| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
৩. চূল়ৰগ্গো
3. Cūḷavaggo
১. অভিজ্জমানপেতৰত্থুৰণ্ণনা
1. Abhijjamānapetavatthuvaṇṇanā
অভিজ্জমানে ৰারিম্হীতি ইদং সত্থরি ৰেল়ুৰনে ৰিহরন্তে অঞ্ঞতরং লুদ্দপেতং আরব্ভ ৰুত্তং। বারাণসিযং কির অপরদিসাভাগে পারগঙ্গায ৰাসভগামং অতিক্কমিত্ৰা চুন্দট্ঠিলনামকে গামে একো লুদ্দকো অহোসি। সো অরঞ্ঞে মিগে ৰধিত্ৰা ৰরমংসং অঙ্গারে পচিত্ৰা খাদিত্ৰা অৰসেসং পণ্ণপুটে বন্ধিত্ৰা কাজেন গহেত্ৰা গামং আগচ্ছতি। তং বালদারকা গামদ্ৰারে দিস্ৰা ‘‘মংসং মে দেহি, মংসং মে দেহী’’তি হত্থে পসারেত্ৰা উপধাৰন্তি। সো তেসং থোকং থোকং মংসং দেতি। অথেকদিৰসং মংসং অলভিত্ৰা উদ্দালকপুপ্ফং পিল়ন্ধিত্ৰা বহুঞ্চ হত্থেন গহেত্ৰা গামং গচ্ছন্তং তং দারকা গামদ্ৰারে দিস্ৰা ‘‘মংসং মে দেহি, মংসং মে দেহী’’তি হত্থে পসারেত্ৰা উপধাৰিংসু। সো তেসং একেকং পুপ্ফমঞ্জরিং অদাসি।
Abhijjamānevārimhīti idaṃ satthari veḷuvane viharante aññataraṃ luddapetaṃ ārabbha vuttaṃ. Bārāṇasiyaṃ kira aparadisābhāge pāragaṅgāya vāsabhagāmaṃ atikkamitvā cundaṭṭhilanāmake gāme eko luddako ahosi. So araññe mige vadhitvā varamaṃsaṃ aṅgāre pacitvā khāditvā avasesaṃ paṇṇapuṭe bandhitvā kājena gahetvā gāmaṃ āgacchati. Taṃ bāladārakā gāmadvāre disvā ‘‘maṃsaṃ me dehi, maṃsaṃ me dehī’’ti hatthe pasāretvā upadhāvanti. So tesaṃ thokaṃ thokaṃ maṃsaṃ deti. Athekadivasaṃ maṃsaṃ alabhitvā uddālakapupphaṃ piḷandhitvā bahuñca hatthena gahetvā gāmaṃ gacchantaṃ taṃ dārakā gāmadvāre disvā ‘‘maṃsaṃ me dehi, maṃsaṃ me dehī’’ti hatthe pasāretvā upadhāviṃsu. So tesaṃ ekekaṃ pupphamañjariṃ adāsi.
অথ অপরেন সমযেন কালং কত্ৰা পেতেসু নিব্বত্তো নগ্গো ৰিরূপরূপো ভযানকদস্সনো সুপিনেপি অন্নপানং অজানন্তো সীসে আবন্ধিতউদ্দালককুসুমমালাকলাপো ‘‘চুন্দট্ঠিলাযং ঞাতকানং সন্তিকে কিঞ্চি লভিস্সামী’’তি গঙ্গায উদকে অভিজ্জমানে পটিসোতং পদসা গচ্ছতি। তেন চ সমযেন কোলিযো নাম রঞ্ঞো বিম্বিসারস্স মহামত্তো কুপিতং পচ্চন্তং ৰূপসমেত্ৰা পটিনিৰত্তেন্তো হত্থিঅস্সাদিপরিৰারবলং থলপথেন পেসেত্ৰা সযং গঙ্গায নদিযা অনুসোতং নাৰায আগচ্ছন্তো তং পেতং তথা গচ্ছন্তং দিস্ৰা পুচ্ছন্তো –
Atha aparena samayena kālaṃ katvā petesu nibbatto naggo virūparūpo bhayānakadassano supinepi annapānaṃ ajānanto sīse ābandhitauddālakakusumamālākalāpo ‘‘cundaṭṭhilāyaṃ ñātakānaṃ santike kiñci labhissāmī’’ti gaṅgāya udake abhijjamāne paṭisotaṃ padasā gacchati. Tena ca samayena koliyo nāma rañño bimbisārassa mahāmatto kupitaṃ paccantaṃ vūpasametvā paṭinivattento hatthiassādiparivārabalaṃ thalapathena pesetvā sayaṃ gaṅgāya nadiyā anusotaṃ nāvāya āgacchanto taṃ petaṃ tathā gacchantaṃ disvā pucchanto –
৩৮৭.
387.
‘‘অভিজ্জমানে ৰারিম্হি, গঙ্গায ইধ গচ্ছসি।
‘‘Abhijjamāne vārimhi, gaṅgāya idha gacchasi;
নগ্গো পুব্বদ্ধপেতোৰ, মালধারী অলঙ্কতো।
Naggo pubbaddhapetova, māladhārī alaṅkato;
কুহিং গমিস্সসি পেত, কত্থ ৰাসো ভৰিস্সতী’’তি॥ –
Kuhiṃ gamissasi peta, kattha vāso bhavissatī’’ti. –
গাথমাহ। তত্থ অভিজ্জমানেতি পদনিক্খেপেন অভিজ্জমানে সঙ্ঘাতে, ৰারিম্হি গঙ্গাযাতি গঙ্গায নদিযা উদকে। ইধাতি ইমস্মিং ঠানে। পুব্বদ্ধপেতোৰাতি কাযস্স পুরিমদ্ধেন অপেতো ৰিয অপেতযোনিকো দেৰপুত্তো ৰিয। কথং? মালধারী অলঙ্কতোতি, মালাহি পিল়ন্ধিত্ৰা অলঙ্কতসীসগ্গোতি অত্থো। কত্থ ৰাসো ভৰিস্সতীতি কতরস্মিং গামে দেসে ৰা তুয্হং নিৰাসো ভৰিস্সতি, তং কথেহীতি অত্থো।
Gāthamāha. Tattha abhijjamāneti padanikkhepena abhijjamāne saṅghāte, vārimhi gaṅgāyāti gaṅgāya nadiyā udake. Idhāti imasmiṃ ṭhāne. Pubbaddhapetovāti kāyassa purimaddhena apeto viya apetayoniko devaputto viya. Kathaṃ? Māladhārī alaṅkatoti, mālāhi piḷandhitvā alaṅkatasīsaggoti attho. Kattha vāso bhavissatīti katarasmiṃ gāme dese vā tuyhaṃ nivāso bhavissati, taṃ kathehīti attho.
ইদানি যং তদা তেন পেতেন কোলিযেন চ ৰুত্তং, তং দস্সেতুং সঙ্গীতিকারা –
Idāni yaṃ tadā tena petena koliyena ca vuttaṃ, taṃ dassetuṃ saṅgītikārā –
৩৮৮.
388.
‘‘চুন্দট্ঠিলং গমিস্সামি, পেতো সো ইতি ভাসতি।
‘‘Cundaṭṭhilaṃ gamissāmi, peto so iti bhāsati;
অন্তরে ৰাসভগামং, বারাণসিঞ্চ সন্তিকে॥
Antare vāsabhagāmaṃ, bārāṇasiñca santike.
৩৮৯.
389.
‘‘তঞ্চ দিস্ৰা মহামত্তো, কোলিযো ইতি ৰিস্সুতো।
‘‘Tañca disvā mahāmatto, koliyo iti vissuto;
সত্তুং ভত্তঞ্চ পেতস্স, পীতকঞ্চ যুগং অদা॥
Sattuṃ bhattañca petassa, pītakañca yugaṃ adā.
৩৯০.
390.
‘‘নাৰায তিট্ঠমানায, কপ্পকস্স অদাপযি।
‘‘Nāvāya tiṭṭhamānāya, kappakassa adāpayi;
কপ্পকস্স পদিন্নম্হি, ঠানে পেতস্স দিস্সথ॥
Kappakassa padinnamhi, ṭhāne petassa dissatha.
৩৯১.
391.
‘‘ততো সুৰত্থৰসনো, মালধারী অলঙ্কতো।
‘‘Tato suvatthavasano, māladhārī alaṅkato;
ঠানে ঠিতস্স পেতস্স, দক্খিণা উপকপ্পথ।
Ṭhāne ṭhitassa petassa, dakkhiṇā upakappatha;
তস্মা দজ্জেথ পেতানং, অনুকম্পায পুনপ্পুন’’ন্তি॥ – গাথাযো অৰোচুং।
Tasmā dajjetha petānaṃ, anukampāya punappuna’’nti. – gāthāyo avocuṃ;
৩৮৮. তত্থ চুন্দট্ঠিলন্তি এৰংনামকং গামং। অন্তরে ৰাসভগামং, বারাণসিঞ্চ সন্তিকেতি ৰাসভগামস্স চ বারাণসিযা চ ৰেমজ্ঝে। অন্তরা-সদ্দযোগেন হেতং সাম্যত্থে উপযোগৰচনং। বারাণসিযা সন্তিকে হি সো গামোতি। অযঞ্হেত্থ অত্থো – অন্তরে ৰাসভগামস্স চ বারাণসিযা চ যো চুন্দট্ঠিলনামকো গামো বারাণসিযা অৰিদূরে, তং গামং গমিস্সামীতি।
388. Tattha cundaṭṭhilanti evaṃnāmakaṃ gāmaṃ. Antare vāsabhagāmaṃ, bārāṇasiñca santiketi vāsabhagāmassa ca bārāṇasiyā ca vemajjhe. Antarā-saddayogena hetaṃ sāmyatthe upayogavacanaṃ. Bārāṇasiyā santike hi so gāmoti. Ayañhettha attho – antare vāsabhagāmassa ca bārāṇasiyā ca yo cundaṭṭhilanāmako gāmo bārāṇasiyā avidūre, taṃ gāmaṃ gamissāmīti.
৩৮৯. কোলিযো ইতি ৰিস্সুতোতি কোলিযোতি এৰংপকাসিতনামো। সত্তুং ভত্তঞ্চাতি সত্তুঞ্চেৰ ভত্তঞ্চ। পীতকঞ্চ যুগং অদাতি পীতকং সুৰণ্ণৰণ্ণং একং ৰত্থযুগঞ্চ অদাসি।
389.Koliyo iti vissutoti koliyoti evaṃpakāsitanāmo. Sattuṃ bhattañcāti sattuñceva bhattañca. Pītakañca yugaṃ adāti pītakaṃ suvaṇṇavaṇṇaṃ ekaṃ vatthayugañca adāsi.
৩৯০. কদা অদাসীতি চে আহ নাৰায তিট্ঠমানায। কপ্পকস্স অদাপযীতি গচ্ছন্তিং নাৰং ঠপেত্ৰা তত্থ একস্স ন্হাপিতস্স উপাসকস্স দাপেসি , দিন্নম্হি ৰত্থযুগেতি যোজনা। ঠানেতি ঠানসো তঙ্খণঞ্ঞেৰ। পেতস্স দিস্সথাতি পেতস্স সরীরে পঞ্ঞাযিত্থ, তস্স নিৰাসনপারুপনৰত্থং সম্পজ্জি। তেনাহ ‘‘ততো সুৰত্থৰসনো, মালধারী অলঙ্কতো’’তি, সুৰত্থৰসনো মালাভরণেহি সুমণ্ডিতপসাধিতো। ঠানে ঠিতস্স পেতস্স, দক্খিণা উপকপ্পথাতি দক্খিণেয্যট্ঠানে ঠিতা পনেসা দক্খিণা তস্স পেতস্স যস্মা উপকপ্পতি, ৰিনিযোগং অগমাসি। তস্মা দজ্জেথ পেতানং, অনুকম্পায পুনপ্পুনন্তি পেতানং অনুকম্পায পেতে উদ্দিস্স পুনপ্পুনং দক্খিণং দদেয্যাতি অত্থো।
390. Kadā adāsīti ce āha nāvāya tiṭṭhamānāya. Kappakassa adāpayīti gacchantiṃ nāvaṃ ṭhapetvā tattha ekassa nhāpitassa upāsakassa dāpesi , dinnamhi vatthayugeti yojanā. Ṭhāneti ṭhānaso taṅkhaṇaññeva. Petassa dissathāti petassa sarīre paññāyittha, tassa nivāsanapārupanavatthaṃ sampajji. Tenāha ‘‘tato suvatthavasano, māladhārī alaṅkato’’ti, suvatthavasano mālābharaṇehi sumaṇḍitapasādhito. Ṭhāne ṭhitassa petassa, dakkhiṇā upakappathāti dakkhiṇeyyaṭṭhāne ṭhitā panesā dakkhiṇā tassa petassa yasmā upakappati, viniyogaṃ agamāsi. Tasmā dajjetha petānaṃ, anukampāya punappunanti petānaṃ anukampāya pete uddissa punappunaṃ dakkhiṇaṃ dadeyyāti attho.
অথ সো কোলিযমহামত্তো তং পেতং অনুকম্পমানো দানৰিধিং সম্পাদেত্ৰা অনুসোতং আগন্ত্ৰা সূরিযে উগ্গচ্ছন্তে বারাণসিং সম্পাপুণি। ভগৰা চ তেসং অনুগ্গহত্থং আকাসেন আগন্ত্ৰা গঙ্গাতীরে অট্ঠাসি। কোলিযমহামত্তোপি নাৰাতো ওতরিত্ৰা হট্ঠপহট্ঠো ভগৰন্তং নিমন্তেসি – ‘‘অধিৰাসেথ মে, ভন্তে, ভগৰা অজ্জতনায ভত্তং অনুকম্পং উপাদাযা’’তি। অধিৰাসেসি ভগৰা তুণ্হীভাৰেন। সো ভগৰতো অধিৰাসনং ৰিদিত্ৰা তাৰদেৰ রমণীযে ভূমিভাগে মহন্তং সাখামণ্ডপং উপরি চতূসু চ পস্সেসু নানাৰিরাগৰণ্ণৰিচিত্তৰিৰিধৰসনসমলঙ্কতং কারেত্ৰা তত্থ ভগৰতো আসনং পঞ্ঞাপেত্ৰা অদাসি। নিসীদি ভগৰা পঞ্ঞত্তে আসনে।
Atha so koliyamahāmatto taṃ petaṃ anukampamāno dānavidhiṃ sampādetvā anusotaṃ āgantvā sūriye uggacchante bārāṇasiṃ sampāpuṇi. Bhagavā ca tesaṃ anuggahatthaṃ ākāsena āgantvā gaṅgātīre aṭṭhāsi. Koliyamahāmattopi nāvāto otaritvā haṭṭhapahaṭṭho bhagavantaṃ nimantesi – ‘‘adhivāsetha me, bhante, bhagavā ajjatanāya bhattaṃ anukampaṃ upādāyā’’ti. Adhivāsesi bhagavā tuṇhībhāvena. So bhagavato adhivāsanaṃ viditvā tāvadeva ramaṇīye bhūmibhāge mahantaṃ sākhāmaṇḍapaṃ upari catūsu ca passesu nānāvirāgavaṇṇavicittavividhavasanasamalaṅkataṃ kāretvā tattha bhagavato āsanaṃ paññāpetvā adāsi. Nisīdi bhagavā paññatte āsane.
অথ সো মহামত্তো ভগৰন্তং উপসঙ্কমিত্ৰা গন্ধপুপ্ফাদীহি পূজেত্ৰা ৰন্দিত্ৰা একমন্তং নিসিন্নো হেট্ঠা অত্তনো ৰুত্তৰচনং পেতস্স চ পটিৰচনং ভগৰতো আরোচেসি। ভগৰা ‘‘ভিক্খুসঙ্ঘো আগচ্ছতূ’’তি চিন্তেসি। চিন্তিতসমনন্তরমেৰ বুদ্ধানুভাৰসঞ্চোদিতো সুৰণ্ণহংসগণো ৰিয ধতরট্ঠহংসরাজং ভিক্খুসঙ্ঘো ধম্মরাজং সম্পরিৰারেসি। তাৰদেৰ মহাজনো সন্নিপতি ‘‘উল়ারা ধম্মদেসনা ভৰিস্সতী’’তি। তং দিস্ৰা পসন্নমানসো মহামত্তো বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সন্তপ্পেসি। ভগৰা কতভত্তকিচ্চো মহাজনস্স অনুকম্পায ‘‘বারাণসিসমীপগামৰাসিনো সন্নিপতন্তূ’’তি অধিট্ঠাসি। সব্বে চ তে ইদ্ধিবলেন মহাজনা সন্নিপতিংসু, উল়ারে চস্স পেতে পাকটে অকাসি। তেসু কেচি ছিন্নভিন্নপিলোতিকখণ্ডধরা, কেচি অত্তনো কেসেহেৰ পটিচ্ছাদিতকোপিনা, কেচি নগ্গা যথাজাতরূপা খুপ্পিপাসাভিভূতা তচপরিযোনদ্ধা অট্ঠিমত্তসরীরা ইতো চিতো চ পরিব্ভমন্তা মহাজনস্স পচ্চক্খতো পঞ্ঞাযিংসু।
Atha so mahāmatto bhagavantaṃ upasaṅkamitvā gandhapupphādīhi pūjetvā vanditvā ekamantaṃ nisinno heṭṭhā attano vuttavacanaṃ petassa ca paṭivacanaṃ bhagavato ārocesi. Bhagavā ‘‘bhikkhusaṅgho āgacchatū’’ti cintesi. Cintitasamanantarameva buddhānubhāvasañcodito suvaṇṇahaṃsagaṇo viya dhataraṭṭhahaṃsarājaṃ bhikkhusaṅgho dhammarājaṃ samparivāresi. Tāvadeva mahājano sannipati ‘‘uḷārā dhammadesanā bhavissatī’’ti. Taṃ disvā pasannamānaso mahāmatto buddhappamukhaṃ bhikkhusaṅghaṃ paṇītena khādanīyena bhojanīyena santappesi. Bhagavā katabhattakicco mahājanassa anukampāya ‘‘bārāṇasisamīpagāmavāsino sannipatantū’’ti adhiṭṭhāsi. Sabbe ca te iddhibalena mahājanā sannipatiṃsu, uḷāre cassa pete pākaṭe akāsi. Tesu keci chinnabhinnapilotikakhaṇḍadharā, keci attano keseheva paṭicchāditakopinā, keci naggā yathājātarūpā khuppipāsābhibhūtā tacapariyonaddhā aṭṭhimattasarīrā ito cito ca paribbhamantā mahājanassa paccakkhato paññāyiṃsu.
অথ ভগৰা তথারূপং ইদ্ধাভিসঙ্খারং অভিসঙ্খাসি, যথা তে একজ্ঝং সন্নিপতিত্ৰা অত্তনা কতং পাপকম্মং মহাজনস্স পৰেদেসুং। তমত্থং দীপেন্তা সঙ্গীতিকারা –
Atha bhagavā tathārūpaṃ iddhābhisaṅkhāraṃ abhisaṅkhāsi, yathā te ekajjhaṃ sannipatitvā attanā kataṃ pāpakammaṃ mahājanassa pavedesuṃ. Tamatthaṃ dīpentā saṅgītikārā –
৩৯২.
392.
‘‘সাতুন্নৰসনা একে, অঞ্ঞে কেসনিৰাসনা।
‘‘Sātunnavasanā eke, aññe kesanivāsanā;
পেতা ভত্তায গচ্ছন্তি, পক্কমন্তি দিসোদিসং॥
Petā bhattāya gacchanti, pakkamanti disodisaṃ.
৩৯৩.
393.
‘‘দূরে একে পধাৰিত্ৰা, অলদ্ধাৰ নিৰত্তরে।
‘‘Dūre eke padhāvitvā, aladdhāva nivattare;
ছাতা পমুচ্ছিতা ভন্তা, ভূমিযং পটিসুম্ভিতা॥
Chātā pamucchitā bhantā, bhūmiyaṃ paṭisumbhitā.
৩৯৪.
394.
‘‘কেচি তত্থ পপতিত্ৰা, ভূমিযং পটিসুম্ভিতা।
‘‘Keci tattha papatitvā, bhūmiyaṃ paṭisumbhitā;
পুব্বে অকতকল্যাণা, অগ্গিদড্ঢাৰ আতপে॥
Pubbe akatakalyāṇā, aggidaḍḍhāva ātape.
৩৯৫.
395.
‘‘মযং পুব্বে পাপধম্মা, ঘরণী কুলমাতরো।
‘‘Mayaṃ pubbe pāpadhammā, gharaṇī kulamātaro;
সন্তেসু দেয্যধম্মেসু, দীপং নাকম্হ অত্তনো॥
Santesu deyyadhammesu, dīpaṃ nākamha attano.
৩৯৬.
396.
‘‘পহূতং অন্নপানম্পি, অপিস্সু অৰকিরীযতি।
‘‘Pahūtaṃ annapānampi, apissu avakirīyati;
সম্মগ্গতে পব্বজিতে, ন চ কিঞ্চি অদম্হসে॥
Sammaggate pabbajite, na ca kiñci adamhase.
৩৯৭.
397.
‘‘অকম্মকামা অলসা, সাদুকামা মহগ্ঘসা।
‘‘Akammakāmā alasā, sādukāmā mahagghasā;
আলোপপিণ্ডদাতারো, পটিগ্গহে পরিভাসিম্হসে॥
Ālopapiṇḍadātāro, paṭiggahe paribhāsimhase.
৩৯৮.
398.
‘‘তে ঘরা তা চ দাসিযো, তানেৰাভরণানি নো।
‘‘Te gharā tā ca dāsiyo, tānevābharaṇāni no;
তে অঞ্ঞে পরিচারেন্তি, মযং দুক্খস্স ভাগিনো॥
Te aññe paricārenti, mayaṃ dukkhassa bhāgino.
৩৯৯.
399.
‘‘ৰেণী ৰা অৰঞ্ঞা হোন্তি, রথকারী চ দুব্ভিকা।
‘‘Veṇī vā avaññā honti, rathakārī ca dubbhikā;
চণ্ডালী কপণা হোন্তি, কপ্পকা চ পুনপ্পুনং॥
Caṇḍālī kapaṇā honti, kappakā ca punappunaṃ.
৪০০.
400.
‘‘যানি যানি নিহীনানি, কুলানি কপণানি চ।
‘‘Yāni yāni nihīnāni, kulāni kapaṇāni ca;
তেসু তেস্ৰেৰ জাযন্তি, এসা মচ্ছরিনো গতি॥
Tesu tesveva jāyanti, esā maccharino gati.
৪০১.
401.
‘‘পুব্বে চ কতকল্যাণা, দাযকা ৰীতমচ্ছরা।
‘‘Pubbe ca katakalyāṇā, dāyakā vītamaccharā;
সগ্গং তে পরিপূরেন্তি, ওভাসেন্তি চ নন্দনং॥
Saggaṃ te paripūrenti, obhāsenti ca nandanaṃ.
৪০২.
402.
‘‘ৰেজযন্তে চ পাসাদে, রমিত্ৰা কামকামিনো।
‘‘Vejayante ca pāsāde, ramitvā kāmakāmino;
উচ্চাকুলেসু জাযন্তি, সভোগেসু ততো চুতা॥
Uccākulesu jāyanti, sabhogesu tato cutā.
৪০৩.
403.
‘‘কূটাগারে চ পাসাদে, পল্লঙ্কে পোনকত্থতে।
‘‘Kūṭāgāre ca pāsāde, pallaṅke ponakatthate;
বীজিতঙ্গা মোরহত্থেহি, কুলে জাতা যসস্সিনো॥
Bījitaṅgā morahatthehi, kule jātā yasassino.
৪০৪.
404.
‘‘অঙ্কতো অঙ্কং গচ্ছন্তি, মালধারী অলঙ্কতা।
‘‘Aṅkato aṅkaṃ gacchanti, māladhārī alaṅkatā;
ধাতিযো উপতিট্ঠন্তি, সাযং পাতং সুখেসিনো॥
Dhātiyo upatiṭṭhanti, sāyaṃ pātaṃ sukhesino.
৪০৫.
405.
‘‘নযিদং অকতপুঞ্ঞানং, কতপুঞ্ঞানমেৰিদং।
‘‘Nayidaṃ akatapuññānaṃ, katapuññānamevidaṃ;
অসোকং নন্দনং রম্মং, তিদসানং মহাৰনং॥
Asokaṃ nandanaṃ rammaṃ, tidasānaṃ mahāvanaṃ.
৪০৬.
406.
‘‘সুখং অকতপুঞ্ঞানং, ইধ নত্থি পরত্থ চ।
‘‘Sukhaṃ akatapuññānaṃ, idha natthi parattha ca;
সুখঞ্চ কতপুঞ্ঞানং, ইধ চেৰ পরত্থ চ॥
Sukhañca katapuññānaṃ, idha ceva parattha ca.
৪০৭.
407.
‘‘তেসং সহব্যকামানং, কত্তব্বং কুসলং বহুং।
‘‘Tesaṃ sahabyakāmānaṃ, kattabbaṃ kusalaṃ bahuṃ;
কতপুঞ্ঞা হি মোদন্তি, সগ্গে ভোগসমঙ্গিনো’’তি॥ – গাথাযো অৰোচুং।
Katapuññā hi modanti, sagge bhogasamaṅgino’’ti. – gāthāyo avocuṃ;
৩৯২. তত্থ সাতুন্নৰসনাতি ছিন্নভিন্নপিলোতিকখণ্ডনিৰাসনা। একেতি একচ্চে। কেসনিৰাসনাতি কেসেহেৰ পটিচ্ছাদিতকোপিনা। ভত্তায গচ্ছন্তীতি ‘‘অপ্পেৰ নাম ইতো গতা যত্থ ৰা তত্থ ৰা কিঞ্চি উচ্ছিট্ঠভত্তং ৰা ৰমিতভত্তং ৰা গব্ভমলাদিকং ৰা লভেয্যামা’’তি কত্থচিদেৰ অট্ঠত্ৰা ঘাসত্থায গচ্ছন্তি। পক্কমন্তি দিসোদিসন্তি দিসতো দিসং অনেকযোজনন্তরিকং ঠানং পক্কমন্তি।
392. Tattha sātunnavasanāti chinnabhinnapilotikakhaṇḍanivāsanā. Eketi ekacce. Kesanivāsanāti keseheva paṭicchāditakopinā. Bhattāya gacchantīti ‘‘appeva nāma ito gatā yattha vā tattha vā kiñci ucchiṭṭhabhattaṃ vā vamitabhattaṃ vā gabbhamalādikaṃ vā labheyyāmā’’ti katthacideva aṭṭhatvā ghāsatthāya gacchanti. Pakkamanti disodisanti disato disaṃ anekayojanantarikaṃ ṭhānaṃ pakkamanti.
৩৯৩. দূরেতি দূরেৰ ঠানে। একেতি একচ্চে পেতা। পধাৰিত্ৰাতি ঘাসত্থায উপধাৰিত্ৰা। অলদ্ধাৰ নিৰত্তরেতি কিঞ্চি ঘাসং ৰা পানীযং ৰা অলভিত্ৰা এৰ নিৰত্তন্তি। পমুচ্ছিতাতি খুপ্পিপাসাদিদুক্খেন সঞ্জাতমুচ্ছা। ভন্তাতি পরিব্ভমন্তা। ভূমিযং পটিসুম্ভিতাতি তায এৰ মুচ্ছায উপ্পত্তিযা ঠত্ৰা অৰক্খিত্তমত্তিকাপিণ্ডা ৰিয ৰিস্সুস্সিত্ৰা পথৰিযং পতিতা।
393.Dūreti dūreva ṭhāne. Eketi ekacce petā. Padhāvitvāti ghāsatthāya upadhāvitvā. Aladdhāva nivattareti kiñci ghāsaṃ vā pānīyaṃ vā alabhitvā eva nivattanti. Pamucchitāti khuppipāsādidukkhena sañjātamucchā. Bhantāti paribbhamantā. Bhūmiyaṃ paṭisumbhitāti tāya eva mucchāya uppattiyā ṭhatvā avakkhittamattikāpiṇḍā viya vissussitvā pathaviyaṃ patitā.
৩৯৪. তত্থাতি গতট্ঠানে। ভূমিযং পটিসুম্ভিতাতি পপাতে পতিতা ৰিয জিঘচ্ছাদিদুক্খেন ঠাতুং অসমত্থভাৰেন ভূমিযং পতিতা, তত্থ ৰা গতট্ঠানে ঘাসাদীনং অলাভেন ছিন্নাসা হুত্ৰা কেনচি পটিমুখং সুম্ভিতা পোথিতা ৰিয ভূমিযং পতিতা হোন্তীতি অত্থো। পুব্বে অকতকল্যাণাতি পুরিমভৰে অকতকুসলা। অগ্গিদড্ঢাৰ আতপেতি নিদাঘকালে আতপট্ঠানে অগ্গিনা দড্ঢা ৰিয, খুপ্পিপাসগ্গিনা ডয্হমানা মহাদুক্খং অনুভৰন্তীতি অত্থো।
394.Tatthāti gataṭṭhāne. Bhūmiyaṃ paṭisumbhitāti papāte patitā viya jighacchādidukkhena ṭhātuṃ asamatthabhāvena bhūmiyaṃ patitā, tattha vā gataṭṭhāne ghāsādīnaṃ alābhena chinnāsā hutvā kenaci paṭimukhaṃ sumbhitā pothitā viya bhūmiyaṃ patitā hontīti attho. Pubbe akatakalyāṇāti purimabhave akatakusalā. Aggidaḍḍhāva ātapeti nidāghakāle ātapaṭṭhāne agginā daḍḍhā viya, khuppipāsagginā ḍayhamānā mahādukkhaṃ anubhavantīti attho.
৩৯৫. পুব্বেতি অতীতভৰে। পাপধম্মাতি ইস্সুকীমচ্ছরীআদিভাৰেন লামকসভাৰা। ঘরণীতি ঘরসামিনিযো। কুলমাতরোতি কুলদারকানং মাতরো, কুলপুরিসানং ৰা মাতরো। দীপন্তি পতিট্ঠং, পুঞ্ঞন্তি অত্থো। তঞ্হি সত্তানং সুগতীসু পতিট্ঠাভাৰতো ‘‘পতিট্ঠা’’তি ৰুচ্চতি। নাকম্হাতি ন করিম্হ।
395.Pubbeti atītabhave. Pāpadhammāti issukīmaccharīādibhāvena lāmakasabhāvā. Gharaṇīti gharasāminiyo. Kulamātaroti kuladārakānaṃ mātaro, kulapurisānaṃ vā mātaro. Dīpanti patiṭṭhaṃ, puññanti attho. Tañhi sattānaṃ sugatīsu patiṭṭhābhāvato ‘‘patiṭṭhā’’ti vuccati. Nākamhāti na karimha.
৩৯৬. পহূতন্তি বহুং। অন্নপানম্পীতি অন্নঞ্চ পানঞ্চ। অপিস্সু অৰকিরীযতীতি সূতি নিপাতমত্তং, অপি অৰকিরীযতি ছট্টীযতি। সম্মগ্গতেতি সম্মা গতে সম্মা পটিপন্নে সম্মা পটিপন্নায। পব্বজিতেতি পব্বজিতায। সম্পদানে হি ইদং ভুম্মৰচনং। সম্মগ্গতে ৰা পব্বজিতে সতি লব্ভমানেতি অত্থো। ন চ কিঞ্চি অদম্হসেতি ‘‘কিঞ্চিমত্তম্পি দেয্যধম্মং নাদম্হা’’তি ৰিপ্পটিসারাভিভূতা ৰদন্তি।
396.Pahūtanti bahuṃ. Annapānampīti annañca pānañca. Apissu avakirīyatīti sūti nipātamattaṃ, api avakirīyati chaṭṭīyati. Sammaggateti sammā gate sammā paṭipanne sammā paṭipannāya. Pabbajiteti pabbajitāya. Sampadāne hi idaṃ bhummavacanaṃ. Sammaggate vā pabbajite sati labbhamāneti attho. Na ca kiñci adamhaseti ‘‘kiñcimattampi deyyadhammaṃ nādamhā’’ti vippaṭisārābhibhūtā vadanti.
৩৯৭. অকম্মকামাতি সাধূতি অকত্তব্বং কম্মং অকুসলং কামেন্তীতি অকম্মকামা, সাধূহি ৰা কত্তব্বং কুসলং কামেন্তীতি কম্মকামা, ন কম্মকামাতি অকম্মকামা , কুসলধম্মেসু অচ্ছন্দিকাতি অত্থো। অলসাতি কুসীতা কুসলকম্মকরণে নিব্বীরিযা। সাদুকামাতি সাতমধুরৰত্থুপিযা। মহগ্ঘসাতি মহাভোজনা, উভযেনাপি সুন্দরঞ্চ মধুরঞ্চ ভোজনং লভিত্ৰা অত্থিকানং কিঞ্চি অদত্ৰা সযমেৰ ভুঞ্জিতারোতি দস্সেতি। আলোপপিণ্ডদাতারোতি আলোপমত্তস্সপি ভোজনপিণ্ডস্স দাযকা। পটিগ্গহেতি তস্স পটিগ্গণ্হনকে। পরিভাসিম্হসেতি পরিভৰং করোন্তা ভাসিম্হ, অৰমঞ্ঞিম্হ উপ্পণ্ডিম্হা চাতি অত্থো।
397.Akammakāmāti sādhūti akattabbaṃ kammaṃ akusalaṃ kāmentīti akammakāmā, sādhūhi vā kattabbaṃ kusalaṃ kāmentīti kammakāmā, na kammakāmāti akammakāmā , kusaladhammesu acchandikāti attho. Alasāti kusītā kusalakammakaraṇe nibbīriyā. Sādukāmāti sātamadhuravatthupiyā. Mahagghasāti mahābhojanā, ubhayenāpi sundarañca madhurañca bhojanaṃ labhitvā atthikānaṃ kiñci adatvā sayameva bhuñjitāroti dasseti. Ālopapiṇḍadātāroti ālopamattassapi bhojanapiṇḍassa dāyakā. Paṭiggaheti tassa paṭiggaṇhanake. Paribhāsimhaseti paribhavaṃ karontā bhāsimha, avamaññimha uppaṇḍimhā cāti attho.
৩৯৮. তে ঘরাতি যত্থ মযং পুব্বে ‘‘অম্হাকং ঘর’’ন্তি মমত্তং অকরিম্হা, তানি ঘরানি যথাঠিতানি, ইদানি নো ন কিঞ্চি উপকপ্পতীতি অধিপ্পাযো। তা চ দাসিযো তানেৰাভরণানি নোতি এত্থাপি এসেৰ নযো। তত্থ নোতি অম্হাকং। তেতি তে ঘরাদিকে। অঞ্ঞে পরিচারেন্তি, পরিভোগাদিৰসেন ৰিনিযোগং করোন্তীতি অত্থো। মযং দুক্খস্স ভাগিনোতি মযং পন পুব্বে কেৰলং কীল়নপ্পসুতা হুত্ৰা সাপতেয্যং পহায গমনীযং অনুগামিকং কাতুং অজানন্তা ইদানি খুপ্পিপাসাদিদুক্খস্স ভাগিনো ভৰামাতি অত্তানং গরহন্তা ৰদন্তি।
398.Te gharāti yattha mayaṃ pubbe ‘‘amhākaṃ ghara’’nti mamattaṃ akarimhā, tāni gharāni yathāṭhitāni, idāni no na kiñci upakappatīti adhippāyo. Tā ca dāsiyo tānevābharaṇāni noti etthāpi eseva nayo. Tattha noti amhākaṃ. Teti te gharādike. Aññe paricārenti, paribhogādivasena viniyogaṃ karontīti attho. Mayaṃ dukkhassa bhāginoti mayaṃ pana pubbe kevalaṃ kīḷanappasutā hutvā sāpateyyaṃ pahāya gamanīyaṃ anugāmikaṃ kātuṃ ajānantā idāni khuppipāsādidukkhassa bhāgino bhavāmāti attānaṃ garahantā vadanti.
৩৯৯. ইদানি যস্মা পেতযোনিতো চৰিত্ৰা মনুস্সেসু উপ্পজ্জন্তাপি সত্তা যেভুয্যেন তস্সেৰ কম্মস্স ৰিপাকাৰসেসেন হীনজাতিকা কপণৰুত্তিনোৰ হোন্তি, তস্মা তমত্থং দস্সেতুং ‘‘ৰেণিৰা’’তিআদিনা দ্ৰে গাথা ৰুত্তা। তত্থ ৰেণিৰাতি ৰেনজাতিকা, ৰিলীৰকারা নল়কারা হোন্তীতি অত্থো। ৰা-সদ্দো অনিযমত্থো। অৰঞ্ঞাতি অৰঞ্ঞেয্যা, অৰজানিতব্বাতি ৰুত্তং হোতি। ‘‘ৰম্ভনা’’তি ৰা পাঠো, পরেহি বাধনীযাতি অত্থো। রথকারীতি চম্মকারিনো। দুব্ভিকাতি মিত্তদুব্ভিকা মিত্তানং বাধিকা। চণ্ডালীতি চণ্ডালজাতিকা। কপণাতি ৰনিব্বকা অতিৰিয কারুঞ্ঞপ্পত্তা । কপ্পকাতি কপ্পকজাতিকা, সব্বত্থ ‘‘হোন্তি পুনপ্পুন’’ন্তি যোজনা, অপরাপরম্পি ইমেসু নিহীনকুলেসু উপ্পজ্জন্তীতি ৰুত্তং হোতি।
399. Idāni yasmā petayonito cavitvā manussesu uppajjantāpi sattā yebhuyyena tasseva kammassa vipākāvasesena hīnajātikā kapaṇavuttinova honti, tasmā tamatthaṃ dassetuṃ ‘‘veṇivā’’tiādinā dve gāthā vuttā. Tattha veṇivāti venajātikā, vilīvakārā naḷakārā hontīti attho. Vā-saddo aniyamattho. Avaññāti avaññeyyā, avajānitabbāti vuttaṃ hoti. ‘‘Vambhanā’’ti vā pāṭho, parehi bādhanīyāti attho. Rathakārīti cammakārino. Dubbhikāti mittadubbhikā mittānaṃ bādhikā. Caṇḍālīti caṇḍālajātikā. Kapaṇāti vanibbakā ativiya kāruññappattā . Kappakāti kappakajātikā, sabbattha ‘‘honti punappuna’’nti yojanā, aparāparampi imesu nihīnakulesu uppajjantīti vuttaṃ hoti.
৪০০. তেসু তেস্ৰেৰ জাযন্তীতি যানি যানি অঞ্ঞানিপি নেসাদপুক্কুসকুলাদীনি কপণানি অতিৰিয ৰম্ভনিযানি পরমদুগ্গতানি চ, তেসু তেসু এৰ নিহীনকুলেসু মচ্ছরিযমলেন পেতেসু নিব্বত্তিত্ৰা ততো চুতা নিব্বত্তন্তি। তেনাহ ‘‘এসা মচ্ছরিনো গতী’’তি।
400.Tesu tesveva jāyantīti yāni yāni aññānipi nesādapukkusakulādīni kapaṇāni ativiya vambhaniyāni paramaduggatāni ca, tesu tesu eva nihīnakulesu macchariyamalena petesu nibbattitvā tato cutā nibbattanti. Tenāha ‘‘esā maccharino gatī’’ti.
৪০১. এৰং অকতপুঞ্ঞানং সত্তানং গতিং দস্সেত্ৰা ইদানি কতপুঞ্ঞানং গতিং দস্সেতুং ‘‘পুব্বে চ কতকল্যাণা’’তি সত্ত গাথা ৰুত্তা। তত্থ সগ্গং তে পরিপূরেন্তীতি যে পুব্বে পুরিমজাতিযং কতকল্যাণা দাযকা দানপুঞ্ঞাভিরতা ৰিগতমলমচ্ছেরা, তে অত্তনো রূপসম্পত্তিযা চেৰ পরিৰারসম্পত্তিযা চ সগ্গং দেৰলোকং পরিপূরেন্তি পরিপুণ্ণং করোন্তি। ওভাসেন্তি চ নন্দনন্তি ন কেৰলং পরিপূরেন্তিযেৰ, অথ খো কপ্পরুক্খাদীনং পভাহি সভাৰেনেৰ ওভাসমানম্পি নন্দনৰনং অত্তনো ৰত্থাভরণজুতীহি সরীরপ্পভায চ অভিভৰিত্ৰা চেৰ ওভাসেত্ৰা চ জোতেন্তি।
401. Evaṃ akatapuññānaṃ sattānaṃ gatiṃ dassetvā idāni katapuññānaṃ gatiṃ dassetuṃ ‘‘pubbe ca katakalyāṇā’’ti satta gāthā vuttā. Tattha saggaṃ te paripūrentīti ye pubbe purimajātiyaṃ katakalyāṇā dāyakā dānapuññābhiratā vigatamalamaccherā, te attano rūpasampattiyā ceva parivārasampattiyā ca saggaṃ devalokaṃ paripūrenti paripuṇṇaṃ karonti. Obhāsenti ca nandananti na kevalaṃ paripūrentiyeva, atha kho kapparukkhādīnaṃ pabhāhi sabhāveneva obhāsamānampi nandanavanaṃ attano vatthābharaṇajutīhi sarīrappabhāya ca abhibhavitvā ceva obhāsetvā ca jotenti.
৪০২. কামকামিনোতি যথিচ্ছিতেসু কামগুণেসু যথাকামং পরিভোগৰন্তো। উচ্চাকুলেসূতি উচ্চেসু খত্তিযকুলাদীসু কুলেসু। সভোগেসূতি মহাৰিভৰেসু। ততো চুতাতি ততো দেৰলোকতো চুতা।
402.Kāmakāminoti yathicchitesu kāmaguṇesu yathākāmaṃ paribhogavanto. Uccākulesūti uccesu khattiyakulādīsu kulesu. Sabhogesūti mahāvibhavesu. Tato cutāti tato devalokato cutā.
৪০৩. কূটাগারে চ পাসাদেতি কূটাগারে চ পাসাদে চ। বীজিতঙ্গাতি বীজিযমানদেহা। মোরহত্থেহীতি মোরপিঞ্ছপটিমণ্ডিতবীজনীহত্থেহি। যসস্সিনোতি পরিৰারৰন্তো রমন্তীতি অধিপ্পাযো।
403.Kūṭāgāreca pāsādeti kūṭāgāre ca pāsāde ca. Bījitaṅgāti bījiyamānadehā. Morahatthehīti morapiñchapaṭimaṇḍitabījanīhatthehi. Yasassinoti parivāravanto ramantīti adhippāyo.
৪০৪. অঙ্কতো অঙ্কং গচ্ছন্তীতি দারককালেপি ঞাতীনং ধাতীনঞ্চ অঙ্কট্ঠানতো অঙ্কট্ঠানমেৰ গচ্ছন্তি, ন ভূমিতলন্তি অধিপ্পাযো। উপতিট্ঠন্তীতি উপট্ঠানং করোন্তি। সুখেসিনোতি সুখমিচ্ছন্তা, ‘‘মা সীতং ৰা উণ্হং ৰা’’তি অপ্পকম্পি দুক্খং পরিহরন্তা উপতিট্ঠন্তীতি অধিপ্পাযো।
404.Aṅkato aṅkaṃ gacchantīti dārakakālepi ñātīnaṃ dhātīnañca aṅkaṭṭhānato aṅkaṭṭhānameva gacchanti, na bhūmitalanti adhippāyo. Upatiṭṭhantīti upaṭṭhānaṃ karonti. Sukhesinoti sukhamicchantā, ‘‘mā sītaṃ vā uṇhaṃ vā’’ti appakampi dukkhaṃ pariharantā upatiṭṭhantīti adhippāyo.
৪০৫. নযিদং অকতপুঞ্ঞানন্তি ইদং সোকৰত্থুঅভাৰতো অসোকং রম্মং রমণীযং তিদসানং তাৰতিংসদেৰানং মহাৰনং মহাউপৰনভূতং নন্দনং নন্দনৰনং অকতপুঞ্ঞানং ন হোতি, তেহি লদ্ধুং ন সক্কাতি অত্থো।
405.Nayidaṃ akatapuññānanti idaṃ sokavatthuabhāvato asokaṃ rammaṃ ramaṇīyaṃ tidasānaṃ tāvatiṃsadevānaṃ mahāvanaṃ mahāupavanabhūtaṃ nandanaṃ nandanavanaṃ akatapuññānaṃ na hoti, tehi laddhuṃ na sakkāti attho.
৪০৬. ইধাতি ইমস্মিং মনুস্সলোকে ৰিসেসতো পুঞ্ঞং করীযতি, তং সন্ধাযাহ। ইধাতি ৰা দিট্ঠধম্মে। পরত্থাতি সম্পরাযে।
406.Idhāti imasmiṃ manussaloke visesato puññaṃ karīyati, taṃ sandhāyāha. Idhāti vā diṭṭhadhamme. Paratthāti samparāye.
৪০৭. তেসন্তি তেহি যথাৰুত্তেহি দেৰেহি। সহব্যকামানন্তি সহভাৰং ইচ্ছন্তেহি। ভোগসমঙ্গিনোতি ভোগেহি সমন্নাগতা, দিব্বেহি পঞ্চকামগুণেহি সমপ্পিতা মোদন্তীতি অত্থো। সেসং উত্তানত্থমেৰ।
407.Tesanti tehi yathāvuttehi devehi. Sahabyakāmānanti sahabhāvaṃ icchantehi. Bhogasamaṅginoti bhogehi samannāgatā, dibbehi pañcakāmaguṇehi samappitā modantīti attho. Sesaṃ uttānatthameva.
এৰং তেহি পেতেহি সাধারণতো অত্তনা কতকম্মস্স চ গতিযা পুঞ্ঞকম্মস্স চ গতিযা পৰেদিতায সংৰিগ্গমনস্স কোল়িযামচ্চপমুখস্স তত্থ সন্নিপতিতস্স মহাজনস্স অজ্ঝাসযানুরূপং ভগৰা ৰিত্থারেন ধম্মং দেসেসি। দেসনাপরিযোসানে চতুরাসীতিযা পাণসহস্সানং ধম্মাভিসমযো অহোসীতি।
Evaṃ tehi petehi sādhāraṇato attanā katakammassa ca gatiyā puññakammassa ca gatiyā paveditāya saṃviggamanassa koḷiyāmaccapamukhassa tattha sannipatitassa mahājanassa ajjhāsayānurūpaṃ bhagavā vitthārena dhammaṃ desesi. Desanāpariyosāne caturāsītiyā pāṇasahassānaṃ dhammābhisamayo ahosīti.
অভিজ্জমানপেতৰত্থুৰণ্ণনা নিট্ঠিতা।
Abhijjamānapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ১. অভিজ্জমানপেতৰত্থু • 1. Abhijjamānapetavatthu
