| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
2. абхид̇хаммабхааж̇анийяаван̣н̣анаа
2. Abhidhammabhājanīyavaṇṇanā
155. абхид̇хаммабхааж̇анийяз яат̇аа хздтаа вибассагаанам̣ убагаарад̇т̇ааяа ‘‘жагкааяад̇анам̣ руубааяад̇ана’’нд̇и яуг̇алад̇о ааяад̇анаани вуд̇д̇аани, д̇ат̇аа авад̇ваа аж̇жхад̇д̇игаб̣аахираанам̣ саб̣б̣аагаарад̇о сабхаавад̣̇ассанад̇т̇ам̣ ‘‘жагкааяад̇анам̣ сод̇ааяад̇ана’’нд̇и звам̣ аж̇жхад̇д̇игаб̣аахирававад̇т̇аананаязна вуд̇д̇аани.
155. Abhidhammabhājanīye yathā heṭṭhā vipassakānaṃ upakāratthāya ‘‘cakkhāyatanaṃ rūpāyatana’’nti yugalato āyatanāni vuttāni, tathā avatvā ajjhattikabāhirānaṃ sabbākārato sabhāvadassanatthaṃ ‘‘cakkhāyatanaṃ sotāyatana’’nti evaṃ ajjhattikabāhiravavatthānanayena vuttāni.
156. д̇зсам̣ нид̣̇д̣̇зсаваарз д̇ад̇т̇а гад̇амам̣ жагкааяад̇ананд̇иаад̣̇ийни хздтаа вуд̇д̇анаязнзва взд̣̇ид̇аб̣б̣аани.
156. Tesaṃ niddesavāre tattha katamaṃ cakkhāyatanantiādīni heṭṭhā vuttanayeneva veditabbāni.
167. яам̣ банзд̇ам̣ д̇хаммааяад̇ананид̣̇д̣̇зсз ‘‘д̇ад̇т̇а гад̇амаа асан̇кад̇аа д̇хаад̇у? рааг̇агкаяо д̣̇осагкаяо мохагкаяо’’д̇и вуд̇д̇ам̣, д̇ад̇рааяамад̇т̇о – асан̇кад̇аа д̇хаад̇ууд̇и асан̇кад̇асабхаавам̣ ниб̣б̣аанам̣. яасмаа банзд̇ам̣ ааг̇амма рааг̇аад̣̇аяо кийяанд̇и, д̇асмаа рааг̇агкаяо д̣̇осагкаяо мохагкаяод̇и вуд̇д̇ам̣. аяамзд̇т̇а аажарияаанам̣ самаанад̇т̇агат̇аа.
167. Yaṃ panetaṃ dhammāyatananiddese ‘‘tattha katamā asaṅkhatā dhātu? Rāgakkhayo dosakkhayo mohakkhayo’’ti vuttaṃ, tatrāyamattho – asaṅkhatā dhātūti asaṅkhatasabhāvaṃ nibbānaṃ. Yasmā panetaṃ āgamma rāgādayo khīyanti, tasmā rāgakkhayo dosakkhayo mohakkhayoti vuttaṃ. Ayamettha ācariyānaṃ samānatthakathā.
вид̇ан̣д̣аваад̣̇ий банааха – ‘баадиязггам̣ ниб̣б̣аанам̣ наама над̇т̇и, гилзсагкаяова ниб̣б̣аана’нд̇и. ‘суд̇д̇ам̣ аахараа’д̇и жа вуд̇д̇з ‘‘ниб̣б̣аанам̣ ниб̣б̣аананд̇и ко, аавусо саарибуд̇д̇а, вужжад̇и; гад̇амам̣ ну ко, аавусо, ниб̣б̣аананд̇и? яо ко, аавусо, рааг̇агкаяо д̣̇осагкаяо мохагкаяо – ид̣̇ам̣ вужжад̇и ниб̣б̣аана’’нд̇и зд̇ам̣ ж̇амб̣укаад̣̇агасуд̇д̇ам̣ аахарид̇ваа ‘иминаа суд̇д̇зна взд̣̇ид̇аб̣б̣ам̣ баадиязггам̣ ниб̣б̣аанам̣ наама над̇т̇и, гилзсагкаяова ниб̣б̣аана’нд̇и ааха. со вад̇д̇аб̣б̣о – ‘гим̣ бана яат̇аа жзд̇ам̣ суд̇д̇ам̣ д̇ат̇аа ад̇т̇о’д̇и? ад̣̇д̇хаа вагкад̇и – ‘аама , над̇т̇и суд̇д̇ад̇о мун̃жид̇ваа ад̇т̇о’д̇и. д̇ад̇о вад̇д̇аб̣б̣о – ‘ид̣̇ам̣ д̇аава д̇з суд̇д̇ам̣ аабхад̇ам̣; ананд̇арасуд̇д̇ам̣ аахараа’д̇и. ананд̇арасуд̇д̇ам̣ наама – ‘‘арахад̇д̇ам̣ арахад̇д̇анд̇и, аавусо саарибуд̇д̇а, вужжад̇и; гад̇амам̣ ну ко, аавусо, арахад̇д̇анд̇и? яо ко, аавусо, рааг̇агкаяо д̣̇осагкаяо мохагкаяо – ид̣̇ам̣ вужжад̇и арахад̇д̇а’’нд̇и (сам̣. ни. 4.315) ид̣̇ам̣ д̇ассзваананд̇арам̣ аабхад̇асуд̇д̇ам̣.
Vitaṇḍavādī panāha – ‘pāṭiyekkaṃ nibbānaṃ nāma natthi, kilesakkhayova nibbāna’nti. ‘Suttaṃ āharā’ti ca vutte ‘‘nibbānaṃ nibbānanti kho, āvuso sāriputta, vuccati; katamaṃ nu kho, āvuso, nibbānanti? Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti etaṃ jambukhādakasuttaṃ āharitvā ‘iminā suttena veditabbaṃ pāṭiyekkaṃ nibbānaṃ nāma natthi, kilesakkhayova nibbāna’nti āha. So vattabbo – ‘kiṃ pana yathā cetaṃ suttaṃ tathā attho’ti? Addhā vakkhati – ‘āma , natthi suttato muñcitvā attho’ti. Tato vattabbo – ‘idaṃ tāva te suttaṃ ābhataṃ; anantarasuttaṃ āharā’ti. Anantarasuttaṃ nāma – ‘‘arahattaṃ arahattanti, āvuso sāriputta, vuccati; katamaṃ nu kho, āvuso, arahattanti? Yo kho, āvuso, rāgakkhayo dosakkhayo mohakkhayo – idaṃ vuccati arahatta’’nti (saṃ. ni. 4.315) idaṃ tassevānantaraṃ ābhatasuttaṃ.
имасмим̣ бана нам̣ аабхад̇з аахам̣су – ‘ниб̣б̣аанам̣ наама д̇хаммааяад̇анабарияаабанно д̇хаммо, арахад̇д̇ам̣ жад̇д̇ааро канд̇хаа. ниб̣б̣аанам̣ сажчигад̇ваа вихаранд̇о д̇хаммасзнаабад̇и ниб̣б̣аанам̣ бужчид̇оби арахад̇д̇ам̣ бужчид̇оби гилзсагкаяамзва ааха. гим̣ бана ниб̣б̣аанан̃жа арахад̇д̇ан̃жа згам̣ уд̣̇ааху наана’нд̇и? ‘згам̣ ваа ход̇у наанам̣ ваа. го зд̇т̇а д̇аяаа ад̇иб̣ахум̣ жун̣н̣ийгаран̣ам̣ гаронд̇зна ад̇т̇о’? ‘на д̇вам̣ згам̣ наанам̣ ж̇аанаасийд̇и. нану н̃аад̇з саад̇ху ход̇ий’д̇и звам̣ бунаббунам̣ бужчид̇о ван̃жзд̇ум̣ асаггонд̇о ааха – ‘рааг̇аад̣̇ийнам̣ кийн̣анд̇з уббаннад̇д̇аа арахад̇д̇ам̣ рааг̇агкаяо д̣̇осагкаяо мохагкаяо’д̇и вужжад̇ийд̇и. д̇ад̇о нам̣ аахам̣су – ‘махаагаммам̣ д̇з гад̇ам̣. лан̃ж̇ам̣ д̣̇ад̇вааби д̇ам̣ вад̣̇аабзнд̇о зд̇ад̣̇зва вад̣̇аабзяяа. яат̇зва жа д̇з зд̇ам̣ вибхаж̇ид̇ваа гат̇ид̇ам̣, звам̣ ид̣̇амби саллагкзхи – ниб̣б̣аанан̃хи ааг̇амма рааг̇аад̣̇аяо кийн̣аад̇и ниб̣б̣аанам̣ рааг̇агкаяо д̣̇осагкаяо мохагкаяод̇и вуд̇д̇ам̣. д̇ийн̣иби хи зд̇аани ниб̣б̣аанассзва ад̇хиважанааний’д̇и.
Imasmiṃ pana naṃ ābhate āhaṃsu – ‘nibbānaṃ nāma dhammāyatanapariyāpanno dhammo, arahattaṃ cattāro khandhā. Nibbānaṃ sacchikatvā viharanto dhammasenāpati nibbānaṃ pucchitopi arahattaṃ pucchitopi kilesakkhayameva āha. Kiṃ pana nibbānañca arahattañca ekaṃ udāhu nāna’nti? ‘Ekaṃ vā hotu nānaṃ vā. Ko ettha tayā atibahuṃ cuṇṇīkaraṇaṃ karontena attho’? ‘Na tvaṃ ekaṃ nānaṃ jānāsīti. Nanu ñāte sādhu hotī’ti evaṃ punappunaṃ pucchito vañcetuṃ asakkonto āha – ‘rāgādīnaṃ khīṇante uppannattā arahattaṃ rāgakkhayo dosakkhayo mohakkhayo’ti vuccatīti. Tato naṃ āhaṃsu – ‘mahākammaṃ te kataṃ. Lañjaṃ datvāpi taṃ vadāpento etadeva vadāpeyya. Yatheva ca te etaṃ vibhajitvā kathitaṃ, evaṃ idampi sallakkhehi – nibbānañhi āgamma rāgādayo khīṇāti nibbānaṃ rāgakkhayo dosakkhayo mohakkhayoti vuttaṃ. Tīṇipi hi etāni nibbānasseva adhivacanānī’ti.
сажз звам̣ вуд̇д̇з сан̃н̃ад̇д̇им̣ г̇ажчад̇и ижжзд̇ам̣ гусалам̣; но жз, б̣ахуниб̣б̣аанад̇ааяа гаарзд̇аб̣б̣о. гат̇ам̣? звам̣ д̇аава бужчид̇аб̣б̣о – ‘рааг̇агкаяо наама рааг̇ассзва каяо уд̣̇ааху д̣̇осамохаанамби? д̣̇осагкаяо наама д̣̇осассзва каяо уд̣̇ааху рааг̇амохаанамби? мохагкаяо наама мохассзва каяо уд̣̇ааху рааг̇ад̣̇осаанамбий’д̇и? ад̣̇д̇хаа вагкад̇и – ‘рааг̇агкаяо наама рааг̇ассзва каяо, д̣̇осагкаяо наама д̣̇осассзва каяо, мохагкаяо наама мохассзва каяо’д̇и.
Sace evaṃ vutte saññattiṃ gacchati iccetaṃ kusalaṃ; no ce, bahunibbānatāya kāretabbo. Kathaṃ? Evaṃ tāva pucchitabbo – ‘rāgakkhayo nāma rāgasseva khayo udāhu dosamohānampi? Dosakkhayo nāma dosasseva khayo udāhu rāgamohānampi? Mohakkhayo nāma mohasseva khayo udāhu rāgadosānampī’ti? Addhā vakkhati – ‘rāgakkhayo nāma rāgasseva khayo, dosakkhayo nāma dosasseva khayo, mohakkhayo nāma mohasseva khayo’ti.
д̇ад̇о вад̇д̇аб̣б̣о – ‘д̇ава ваад̣̇з рааг̇агкаяо згам̣ ниб̣б̣аанам̣ ход̇и, д̣̇осагкаяо згам̣, мохагкаяо згам̣; д̇ин̣н̣ам̣ агусаламуулаанам̣ каяз д̇ийн̣и ниб̣б̣аанаани хонд̇и, жад̇уннам̣ убаад̣̇аанаанам̣ каяз жад̇д̇аари, бан̃жаннам̣ нийваран̣аанам̣ каяз бан̃жа, чаннам̣ д̇ан̣хаагааяаанам̣ каяз ча, сад̇д̇аннам̣ анусаяаанам̣ каяз сад̇д̇а, адтаннам̣ мижчад̇д̇аанам̣ каяз адта, наваннам̣ д̇ан̣хаамуулагад̇хаммаанам̣ каяз нава, д̣̇асаннам̣ сам̣яож̇анаанам̣ каяз д̣̇аса, д̣̇ияад̣дхагилзсасахассасса каяз баадиязггам̣ баадиязггам̣ ниб̣б̣аананд̇и б̣ахууни ниб̣б̣аанаани хонд̇и. над̇т̇и бана д̇з ниб̣б̣аанаанам̣ бамаан̣анд̇и. звам̣ бана аг̇г̇ахзд̇ваа ниб̣б̣аанам̣ ааг̇амма рааг̇аад̣̇аяо кийн̣аад̇и згамзва ниб̣б̣аанам̣ рааг̇агкаяо д̣̇осагкаяо мохагкаяод̇и вужжад̇и. д̇ийн̣иби хзд̇аани ниб̣б̣аанассзва ад̇хиважанаанийд̇и г̇ан̣ха’.
Tato vattabbo – ‘tava vāde rāgakkhayo ekaṃ nibbānaṃ hoti, dosakkhayo ekaṃ, mohakkhayo ekaṃ; tiṇṇaṃ akusalamūlānaṃ khaye tīṇi nibbānāni honti, catunnaṃ upādānānaṃ khaye cattāri, pañcannaṃ nīvaraṇānaṃ khaye pañca, channaṃ taṇhākāyānaṃ khaye cha, sattannaṃ anusayānaṃ khaye satta, aṭṭhannaṃ micchattānaṃ khaye aṭṭha, navannaṃ taṇhāmūlakadhammānaṃ khaye nava, dasannaṃ saṃyojanānaṃ khaye dasa, diyaḍḍhakilesasahassassa khaye pāṭiyekkaṃ pāṭiyekkaṃ nibbānanti bahūni nibbānāni honti. Natthi pana te nibbānānaṃ pamāṇanti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
сажз бана звам̣ вуд̇д̇зби на саллагкзд̇и, ол̣ааригад̇ааяа гаарзд̇аб̣б̣о. гат̇ам̣? ‘анд̇хаб̣аалаа хи ажчад̣̇ийбимиг̇амаггадаад̣̇аяоби гилзсабарияудтид̇аа вад̇т̇ум̣ бадисзванд̇и. ат̇а нзсам̣ бадисзванабарияанд̇з гилзсо вуубасаммад̇и. д̇ава ваад̣̇з ажчад̣̇ийбимиг̇амаггадаад̣̇аяо ниб̣б̣аанаббад̇д̇аа наама хонд̇и. ол̣ааригам̣ вад̇а д̇з ниб̣б̣аанам̣ т̇уулам̣, ган̣н̣зхи бил̣анд̇хид̇ум̣ на саггаад̇и. звам̣ бана аг̇г̇ахзд̇ваа ниб̣б̣аанам̣ ааг̇амма рааг̇аад̣̇аяо кийн̣аад̇и згамзва ниб̣б̣аанам̣ рааг̇агкаяо д̣̇осагкаяо мохагкаяод̇и вужжад̇и. д̇ийн̣иби хзд̇аани ниб̣б̣аанассзва ад̇хиважанаанийд̇и г̇ан̣ха’.
Sace pana evaṃ vuttepi na sallakkheti, oḷārikatāya kāretabbo. Kathaṃ? ‘Andhabālā hi acchadīpimigamakkaṭādayopi kilesapariyuṭṭhitā vatthuṃ paṭisevanti. Atha nesaṃ paṭisevanapariyante kileso vūpasammati. Tava vāde acchadīpimigamakkaṭādayo nibbānappattā nāma honti. Oḷārikaṃ vata te nibbānaṃ thūlaṃ, kaṇṇehi piḷandhituṃ na sakkāti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
сажз бана звам̣ вуд̇д̇зби на саллагкзд̇и, г̇од̇рабхунааби гаарзд̇аб̣б̣о. гат̇ам̣? звам̣ д̇аава бужчид̇аб̣б̣о – ‘д̇вам̣ г̇од̇рабху наама ад̇т̇ийд̇и вад̣̇зсий’д̇и? ‘аама вад̣̇аамий’д̇и. ‘г̇од̇рабхугкан̣з гилзсаа кийн̣аа, кийяанд̇и, кийяиссанд̇ий’д̇и? на кийн̣аа, на кийяанд̇и; абижа ко кийяиссанд̇ийд̇и. ‘г̇од̇рабху бана гим̣ аарамман̣ам̣ гарод̇ий’д̇и? ‘ниб̣б̣аанам̣’. ‘д̇ава г̇од̇рабхугкан̣з гилзсаа на кийн̣аа, на кийяанд̇и; ат̇а ко кийяиссанд̇и. д̇вам̣ акийн̣зсуязва гилзсзсу гилзсагкаяам̣ ниб̣б̣аанам̣ бан̃н̃абзси, аббахийнзсу анусаязсу анусаяаббахаанам̣ ниб̣б̣аанам̣ бан̃н̃абзси. д̇ам̣ д̇з на самзд̇и. звам̣ бана аг̇г̇ахзд̇ваа ниб̣б̣аанам̣ ааг̇амма рааг̇аад̣̇аяо кийн̣аад̇и згамзва ниб̣б̣аанам̣ рааг̇агкаяо д̣̇осагкаяо мохагкаяод̇и вужжад̇и. д̇ийн̣иби хзд̇аани ниб̣б̣аанассзва ад̇хиважанаанийд̇и г̇ан̣ха’.
Sace pana evaṃ vuttepi na sallakkheti, gotrabhunāpi kāretabbo. Kathaṃ? Evaṃ tāva pucchitabbo – ‘tvaṃ gotrabhu nāma atthīti vadesī’ti? ‘Āma vadāmī’ti. ‘Gotrabhukkhaṇe kilesā khīṇā, khīyanti, khīyissantī’ti? Na khīṇā, na khīyanti; apica kho khīyissantīti. ‘Gotrabhu pana kiṃ ārammaṇaṃ karotī’ti? ‘Nibbānaṃ’. ‘Tava gotrabhukkhaṇe kilesā na khīṇā, na khīyanti; atha kho khīyissanti. Tvaṃ akhīṇesuyeva kilesesu kilesakkhayaṃ nibbānaṃ paññapesi, appahīnesu anusayesu anusayappahānaṃ nibbānaṃ paññapesi. Taṃ te na sameti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
сажз бана звам̣ вуд̇д̇зби на саллагкзд̇и, маг̇г̇зна гаарзд̇аб̣б̣о. гат̇ам̣? звам̣ д̇аава бужчид̇аб̣б̣о – ‘д̇вам̣ маг̇г̇ам̣ наама вад̣̇зсий’д̇и? ‘аама вад̣̇змий’д̇и. ‘маг̇г̇агкан̣з гилзсаа кийн̣аа, кийяанд̇и, кияиссанд̇ий’д̇и? ж̇аанамаано вагкад̇и – ‘кийн̣аад̇и ваа кийяиссанд̇ийд̇и ваа вад̇д̇ум̣ на ваддад̇и, кийяанд̇ийд̇и вад̇д̇ум̣ ваддад̇ий’д̇и. ‘яад̣̇и звам̣, маг̇г̇асса гилзсагкаяам̣ ниб̣б̣аанам̣ гад̇амам̣? маг̇г̇зна кийяанагагилзсаа гад̇амз? маг̇г̇о гад̇амам̣ гилзсагкаяам̣ ниб̣б̣аанам̣ аарамман̣ам̣ гад̇ваа гад̇амз гилзсз кзбзд̇и? д̇асмаа маа звам̣ г̇ан̣ха. ниб̣б̣аанам̣ бана ааг̇амма рааг̇аад̣̇аяо кийн̣аад̇и згамзва ниб̣б̣аанам̣ рааг̇агкаяо д̣̇осагкаяо мохагкаяод̇и вужжад̇и. д̇ийн̣иби хзд̇аани ниб̣б̣аанассзва ад̇хиважанааний’д̇и.
Sace pana evaṃ vuttepi na sallakkheti, maggena kāretabbo. Kathaṃ? Evaṃ tāva pucchitabbo – ‘tvaṃ maggaṃ nāma vadesī’ti? ‘Āma vademī’ti. ‘Maggakkhaṇe kilesā khīṇā, khīyanti, khiyissantī’ti? Jānamāno vakkhati – ‘khīṇāti vā khīyissantīti vā vattuṃ na vaṭṭati, khīyantīti vattuṃ vaṭṭatī’ti. ‘Yadi evaṃ, maggassa kilesakkhayaṃ nibbānaṃ katamaṃ? Maggena khīyanakakilesā katame? Maggo katamaṃ kilesakkhayaṃ nibbānaṃ ārammaṇaṃ katvā katame kilese khepeti? Tasmā mā evaṃ gaṇha. Nibbānaṃ pana āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānī’ti.
звам̣ вуд̇д̇з звамааха – ‘д̇вам̣ ааг̇амма ааг̇аммаад̇и вад̣̇зсий’д̇и? ‘аама вад̣̇змий’д̇и. ‘ааг̇амма наамаад̇и ид̣̇ам̣ д̇з гуд̇о лад̣̇д̇ха’нд̇и? ‘суд̇д̇ад̇о лад̣̇д̇ха’нд̇и . ‘аахара суд̇д̇а’нд̇и. ‘‘звам̣ авиж̇ж̇аа жа д̇ан̣хаа жа д̇ам̣ ааг̇амма, д̇амхи кийн̣аа, д̇амхи бхаг̇г̇аа, на жа гин̃жи гад̣̇аажий’’д̇и. звам̣ вуд̇д̇з бараваад̣̇ий д̇ун̣хийбхаавам̣ аабаннод̇и.
Evaṃ vutte evamāha – ‘tvaṃ āgamma āgammāti vadesī’ti? ‘Āma vademī’ti. ‘Āgamma nāmāti idaṃ te kuto laddha’nti? ‘Suttato laddha’nti . ‘Āhara sutta’nti. ‘‘Evaṃ avijjā ca taṇhā ca taṃ āgamma, tamhi khīṇā, tamhi bhaggā, na ca kiñci kadācī’’ti. Evaṃ vutte paravādī tuṇhībhāvaṃ āpannoti.
ид̇хааби д̣̇асааяад̇анаани гаамааважараани, д̣̇вз бана жад̇убхуумагаани логияалогуд̇д̇арамиссагаанийд̇и взд̣̇ид̇аб̣б̣аани.
Idhāpi dasāyatanāni kāmāvacarāni, dve pana catubhūmakāni lokiyalokuttaramissakānīti veditabbāni.
абхид̇хаммабхааж̇анийяаван̣н̣анаа.
Abhidhammabhājanīyavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 2. ааяад̇анавибхан̇г̇о • 2. Āyatanavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 2. ааяад̇анавибхан̇г̇о • 2. Āyatanavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 2. ааяад̇анавибхан̇г̇о • 2. Āyatanavibhaṅgo
