| Library / Tipiṭaka / ತಿಪಿಟಕ • Tipiṭaka / ಸಮ್ಮೋಹವಿನೋದನೀ-ಅಟ್ಠಕಥಾ • Sammohavinodanī-aṭṭhakathā |
೨. ಅಭಿಧಮ್ಮಭಾಜನೀಯವಣ್ಣನಾ
2. Abhidhammabhājanīyavaṇṇanā
೪೭೨. ಅಭಿಧಮ್ಮಭಾಜನೀಯೇ ಸತ್ತಪಿ ಬೋಜ್ಝಙ್ಗೇ ಏಕತೋ ಪುಚ್ಛಿತ್ವಾ ವಿಸ್ಸಜ್ಜನಸ್ಸ ಚ ಪಾಟಿಯೇಕ್ಕಂ ಪುಚ್ಛಿತ್ವಾ ವಿಸ್ಸಜ್ಜನಸ್ಸ ಚ ವಸೇನ ದ್ವೇ ನಯಾ। ತೇಸಂ ಅತ್ಥವಣ್ಣನಾ ಹೇಟ್ಠಾ ವುತ್ತನಯೇನೇವ ವೇದಿತಬ್ಬಾ।
472. Abhidhammabhājanīye sattapi bojjhaṅge ekato pucchitvā vissajjanassa ca pāṭiyekkaṃ pucchitvā vissajjanassa ca vasena dve nayā. Tesaṃ atthavaṇṇanā heṭṭhā vuttanayeneva veditabbā.
ಉಪೇಕ್ಖಾಸಮ್ಬೋಜ್ಝಙ್ಗನಿದ್ದೇಸೇ ಪನ ಉಪೇಕ್ಖನವಸೇನ ಉಪೇಕ್ಖಾ। ಉಪೇಕ್ಖನಾಕಾರೋ ಉಪೇಕ್ಖನಾ। ಉಪೇಕ್ಖಿತಬ್ಬಯುತ್ತೇ ಸಮಪ್ಪವತ್ತೇ ಧಮ್ಮೇ ಇಕ್ಖತಿ, ನ ಚೋದೇತೀತಿ ಉಪೇಕ್ಖಾ। ಪುಗ್ಗಲಂ ಉಪೇಕ್ಖಾಪೇತೀತಿ ಉಪೇಕ್ಖನಾ । ಬೋಜ್ಝಙ್ಗಭಾವಪ್ಪತ್ತಿಯಾ ಲೋಕಿಯಉಪೇಕ್ಖನಾಯ ಅಧಿಕಾ ಉಪೇಕ್ಖನಾ ಅಜ್ಝುಪೇಕ್ಖನಾ। ಅಬ್ಯಾಪಾರಾಪಜ್ಜನೇನ ಮಜ್ಝತ್ತಭಾವೋ ಮಜ್ಝತ್ತತಾ। ಸಾ ಪನ ಚಿತ್ತಸ್ಸ, ನ ಸತ್ತಸ್ಸಾತಿ ದೀಪೇತುಂ ಮಜ್ಝತ್ತತಾ ಚಿತ್ತಸ್ಸಾತಿ ವುತ್ತನ್ತಿ। ಅಯಮೇತ್ಥ ಅನುಪುಬ್ಬಪದವಣ್ಣನಾ।
Upekkhāsambojjhaṅganiddese pana upekkhanavasena upekkhā. Upekkhanākāro upekkhanā. Upekkhitabbayutte samappavatte dhamme ikkhati, na codetīti upekkhā. Puggalaṃ upekkhāpetīti upekkhanā . Bojjhaṅgabhāvappattiyā lokiyaupekkhanāya adhikā upekkhanā ajjhupekkhanā. Abyāpārāpajjanena majjhattabhāvo majjhattatā. Sā pana cittassa, na sattassāti dīpetuṃ majjhattatā cittassāti vuttanti. Ayamettha anupubbapadavaṇṇanā.
ನಯಾ ಪನೇತ್ಥ ಗಣೇತಬ್ಬಾ – ಸತ್ತನ್ನಮ್ಪಿ ಹಿ ಬೋಜ್ಝಙ್ಗಾನಂ ಏಕತೋ ಪುಚ್ಛಿತ್ವಾ ವಿಸ್ಸಜ್ಜನೇ ಏಕೇಕಮಗ್ಗೇ ನಯಸಹಸ್ಸಂ ನಯಸಹಸ್ಸನ್ತಿ ಚತ್ತಾರಿ ನಯಸಹಸ್ಸಾನಿ ವಿಭತ್ತಾನಿ। ಪಾಟಿಯೇಕ್ಕಂ ಪುಚ್ಛಿತ್ವಾ ವಿಸ್ಸಜ್ಜನೇ ಏಕೇಕಬೋಜ್ಝಙ್ಗವಸೇನ ಚತ್ತಾರಿ ಚತ್ತಾರೀತಿ ಸತ್ತ ಚತುಕ್ಕಾ ಅಟ್ಠವೀಸತಿ। ತಾನಿ ಪುರಿಮೇಹಿ ಚತೂಹಿ ಸದ್ಧಿಂ ದ್ವತ್ತಿಂಸಾತಿ ಸಬ್ಬಾನಿಪಿ ಅಭಿಧಮ್ಮಭಾಜನೀಯೇ ದ್ವತ್ತಿಂಸ ನಯಸಹಸ್ಸಾನಿ ವಿಭತ್ತಾನಿ ಕುಸಲಾನೇವ। ಯಸ್ಮಾ ಪನ ಫಲಕ್ಖಣೇಪಿ ಬೋಜ್ಝಙ್ಗಾ ಲಬ್ಭನ್ತಿ, ಕುಸಲಹೇತುಕಾನಿ ಚ ಸಾಮಞ್ಞಫಲಾನಿ, ತಸ್ಮಾ ತೇಸುಪಿ ಬೋಜ್ಝಙ್ಗದಸ್ಸನತ್ಥಂ ಕುಸಲನಿದ್ದೇಸಪುಬ್ಬಙ್ಗಮಾಯ ಏವ ತನ್ತಿಯಾ ವಿಪಾಕನಯೋ ಆರದ್ಧೋ। ಸೋಪಿ ಏಕತೋ ಪುಚ್ಛಿತ್ವಾ ವಿಸ್ಸಜ್ಜನಸ್ಸ ಚ, ಪಾಟಿಯೇಕ್ಕಂ ಪುಚ್ಛಿತ್ವಾ ವಿಸ್ಸಜ್ಜನಸ್ಸ ಚ ವಸೇನ ದುವಿಧೋ ಹೋತಿ। ಸೇಸಮೇತ್ಥ ಹೇಟ್ಠಾ ವುತ್ತನಯೇನೇವ ವೇದಿತಬ್ಬಂ। ವಿಪಾಕೇ ಪನ ಕುಸಲತೋ ತಿಗುಣಾ ನಯಾ ಕಾತಬ್ಬಾತಿ।
Nayā panettha gaṇetabbā – sattannampi hi bojjhaṅgānaṃ ekato pucchitvā vissajjane ekekamagge nayasahassaṃ nayasahassanti cattāri nayasahassāni vibhattāni. Pāṭiyekkaṃ pucchitvā vissajjane ekekabojjhaṅgavasena cattāri cattārīti satta catukkā aṭṭhavīsati. Tāni purimehi catūhi saddhiṃ dvattiṃsāti sabbānipi abhidhammabhājanīye dvattiṃsa nayasahassāni vibhattāni kusalāneva. Yasmā pana phalakkhaṇepi bojjhaṅgā labbhanti, kusalahetukāni ca sāmaññaphalāni, tasmā tesupi bojjhaṅgadassanatthaṃ kusalaniddesapubbaṅgamāya eva tantiyā vipākanayo āraddho. Sopi ekato pucchitvā vissajjanassa ca, pāṭiyekkaṃ pucchitvā vissajjanassa ca vasena duvidho hoti. Sesamettha heṭṭhā vuttanayeneva veditabbaṃ. Vipāke pana kusalato tiguṇā nayā kātabbāti.
ಅಭಿಧಮ್ಮಭಾಜನೀಯವಣ್ಣನಾ।
Abhidhammabhājanīyavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ವಿಭಙ್ಗಪಾಳಿ • Vibhaṅgapāḷi / ೧೦. ಬೋಜ್ಝಙ್ಗವಿಭಙ್ಗೋ • 10. Bojjhaṅgavibhaṅgo
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ವಿಭಙ್ಗ-ಮೂಲಟೀಕಾ • Vibhaṅga-mūlaṭīkā / ೧೦. ಬೋಜ್ಝಙ್ಗವಿಭಙ್ಗೋ • 10. Bojjhaṅgavibhaṅgo
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ವಿಭಙ್ಗ-ಅನುಟೀಕಾ • Vibhaṅga-anuṭīkā / ೧೦. ಬೋಜ್ಝಙ್ಗವಿಭಙ್ಗೋ • 10. Bojjhaṅgavibhaṅgo
