| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๑๑. อภิชานนฺตสติปโญฺห
11. Abhijānantasatipañho
๑๑. ราชา อาห ‘‘ภเนฺต นาคเสน, สพฺพา สติ อภิชานนฺตี อุปฺปชฺชติ , อุทาหุ กฎุมิกาว สตี’’ติ? ‘‘อภิชานนฺตีปิ, มหาราช, กฎุมิกาปิ สตี’’ติฯ ‘‘เอวญฺหิ โข, ภเนฺต นาคเสน, สพฺพา สติ อภิชานนฺตี, นตฺถิ กฎุมิกา สตี’’ติ? ‘‘ยทิ นตฺถิ, มหาราช, กฎุมิกา สติ, นตฺถิ กิญฺจิ สิปฺปิกานํ กมฺมายตเนหิ วา สิปฺปายตเนหิ วา วิชฺชาฎฺฐาเนหิ วา กรณียํ, นิรตฺถกา อาจริยา, ยสฺมา จ โข, มหาราช, อตฺถิ กฎุมิกา สติ, ตสฺมา อตฺถิ กมฺมายตเนหิ วา สิปฺปายตเนหิ วา วิชฺชาฎฺฐาเนหิ วา กรณียํ, อโตฺถ จ อาจริเยหี’’ติฯ
11. Rājā āha ‘‘bhante nāgasena, sabbā sati abhijānantī uppajjati , udāhu kaṭumikāva satī’’ti? ‘‘Abhijānantīpi, mahārāja, kaṭumikāpi satī’’ti. ‘‘Evañhi kho, bhante nāgasena, sabbā sati abhijānantī, natthi kaṭumikā satī’’ti? ‘‘Yadi natthi, mahārāja, kaṭumikā sati, natthi kiñci sippikānaṃ kammāyatanehi vā sippāyatanehi vā vijjāṭṭhānehi vā karaṇīyaṃ, niratthakā ācariyā, yasmā ca kho, mahārāja, atthi kaṭumikā sati, tasmā atthi kammāyatanehi vā sippāyatanehi vā vijjāṭṭhānehi vā karaṇīyaṃ, attho ca ācariyehī’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
อภิชานนฺตสติปโญฺห เอกาทสโมฯ
Abhijānantasatipañho ekādasamo.
สติวโคฺค ฉโฎฺฐฯ
Sativaggo chaṭṭho.
อิมสฺมิํ วเคฺค เอกาทส ปญฺหาฯ
Imasmiṃ vagge ekādasa pañhā.
