| Library / Tipiṭaka / තිපිටක • Tipiṭaka / සම්‌මොහවිනොදනී-අට්‌ඨකථා • Sammohavinodanī-aṭṭhakathā |
2. අභිධම්‌මභාජනීයවණ්‌ණනා
2. Abhidhammabhājanīyavaṇṇanā
374. අභිධම්‌මභාජනීයෙ ලොකුත්‌තරසතිපට්‌ඨානවසෙන දෙසනාය ආරද්‌ධත්‌තා යථා කායාදිආරම්‌මණෙසු ලොකියසතිපට්‌ඨානෙසු තන්‌ති ඨපිතා, එවං අට්‌ඨපෙත්‌වා සබ්‌බානිපි කායානුපස්‌සාදීනි සතිපට්‌ඨානානි ධම්‌මසඞ්‌ගණියං (ධ. ස. 355 ආදයො) විභත්‌තස්‌ස දෙසනානයස්‌ස මුඛමත්‌තමෙව දස්‌සෙන්‌තෙන නිද්‌දිට්‌ඨානි.
374. Abhidhammabhājanīye lokuttarasatipaṭṭhānavasena desanāya āraddhattā yathā kāyādiārammaṇesu lokiyasatipaṭṭhānesu tanti ṭhapitā, evaṃ aṭṭhapetvā sabbānipi kāyānupassādīni satipaṭṭhānāni dhammasaṅgaṇiyaṃ (dha. sa. 355 ādayo) vibhattassa desanānayassa mukhamattameva dassentena niddiṭṭhāni.
තත්‌ථ නයභෙදො වෙදිතබ්‌බො. කථං? කායානුපස්‌සනාය තාව සොතාපත්‌තිමග්‌ගෙ ඣානාභිනිවෙසෙ සුද්‌ධිකපටිපදා, සුද්‌ධිකසුඤ්‌ඤතා, සුඤ්‌ඤතපටිපදා, සුද්‌ධිකඅප්‌පණිහිතං, අප්‌පණිහිතපටිපදාති ඉමෙසු පඤ්‌චසු ඨානෙසු ද්‌වින්‌නං ද්‌වින්‌නං චතුක්‌කපඤ්‌චකනයානං වසෙන දස නයා හොන්‌ති. එවං සෙසෙසුපීති වීසතියා අභිනිවෙසෙසු ද්‌වෙ නයසතානි. තානි චතූහි අධිපතීහි චතුගුණිතානි අට්‌ඨ. ඉති සුද්‌ධිකානි ද්‌වෙ සාධිපතීනි අට්‌ඨාති සබ්‌බම්‌පි නයසහස්‌සං හොති. තථා වෙදනානුපස්‌සනාදීසු සුද්‌ධිකසතිපට්‌ඨානෙ චාති සොතාපත්‌තිමග්‌ගෙ පඤ්‌ච නයසහස්‌සානි. යථා ච සොතාපත්‌තිමග්‌ගෙ, එවං සෙසමග්‌ගෙසුපීති කුසලෙ වීසති නයසහස්‌සානි; සුඤ්‌ඤතාපණිහිතානිමිත්‌තාදිභෙදෙසු පන තතො තිගුණෙ විපාකෙ සට්‌ඨි නයසහස්‌සානීති. එවමෙව සකිච්‌චසාධකානඤ්‌චෙව සංසිද්‌ධිකකිච්‌චානඤ්‌ච කුසලවිපාකසතිපට්‌ඨානානං නිද්‌දෙසවසෙන දුවිධො කායානුපස්‌සනාදිවසෙන ච සුද්‌ධිකවසෙන ච කුසලෙ පඤ්‌චන්‌නං විපාකෙ පඤ්‌චන්‌නන්‌ති දසන්‌නං නිද්‌දෙසවාරානං වසෙන දසප්‌පභෙදො අසීතිනයසහස්‌සපතිමණ්‌ඩිතො අභිධම්‌මභාජනීයනිද්‌දෙසො.
Tattha nayabhedo veditabbo. Kathaṃ? Kāyānupassanāya tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitaṃ, appaṇihitapaṭipadāti imesu pañcasu ṭhānesu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catuguṇitāni aṭṭha. Iti suddhikāni dve sādhipatīni aṭṭhāti sabbampi nayasahassaṃ hoti. Tathā vedanānupassanādīsu suddhikasatipaṭṭhāne cāti sotāpattimagge pañca nayasahassāni. Yathā ca sotāpattimagge, evaṃ sesamaggesupīti kusale vīsati nayasahassāni; suññatāpaṇihitānimittādibhedesu pana tato tiguṇe vipāke saṭṭhi nayasahassānīti. Evameva sakiccasādhakānañceva saṃsiddhikakiccānañca kusalavipākasatipaṭṭhānānaṃ niddesavasena duvidho kāyānupassanādivasena ca suddhikavasena ca kusale pañcannaṃ vipāke pañcannanti dasannaṃ niddesavārānaṃ vasena dasappabhedo asītinayasahassapatimaṇḍito abhidhammabhājanīyaniddeso.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / විභඞ්‌ගපාළි • Vibhaṅgapāḷi / 7. සතිපට්‌ඨානවිභඞ්‌ගො • 7. Satipaṭṭhānavibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-මූලටීකා • Vibhaṅga-mūlaṭīkā / 7. සතිපට්‌ඨානවිභඞ්‌ගො • 7. Satipaṭṭhānavibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-අනුටීකා • Vibhaṅga-anuṭīkā / 7. සතිපට්‌ඨානවිභඞ්‌ගො • 7. Satipaṭṭhānavibhaṅgo
