| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
2. абхид̇хаммабхааж̇анийяаван̣н̣анаа
2. Abhidhammabhājanīyavaṇṇanā
183. абхид̇хаммабхааж̇анийяз саруубзнзва саб̣б̣ааби д̇хаад̇уяо д̣̇ассзнд̇о адтаараса д̇хаад̇уяо – жагкуд̇хаад̇у руубад̇хаад̇ууд̇иаад̣̇имааха. д̇ад̇т̇а уд̣̇д̣̇зсаваарз д̇аава –
183. Abhidhammabhājanīye sarūpeneva sabbāpi dhātuyo dassento aṭṭhārasa dhātuyo – cakkhudhātu rūpadhātūtiādimāha. Tattha uddesavāre tāva –
ад̇т̇ад̇о лагкан̣аад̣̇ид̇о, гамад̇аавад̇васан̇кад̇о;
Atthato lakkhaṇādito, kamatāvatvasaṅkhato;
бажжаяаа ат̇а д̣̇адтаб̣б̣аа, взд̣̇ид̇аб̣б̣о винижчаяо.
Paccayā atha daṭṭhabbā, veditabbo vinicchayo.
д̇ад̇т̇а ‘ад̇т̇ад̇о’д̇и жагкад̇ийд̇и жагку. руубаяад̇ийд̇и руубам̣. жагкусса вин̃н̃аан̣ам̣ жагкувин̃н̃аан̣анд̇и звамаад̣̇инаа д̇аава наязна жагкаад̣̇ийнам̣ висзсад̇т̇ад̇о взд̣̇ид̇аб̣б̣о винижчаяо. ависзсзна бана вид̣̇ахад̇и, д̇хийяад̇з, вид̇хаанам̣, вид̇хийяад̇з зд̇ааяа, зд̇т̇а ваа д̇хийяад̇ийд̇и д̇хаад̇у. логияаа хи д̇хаад̇уяо гааран̣абхаавзна вавад̇т̇ид̇аа худ̇ваа суван̣н̣араж̇ад̇аад̣̇ид̇хаад̇уяо вияа суван̣н̣араж̇ад̇аад̣̇им̣ анзгаббагаарам̣ сам̣саарад̣̇угкам̣ вид̣̇аханд̇и ; бхаарахаарзхи жа бхааро вияа сад̇д̇зхи д̇хийяанд̇з д̇хаарийяанд̇зд̇и ад̇т̇о. д̣̇угкавид̇хаанамад̇д̇амзва жзд̇аа авасавад̇д̇анад̇о. зд̇аахи жа гаран̣абхууд̇аахи сам̣саарад̣̇угкам̣ сад̇д̇зхи анувид̇хийяад̇и; д̇ат̇аавихид̇ан̃жзд̇ам̣ зд̇аасвзва д̇хийяад̇и табийяад̇ийд̇и ад̇т̇о. ид̇и жагкаад̣̇ийсу згзго д̇хаммо яат̇аасамбхавам̣ вид̣̇ахад̇и д̇хийяад̇зд̇иаад̣̇иад̇т̇авасзна д̇хаад̇ууд̇и вужжад̇и.
Tattha ‘atthato’ti cakkhatīti cakkhu. Rūpayatīti rūpaṃ. Cakkhussa viññāṇaṃ cakkhuviññāṇanti evamādinā tāva nayena cakkhādīnaṃ visesatthato veditabbo vinicchayo. Avisesena pana vidahati, dhīyate, vidhānaṃ, vidhīyate etāya, ettha vā dhīyatīti dhātu. Lokiyā hi dhātuyo kāraṇabhāvena vavatthitā hutvā suvaṇṇarajatādidhātuyo viya suvaṇṇarajatādiṃ anekappakāraṃ saṃsāradukkhaṃ vidahanti ; bhārahārehi ca bhāro viya sattehi dhīyante dhārīyanteti attho. Dukkhavidhānamattameva cetā avasavattanato. Etāhi ca karaṇabhūtāhi saṃsāradukkhaṃ sattehi anuvidhīyati; tathāvihitañcetaṃ etāsveva dhīyati ṭhapīyatīti attho. Iti cakkhādīsu ekeko dhammo yathāsambhavaṃ vidahati dhīyatetiādiatthavasena dhātūti vuccati.
абижа яат̇аа д̇ид̇т̇ияаанам̣ ад̇д̇аа наама сабхаавад̇о над̇т̇и, на звамзд̇аа. зд̇аа бана ад̇д̇ано сабхаавам̣ д̇хаарзнд̇ийд̇и д̇хаад̇уяо. яат̇аа жа логз вижид̇д̇аа харид̇ааламаносилаад̣̇аяо силааваяаваа д̇хаад̇уяод̇и вужжанд̇и, звамзд̇ааби д̇хаад̇уяо вияа д̇хаад̇уяо. вижид̇д̇аа хзд̇аа н̃аан̣ан̃зяяааваяаваад̇и. яат̇аа ваа сарийрасан̇каад̇асса самуд̣̇ааяасса аваяавабхууд̇зсу расасон̣ид̇аад̣̇ийсу ан̃н̃аман̃н̃ам̣ висабхааг̇алагкан̣абарижчиннзсу д̇хаад̇усаман̃н̃аа, звамзд̇зсуби бан̃жагканд̇хасан̇каад̇асса ад̇д̇абхаавасса аваяавзсу д̇хаад̇усаман̃н̃аа взд̣̇ид̇аб̣б̣аа. ан̃н̃аман̃н̃ависабхааг̇алагкан̣абарижчиннаа хзд̇з жагкаад̣̇аяод̇и. абижа д̇хаад̇ууд̇и ниж̇ж̇ийвамад̇д̇ассзд̇ам̣ ад̇хиважанам̣. д̇ат̇аа хи бхаг̇аваа – ‘‘ча д̇хаад̇уро аяам̣, бхигку, бурисо’’д̇иаад̣̇ийсу (ма. ни. 3.343-344) ж̇ийвасан̃н̃аасамууханад̇т̇ам̣ д̇хаад̇уд̣̇зсанам̣ агаасийд̇и. д̇асмаа яат̇аавуд̇д̇знад̇т̇зна жагку жа д̇ам̣ д̇хаад̇у жаад̇и жагкуд̇хаад̇у …бз… мановин̃н̃аан̣ан̃жа д̇ам̣ д̇хаад̇у жаад̇и мановин̃н̃аан̣ад̇хаад̇ууд̇и звам̣ д̇аавзд̇т̇а ад̇т̇ад̇о вин̃н̃аад̇аб̣б̣о винижчаяо.
Apica yathā titthiyānaṃ attā nāma sabhāvato natthi, na evametā. Etā pana attano sabhāvaṃ dhārentīti dhātuyo. Yathā ca loke vicittā haritālamanosilādayo silāvayavā dhātuyoti vuccanti, evametāpi dhātuyo viya dhātuyo. Vicittā hetā ñāṇañeyyāvayavāti. Yathā vā sarīrasaṅkhātassa samudāyassa avayavabhūtesu rasasoṇitādīsu aññamaññaṃ visabhāgalakkhaṇaparicchinnesu dhātusamaññā, evametesupi pañcakkhandhasaṅkhātassa attabhāvassa avayavesu dhātusamaññā veditabbā. Aññamaññavisabhāgalakkhaṇaparicchinnā hete cakkhādayoti. Apica dhātūti nijjīvamattassetaṃ adhivacanaṃ. Tathā hi bhagavā – ‘‘cha dhāturo ayaṃ, bhikkhu, puriso’’tiādīsu (ma. ni. 3.343-344) jīvasaññāsamūhanatthaṃ dhātudesanaṃ akāsīti. Tasmā yathāvuttenatthena cakkhu ca taṃ dhātu cāti cakkhudhātu …pe… manoviññāṇañca taṃ dhātu cāti manoviññāṇadhātūti evaṃ tāvettha atthato viññātabbo vinicchayo.
‘лагкан̣аад̣̇ид̇о’д̇и жагкаад̣̇ийнам̣ лагкан̣аад̣̇ид̇о бзд̇т̇а взд̣̇ид̇аб̣б̣о винижчаяо. д̇аани жа бана д̇зсам̣ лагкан̣аад̣̇ийни хздтаа вуд̇д̇анаязнзва взд̣̇ид̇аб̣б̣аани.
‘Lakkhaṇādito’ti cakkhādīnaṃ lakkhaṇādito pettha veditabbo vinicchayo. Tāni ca pana tesaṃ lakkhaṇādīni heṭṭhā vuttanayeneva veditabbāni.
‘гамад̇о’д̇и ид̇хааби буб̣б̣з вуд̇д̇зсу уббад̇д̇иггамаад̣̇ийсу д̣̇зсанааггамова яуж̇ж̇ад̇и. со жа банааяам̣ хзд̇упалаанубуб̣б̣ававад̇т̇аанавасзна вуд̇д̇о. жагкуд̇хаад̇у руубад̇хаад̇ууд̇и ид̣̇ан̃хи д̣̇ваяам̣ хзд̇у. жагкувин̃н̃аан̣ад̇хаад̇ууд̇и палам̣. звам̣ саб̣б̣ад̇т̇а гамад̇о взд̣̇ид̇аб̣б̣о винижчаяо.
‘Kamato’ti idhāpi pubbe vuttesu uppattikkamādīsu desanākkamova yujjati. So ca panāyaṃ hetuphalānupubbavavatthānavasena vutto. Cakkhudhātu rūpadhātūti idañhi dvayaṃ hetu. Cakkhuviññāṇadhātūti phalaṃ. Evaṃ sabbattha kamato veditabbo vinicchayo.
‘д̇аавад̇вад̇о’д̇и д̇аавабхаавад̇о. ид̣̇ам̣ вуд̇д̇ам̣ ход̇и – д̇зсу д̇зсу хи суд̇д̇аабхид̇хаммабад̣̇зсзсу аабхаад̇хаад̇у, субхад̇хаад̇у, аагаасаанан̃жааяад̇анад̇хаад̇у, вин̃н̃аан̣ан̃жааяад̇анад̇хаад̇у, аагин̃жан̃н̃ааяад̇анад̇хаад̇у , нзвасан̃н̃аанаасан̃н̃ааяад̇анад̇хаад̇у, сан̃н̃аавзд̣̇аяид̇анирод̇хад̇хаад̇у, гаамад̇хаад̇у, б̣яаабаад̣̇ад̇хаад̇у, вихим̣саад̇хаад̇у, нзгкаммад̇хаад̇у, аб̣яаабаад̣̇ад̇хаад̇у, авихим̣саад̇хаад̇у, сукад̇хаад̇у, д̣̇угкад̇хаад̇у, соманассад̇хаад̇у, д̣̇оманассад̇хаад̇у, убзгкаад̇хаад̇у , авиж̇ж̇аад̇хаад̇у, аарамбхад̇хаад̇у, ниггамад̇хаад̇у, бараггамад̇хаад̇у, хийнад̇хаад̇у, маж̇жхимад̇хаад̇у, бан̣ийд̇ад̇хаад̇у, бат̇авийд̇хаад̇у, аабод̇хаад̇у, д̇зж̇од̇хаад̇у, вааяод̇хаад̇у, аагаасад̇хаад̇у, вин̃н̃аан̣ад̇хаад̇у, сан̇кад̇ад̇хаад̇у, асан̇кад̇ад̇хаад̇у, анзгад̇хаад̇унаанаад̇хаад̇улогод̇и звамаад̣̇аяо ан̃н̃ааби д̇хаад̇уяо д̣̇иссанд̇и.
‘Tāvatvato’ti tāvabhāvato. Idaṃ vuttaṃ hoti – tesu tesu hi suttābhidhammapadesesu ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu , nevasaññānāsaññāyatanadhātu, saññāvedayitanirodhadhātu, kāmadhātu, byāpādadhātu, vihiṃsādhātu, nekkhammadhātu, abyāpādadhātu, avihiṃsādhātu, sukhadhātu, dukkhadhātu, somanassadhātu, domanassadhātu, upekkhādhātu , avijjādhātu, ārambhadhātu, nikkamadhātu, parakkamadhātu, hīnadhātu, majjhimadhātu, paṇītadhātu, pathavīdhātu, āpodhātu, tejodhātu, vāyodhātu, ākāsadhātu, viññāṇadhātu, saṅkhatadhātu, asaṅkhatadhātu, anekadhātunānādhātulokoti evamādayo aññāpi dhātuyo dissanti.
звам̣ сад̇и саб̣б̣аасам̣ васзна барижчзд̣̇ам̣ агад̇ваа гасмаа адтаарасаад̇и аяамзва барижчзд̣̇о гад̇од̇и жз? сабхаавад̇о виж̇ж̇амаанаанам̣ саб̣б̣ад̇хаад̇уунам̣ д̇ад̣̇анд̇ог̇ад̇хад̇д̇аа. руубад̇хаад̇уязва хи аабхаад̇хаад̇у. субхад̇хаад̇у бана руубаад̣̇иббадиб̣ад̣̇д̇хаа. гасмаа? субханимид̇д̇ад̇д̇аа. субханимид̇д̇ан̃хи субхад̇хаад̇у. д̇ан̃жа руубаад̣̇ивинимуд̇д̇ам̣ на виж̇ж̇ад̇и, гусалавибаагаарамман̣аа ваа руубаад̣̇аяо зва субхад̇хаад̇ууд̇и руубаад̣̇имад̇д̇амзвзсаа. аагаасаанан̃жааяад̇анад̇хаад̇уаад̣̇ийсу жид̇д̇ам̣ мановин̃н̃аан̣ад̇хаад̇у. сзсаа д̇хаммаа д̇хаммад̇хаад̇у. сан̃н̃аавзд̣̇аяид̇анирод̇хад̇хаад̇у бана сабхаавад̇о над̇т̇и; д̇хаад̇уд̣̇ваяанирод̇хамад̇д̇амзва хи саа. гаамад̇хаад̇у д̇хаммад̇хаад̇умад̇д̇ам̣ ваа ход̇и, яат̇ааха ‘‘д̇ад̇т̇а гад̇амаа гаамад̇хаад̇у? гаамабадисам̣яуд̇д̇о д̇агго …бз… мижчаасан̇габбо’’д̇и; адтаарасаби д̇хаад̇уяо ваа, яат̇ааха ‘‘хздтад̇о авийжинираяам̣ барияанд̇ам̣ гад̇ваа убарид̇о бараниммид̇авасавад̇д̇ид̣̇звз анд̇огарид̇ваа яам̣ зд̇асмим̣ анд̇арз зд̇т̇ааважараа зд̇т̇а барияаабаннаа канд̇хад̇хаад̇уааяад̇анаа, руубаа, взд̣̇анаа, сан̃н̃аа, сан̇каараа, вин̃н̃аан̣ам̣ – аяам̣ вужжад̇и гаамад̇хаад̇уу’’д̇и. нзгкаммад̇хаад̇у д̇хаммад̇хаад̇у зва; ‘‘саб̣б̣зби гусалаа д̇хаммаа нзгкаммад̇хаад̇уу’’д̇и ваа важанад̇о мановин̃н̃аан̣ад̇хаад̇уби ход̇иязва. б̣яаабаад̣̇авихим̣саааб̣яаабаад̣̇аавихим̣саасукад̣̇угкасоманассад̣̇оманассубзгкааавиж̇ж̇аааарамбханиггамабараггамад̇хаад̇уяо д̇хаммад̇хаад̇уязва.
Evaṃ sati sabbāsaṃ vasena paricchedaṃ akatvā kasmā aṭṭhārasāti ayameva paricchedo katoti ce? Sabhāvato vijjamānānaṃ sabbadhātūnaṃ tadantogadhattā. Rūpadhātuyeva hi ābhādhātu. Subhadhātu pana rūpādippaṭibaddhā. Kasmā? Subhanimittattā. Subhanimittañhi subhadhātu. Tañca rūpādivinimuttaṃ na vijjati, kusalavipākārammaṇā vā rūpādayo eva subhadhātūti rūpādimattamevesā. Ākāsānañcāyatanadhātuādīsu cittaṃ manoviññāṇadhātu. Sesā dhammā dhammadhātu. Saññāvedayitanirodhadhātu pana sabhāvato natthi; dhātudvayanirodhamattameva hi sā. Kāmadhātu dhammadhātumattaṃ vā hoti, yathāha ‘‘tattha katamā kāmadhātu? Kāmapaṭisaṃyutto takko …pe… micchāsaṅkappo’’ti; aṭṭhārasapi dhātuyo vā, yathāha ‘‘heṭṭhato avīcinirayaṃ pariyantaṃ katvā uparito paranimmitavasavattideve antokaritvā yaṃ etasmiṃ antare etthāvacarā ettha pariyāpannā khandhadhātuāyatanā, rūpā, vedanā, saññā, saṅkhārā, viññāṇaṃ – ayaṃ vuccati kāmadhātū’’ti. Nekkhammadhātu dhammadhātu eva; ‘‘sabbepi kusalā dhammā nekkhammadhātū’’ti vā vacanato manoviññāṇadhātupi hotiyeva. Byāpādavihiṃsāabyāpādaavihiṃsāsukhadukkhasomanassadomanassupekkhāavijjāārambhanikkamaparakkamadhātuyo dhammadhātuyeva.
хийнамаж̇жхимабан̣ийд̇ад̇хаад̇уяо адтаарасад̇хаад̇умад̇д̇амзва. хийнаа хи жагкаад̣̇аяо хийнад̇хаад̇у. маж̇жхимабан̣ийд̇аа жагкаад̣̇аяо маж̇жхимаа жзва бан̣ийд̇аа жа д̇хаад̇уу. ниббарияааязна бана агусалаа д̇хаммад̇хаад̇умановин̃н̃аан̣ад̇хаад̇уяо хийнад̇хаад̇у. логияаа гусалааб̣яаагад̇аа убхоби жагкуд̇хаад̇уаад̣̇аяо жа маж̇жхимад̇хаад̇у. логуд̇д̇араа бана д̇хаммад̇хаад̇умановин̃н̃аан̣ад̇хаад̇уяо бан̣ийд̇ад̇хаад̇у. бат̇авийд̇зж̇овааяод̇хаад̇уяо подтаб̣б̣ад̇хаад̇уязва. аабод̇хаад̇у аагаасад̇хаад̇у жа д̇хаммад̇хаад̇уязва. вин̃н̃аан̣ад̇хаад̇у жагкувин̃н̃аан̣аад̣̇исад̇д̇авин̃н̃аан̣ад̇хаад̇усан̇кзбоязва. сад̇д̇араса д̇хаад̇уяо д̇хаммад̇хаад̇узгад̣̇зсо жа сан̇кад̇ад̇хаад̇у. асан̇кад̇ад̇хаад̇у бана д̇хаммад̇хаад̇узгад̣̇зсова. анзгад̇хаад̇унаанаад̇хаад̇улого бана адтаарасад̇хаад̇уббабхзд̣̇амад̇д̇амзваад̇и. ид̇и сабхаавад̇о виж̇ж̇амаанаанам̣ саб̣б̣ад̇хаад̇уунам̣ д̇ад̣̇анд̇ог̇ад̇хад̇д̇аа адтаарасзва вуд̇д̇аад̇и.
Hīnamajjhimapaṇītadhātuyo aṭṭhārasadhātumattameva. Hīnā hi cakkhādayo hīnadhātu. Majjhimapaṇītā cakkhādayo majjhimā ceva paṇītā ca dhātū. Nippariyāyena pana akusalā dhammadhātumanoviññāṇadhātuyo hīnadhātu. Lokiyā kusalābyākatā ubhopi cakkhudhātuādayo ca majjhimadhātu. Lokuttarā pana dhammadhātumanoviññāṇadhātuyo paṇītadhātu. Pathavītejovāyodhātuyo phoṭṭhabbadhātuyeva. Āpodhātu ākāsadhātu ca dhammadhātuyeva. Viññāṇadhātu cakkhuviññāṇādisattaviññāṇadhātusaṅkhepoyeva. Sattarasa dhātuyo dhammadhātuekadeso ca saṅkhatadhātu. Asaṅkhatadhātu pana dhammadhātuekadesova. Anekadhātunānādhātuloko pana aṭṭhārasadhātuppabhedamattamevāti. Iti sabhāvato vijjamānānaṃ sabbadhātūnaṃ tadantogadhattā aṭṭhāraseva vuttāti.
абижа виж̇аананасабхаавз вин̃н̃аан̣з ж̇ийвасан̃н̃ийнам̣ ж̇ийвасан̃н̃аасамууханад̇т̇амби адтаарасзва вуд̇д̇аа . санд̇и хи сад̇д̇аа виж̇аананасабхаавз вин̃н̃аан̣з ж̇ийвасан̃н̃ино. д̇зсам̣ жагкусод̇агхаанаж̇ивхаагааяавин̃н̃аан̣амановин̃н̃аан̣ад̇хаад̇убхзд̣̇зна д̇ассаа анзгад̇д̇ам̣, жагкуруубаад̣̇ибажжаяааяад̇д̇авуд̇д̇ид̇ааяа анижжад̇ан̃жа багаасзд̇ваа д̣̇ийгхарад̇д̇аанусаяид̇ам̣ ж̇ийвасан̃н̃ам̣ самууханид̇угаамзна бхаг̇авад̇аа адтаараса д̇хаад̇уяо багаасид̇аа. гин̃жа бхияяо? д̇ат̇аа взнзяяаж̇жхаасаяавасзна; яз жа имааяа наад̇исан̇кзбавид̇т̇аарааяа д̣̇зсанааяа взнзяяаа сад̇д̇аа, д̇ад̣̇аж̇жхаасаяавасзна жа адтаарасзва багаасид̇аа.
Apica vijānanasabhāve viññāṇe jīvasaññīnaṃ jīvasaññāsamūhanatthampi aṭṭhāraseva vuttā . Santi hi sattā vijānanasabhāve viññāṇe jīvasaññino. Tesaṃ cakkhusotaghānajivhākāyaviññāṇamanoviññāṇadhātubhedena tassā anekattaṃ, cakkhurūpādipaccayāyattavuttitāya aniccatañca pakāsetvā dīgharattānusayitaṃ jīvasaññaṃ samūhanitukāmena bhagavatā aṭṭhārasa dhātuyo pakāsitā. Kiñca bhiyyo? Tathā veneyyajjhāsayavasena; ye ca imāya nātisaṅkhepavitthārāya desanāya veneyyā sattā, tadajjhāsayavasena ca aṭṭhāraseva pakāsitā.
сан̇кзбавид̇т̇ааранаязна д̇ат̇аа д̇ат̇аа хи,
Saṅkhepavitthāranayena tathā tathā hi,
д̇хаммам̣ багаасаяад̇и зса яат̇аа яат̇аасса;
Dhammaṃ pakāsayati esa yathā yathāssa;
сад̣̇д̇хаммад̇зж̇авихад̇ам̣ вилаяам̣ кан̣зна,
Saddhammatejavihataṃ vilayaṃ khaṇena,
взнзяяасад̇д̇ахад̣̇аязсу д̇амо баяаад̇ийд̇и.
Veneyyasattahadayesu tamo payātīti.
звамзд̇т̇а ‘д̇аавад̇вад̇о’ взд̣̇ид̇аб̣б̣о винижчаяо.
Evamettha ‘tāvatvato’ veditabbo vinicchayo.
‘сан̇кад̇о’д̇и жагкуд̇хаад̇у д̇аава ж̇аад̇ид̇о зго д̇хаммод̇взва сан̇кам̣ г̇ажчад̇и жагкубасаад̣̇авасзна. д̇ат̇аа сод̇агхаанаж̇ивхаагааяаруубасад̣̇д̣̇аг̇анд̇харасад̇хаад̇уяо сод̇абасаад̣̇аад̣̇ивасзна. подтаб̣б̣ад̇хаад̇у бана бат̇авийд̇зж̇овааяовасзна д̇аяо д̇хаммаад̇и сан̇кам̣ г̇ажчад̇и. жагкувин̃н̃аан̣ад̇хаад̇у гусалаагусалавибаагавасзна д̣̇вз д̇хаммаад̇и сан̇кам̣ г̇ажчад̇и. д̇ат̇аа сод̇агхаанаж̇ивхаагааяавин̃н̃аан̣ад̇хаад̇уяо. манод̇хаад̇у бана бан̃жад̣̇ваарааваж̇ж̇анагусалаагусалавибаагасамбадижчанавасзна д̇аяо д̇хаммаад̇и сан̇кам̣ г̇ажчад̇и. д̇хаммад̇хаад̇у д̇ин̣н̣ам̣ аруубагканд̇хаанам̣, сол̣асаннам̣ сукумаруубаанам̣, асан̇кад̇ааяа жа д̇хаад̇уяаа васзна вийсад̇ид̇хаммаад̇и сан̇кам̣ г̇ажчад̇и. мановин̃н̃аан̣ад̇хаад̇у сзсагусалаагусалааб̣яаагад̇авин̃н̃аан̣авасзна часад̇д̇ад̇ид̇хаммаад̇и сан̇кам̣ г̇ажчад̇ийд̇и звамзд̇т̇а ‘сан̇кад̇о’ взд̣̇ид̇аб̣б̣о винижчаяо.
‘Saṅkhato’ti cakkhudhātu tāva jātito eko dhammotveva saṅkhaṃ gacchati cakkhupasādavasena. Tathā sotaghānajivhākāyarūpasaddagandharasadhātuyo sotapasādādivasena. Phoṭṭhabbadhātu pana pathavītejovāyovasena tayo dhammāti saṅkhaṃ gacchati. Cakkhuviññāṇadhātu kusalākusalavipākavasena dve dhammāti saṅkhaṃ gacchati. Tathā sotaghānajivhākāyaviññāṇadhātuyo. Manodhātu pana pañcadvārāvajjanakusalākusalavipākasampaṭicchanavasena tayo dhammāti saṅkhaṃ gacchati. Dhammadhātu tiṇṇaṃ arūpakkhandhānaṃ, soḷasannaṃ sukhumarūpānaṃ, asaṅkhatāya ca dhātuyā vasena vīsatidhammāti saṅkhaṃ gacchati. Manoviññāṇadhātu sesakusalākusalābyākataviññāṇavasena chasattatidhammāti saṅkhaṃ gacchatīti evamettha ‘saṅkhato’ veditabbo vinicchayo.
‘бажжаяаа’д̇и жагкуд̇хаад̇уаад̣̇ийнам̣ жагкувин̃н̃аан̣ад̇хаад̇уаад̣̇ийсу бажжаяад̇о взд̣̇ид̇аб̣б̣о винижчаяо. со банзд̇зсам̣ бажжаяабхааво нид̣̇д̣̇зсаваарз аави бхависсад̇и.
‘Paccayā’ti cakkhudhātuādīnaṃ cakkhuviññāṇadhātuādīsu paccayato veditabbo vinicchayo. So panetesaṃ paccayabhāvo niddesavāre āvi bhavissati.
‘д̣̇адтаб̣б̣аа’д̇и д̣̇адтаб̣б̣ад̇обзд̇т̇а винижчаяо взд̣̇ид̇аб̣б̣од̇и ад̇т̇о. саб̣б̣аа зва хи сан̇кад̇аа д̇хаад̇уяо буб̣б̣анд̇аабаранд̇авивид̇д̇ад̇о, д̇хувасубхасукад̇д̇абхаавасун̃н̃ад̇о, бажжаяааяад̇д̇авуд̇д̇ид̇о жа д̣̇адтаб̣б̣аа. висзсад̇о банзд̇т̇а бхзрид̇алам̣ вияа жагкуд̇хаад̇у д̣̇адтаб̣б̣аа, д̣̇ан̣д̣о вияа руубад̇хаад̇у, сад̣̇д̣̇о вияа жагкувин̃н̃аан̣ад̇хаад̇у . д̇ат̇аа аад̣̇аасад̇алам̣ вияа жагкуд̇хаад̇у, мукам̣ вияа руубад̇хаад̇у, муканимид̇д̇ам̣ вияа жагкувин̃н̃аан̣ад̇хаад̇у. ат̇а ваа ужчуд̇илаани вияа жагкуд̇хаад̇у, яанд̇ажаггаяадти вияа руубад̇хаад̇у, ужчурасад̇злаани вияа жагкувин̃н̃аан̣ад̇хаад̇у. д̇ат̇аа ад̇харааран̣ий вияа жагкуд̇хаад̇у, уд̇д̇арааран̣ий вияа руубад̇хаад̇у, аг̇г̇и вияа жагкувин̃н̃аан̣ад̇хаад̇у. зса наяо сод̇ад̇хаад̇уаад̣̇ийсуби.
‘Daṭṭhabbā’ti daṭṭhabbatopettha vinicchayo veditabboti attho. Sabbā eva hi saṅkhatā dhātuyo pubbantāparantavivittato, dhuvasubhasukhattabhāvasuññato, paccayāyattavuttito ca daṭṭhabbā. Visesato panettha bheritalaṃ viya cakkhudhātu daṭṭhabbā, daṇḍo viya rūpadhātu, saddo viya cakkhuviññāṇadhātu . Tathā ādāsatalaṃ viya cakkhudhātu, mukhaṃ viya rūpadhātu, mukhanimittaṃ viya cakkhuviññāṇadhātu. Atha vā ucchutilāni viya cakkhudhātu, yantacakkayaṭṭhi viya rūpadhātu, ucchurasatelāni viya cakkhuviññāṇadhātu. Tathā adharāraṇī viya cakkhudhātu, uttarāraṇī viya rūpadhātu, aggi viya cakkhuviññāṇadhātu. Esa nayo sotadhātuādīsupi.
манод̇хаад̇у бана яат̇аасамбхавад̇о жагкувин̃н̃аан̣ад̇хаад̇уаад̣̇ийнам̣ бурзжараанужараа вияа д̣̇адтаб̣б̣аа. д̇хаммад̇хаад̇уяаа взд̣̇анаагканд̇хо салламива сууламива жа д̣̇адтаб̣б̣о ; сан̃н̃аасан̇каарагканд̇хаа взд̣̇анаасалласуулаяог̇аа аад̇ураа вияа; бут̇уж̇ж̇анаанам̣ ваа сан̃н̃аа аасаад̣̇угкаж̇ананад̇о рид̇д̇амудти вияа, аяат̇аабхужжанимид̇д̇аг̇г̇аахагад̇о ванамиг̇о вияа; сан̇каараа бадисанд̇хияам̣ багкибанад̇о ан̇г̇аарагаасуяам̣ кибанагабурисо вияа, ж̇аад̇ид̣̇угкаануб̣анд̇ханад̇о рааж̇абурисаануб̣анд̇хажораа вияа, саб̣б̣аанад̇т̇аавахасса канд̇хасанд̇аанасса хзд̇уд̇о висаругкаб̣ийж̇аани вияа; руубам̣ наанаавид̇хуубад̣̇д̣̇аванимид̇д̇ад̇о куражаггам̣ вияа д̣̇адтаб̣б̣ам̣.
Manodhātu pana yathāsambhavato cakkhuviññāṇadhātuādīnaṃ purecarānucarā viya daṭṭhabbā. Dhammadhātuyā vedanākkhandho sallamiva sūlamiva ca daṭṭhabbo ; saññāsaṅkhārakkhandhā vedanāsallasūlayogā āturā viya; puthujjanānaṃ vā saññā āsādukkhajananato rittamuṭṭhi viya, ayathābhuccanimittaggāhakato vanamigo viya; saṅkhārā paṭisandhiyaṃ pakkhipanato aṅgārakāsuyaṃ khipanakapuriso viya, jātidukkhānubandhanato rājapurisānubandhacorā viya, sabbānatthāvahassa khandhasantānassa hetuto visarukkhabījāni viya; rūpaṃ nānāvidhūpaddavanimittato khuracakkaṃ viya daṭṭhabbaṃ.
асан̇кад̇аа бана д̇хаад̇у амад̇ад̇о санд̇ад̇о кзмад̇о жа д̣̇адтаб̣б̣аа. гасмаа? саб̣б̣аанад̇т̇абадибагкабхууд̇ад̇д̇аа. мановин̃н̃аан̣ад̇хаад̇у г̇ахид̇аарамман̣ам̣ мун̃жид̇вааби ан̃н̃ам̣ г̇ахзд̇ваава бавад̇анад̇о ванамаггадо вияа, д̣̇уд̣̇д̣̇аманад̇о ассакал̣ун̇го вияа, яад̇т̇агааманибаад̇ид̇о взхаасам̣ кид̇д̇ад̣̇ан̣д̣о вияа, лобхад̣̇осаад̣̇инаанаббагаарагилзсаяог̇ад̇о ран̇г̇анадо вияа д̣̇адтаб̣б̣од̇и.
Asaṅkhatā pana dhātu amatato santato khemato ca daṭṭhabbā. Kasmā? Sabbānatthapaṭipakkhabhūtattā. Manoviññāṇadhātu gahitārammaṇaṃ muñcitvāpi aññaṃ gahetvāva pavatanato vanamakkaṭo viya, duddamanato assakhaḷuṅko viya, yatthakāmanipātito vehāsaṃ khittadaṇḍo viya, lobhadosādinānappakārakilesayogato raṅganaṭo viya daṭṭhabboti.
184. нид̣̇д̣̇зсаваарз жагкун̃жа бадижжа руубз жаад̇и ид̣̇ан̃жа д̣̇ваяам̣ бадижжа ан̃н̃ан̃жа гирияааманод̇хаад̇ун̃жзва самбаяуд̇д̇аканд̇хад̇д̇аяан̃жаад̇и ад̇т̇о. жагкувин̃н̃аан̣ад̇хаад̇уяаа хи жагку ниссаяабажжаяо ход̇и, руубам̣ аарамман̣абажжаяо, гирияаманод̇хаад̇у виг̇ад̇абажжаяо, д̇аяо аруубагканд̇хаа сахаж̇аад̇абажжаяо. д̇асмаа зсаа жагкувин̃н̃аан̣ад̇хаад̇у имз жад̇д̇ааро бадижжа уббаж̇ж̇ад̇и наама. сод̇ан̃жа бадижжаад̇иаад̣̇ийсуби зсзва наяо.
184. Niddesavāre cakkhuñca paṭicca rūpe cāti idañca dvayaṃ paṭicca aññañca kiriyāmanodhātuñceva sampayuttakhandhattayañcāti attho. Cakkhuviññāṇadhātuyā hi cakkhu nissayapaccayo hoti, rūpaṃ ārammaṇapaccayo, kiriyamanodhātu vigatapaccayo, tayo arūpakkhandhā sahajātapaccayo. Tasmā esā cakkhuviññāṇadhātu ime cattāro paṭicca uppajjati nāma. Sotañca paṭiccātiādīsupi eseva nayo.
нируд̣̇д̇хасамананд̇араад̇и нируд̣̇д̇хааяа самананд̇араа. д̇аж̇ж̇аа манод̇хаад̇ууд̇и д̇асмим̣ аарамман̣з ж̇аад̇аа гусалаагусалавибаагад̇о д̣̇увид̇хаа манод̇хаад̇у самбадижчанагижжаа. саб̣б̣ад̇хаммзсу ваа бана батамасаманнаахаарод̇и зд̇зсу жагкувин̃н̃аан̣аад̣̇ийсу саб̣б̣ад̇хаммзсу уббаж̇ж̇амаанзсу батамасаманнаахааро; жагкувин̃н̃аан̣ад̇хаад̇уаад̣̇ийнам̣ ваа аарамман̣асан̇каад̇зсу саб̣б̣ад̇хаммзсу батамасаманнаахаарод̇и аяамзд̇т̇а ад̇т̇о взд̣̇ид̇аб̣б̣о. зд̇зна бан̃жад̣̇ваарааваж̇ж̇анагижжаа гирияаманод̇хаад̇у г̇ахид̇аад̇и взд̣̇ид̇аб̣б̣аа.
Niruddhasamanantarāti niruddhāya samanantarā. Tajjā manodhātūti tasmiṃ ārammaṇe jātā kusalākusalavipākato duvidhā manodhātu sampaṭicchanakiccā. Sabbadhammesu vā pana paṭhamasamannāhāroti etesu cakkhuviññāṇādīsu sabbadhammesu uppajjamānesu paṭhamasamannāhāro; cakkhuviññāṇadhātuādīnaṃ vā ārammaṇasaṅkhātesu sabbadhammesu paṭhamasamannāhāroti ayamettha attho veditabbo. Etena pañcadvārāvajjanakiccā kiriyamanodhātu gahitāti veditabbā.
манод̇хаад̇уяааби уббаж̇ж̇ид̇ваа нируд̣̇д̇хасамананд̇араад̇и зд̇т̇а би-гааро самбин̣д̣анад̇т̇о. д̇асмаа манод̇хаад̇уяааби мановин̃н̃аан̣ад̇хаад̇уяаабийд̇и аяамзд̇т̇а ад̇т̇о взд̣̇ид̇аб̣б̣о. д̇зна яаа жа вибаагаманод̇хаад̇уяаа уббаж̇ж̇ид̇ваа нируд̣̇д̇хааяа самананд̇араа уббаж̇ж̇ад̇и санд̇ийран̣агижжаа вибаагамановин̃н̃аан̣ад̇хаад̇у, яаа жа д̇ассаа уббаж̇ж̇ид̇ваа нируд̣̇д̇хааяа самананд̇араа уббаж̇ж̇ад̇и водтаб̣б̣анагижжаа гирияамановин̃н̃аан̣ад̇хаад̇у, яаа жа д̇ассаа уббаж̇ж̇ид̇ваа нируд̣̇д̇хааяа самананд̇араа уббаж̇ж̇ад̇и ж̇аванагижжаа мановин̃н̃аан̣ад̇хаад̇у – д̇аа саб̣б̣ааби гат̇ид̇аа ход̇ийд̇и взд̣̇ид̇аб̣б̣аа. манан̃жа бадижжаад̇и бхаван̇г̇аманам̣. д̇хаммз жаад̇и жад̇убхуумигад̇хаммаарамман̣ам̣. уббаж̇ж̇ад̇и мановин̃н̃аан̣анд̇и сахааваж̇ж̇анагам̣ ж̇аванам̣ ниб̣б̣ад̇д̇ад̇и.
Manodhātuyāpi uppajjitvā niruddhasamanantarāti ettha pi-kāro sampiṇḍanattho. Tasmā manodhātuyāpi manoviññāṇadhātuyāpīti ayamettha attho veditabbo. Tena yā ca vipākamanodhātuyā uppajjitvā niruddhāya samanantarā uppajjati santīraṇakiccā vipākamanoviññāṇadhātu, yā ca tassā uppajjitvā niruddhāya samanantarā uppajjati voṭṭhabbanakiccā kiriyamanoviññāṇadhātu, yā ca tassā uppajjitvā niruddhāya samanantarā uppajjati javanakiccā manoviññāṇadhātu – tā sabbāpi kathitā hotīti veditabbā. Manañca paṭiccāti bhavaṅgamanaṃ. Dhamme cāti catubhūmikadhammārammaṇaṃ. Uppajjati manoviññāṇanti sahāvajjanakaṃ javanaṃ nibbattati.
имасмим̣ бана таанз хад̇т̇з г̇ахид̇абан̃хам̣ наама г̇ан̣хим̣су. махаад̇хаммарагкид̇ад̇т̇зро гира наама д̣̇ийгхабхаан̣агаабхаяад̇т̇зрам̣ хад̇т̇з г̇ахзд̇ваа ааха – ‘бадижжаад̇и наама ааг̇ад̇адтаанз ааваж̇ж̇анам̣ висум̣ на гаад̇аб̣б̣ам̣, бхаван̇г̇аниссид̇агамзва гаад̇аб̣б̣а’нд̇и. д̇асмаа ид̇ха манод̇и сахааваж̇ж̇анагам̣ бхаван̇г̇ам̣. мановин̃н̃аан̣анд̇и ж̇аванамановин̃н̃аан̣ам̣. имасмим̣ бана абхид̇хаммабхааж̇анийяз сол̣аса д̇хаад̇уяо гаамааважараа, д̣̇вз жад̇убхуумигаа логияалогуд̇д̇арамиссагаа гат̇ид̇аад̇и.
Imasmiṃ pana ṭhāne hatthe gahitapañhaṃ nāma gaṇhiṃsu. Mahādhammarakkhitatthero kira nāma dīghabhāṇakābhayattheraṃ hatthe gahetvā āha – ‘paṭiccāti nāma āgataṭṭhāne āvajjanaṃ visuṃ na kātabbaṃ, bhavaṅganissitakameva kātabba’nti. Tasmā idha manoti sahāvajjanakaṃ bhavaṅgaṃ. Manoviññāṇanti javanamanoviññāṇaṃ. Imasmiṃ pana abhidhammabhājanīye soḷasa dhātuyo kāmāvacarā, dve catubhūmikā lokiyalokuttaramissakā kathitāti.
абхид̇хаммабхааж̇анийяаван̣н̣анаа.
Abhidhammabhājanīyavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 3. д̇хаад̇увибхан̇г̇о • 3. Dhātuvibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 3. д̇хаад̇увибхан̇г̇о • 3. Dhātuvibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 3. д̇хаад̇увибхан̇г̇о • 3. Dhātuvibhaṅgo
