| Library / Tipiṭaka / തിപിടക • Tipiṭaka / സമ്മോഹവിനോദനീ-അട്ഠകഥാ • Sammohavinodanī-aṭṭhakathā |
൨. അഭിധമ്മഭാജനീയവണ്ണനാ
2. Abhidhammabhājanīyavaṇṇanā
൪൭൨. അഭിധമ്മഭാജനീയേ സത്തപി ബോജ്ഝങ്ഗേ ഏകതോ പുച്ഛിത്വാ വിസ്സജ്ജനസ്സ ച പാടിയേക്കം പുച്ഛിത്വാ വിസ്സജ്ജനസ്സ ച വസേന ദ്വേ നയാ. തേസം അത്ഥവണ്ണനാ ഹേട്ഠാ വുത്തനയേനേവ വേദിതബ്ബാ.
472. Abhidhammabhājanīye sattapi bojjhaṅge ekato pucchitvā vissajjanassa ca pāṭiyekkaṃ pucchitvā vissajjanassa ca vasena dve nayā. Tesaṃ atthavaṇṇanā heṭṭhā vuttanayeneva veditabbā.
ഉപേക്ഖാസമ്ബോജ്ഝങ്ഗനിദ്ദേസേ പന ഉപേക്ഖനവസേന ഉപേക്ഖാ. ഉപേക്ഖനാകാരോ ഉപേക്ഖനാ. ഉപേക്ഖിതബ്ബയുത്തേ സമപ്പവത്തേ ധമ്മേ ഇക്ഖതി, ന ചോദേതീതി ഉപേക്ഖാ. പുഗ്ഗലം ഉപേക്ഖാപേതീതി ഉപേക്ഖനാ . ബോജ്ഝങ്ഗഭാവപ്പത്തിയാ ലോകിയഉപേക്ഖനായ അധികാ ഉപേക്ഖനാ അജ്ഝുപേക്ഖനാ. അബ്യാപാരാപജ്ജനേന മജ്ഝത്തഭാവോ മജ്ഝത്തതാ. സാ പന ചിത്തസ്സ, ന സത്തസ്സാതി ദീപേതും മജ്ഝത്തതാ ചിത്തസ്സാതി വുത്തന്തി. അയമേത്ഥ അനുപുബ്ബപദവണ്ണനാ.
Upekkhāsambojjhaṅganiddese pana upekkhanavasena upekkhā. Upekkhanākāro upekkhanā. Upekkhitabbayutte samappavatte dhamme ikkhati, na codetīti upekkhā. Puggalaṃ upekkhāpetīti upekkhanā . Bojjhaṅgabhāvappattiyā lokiyaupekkhanāya adhikā upekkhanā ajjhupekkhanā. Abyāpārāpajjanena majjhattabhāvo majjhattatā. Sā pana cittassa, na sattassāti dīpetuṃ majjhattatā cittassāti vuttanti. Ayamettha anupubbapadavaṇṇanā.
നയാ പനേത്ഥ ഗണേതബ്ബാ – സത്തന്നമ്പി ഹി ബോജ്ഝങ്ഗാനം ഏകതോ പുച്ഛിത്വാ വിസ്സജ്ജനേ ഏകേകമഗ്ഗേ നയസഹസ്സം നയസഹസ്സന്തി ചത്താരി നയസഹസ്സാനി വിഭത്താനി. പാടിയേക്കം പുച്ഛിത്വാ വിസ്സജ്ജനേ ഏകേകബോജ്ഝങ്ഗവസേന ചത്താരി ചത്താരീതി സത്ത ചതുക്കാ അട്ഠവീസതി. താനി പുരിമേഹി ചതൂഹി സദ്ധിം ദ്വത്തിംസാതി സബ്ബാനിപി അഭിധമ്മഭാജനീയേ ദ്വത്തിംസ നയസഹസ്സാനി വിഭത്താനി കുസലാനേവ. യസ്മാ പന ഫലക്ഖണേപി ബോജ്ഝങ്ഗാ ലബ്ഭന്തി, കുസലഹേതുകാനി ച സാമഞ്ഞഫലാനി, തസ്മാ തേസുപി ബോജ്ഝങ്ഗദസ്സനത്ഥം കുസലനിദ്ദേസപുബ്ബങ്ഗമായ ഏവ തന്തിയാ വിപാകനയോ ആരദ്ധോ. സോപി ഏകതോ പുച്ഛിത്വാ വിസ്സജ്ജനസ്സ ച, പാടിയേക്കം പുച്ഛിത്വാ വിസ്സജ്ജനസ്സ ച വസേന ദുവിധോ ഹോതി. സേസമേത്ഥ ഹേട്ഠാ വുത്തനയേനേവ വേദിതബ്ബം. വിപാകേ പന കുസലതോ തിഗുണാ നയാ കാതബ്ബാതി.
Nayā panettha gaṇetabbā – sattannampi hi bojjhaṅgānaṃ ekato pucchitvā vissajjane ekekamagge nayasahassaṃ nayasahassanti cattāri nayasahassāni vibhattāni. Pāṭiyekkaṃ pucchitvā vissajjane ekekabojjhaṅgavasena cattāri cattārīti satta catukkā aṭṭhavīsati. Tāni purimehi catūhi saddhiṃ dvattiṃsāti sabbānipi abhidhammabhājanīye dvattiṃsa nayasahassāni vibhattāni kusalāneva. Yasmā pana phalakkhaṇepi bojjhaṅgā labbhanti, kusalahetukāni ca sāmaññaphalāni, tasmā tesupi bojjhaṅgadassanatthaṃ kusalaniddesapubbaṅgamāya eva tantiyā vipākanayo āraddho. Sopi ekato pucchitvā vissajjanassa ca, pāṭiyekkaṃ pucchitvā vissajjanassa ca vasena duvidho hoti. Sesamettha heṭṭhā vuttanayeneva veditabbaṃ. Vipāke pana kusalato tiguṇā nayā kātabbāti.
അഭിധമ്മഭാജനീയവണ്ണനാ.
Abhidhammabhājanīyavaṇṇanā.
Related texts:
തിപിടക (മൂല) • Tipiṭaka (Mūla) / അഭിധമ്മപിടക • Abhidhammapiṭaka / വിഭങ്ഗപാളി • Vibhaṅgapāḷi / ൧൦. ബോജ്ഝങ്ഗവിഭങ്ഗോ • 10. Bojjhaṅgavibhaṅgo
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / വിഭങ്ഗ-മൂലടീകാ • Vibhaṅga-mūlaṭīkā / ൧൦. ബോജ്ഝങ്ഗവിഭങ്ഗോ • 10. Bojjhaṅgavibhaṅgo
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / വിഭങ്ഗ-അനുടീകാ • Vibhaṅga-anuṭīkā / ൧൦. ബോജ്ഝങ്ഗവിഭങ്ഗോ • 10. Bojjhaṅgavibhaṅgo
