| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
374. அபி⁴த⁴ம்மபா⁴ஜனீயே லோகுத்தரஸதிபட்டா²னவஸேன தே³ஸனாய ஆரத்³த⁴த்தா யதா² காயாதி³ஆரம்மணேஸு லோகியஸதிபட்டா²னேஸு தந்தி ட²பிதா, ஏவங் அட்ட²பெத்வா ஸப்³பா³னிபி காயானுபஸ்ஸாதீ³னி ஸதிபட்டா²னானி த⁴ம்மஸங்க³ணியங் (த⁴॰ ஸ॰ 355 ஆத³யோ) விப⁴த்தஸ்ஸ தே³ஸனானயஸ்ஸ முக²மத்தமேவ த³ஸ்ஸெந்தேன நித்³தி³ட்டா²னி.
374. Abhidhammabhājanīye lokuttarasatipaṭṭhānavasena desanāya āraddhattā yathā kāyādiārammaṇesu lokiyasatipaṭṭhānesu tanti ṭhapitā, evaṃ aṭṭhapetvā sabbānipi kāyānupassādīni satipaṭṭhānāni dhammasaṅgaṇiyaṃ (dha. sa. 355 ādayo) vibhattassa desanānayassa mukhamattameva dassentena niddiṭṭhāni.
தத்த² நயபே⁴தோ³ வேதி³தப்³போ³. கத²ங்? காயானுபஸ்ஸனாய தாவ ஸோதாபத்திமக்³கே³ ஜா²னாபி⁴னிவேஸே ஸுத்³தி⁴கபடிபதா³, ஸுத்³தி⁴கஸுஞ்ஞதா, ஸுஞ்ஞதபடிபதா³, ஸுத்³தி⁴கஅப்பணிஹிதங், அப்பணிஹிதபடிபதா³தி இமேஸு பஞ்சஸு டா²னேஸு த்³வின்னங் த்³வின்னங் சதுக்கபஞ்சகனயானங் வஸேன த³ஸ நயா ஹொந்தி. ஏவங் ஸேஸேஸுபீதி வீஸதியா அபி⁴னிவேஸேஸு த்³வே நயஸதானி. தானி சதூஹி அதி⁴பதீஹி சதுகு³ணிதானி அட்ட². இதி ஸுத்³தி⁴கானி த்³வே ஸாதி⁴பதீனி அட்டா²தி ஸப்³ப³ம்பி நயஸஹஸ்ஸங் ஹோதி. ததா² வேத³னானுபஸ்ஸனாதீ³ஸு ஸுத்³தி⁴கஸதிபட்டா²னே சாதி ஸோதாபத்திமக்³கே³ பஞ்ச நயஸஹஸ்ஸானி. யதா² ச ஸோதாபத்திமக்³கே³, ஏவங் ஸேஸமக்³கே³ஸுபீதி குஸலே வீஸதி நயஸஹஸ்ஸானி; ஸுஞ்ஞதாபணிஹிதானிமித்தாதி³பே⁴தே³ஸு பன ததோ திகு³ணே விபாகே ஸட்டி² நயஸஹஸ்ஸானீதி. ஏவமேவ ஸகிச்சஸாத⁴கானஞ்சேவ ஸங்ஸித்³தி⁴ககிச்சானஞ்ச குஸலவிபாகஸதிபட்டா²னானங் நித்³தே³ஸவஸேன து³விதோ⁴ காயானுபஸ்ஸனாதி³வஸேன ச ஸுத்³தி⁴கவஸேன ச குஸலே பஞ்சன்னங் விபாகே பஞ்சன்னந்தி த³ஸன்னங் நித்³தே³ஸவாரானங் வஸேன த³ஸப்பபே⁴தோ³ அஸீதினயஸஹஸ்ஸபதிமண்டி³தோ அபி⁴த⁴ம்மபா⁴ஜனீயனித்³தே³ஸோ.
Tattha nayabhedo veditabbo. Kathaṃ? Kāyānupassanāya tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitaṃ, appaṇihitapaṭipadāti imesu pañcasu ṭhānesu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catuguṇitāni aṭṭha. Iti suddhikāni dve sādhipatīni aṭṭhāti sabbampi nayasahassaṃ hoti. Tathā vedanānupassanādīsu suddhikasatipaṭṭhāne cāti sotāpattimagge pañca nayasahassāni. Yathā ca sotāpattimagge, evaṃ sesamaggesupīti kusale vīsati nayasahassāni; suññatāpaṇihitānimittādibhedesu pana tato tiguṇe vipāke saṭṭhi nayasahassānīti. Evameva sakiccasādhakānañceva saṃsiddhikakiccānañca kusalavipākasatipaṭṭhānānaṃ niddesavasena duvidho kāyānupassanādivasena ca suddhikavasena ca kusale pañcannaṃ vipāke pañcannanti dasannaṃ niddesavārānaṃ vasena dasappabhedo asītinayasahassapatimaṇḍito abhidhammabhājanīyaniddeso.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 7. ஸதிபட்டா²னவிப⁴ங்கோ³ • 7. Satipaṭṭhānavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 7. ஸதிபட்டா²னவிப⁴ங்கோ³ • 7. Satipaṭṭhānavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 7. ஸதிபட்டா²னவிப⁴ங்கோ³ • 7. Satipaṭṭhānavibhaṅgo
