| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
৫. ইন্দ্রিযৰিভঙ্গো
5. Indriyavibhaṅgo
১. অভিধম্মভাজনীযৰণ্ণনা
1. Abhidhammabhājanīyavaṇṇanā
২১৯. ইদানি তদনন্তরে ইন্দ্রিযৰিভঙ্গে বাৰীসতীতি গণনপরিচ্ছেদো। ইন্দ্রিযানীতি পরিচ্ছিন্নধম্মনিদস্সনং। ইদানি তানি সরূপতো দস্সেন্তো চক্খুন্দ্রিযন্তিআদিমাহ। তত্থ চক্খুদ্ৰারে ইন্দট্ঠং কারেতীতি চক্খুন্দ্রিযং। সোতঘানজিৰ্হাকাযদ্ৰারে ইন্দট্ঠং কারেতীতি কাযিন্দ্রিযং। ৰিজাননলক্খণে ইন্দট্ঠং কারেতীতি মনিন্দ্রিযং। ইত্থিভাৰে ইন্দট্ঠং কারেতীতি ইত্থিন্দ্রিযং। পুরিসভাৰে ইন্দট্ঠং কারেতীতি পুরিসিন্দ্রিযং। অনুপালনলক্খণে ইন্দট্ঠং কারেতীতি জীৰিতিন্দ্রিযং। সুখলক্খণে ইন্দট্ঠং কারেতীতি সুখিন্দ্রিযং। দুক্খসোমনস্স দোমনস্স উপেক্খালক্খণে ইন্দট্ঠং কারেতীতি উপেক্খিন্দ্রিযং। অধিমোক্খলক্খণে ইন্দট্ঠং কারেতীতি সদ্ধিন্দ্রিযং। পগ্গহলক্খণে ইন্দট্ঠং কারেতীতি ৰীরিযিন্দ্রিযং। উপট্ঠানলক্খণে ইন্দট্ঠং কারেতীতি সতিন্দ্রিযং। অৰিক্খেপলক্খণে ইন্দট্ঠং কারেতীতি সমাধিন্দ্রিযং। দস্সনলক্খণে ইন্দট্ঠং কারেতীতি পঞ্ঞিন্দ্রিযং। অনঞ্ঞাতঞ্ঞস্সামীতি পৰত্তে জাননলক্খণে ইন্দট্ঠং কারেতীতি অনঞ্ঞাতঞ্ঞস্সামীতিন্দ্রিযং। ঞাতানংযেৰ ধম্মানং পুন আজাননে ইন্দট্ঠং কারেতীতি অঞ্ঞিন্দ্রিযং। অঞ্ঞাতাৰীভাৰে ইন্দট্ঠং কারেতীতি অঞ্ঞাতাৰিন্দ্রিযং।
219. Idāni tadanantare indriyavibhaṅge bāvīsatīti gaṇanaparicchedo. Indriyānīti paricchinnadhammanidassanaṃ. Idāni tāni sarūpato dassento cakkhundriyantiādimāha. Tattha cakkhudvāre indaṭṭhaṃ kāretīti cakkhundriyaṃ. Sotaghānajivhākāyadvāre indaṭṭhaṃ kāretīti kāyindriyaṃ. Vijānanalakkhaṇe indaṭṭhaṃ kāretīti manindriyaṃ. Itthibhāve indaṭṭhaṃ kāretīti itthindriyaṃ. Purisabhāve indaṭṭhaṃ kāretīti purisindriyaṃ. Anupālanalakkhaṇe indaṭṭhaṃ kāretīti jīvitindriyaṃ. Sukhalakkhaṇe indaṭṭhaṃ kāretīti sukhindriyaṃ. Dukkhasomanassa domanassa upekkhālakkhaṇe indaṭṭhaṃ kāretīti upekkhindriyaṃ. Adhimokkhalakkhaṇe indaṭṭhaṃ kāretīti saddhindriyaṃ. Paggahalakkhaṇe indaṭṭhaṃ kāretīti vīriyindriyaṃ. Upaṭṭhānalakkhaṇe indaṭṭhaṃ kāretīti satindriyaṃ. Avikkhepalakkhaṇe indaṭṭhaṃ kāretīti samādhindriyaṃ. Dassanalakkhaṇe indaṭṭhaṃ kāretīti paññindriyaṃ. Anaññātaññassāmīti pavatte jānanalakkhaṇe indaṭṭhaṃ kāretīti anaññātaññassāmītindriyaṃ. Ñātānaṃyeva dhammānaṃ puna ājānane indaṭṭhaṃ kāretīti aññindriyaṃ. Aññātāvībhāve indaṭṭhaṃ kāretīti aññātāvindriyaṃ.
ইধ সুত্তন্তভাজনীযং নাম ন গহিতং। কস্মা? সুত্তন্তে ইমায পটিপাটিযা বাৰীসতিযা ইন্দ্রিযানং অনাগতত্তা। সুত্তন্তস্মিঞ্হি কত্থচি দ্ৰে ইন্দ্রিযানি কথিতানি, কত্থচি তীণি, কত্থচি পঞ্চ। এৰং পন নিরন্তরং দ্ৰাৰীসতি আগতানি নাম নত্থি। অযং তাৰেত্থ অট্ঠকথানযো। অযং পন অপরো নযো – এতেসু হি
Idha suttantabhājanīyaṃ nāma na gahitaṃ. Kasmā? Suttante imāya paṭipāṭiyā bāvīsatiyā indriyānaṃ anāgatattā. Suttantasmiñhi katthaci dve indriyāni kathitāni, katthaci tīṇi, katthaci pañca. Evaṃ pana nirantaraṃ dvāvīsati āgatāni nāma natthi. Ayaṃ tāvettha aṭṭhakathānayo. Ayaṃ pana aparo nayo – etesu hi
অত্থতো লক্খণাদীহি, কমতো চ ৰিজানিযা।
Atthato lakkhaṇādīhi, kamato ca vijāniyā;
ভেদাভেদা তথা কিচ্চা, ভূমিতো চ ৰিনিচ্ছযং॥
Bhedābhedā tathā kiccā, bhūmito ca vinicchayaṃ.
তত্থ চক্খাদীনং তাৰ ‘‘চক্খতীতি চক্খূ’’তিআদিনা নযেন অত্থো পকাসিতো। পচ্ছিমেসু পন তীসু পঠমং ‘পুব্বভাগে অনঞ্ঞাতং অমতং পদং চতুসচ্চধম্মং ৰা জানিস্সামী’তি এৰং পটিপন্নস্স উপ্পজ্জনতো ইন্দ্রিযট্ঠসম্ভৰতো চ অনঞ্ঞাতঞ্ঞস্সামীতিন্দ্রিযন্তি ৰুত্তং। দুতিযং আজাননতো চ ইন্দ্রিযট্ঠসম্ভৰতো চ অঞ্ঞিন্দ্রিযং। ততিযং অঞ্ঞাতাৰিনো চতূসু সচ্চেসু নিট্ঠিতঞাণকিচ্চস্স খীণাসৰস্সেৰ উপ্পজ্জনতো ইন্দ্রিযট্ঠসম্ভৰতো চ অঞ্ঞাতাৰিন্দ্রিযং।
Tattha cakkhādīnaṃ tāva ‘‘cakkhatīti cakkhū’’tiādinā nayena attho pakāsito. Pacchimesu pana tīsu paṭhamaṃ ‘pubbabhāge anaññātaṃ amataṃ padaṃ catusaccadhammaṃ vā jānissāmī’ti evaṃ paṭipannassa uppajjanato indriyaṭṭhasambhavato ca anaññātaññassāmītindriyanti vuttaṃ. Dutiyaṃ ājānanato ca indriyaṭṭhasambhavato ca aññindriyaṃ. Tatiyaṃ aññātāvino catūsu saccesu niṭṭhitañāṇakiccassa khīṇāsavasseva uppajjanato indriyaṭṭhasambhavato ca aññātāvindriyaṃ.
কো পনেস ইন্দ্রিযট্ঠো নামাতি? ইন্দলিঙ্গট্ঠো ইন্দ্রিযট্ঠো, ইন্দদেসিতট্ঠো ইন্দ্রিযট্ঠো, ইন্দদিট্ঠট্ঠো ইন্দ্রিযট্ঠো, ইন্দসিট্ঠট্ঠো ইন্দ্রিযট্ঠো, ইন্দজুট্ঠট্ঠো ইন্দ্রিযট্ঠো। সো সব্বোপি ইধ যথাযোগং যুজ্জতি। ভগৰা হি সম্মাসম্বুদ্ধো পরমিস্সরিযভাৰতো ইন্দো। কুসলাকুসলঞ্চ কম্মং কম্মেসু কস্সচি ইস্সরিযাভাৰতো। তেনেৰেত্থ কম্মসঞ্জনিতানি ইন্দ্রিযানি কুসলাকুসলকম্মং উল্লিঙ্গেন্তি। তেন চ সিট্ঠানীতি ইন্দলিঙ্গট্ঠেন ইন্দসিট্ঠট্ঠেন চ ইন্দ্রিযানি। সব্বানেৰ পনেতানি ভগৰতা যথাভূততো পকাসিতানি চ অভিসম্বুদ্ধানি চাতি ইন্দদেসিতট্ঠেন ইন্দদিট্ঠট্ঠেন চ ইন্দ্রিযানি। তেনেৰ ভগৰতা মুনিন্দেন কানিচি গোচরাসেৰনায, কানিচি ভাৰনাসেৰনায সেৰিতানীতি ইন্দজুট্ঠট্ঠেনপি ইন্দ্রিযানি। অপিচ আধিপচ্চসঙ্খাতেন ইস্সরিযট্ঠেনাপি এতানি ইন্দ্রিযানি। চক্খুৰিঞ্ঞাণাদিপ্পৰত্তিযঞ্হি চক্খাদীনং সিদ্ধমাধিপচ্চং; তস্মিং তিক্খে তিক্খত্তা মন্দে চ মন্দত্তাতি। অযং তাৰেত্থ ‘অত্থতো’ ৰিনিচ্ছযো।
Ko panesa indriyaṭṭho nāmāti? Indaliṅgaṭṭho indriyaṭṭho, indadesitaṭṭho indriyaṭṭho, indadiṭṭhaṭṭho indriyaṭṭho, indasiṭṭhaṭṭho indriyaṭṭho, indajuṭṭhaṭṭho indriyaṭṭho. So sabbopi idha yathāyogaṃ yujjati. Bhagavā hi sammāsambuddho paramissariyabhāvato indo. Kusalākusalañca kammaṃ kammesu kassaci issariyābhāvato. Tenevettha kammasañjanitāni indriyāni kusalākusalakammaṃ ulliṅgenti. Tena ca siṭṭhānīti indaliṅgaṭṭhena indasiṭṭhaṭṭhena ca indriyāni. Sabbāneva panetāni bhagavatā yathābhūtato pakāsitāni ca abhisambuddhāni cāti indadesitaṭṭhena indadiṭṭhaṭṭhena ca indriyāni. Teneva bhagavatā munindena kānici gocarāsevanāya, kānici bhāvanāsevanāya sevitānīti indajuṭṭhaṭṭhenapi indriyāni. Apica ādhipaccasaṅkhātena issariyaṭṭhenāpi etāni indriyāni. Cakkhuviññāṇādippavattiyañhi cakkhādīnaṃ siddhamādhipaccaṃ; tasmiṃ tikkhe tikkhattā mande ca mandattāti. Ayaṃ tāvettha ‘atthato’ vinicchayo.
‘লক্খণাদীহী’তি লক্খণরসপচ্চুপট্ঠানপদট্ঠানেহিপি চক্খাদীনং ৰিনিচ্ছযং ৰিজানিযাতি অত্থো। তানি নেসং লক্খণাদীনি হেট্ঠা ৰুত্তনযানেৰ। পঞ্ঞিন্দ্রিযাদীনি হি চত্তারি অত্থতো অমোহোযেৰ। সেসানি তত্থ সরূপেনেৰাগতানি।
‘Lakkhaṇādīhī’ti lakkhaṇarasapaccupaṭṭhānapadaṭṭhānehipi cakkhādīnaṃ vinicchayaṃ vijāniyāti attho. Tāni nesaṃ lakkhaṇādīni heṭṭhā vuttanayāneva. Paññindriyādīni hi cattāri atthato amohoyeva. Sesāni tattha sarūpenevāgatāni.
‘কমতো’তি অযম্পি দেসনাক্কমোৰ। তত্থ অজ্ঝত্তধম্মং পরিঞ্ঞায অরিযভূমিপটিলাভো হোতীতি অত্তভাৰপরিযাপন্নানি চক্খুন্দ্রিযাদীনি পঠমং দেসিতানি। সো পনত্তভাৰো যং ধম্মং উপাদায ইত্থীতি ৰা পুরিসোতি ৰা সঙ্খং গচ্ছতি, অযং সোতি নিদস্সনত্থং ততো ইত্থিন্দ্রিযং পুরিসিন্দ্রিযঞ্চ । সো দুৰিধোপি জীৰিতিন্দ্রিযপটিবদ্ধৰুত্তীতি ঞাপনত্থং ততো জীৰিতিন্দ্রিযং। যাৰ তস্স পৰত্তি তাৰ এতেসং ৰেদযিতানং অনিৰত্তি। যং কিঞ্চি ৰেদযিতং সব্বং তং সুখদুক্খন্তি ঞাপনত্থং ততো সুখিন্দ্রিযাদীনি। তংনিরোধত্থং পন এতে ধম্মা ভাৰেতব্বাতি পটিপত্তিদস্সনত্থং ততো সদ্ধাদীনি। ইমায পটিপত্তিযা এস ধম্মো পঠমং অত্তনি পাতুভৰতীতি পটিপত্তিযা অমোঘভাৰদস্সনত্থং ততো অনঞ্ঞাতঞ্ঞস্সামীতিন্দ্রিযং। তস্সেৰ ফলত্তা ততো অনন্তরং ভাৰেতব্বত্তা চ ততো অঞ্ঞিন্দ্রিযং। ইতো পরং ভাৰনায ইমস্স অধিগমো, অধিগতে চ পনিমস্মিং নত্থি কিঞ্চি উত্তরি করণীযন্তি ঞাপনত্থং অন্তে পরমস্সাসভূতং অঞ্ঞাতাৰিন্দ্রিযং দেসিতন্তি অযমেত্থ কমো।
‘Kamato’ti ayampi desanākkamova. Tattha ajjhattadhammaṃ pariññāya ariyabhūmipaṭilābho hotīti attabhāvapariyāpannāni cakkhundriyādīni paṭhamaṃ desitāni. So panattabhāvo yaṃ dhammaṃ upādāya itthīti vā purisoti vā saṅkhaṃ gacchati, ayaṃ soti nidassanatthaṃ tato itthindriyaṃ purisindriyañca . So duvidhopi jīvitindriyapaṭibaddhavuttīti ñāpanatthaṃ tato jīvitindriyaṃ. Yāva tassa pavatti tāva etesaṃ vedayitānaṃ anivatti. Yaṃ kiñci vedayitaṃ sabbaṃ taṃ sukhadukkhanti ñāpanatthaṃ tato sukhindriyādīni. Taṃnirodhatthaṃ pana ete dhammā bhāvetabbāti paṭipattidassanatthaṃ tato saddhādīni. Imāya paṭipattiyā esa dhammo paṭhamaṃ attani pātubhavatīti paṭipattiyā amoghabhāvadassanatthaṃ tato anaññātaññassāmītindriyaṃ. Tasseva phalattā tato anantaraṃ bhāvetabbattā ca tato aññindriyaṃ. Ito paraṃ bhāvanāya imassa adhigamo, adhigate ca panimasmiṃ natthi kiñci uttari karaṇīyanti ñāpanatthaṃ ante paramassāsabhūtaṃ aññātāvindriyaṃ desitanti ayamettha kamo.
‘ভেদাভেদা’তি জীৰিতিন্দ্রিযস্সেৰ চেত্থ ভেদো। তঞ্হি রূপজীৰিতিন্দ্রিযং অরূপজীৰিতিন্দ্রিযন্তি দুৰিধং হোতি। সেসানং অভেদোতি এৰমেত্থ ভেদাভেদতো ৰিনিচ্ছযং ৰিজানিযা।
‘Bhedābhedā’ti jīvitindriyasseva cettha bhedo. Tañhi rūpajīvitindriyaṃ arūpajīvitindriyanti duvidhaṃ hoti. Sesānaṃ abhedoti evamettha bhedābhedato vinicchayaṃ vijāniyā.
‘কিচ্চা’তি কিং ইন্দ্রিযানং কিচ্চন্তি চে? চক্খুন্দ্রিযস্স তাৰ ‘‘চক্খাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং ইন্দ্রিযপচ্চযেন পচ্চযো’’তি ৰচনতো যং তং ইন্দ্রিযপচ্চযভাৰেন সাধেতব্বং অত্তনো তিক্খমন্দাদিভাৰেন চক্খুৰিঞ্ঞাণাদিধম্মানং তিক্খমন্দাদিসঙ্খাতং অত্তাকারানুৰত্তাপনং ইদং ‘কিচ্চং’। এৰং সোতঘানজিৰ্হাকাযানং। মনিন্দ্রিযস্স পন সহজাতধম্মানং অত্তনো ৰসৰত্তাপনং, জীৰিতিন্দ্রিযস্স সহজাতধম্মানুপালনং, ইত্থিন্দ্রিযপুরিসিন্দ্রিযানং ইত্থিপুরিসনিমিত্তকুত্তাকপ্পাকারানুৰিধানং, সুখদুক্খসোমনস্সদোমনস্সিন্দ্রিযানং সহজাতধম্মে অভিভৰিত্ৰা যথাসকং ওল়ারিকাকারানুপাপনং, উপেক্খিন্দ্রিযস্স সন্তপণীতমজ্ঝত্তাকারানুপাপনং, সদ্ধাদীনং পটিপক্খাভিভৰনং সম্পযুত্তধম্মানঞ্চ পসন্নাকারাদিভাৰসম্পাপনং, অনঞ্ঞাতঞ্ঞস্সামীতিন্দ্রিযস্স সংযোজনত্তযপ্পহানঞ্চেৰ সম্পযুত্তকানঞ্চ তপ্পহানাভিমুখভাৰকরণং, অঞ্ঞিন্দ্রিযস্স কামরাগব্যাপাদাদিতনুকরণপহানঞ্চেৰ সহজাতানঞ্চ অত্তনো ৰসানুৰত্তাপনং, অঞ্ঞাতাৰিন্দ্রিযস্স সব্বকিচ্চেসু উস্সুক্কপ্পহানঞ্চেৰ অমতাভিমুখভাৰপচ্চযতা চ সম্পযুত্তানন্তি এৰমেত্থ কিচ্চতো ৰিনিচ্ছযং ৰিজানিযা।
‘Kiccā’ti kiṃ indriyānaṃ kiccanti ce? Cakkhundriyassa tāva ‘‘cakkhāyatanaṃ cakkhuviññāṇadhātuyā taṃsampayuttakānañca dhammānaṃ indriyapaccayena paccayo’’ti vacanato yaṃ taṃ indriyapaccayabhāvena sādhetabbaṃ attano tikkhamandādibhāvena cakkhuviññāṇādidhammānaṃ tikkhamandādisaṅkhātaṃ attākārānuvattāpanaṃ idaṃ ‘kiccaṃ’. Evaṃ sotaghānajivhākāyānaṃ. Manindriyassa pana sahajātadhammānaṃ attano vasavattāpanaṃ, jīvitindriyassa sahajātadhammānupālanaṃ, itthindriyapurisindriyānaṃ itthipurisanimittakuttākappākārānuvidhānaṃ, sukhadukkhasomanassadomanassindriyānaṃ sahajātadhamme abhibhavitvā yathāsakaṃ oḷārikākārānupāpanaṃ, upekkhindriyassa santapaṇītamajjhattākārānupāpanaṃ, saddhādīnaṃ paṭipakkhābhibhavanaṃ sampayuttadhammānañca pasannākārādibhāvasampāpanaṃ, anaññātaññassāmītindriyassa saṃyojanattayappahānañceva sampayuttakānañca tappahānābhimukhabhāvakaraṇaṃ, aññindriyassa kāmarāgabyāpādāditanukaraṇapahānañceva sahajātānañca attano vasānuvattāpanaṃ, aññātāvindriyassa sabbakiccesu ussukkappahānañceva amatābhimukhabhāvapaccayatā ca sampayuttānanti evamettha kiccato vinicchayaṃ vijāniyā.
‘ভূমিতো’তি চক্খুসোতঘানজিৰ্হাকাযইত্থিপুরিসসুখদুক্খদোমনস্সিন্দ্রিযানি চেত্থ কামাৰচরানেৰ । মনিন্দ্রিযজীৰিতিন্দ্রিযউপেক্খিন্দ্রিযানি, সদ্ধাৰীরিযসতিসমাধিপঞ্ঞিন্দ্রিযানি চ চতুভূমিপরিযাপন্নানি। সোমনস্সিন্দ্রিযং কামাৰচর-রূপাৰচর-লোকুত্তরৰসেন ভূমিত্তযপরিযাপন্নং। অৰসানে তীণি লোকুত্তরানেৰাতি এৰং ভূমিতো ৰিনিচ্ছযং ৰিজানিযা। এৰঞ্হি ৰিজানন্তো –
‘Bhūmito’ti cakkhusotaghānajivhākāyaitthipurisasukhadukkhadomanassindriyāni cettha kāmāvacarāneva . Manindriyajīvitindriyaupekkhindriyāni, saddhāvīriyasatisamādhipaññindriyāni ca catubhūmipariyāpannāni. Somanassindriyaṃ kāmāvacara-rūpāvacara-lokuttaravasena bhūmittayapariyāpannaṃ. Avasāne tīṇi lokuttarānevāti evaṃ bhūmito vinicchayaṃ vijāniyā. Evañhi vijānanto –
সংৰেগবহুলো ভিক্খু, ঠিতো ইন্দ্রিযসংৰরে।
Saṃvegabahulo bhikkhu, ṭhito indriyasaṃvare;
ইন্দ্রিযানি পরিঞ্ঞায, দুক্খস্সন্তং নিগচ্ছতীতি॥
Indriyāni pariññāya, dukkhassantaṃ nigacchatīti.
২২০. নিদ্দেসৰারে ‘‘যং চক্খু চতুন্নং মহাভূতান’’ন্তিআদি সব্বং ধম্মসঙ্গণিযং পদভাজনে (ধ॰ স॰ অট্ঠ॰ ৫৯৫ আদযো) ৰুত্তনযেনেৰ ৰেদিতব্বং। ৰীরিযিন্দ্রিযসমাধিন্দ্রিযনিদ্দেসাদীসু চ সম্মাৰাযামো মিচ্ছাৰাযামো সম্মাসমাধি মিচ্ছাসমাধীতিআদীনি ন ৰুত্তানি। কস্মা? সব্বসঙ্গাহকত্তা। সব্বসঙ্গাহকানি হি ইধ ইন্দ্রিযানি কথিতানি। এৰং সন্তেপেত্থ দস ইন্দ্রিযানি লোকিযানি কামাৰচরানেৰ, তীণি লোকুত্তরানি, নৰ লোকিযলোকুত্তরমিস্সকানীতি।
220. Niddesavāre ‘‘yaṃ cakkhu catunnaṃ mahābhūtāna’’ntiādi sabbaṃ dhammasaṅgaṇiyaṃ padabhājane (dha. sa. aṭṭha. 595 ādayo) vuttanayeneva veditabbaṃ. Vīriyindriyasamādhindriyaniddesādīsu ca sammāvāyāmo micchāvāyāmo sammāsamādhi micchāsamādhītiādīni na vuttāni. Kasmā? Sabbasaṅgāhakattā. Sabbasaṅgāhakāni hi idha indriyāni kathitāni. Evaṃ santepettha dasa indriyāni lokiyāni kāmāvacarāneva, tīṇi lokuttarāni, nava lokiyalokuttaramissakānīti.
অভিধম্মভাজনীযৰণ্ণনা।
Abhidhammabhājanīyavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ৫. ইন্দ্রিযৰিভঙ্গো • 5. Indriyavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ৫. ইন্দ্রিযৰিভঙ্গো • 5. Indriyavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ৫. ইন্দ্রিযৰিভঙ্গো • 5. Indriyavibhaṅgo
