| Library / Tipiṭaka / തിപിടക • Tipiṭaka / സമ്മോഹവിനോദനീ-അട്ഠകഥാ • Sammohavinodanī-aṭṭhakathā |
൨. അഭിധമ്മഭാജനീയവണ്ണനാ
2. Abhidhammabhājanīyavaṇṇanā
൪൦൮. അഭിധമ്മഭാജനീയേ സബ്ബാനിപി സമ്മപ്പധാനാനി ധമ്മസങ്ഗണിയം വിഭത്തസ്സ ദേസനാനയസ്സ മുഖമത്തമേവ ദസ്സേന്തേന നിദ്ദിട്ഠാനി. തത്ഥ നയഭേദോ വേദിതബ്ബോ. കഥം? പഠമസമ്മപ്പധാനേ താവ സോതാപത്തിമഗ്ഗേ ഝാനാഭിനിവേസേ സുദ്ധികപടിപദാ, സുദ്ധികസുഞ്ഞതാ, സുഞ്ഞതപടിപദാ, സുദ്ധികഅപ്പണിഹിതാ, അപ്പണിഹിതപടിപദാതി ഇമേസു പഞ്ചസു ഠാനേസു ദ്വിന്നം ദ്വിന്നം ചതുക്കപഞ്ചകനയാനം വസേന ദസ നയാ ഹോന്തി. ഏവം സേസേസുപീതി വീസതിയാ അഭിനിവേസേസു ദ്വേ നയസതാനി. താനി ചതൂഹി അധിപതീഹി ചതുഗ്ഗുണിതാനി അട്ഠ. ഇതി സുദ്ധികാനി ദ്വേ സാധിപതീനി അട്ഠാതി സബ്ബമ്പി നയസഹസ്സം ഹോതി. തഥാദുതിയസമ്മപ്പധാനാദീസു സുദ്ധികസമ്മപ്പധാനേ ചാതി സോതാപത്തിമഗ്ഗേ പഞ്ചനയസഹസ്സാനി. യഥാ ച സോതാപത്തിമഗ്ഗേ, ഏവം സേസമഗ്ഗേസുപീതി കുസലവസേനേവ വീസതി നയസഹസ്സാനി. വിപാകേ പന സമ്മപ്പധാനേഹി കത്തബ്ബകിച്ചം നത്ഥീതി വിപാകവാരോ ന ഗഹിതോതി. സമ്മപ്പധാനാനി പനേത്ഥ നിബ്ബത്തിതലോകുത്തരാനേവ കഥിതാനീതി വേദിതബ്ബാനി.
408. Abhidhammabhājanīye sabbānipi sammappadhānāni dhammasaṅgaṇiyaṃ vibhattassa desanānayassa mukhamattameva dassentena niddiṭṭhāni. Tattha nayabhedo veditabbo. Kathaṃ? Paṭhamasammappadhāne tāva sotāpattimagge jhānābhinivese suddhikapaṭipadā, suddhikasuññatā, suññatapaṭipadā, suddhikaappaṇihitā, appaṇihitapaṭipadāti imesu pañcasu ṭhānesu dvinnaṃ dvinnaṃ catukkapañcakanayānaṃ vasena dasa nayā honti. Evaṃ sesesupīti vīsatiyā abhinivesesu dve nayasatāni. Tāni catūhi adhipatīhi catugguṇitāni aṭṭha. Iti suddhikāni dve sādhipatīni aṭṭhāti sabbampi nayasahassaṃ hoti. Tathādutiyasammappadhānādīsu suddhikasammappadhāne cāti sotāpattimagge pañcanayasahassāni. Yathā ca sotāpattimagge, evaṃ sesamaggesupīti kusalavaseneva vīsati nayasahassāni. Vipāke pana sammappadhānehi kattabbakiccaṃ natthīti vipākavāro na gahitoti. Sammappadhānāni panettha nibbattitalokuttarāneva kathitānīti veditabbāni.
അഭിധമ്മഭാജനീയവണ്ണനാ.
Abhidhammabhājanīyavaṇṇanā.
Related texts:
തിപിടക (മൂല) • Tipiṭaka (Mūla) / അഭിധമ്മപിടക • Abhidhammapiṭaka / വിഭങ്ഗപാളി • Vibhaṅgapāḷi / ൮. സമ്മപ്പധാനവിഭങ്ഗോ • 8. Sammappadhānavibhaṅgo
