| Library / Tipiṭaka / තිපිටක • Tipiṭaka / සම්‌මොහවිනොදනී-අට්‌ඨකථා • Sammohavinodanī-aṭṭhakathā |
2. අභිධම්‌මභාජනීයවණ්‌ණනා
2. Abhidhammabhājanīyavaṇṇanā
472. අභිධම්‌මභාජනීයෙ සත්‌තපි බොජ්‌ඣඞ්‌ගෙ එකතො පුච්‌ඡිත්‌වා විස්‌සජ්‌ජනස්‌ස ච පාටියෙක්‌කං පුච්‌ඡිත්‌වා විස්‌සජ්‌ජනස්‌ස ච වසෙන ද්‌වෙ නයා. තෙසං අත්‌ථවණ්‌ණනා හෙට්‌ඨා වුත්‌තනයෙනෙව වෙදිතබ්‌බා.
472. Abhidhammabhājanīye sattapi bojjhaṅge ekato pucchitvā vissajjanassa ca pāṭiyekkaṃ pucchitvā vissajjanassa ca vasena dve nayā. Tesaṃ atthavaṇṇanā heṭṭhā vuttanayeneva veditabbā.
උපෙක්‌ඛාසම්‌බොජ්‌ඣඞ්‌ගනිද්‌දෙසෙ පන උපෙක්‌ඛනවසෙන උපෙක්‌ඛා. උපෙක්‌ඛනාකාරො උපෙක්‌ඛනා. උපෙක්‌ඛිතබ්‌බයුත්‌තෙ සමප්‌පවත්‌තෙ ධම්‌මෙ ඉක්‌ඛති, න චොදෙතීති උපෙක්‌ඛා. පුග්‌ගලං උපෙක්‌ඛාපෙතීති උපෙක්‌ඛනා . බොජ්‌ඣඞ්‌ගභාවප්‌පත්‌තියා ලොකියඋපෙක්‌ඛනාය අධිකා උපෙක්‌ඛනා අජ්‌ඣුපෙක්‌ඛනා. අබ්‍යාපාරාපජ්‌ජනෙන මජ්‌ඣත්‌තභාවො මජ්‌ඣත්‌තතා. සා පන චිත්‌තස්‌ස, න සත්‌තස්‌සාති දීපෙතුං මජ්‌ඣත්‌තතා චිත්‌තස්‌සාති වුත්‌තන්‌ති. අයමෙත්‌ථ අනුපුබ්‌බපදවණ්‌ණනා.
Upekkhāsambojjhaṅganiddese pana upekkhanavasena upekkhā. Upekkhanākāro upekkhanā. Upekkhitabbayutte samappavatte dhamme ikkhati, na codetīti upekkhā. Puggalaṃ upekkhāpetīti upekkhanā . Bojjhaṅgabhāvappattiyā lokiyaupekkhanāya adhikā upekkhanā ajjhupekkhanā. Abyāpārāpajjanena majjhattabhāvo majjhattatā. Sā pana cittassa, na sattassāti dīpetuṃ majjhattatā cittassāti vuttanti. Ayamettha anupubbapadavaṇṇanā.
නයා පනෙත්‌ථ ගණෙතබ්‌බා – සත්‌තන්‌නම්‌පි හි බොජ්‌ඣඞ්‌ගානං එකතො පුච්‌ඡිත්‌වා විස්‌සජ්‌ජනෙ එකෙකමග්‌ගෙ නයසහස්‌සං නයසහස්‌සන්‌ති චත්‌තාරි නයසහස්‌සානි විභත්‌තානි. පාටියෙක්‌කං පුච්‌ඡිත්‌වා විස්‌සජ්‌ජනෙ එකෙකබොජ්‌ඣඞ්‌ගවසෙන චත්‌තාරි චත්‌තාරීති සත්‌ත චතුක්‌කා අට්‌ඨවීසති. තානි පුරිමෙහි චතූහි සද්‌ධිං ද්‌වත්‌තිංසාති සබ්‌බානිපි අභිධම්‌මභාජනීයෙ ද්‌වත්‌තිංස නයසහස්‌සානි විභත්‌තානි කුසලානෙව. යස්‌මා පන ඵලක්‌ඛණෙපි බොජ්‌ඣඞ්‌ගා ලබ්‌භන්‌ති, කුසලහෙතුකානි ච සාමඤ්‌ඤඵලානි, තස්‌මා තෙසුපි බොජ්‌ඣඞ්‌ගදස්‌සනත්‌ථං කුසලනිද්‌දෙසපුබ්‌බඞ්‌ගමාය එව තන්‌තියා විපාකනයො ආරද්‌ධො. සොපි එකතො පුච්‌ඡිත්‌වා විස්‌සජ්‌ජනස්‌ස ච, පාටියෙක්‌කං පුච්‌ඡිත්‌වා විස්‌සජ්‌ජනස්‌ස ච වසෙන දුවිධො හොති. සෙසමෙත්‌ථ හෙට්‌ඨා වුත්‌තනයෙනෙව වෙදිතබ්‌බං. විපාකෙ පන කුසලතො තිගුණා නයා කාතබ්‌බාති.
Nayā panettha gaṇetabbā – sattannampi hi bojjhaṅgānaṃ ekato pucchitvā vissajjane ekekamagge nayasahassaṃ nayasahassanti cattāri nayasahassāni vibhattāni. Pāṭiyekkaṃ pucchitvā vissajjane ekekabojjhaṅgavasena cattāri cattārīti satta catukkā aṭṭhavīsati. Tāni purimehi catūhi saddhiṃ dvattiṃsāti sabbānipi abhidhammabhājanīye dvattiṃsa nayasahassāni vibhattāni kusalāneva. Yasmā pana phalakkhaṇepi bojjhaṅgā labbhanti, kusalahetukāni ca sāmaññaphalāni, tasmā tesupi bojjhaṅgadassanatthaṃ kusalaniddesapubbaṅgamāya eva tantiyā vipākanayo āraddho. Sopi ekato pucchitvā vissajjanassa ca, pāṭiyekkaṃ pucchitvā vissajjanassa ca vasena duvidho hoti. Sesamettha heṭṭhā vuttanayeneva veditabbaṃ. Vipāke pana kusalato tiguṇā nayā kātabbāti.
අභිධම්‌මභාජනීයවණ්‌ණනා.
Abhidhammabhājanīyavaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / විභඞ්‌ගපාළි • Vibhaṅgapāḷi / 10. බොජ්‌ඣඞ්‌ගවිභඞ්‌ගො • 10. Bojjhaṅgavibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-මූලටීකා • Vibhaṅga-mūlaṭīkā / 10. බොජ්‌ඣඞ්‌ගවිභඞ්‌ගො • 10. Bojjhaṅgavibhaṅgo
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / විභඞ්‌ග-අනුටීකා • Vibhaṅga-anuṭīkā / 10. බොජ්‌ඣඞ්‌ගවිභඞ්‌ගො • 10. Bojjhaṅgavibhaṅgo
