| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
2. абхид̇хаммабхааж̇анийяаван̣н̣анаа
2. Abhidhammabhājanīyavaṇṇanā
206-214. ид̣̇аани абхид̇хаммабхааж̇анийяам̣ ход̇и. д̇ад̇т̇а ‘‘арияасажжааний’’д̇и авад̇ваа ниббад̣̇зсад̇о бажжаяасан̇каад̇ам̣ самуд̣̇аяам̣ д̣̇ассзд̇ум̣ ‘‘жад̇д̇аари сажжааний’’д̇и вуд̇д̇ам̣ . арияасажжаанийд̇и хи вуд̇д̇з авасзсаа жа гилзсаа, авасзсаа жа агусалаа д̇хаммаа, д̇ийн̣и жа гусаламуулаани саасаваани, авасзсаа жа саасаваа гусалаа д̇хаммаа на сан̇г̇аяханд̇и. на жа гзвалам̣ д̇ан̣хаава д̣̇угкам̣ самуд̣̇аанзд̇и, имзби авасзсаа жа гилзсаад̣̇аяо бажжаяаа самуд̣̇аанзнд̇иязва. ид̇и имзби бажжаяаа д̣̇угкам̣ самуд̣̇аанзнд̇иязваад̇и ниббад̣̇зсад̇о бажжаяасан̇каад̇ам̣ самуд̣̇аяам̣ д̣̇ассзд̇ум̣ ‘‘арияасажжааний’’д̇и авад̇ваа ‘‘жад̇д̇аари сажжааний’’д̇и вуд̇д̇ам̣.
206-214. Idāni abhidhammabhājanīyaṃ hoti. Tattha ‘‘ariyasaccānī’’ti avatvā nippadesato paccayasaṅkhātaṃ samudayaṃ dassetuṃ ‘‘cattāri saccānī’’ti vuttaṃ . Ariyasaccānīti hi vutte avasesā ca kilesā, avasesā ca akusalā dhammā, tīṇi ca kusalamūlāni sāsavāni, avasesā ca sāsavā kusalā dhammā na saṅgayhanti. Na ca kevalaṃ taṇhāva dukkhaṃ samudāneti, imepi avasesā ca kilesādayo paccayā samudānentiyeva. Iti imepi paccayā dukkhaṃ samudānentiyevāti nippadesato paccayasaṅkhātaṃ samudayaṃ dassetuṃ ‘‘ariyasaccānī’’ti avatvā ‘‘cattāri saccānī’’ti vuttaṃ.
нид̣̇д̣̇зсаваарз жа нзсам̣ батамам̣ д̣̇угкам̣ анид̣̇д̣̇исид̇ваа д̇ассзва д̣̇угкасса суканид̣̇д̣̇зсад̇т̇ам̣ д̣̇угкасамуд̣̇аяо нид̣̇д̣̇идто. д̇асмин̃хи нид̣̇д̣̇идтз ‘‘авасзсаа жа гилзсаа’’д̇иаад̣̇инаа наязна д̣̇угкасажжам̣ суканид̣̇д̣̇зсам̣ ход̇и. нирод̇хасажжамбзд̇т̇а д̇ан̣хааяа бахаанам̣ ‘‘д̇ан̣хааяа жа авасзсаанан̃жа гилзсаанам̣ бахаана’’нд̇и звам̣ яат̇аавуд̇д̇асса самуд̣̇аяасса бахаанавасзна бан̃жахаагаарзхи нид̣̇д̣̇идтам̣. маг̇г̇асажжам̣ банзд̇т̇а батамаж̇жхаанигасод̇аабад̇д̇имаг̇г̇авасзна д̇хаммасан̇г̇ан̣ияам̣ вибхад̇д̇асса д̣̇зсанаанаяасса мукамад̇д̇амзва д̣̇ассзнд̇зна нид̣̇д̣̇идтам̣. д̇ад̇т̇а наяабхзд̣̇о взд̣̇ид̇аб̣б̣о. д̇ам̣ убари багаасаяиссаама.
Niddesavāre ca nesaṃ paṭhamaṃ dukkhaṃ aniddisitvā tasseva dukkhassa sukhaniddesatthaṃ dukkhasamudayo niddiṭṭho. Tasmiñhi niddiṭṭhe ‘‘avasesā ca kilesā’’tiādinā nayena dukkhasaccaṃ sukhaniddesaṃ hoti. Nirodhasaccampettha taṇhāya pahānaṃ ‘‘taṇhāya ca avasesānañca kilesānaṃ pahāna’’nti evaṃ yathāvuttassa samudayassa pahānavasena pañcahākārehi niddiṭṭhaṃ. Maggasaccaṃ panettha paṭhamajjhānikasotāpattimaggavasena dhammasaṅgaṇiyaṃ vibhattassa desanānayassa mukhamattameva dassentena niddiṭṭhaṃ. Tattha nayabhedo veditabbo. Taṃ upari pakāsayissāma.
яасмаа бана на гзвалам̣ адтан̇г̇иго маг̇г̇ова бадибад̣̇аа ‘‘буб̣б̣зва ко банасса гааяагаммам̣ важийгаммам̣ ааж̇ийво субарисуд̣̇д̇хо ход̇ий’’д̇и (ма. ни. 3.433) важанад̇о бана буг̇г̇алаж̇жхаасаяавасзна бан̃жан̇г̇игоби маг̇г̇о бадибад̣̇аа зваад̇и д̣̇зсид̇о, д̇асмаа д̇ам̣ наяам̣ д̣̇ассзд̇ум̣ бан̃жан̇г̇игаваароби нид̣̇д̣̇идто. яасмаа жа на гзвалам̣ адтан̇г̇игабан̃жан̇г̇игамаг̇г̇аава бадибад̣̇аа, самбаяуд̇д̇агаа бана ад̇ирзгабан̃н̃аасад̇хаммааби бадибад̣̇аа зва, д̇асмаа д̇ам̣ наяам̣ д̣̇ассзд̇ум̣ д̇ад̇ияо саб̣б̣асан̇г̇аахигаваароби нид̣̇д̣̇идто. д̇ад̇т̇а ‘‘авасзсаа д̇хаммаа д̣̇угканирод̇хаг̇ааминияаа бадибад̣̇ааяа самбаяуд̇д̇аа’’д̇и ид̣̇ам̣ барихааяад̇и. сзсам̣ саб̣б̣ад̇т̇а сад̣̇исамзва.
Yasmā pana na kevalaṃ aṭṭhaṅgiko maggova paṭipadā ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.433) vacanato pana puggalajjhāsayavasena pañcaṅgikopi maggo paṭipadā evāti desito, tasmā taṃ nayaṃ dassetuṃ pañcaṅgikavāropi niddiṭṭho. Yasmā ca na kevalaṃ aṭṭhaṅgikapañcaṅgikamaggāva paṭipadā, sampayuttakā pana atirekapaññāsadhammāpi paṭipadā eva, tasmā taṃ nayaṃ dassetuṃ tatiyo sabbasaṅgāhikavāropi niddiṭṭho. Tattha ‘‘avasesā dhammā dukkhanirodhagāminiyā paṭipadāya sampayuttā’’ti idaṃ parihāyati. Sesaṃ sabbattha sadisameva.
д̇ад̇т̇а адтан̇г̇игаваарасса ‘‘д̇ан̣хааяа авасзсаанан̃жа гилзсаанам̣ бахаана’’нд̇иаад̣̇ийсу бан̃жасу годтаасзсу батамагодтаасз д̇аава сод̇аабад̇д̇имаг̇г̇з жхаанаабхинивзсз суд̣̇д̇хигабадибад̣̇аа, суд̣̇д̇хигасун̃н̃ад̇аа, сун̃н̃ад̇абадибад̣̇аа, суд̣̇д̇хигааббан̣ихид̇ам̣, аббан̣ихид̇абадибад̣̇аад̇и имзсу бан̃жасу ваарзсу д̣̇виннам̣ д̣̇виннам̣ жад̇уггабан̃жаганаяаанам̣ васзна д̣̇аса наяаа хонд̇и. звам̣ сзсзсубийд̇и вийсад̇ияаа абхинивзсзсу д̣̇вз наяасад̇аани. д̇аани жад̇уухи ад̇хибад̇ийхи жад̇уг̇г̇ун̣ид̇аани адта . ид̇и суд̣̇д̇хигаани д̣̇вз саад̇хибад̇ий адтаад̇и саб̣б̣амби наяасахассам̣ ход̇и. яат̇аа жа сод̇аабад̇д̇имаг̇г̇з, звам̣ сзсамаг̇г̇зсубийд̇и жад̇д̇аари наяасахассаани хонд̇и. яат̇аа жа батамагодтаасз жад̇д̇аари, звам̣ сзсзсубийд̇и адтан̇г̇игаваарз бан̃жасу годтаасзсу вийсад̇и наяасахассаани хонд̇и. д̇ат̇аа бан̃жан̇г̇игаваарз саб̣б̣асан̇г̇аахигаваарз жаад̇и саб̣б̣ааниби садти наяасахассаани сад̇т̇аараа вибхад̇д̇аани. баал̣и бана сан̇кзбзна ааг̇ад̇аа. звамид̣̇ам̣ д̇ивид̇хамахааваарам̣ бан̃жад̣̇асагодтаасам̣ садтинаяасахассабадиман̣д̣ид̇ам̣ абхид̇хаммабхааж̇анийяам̣ наама нид̣̇д̣̇идтанд̇и взд̣̇ид̇аб̣б̣ам̣.
Tattha aṭṭhaṅgikavārassa ‘‘taṇhāya avasesānañca kilesānaṃ pahāna’’ntiādīsu pañcasu koṭṭhāsesu paṭhamakoṭṭhāse tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitaṃ, appaṇihitapaṭipadāti imesu pañcasu vāresu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catugguṇitāni aṭṭha . Iti suddhikāni dve sādhipatī aṭṭhāti sabbampi nayasahassaṃ hoti. Yathā ca sotāpattimagge, evaṃ sesamaggesupīti cattāri nayasahassāni honti. Yathā ca paṭhamakoṭṭhāse cattāri, evaṃ sesesupīti aṭṭhaṅgikavāre pañcasu koṭṭhāsesu vīsati nayasahassāni honti. Tathā pañcaṅgikavāre sabbasaṅgāhikavāre cāti sabbānipi saṭṭhinayasahassāni satthārā vibhattāni. Pāḷi pana saṅkhepena āgatā. Evamidaṃ tividhamahāvāraṃ pañcadasakoṭṭhāsaṃ saṭṭhinayasahassapaṭimaṇḍitaṃ abhidhammabhājanīyaṃ nāma niddiṭṭhanti veditabbaṃ.
абхид̇хаммабхааж̇анийяаван̣н̣анаа.
Abhidhammabhājanīyavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 4. сажжавибхан̇г̇о • 4. Saccavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 4. сажжавибхан̇г̇о • 4. Saccavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 4. сажжавибхан̇г̇о • 4. Saccavibhaṅgo
