccaṃ panettha paṭhamajjhānikasotāpattimaggavasena dhammasaṅgaṇiyaṃ vibhattassa desanānayassa mukhamattameva dassentena niddiṭṭhaṃ. Tattha nayabhedo veditabbo. Taṃ upari pakāsayissāma.
யஸ்மா பன ந கேவலங் அட்ட²ங்கி³கோ மக்³கோ³வ படிபதா³ ‘‘புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதீ’’தி (ம॰ நி॰ 3.433) வசனதோ பன புக்³க³லஜ்ஜா²ஸயவஸேன பஞ்சங்கி³கோபி மக்³கோ³ படிபதா³ ஏவாதி தே³ஸிதோ, தஸ்மா தங் நயங் த³ஸ்ஸேதுங் பஞ்சங்கி³கவாரோபி நித்³தி³ட்டோ². யஸ்மா ச ந கேவலங் அட்ட²ங்கி³கபஞ்சங்கி³கமக்³கா³வ படிபதா³, ஸம்பயுத்தகா பன அதிரேகபஞ்ஞாஸத⁴ம்மாபி படிபதா³ ஏவ, தஸ்மா தங் நயங் த³ஸ்ஸேதுங் ததியோ ஸப்³ப³ஸங்கா³ஹிகவாரோபி நித்³தி³ட்டோ². தத்த² ‘‘அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா’’தி இத³ங் பரிஹாயதி. ஸேஸங் ஸப்³ப³த்த² ஸதி³ஸமேவ.
Yasmā pana na kevalaṃ aṭṭhaṅgiko maggova paṭipadā ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.433) vacanato pana puggalajjhāsayavasena pañcaṅgikopi maggo paṭipadā evāti desito, tasmā taṃ nayaṃ dassetuṃ pañcaṅgikavāropi niddiṭṭho. Yasmā ca na kevalaṃ aṭṭhaṅgikapañcaṅgikamaggāva paṭipadā, sampayuttakā pana atirekapaññāsadhammāpi paṭipadā eva, tasmā taṃ nayaṃ dassetuṃ tatiyo sabbasaṅgāhikavāropi niddiṭṭho. Tattha ‘‘avasesā dhammā dukkhanirodhagāminiyā paṭipadāya sampayuttā’’ti idaṃ parihāyati. Sesaṃ sabbattha sadisameva.
தத்த² அட்ட²ங்கி³கவாரஸ்ஸ ‘‘தண்ஹாய அவஸேஸானஞ்ச கிலேஸானங் பஹான’’ந்திஆதீ³ஸு பஞ்சஸு கொட்டா²ஸேஸு பட²மகொட்டா²ஸே தாவ ஸோதாபத்திமக்³கே³ ஜா²னாபி⁴னிவேஸே ஸுத்³தி⁴கபடிபதா³, ஸுத்³தி⁴கஸுஞ்ஞதா, ஸுஞ்ஞதபடிபதா³, ஸுத்³தி⁴கஅப்பணிஹிதங், அப்பணிஹிதபடிபதா³தி இமேஸு பஞ்சஸு வாரேஸு த்³வின்னங் த்³வின்னங் சதுக்கபஞ்சகனயானங் வஸேன த³ஸ நயா ஹொந்தி. ஏவங் ஸேஸேஸுபீதி வீஸதியா அபி⁴னிவேஸேஸு த்³வே நயஸதானி. தானி சதூஹி அதி⁴பதீஹி சதுக்³கு³ணிதானி அட்ட² . இதி ஸுத்³தி⁴கானி த்³வே ஸாதி⁴பதீ அட்டா²தி ஸப்³ப³ம்பி நயஸஹஸ்ஸங் ஹோதி. யதா² ச ஸோதாபத்திமக்³கே³, ஏவங் ஸேஸமக்³கே³ஸுபீதி சத்தாரி நயஸஹஸ்ஸானி ஹொந்தி. யதா² ச பட²மகொட்டா²ஸே சத்தாரி, ஏவங் ஸேஸேஸுபீதி அட்ட²ங்கி³கவாரே பஞ்சஸு கொட்டா²ஸேஸு வீஸதி நயஸஹஸ்ஸானி ஹொந்தி. ததா² பஞ்சங்கி³கவாரே ஸப்³ப³ஸங்கா³ஹிகவாரே சாதி ஸப்³பா³னிபி ஸட்டி² நயஸஹஸ்ஸானி ஸத்தா²ரா விப⁴த்தானி. பாளி பன ஸங்கே²பேன ஆக³தா. ஏவமித³ங் திவித⁴மஹாவாரங் பஞ்சத³ஸகொட்டா²ஸங் ஸட்டி²னயஸஹஸ்ஸபடிமண்டி³தங் அபி⁴த⁴ம்மபா⁴ஜனீயங் நாம நித்³தி³ட்ட²ந்தி வேதி³தப்³ப³ங்.
Tattha aṭṭhaṅgikavārassa ‘‘taṇhāya avasesānañca kilesānaṃ pahāna’’ntiādīsu pañcasu koṭṭhāsesu paṭhamakoṭṭhāse tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitaṃ, appaṇihitapaṭipadāti imesu pañcasu vāresu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catugguṇitāni aṭṭha . Iti suddhikāni dve sādhipatī aṭṭhāti sabbampi nayasahassaṃ hoti. Yathā ca sotāpattimagge, evaṃ sesamaggesupīti cattāri nayasahassāni honti. Yathā ca paṭhamakoṭṭhāse cattāri, evaṃ sesesupīti aṭṭhaṅgikavāre pañcasu koṭṭhāsesu vīsati nayasahassāni honti. Tathā pañcaṅgikavāre sabbasaṅgāhikavāre cāti sabbānipi saṭṭhinayasahassāni satthārā vibhattāni. Pāḷi pana saṅkhepena āgatā. Evamidaṃ tividhamahāvāraṃ pañcadasakoṭṭhāsaṃ saṭṭhinayasahassapaṭimaṇḍitaṃ abhidhammabhājanīyaṃ nāma niddiṭṭhanti veditabbaṃ.
அபி⁴த⁴ம்மபா⁴ஜனீயவண்ணனா.
Abhidhammabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 4. ஸச்சவிப⁴ங்கோ³ • 4. Saccavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 4. ஸச்சவிப⁴ங்கோ³ • 4. Saccavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 4. ஸச்சவிப⁴ங்கோ³ • 4. Saccavibhaṅgo
