| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
408. அபி⁴த⁴ம்மபா⁴ஜனீயே ஸப்³பா³னிபி ஸம்மப்பதா⁴னானி த⁴ம்மஸங்க³ணியங் விப⁴த்தஸ்ஸ தே³ஸனானயஸ்ஸ முக²மத்தமேவ த³ஸ்ஸெந்தேன நித்³தி³ட்டா²னி. தத்த² நயபே⁴தோ³ வேதி³தப்³போ³. கத²ங்? பட²மஸம்மப்பதா⁴னே தாவ ஸோதாபத்திமக்³கே³ ஜா²னாபி⁴னிவேஸே ஸுத்³தி⁴கபடிபதா³, ஸுத்³தி⁴கஸுஞ்ஞதா, ஸுஞ்ஞதபடிபதா³, ஸுத்³தி⁴கஅப்பணிஹிதா, அப்பணிஹிதபடிபதா³தி இமேஸு பஞ்சஸு டா²னேஸு த்³வின்னங் த்³வின்னங் சதுக்கபஞ்சகனயானங் வஸேன த³ஸ நயா ஹொந்தி. ஏவங் ஸேஸேஸுபீதி வீஸதியா அபி⁴னிவேஸேஸு த்³வே நயஸதானி. தானி சதூஹி அதி⁴பதீஹி சதுக்³கு³ணிதானி அட்ட². இதி ஸுத்³தி⁴கானி த்³வே ஸாதி⁴பதீனி அட்டா²தி ஸப்³ப³ம்பி நயஸஹஸ்ஸங் ஹோதி. ததா²து³தியஸம்மப்பதா⁴னாதீ³ஸு ஸுத்³தி⁴கஸம்மப்பதா⁴னே சாதி ஸோதாபத்திமக்³கே³ பஞ்சனயஸஹஸ்ஸானி. யதா² ச ஸோதாபத்திமக்³கே³, ஏவங் ஸேஸமக்³கே³ஸுபீதி குஸலவஸேனேவ வீஸதி நயஸஹஸ்ஸானி. விபாகே பன ஸம்மப்பதா⁴னேஹி கத்தப்³ப³கிச்சங் நத்தீ²தி விபாகவாரோ ந க³ஹிதோதி. ஸம்மப்பதா⁴னானி பனெத்த² நிப்³ப³த்திதலோகுத்தரானேவ கதி²தானீதி வேதி³தப்³பா³னி.
408. Abhidhammabhājanīye sabbānipi sammappadhānāni dhammasaṅgaṇiyaṃ vibhattassa desanānayassa mukhamattameva dassentena niddiṭṭhāni. Tattha nayabhedo veditabbo. Kathaṃ? Paṭhamasammappadhāne tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitā, appaṇihitapaṭipadāti imesu pañcasu ṭhānesu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catugguṇitāni aṭṭha. Iti suddhikāni dve sādhipatīni aṭṭhāti sabbampi nayasahassaṃ hoti. Tathādutiyasammappadhānādīsu suddhikasammappadhāne cāti sotāpattimagge pañcanayasahassāni. Yathā ca sotāpattimagge, evaṃ sesamaggesupīti kusalavaseneva vīsati nayasahassāni. Vipāke pana sammappadhānehi kattabbakiccaṃ natthīti vipākavāro na gahitoti. Sammappadhānāni panettha nibbattitalokuttarāneva kathitānīti veditabbāni.
அபி⁴த⁴ம்மபா⁴ஜனீயவண்ணனா.
Abhidhammabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
