Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā

    3. жуул̣аваг̇г̇о

    3. Cūḷavaggo

    1. абхиж̇ж̇амаанабзд̇авад̇т̇уван̣н̣анаа

    1. Abhijjamānapetavatthuvaṇṇanā

    абхиж̇ж̇амаанз вааримхийд̇и ид̣̇ам̣ сад̇т̇ари взл̣уванз вихаранд̇з ан̃н̃ад̇арам̣ луд̣̇д̣̇абзд̇ам̣ аараб̣бха вуд̇д̇ам̣. б̣аараан̣асияам̣ гира абарад̣̇исаабхааг̇з баараг̇ан̇г̇ааяа ваасабхаг̇аамам̣ ад̇иггамид̇ваа жунд̣̇адтиланаамагз г̇аамз зго луд̣̇д̣̇аго ахоси. со аран̃н̃з миг̇з вад̇хид̇ваа варамам̣сам̣ ан̇г̇аарз бажид̇ваа каад̣̇ид̇ваа авасзсам̣ бан̣н̣абудз б̣анд̇хид̇ваа гааж̇зна г̇ахзд̇ваа г̇аамам̣ ааг̇ажчад̇и. д̇ам̣ б̣аалад̣̇аарагаа г̇аамад̣̇ваарз д̣̇исваа ‘‘мам̣сам̣ мз д̣̇зхи, мам̣сам̣ мз д̣̇зхий’’д̇и хад̇т̇з басаарзд̇ваа убад̇хааванд̇и. со д̇зсам̣ т̇огам̣ т̇огам̣ мам̣сам̣ д̣̇зд̇и. ат̇згад̣̇ивасам̣ мам̣сам̣ алабхид̇ваа уд̣̇д̣̇аалагабубпам̣ бил̣анд̇хид̇ваа б̣ахун̃жа хад̇т̇зна г̇ахзд̇ваа г̇аамам̣ г̇ажчанд̇ам̣ д̇ам̣ д̣̇аарагаа г̇аамад̣̇ваарз д̣̇исваа ‘‘мам̣сам̣ мз д̣̇зхи, мам̣сам̣ мз д̣̇зхий’’д̇и хад̇т̇з басаарзд̇ваа убад̇хаавим̣су. со д̇зсам̣ згзгам̣ бубпаман̃ж̇арим̣ ад̣̇ааси.

    Abhijjamānevārimhīti idaṃ satthari veḷuvane viharante aññataraṃ luddapetaṃ ārabbha vuttaṃ. Bārāṇasiyaṃ kira aparadisābhāge pāragaṅgāya vāsabhagāmaṃ atikkamitvā cundaṭṭhilanāmake gāme eko luddako ahosi. So araññe mige vadhitvā varamaṃsaṃ aṅgāre pacitvā khāditvā avasesaṃ paṇṇapuṭe bandhitvā kājena gahetvā gāmaṃ āgacchati. Taṃ bāladārakā gāmadvāre disvā ‘‘maṃsaṃ me dehi, maṃsaṃ me dehī’’ti hatthe pasāretvā upadhāvanti. So tesaṃ thokaṃ thokaṃ maṃsaṃ deti. Athekadivasaṃ maṃsaṃ alabhitvā uddālakapupphaṃ piḷandhitvā bahuñca hatthena gahetvā gāmaṃ gacchantaṃ taṃ dārakā gāmadvāre disvā ‘‘maṃsaṃ me dehi, maṃsaṃ me dehī’’ti hatthe pasāretvā upadhāviṃsu. So tesaṃ ekekaṃ pupphamañjariṃ adāsi.

    ат̇а абарзна самаязна гаалам̣ гад̇ваа бзд̇зсу ниб̣б̣ад̇д̇о наг̇г̇о вируубаруубо бхаяаанагад̣̇ассано субинзби аннабаанам̣ аж̇аананд̇о сийсз ааб̣анд̇хид̇ауд̣̇д̣̇аалагагусумамаалаагалаабо ‘‘жунд̣̇адтилааяам̣ н̃аад̇агаанам̣ санд̇игз гин̃жи лабхиссаамий’’д̇и г̇ан̇г̇ааяа уд̣̇агз абхиж̇ж̇амаанз бадисод̇ам̣ бад̣̇асаа г̇ажчад̇и. д̇зна жа самаязна голияо наама ран̃н̃о б̣имб̣исаарасса махаамад̇д̇о губид̇ам̣ бажжанд̇ам̣ вуубасамзд̇ваа бадинивад̇д̇знд̇о хад̇т̇иассаад̣̇ибариваараб̣алам̣ т̇алабат̇зна бзсзд̇ваа саяам̣ г̇ан̇г̇ааяа над̣̇ияаа анусод̇ам̣ наавааяа ааг̇ажчанд̇о д̇ам̣ бзд̇ам̣ д̇ат̇аа г̇ажчанд̇ам̣ д̣̇исваа бужчанд̇о –

    Atha aparena samayena kālaṃ katvā petesu nibbatto naggo virūparūpo bhayānakadassano supinepi annapānaṃ ajānanto sīse ābandhitauddālakakusumamālākalāpo ‘‘cundaṭṭhilāyaṃ ñātakānaṃ santike kiñci labhissāmī’’ti gaṅgāya udake abhijjamāne paṭisotaṃ padasā gacchati. Tena ca samayena koliyo nāma rañño bimbisārassa mahāmatto kupitaṃ paccantaṃ vūpasametvā paṭinivattento hatthiassādiparivārabalaṃ thalapathena pesetvā sayaṃ gaṅgāya nadiyā anusotaṃ nāvāya āgacchanto taṃ petaṃ tathā gacchantaṃ disvā pucchanto –

    387.

    387.

    ‘‘абхиж̇ж̇амаанз вааримхи, г̇ан̇г̇ааяа ид̇ха г̇ажчаси;

    ‘‘Abhijjamāne vārimhi, gaṅgāya idha gacchasi;

    наг̇г̇о буб̣б̣ад̣̇д̇хабзд̇ова, маалад̇хаарий алан̇гад̇о;

    Naggo pubbaddhapetova, māladhārī alaṅkato;

    гухим̣ г̇амиссаси бзд̇а, гад̇т̇а ваасо бхависсад̇ий’’д̇и. –

    Kuhiṃ gamissasi peta, kattha vāso bhavissatī’’ti. –

    г̇аат̇амааха. д̇ад̇т̇а абхиж̇ж̇амаанзд̇и бад̣̇анигкзбзна абхиж̇ж̇амаанз сан̇гхаад̇з, вааримхи г̇ан̇г̇ааяаад̇и г̇ан̇г̇ааяа над̣̇ияаа уд̣̇агз. ид̇хаад̇и имасмим̣ таанз. буб̣б̣ад̣̇д̇хабзд̇оваад̇и гааяасса буримад̣̇д̇хзна абзд̇о вияа абзд̇аяониго д̣̇звабуд̇д̇о вияа. гат̇ам̣? маалад̇хаарий алан̇гад̇од̇и, маалаахи бил̣анд̇хид̇ваа алан̇гад̇асийсаг̇г̇од̇и ад̇т̇о. гад̇т̇а ваасо бхависсад̇ийд̇и гад̇арасмим̣ г̇аамз д̣̇зсз ваа д̇уяхам̣ ниваасо бхависсад̇и, д̇ам̣ гат̇зхийд̇и ад̇т̇о.

    Gāthamāha. Tattha abhijjamāneti padanikkhepena abhijjamāne saṅghāte, vārimhi gaṅgāyāti gaṅgāya nadiyā udake. Idhāti imasmiṃ ṭhāne. Pubbaddhapetovāti kāyassa purimaddhena apeto viya apetayoniko devaputto viya. Kathaṃ? Māladhārī alaṅkatoti, mālāhi piḷandhitvā alaṅkatasīsaggoti attho. Kattha vāso bhavissatīti katarasmiṃ gāme dese vā tuyhaṃ nivāso bhavissati, taṃ kathehīti attho.

    ид̣̇аани яам̣ д̇ад̣̇аа д̇зна бзд̇зна голиязна жа вуд̇д̇ам̣, д̇ам̣ д̣̇ассзд̇ум̣ сан̇г̇ийд̇игаараа –

    Idāni yaṃ tadā tena petena koliyena ca vuttaṃ, taṃ dassetuṃ saṅgītikārā –

    388.

    388.

    ‘‘жунд̣̇адтилам̣ г̇амиссаами, бзд̇о со ид̇и бхаасад̇и;

    ‘‘Cundaṭṭhilaṃ gamissāmi, peto so iti bhāsati;

    анд̇арз ваасабхаг̇аамам̣, б̣аараан̣асин̃жа санд̇игз.

    Antare vāsabhagāmaṃ, bārāṇasiñca santike.

    389.

    389.

    ‘‘д̇ан̃жа д̣̇исваа махаамад̇д̇о, голияо ид̇и виссуд̇о;

    ‘‘Tañca disvā mahāmatto, koliyo iti vissuto;

    сад̇д̇ум̣ бхад̇д̇ан̃жа бзд̇асса, бийд̇аган̃жа яуг̇ам̣ ад̣̇аа.

    Sattuṃ bhattañca petassa, pītakañca yugaṃ adā.

    390.

    390.

    ‘‘наавааяа д̇идтамаанааяа, габбагасса ад̣̇аабаяи;

    ‘‘Nāvāya tiṭṭhamānāya, kappakassa adāpayi;

    габбагасса бад̣̇иннамхи, таанз бзд̇асса д̣̇иссат̇а.

    Kappakassa padinnamhi, ṭhāne petassa dissatha.

    391.

    391.

    ‘‘д̇ад̇о сувад̇т̇авасано, маалад̇хаарий алан̇гад̇о;

    ‘‘Tato suvatthavasano, māladhārī alaṅkato;

    таанз тид̇асса бзд̇асса, д̣̇агкин̣аа убагаббат̇а;

    Ṭhāne ṭhitassa petassa, dakkhiṇā upakappatha;

    д̇асмаа д̣̇аж̇ж̇зт̇а бзд̇аанам̣, анугамбааяа бунаббуна’’нд̇и. – г̇аат̇ааяо авожум̣;

    Tasmā dajjetha petānaṃ, anukampāya punappuna’’nti. – gāthāyo avocuṃ;

    388. д̇ад̇т̇а жунд̣̇адтиланд̇и звам̣наамагам̣ г̇аамам̣. анд̇арз ваасабхаг̇аамам̣, б̣аараан̣асин̃жа санд̇игзд̇и ваасабхаг̇аамасса жа б̣аараан̣асияаа жа взмаж̇жхз. анд̇араа-сад̣̇д̣̇аяог̇зна хзд̇ам̣ саамяад̇т̇з убаяог̇аважанам̣. б̣аараан̣асияаа санд̇игз хи со г̇аамод̇и. аяан̃хзд̇т̇а ад̇т̇о – анд̇арз ваасабхаг̇аамасса жа б̣аараан̣асияаа жа яо жунд̣̇адтиланаамаго г̇аамо б̣аараан̣асияаа авид̣̇уурз, д̇ам̣ г̇аамам̣ г̇амиссаамийд̇и.

    388. Tattha cundaṭṭhilanti evaṃnāmakaṃ gāmaṃ. Antare vāsabhagāmaṃ, bārāṇasiñca santiketi vāsabhagāmassa ca bārāṇasiyā ca vemajjhe. Antarā-saddayogena hetaṃ sāmyatthe upayogavacanaṃ. Bārāṇasiyā santike hi so gāmoti. Ayañhettha attho – antare vāsabhagāmassa ca bārāṇasiyā ca yo cundaṭṭhilanāmako gāmo bārāṇasiyā avidūre, taṃ gāmaṃ gamissāmīti.

    389. голияо ид̇и виссуд̇од̇и голияод̇и звам̣багаасид̇анаамо. сад̇д̇ум̣ бхад̇д̇ан̃жаад̇и сад̇д̇ун̃жзва бхад̇д̇ан̃жа. бийд̇аган̃жа яуг̇ам̣ ад̣̇аад̇и бийд̇агам̣ суван̣н̣аван̣н̣ам̣ згам̣ вад̇т̇аяуг̇ан̃жа ад̣̇ааси.

    389.Koliyo iti vissutoti koliyoti evaṃpakāsitanāmo. Sattuṃ bhattañcāti sattuñceva bhattañca. Pītakañca yugaṃ adāti pītakaṃ suvaṇṇavaṇṇaṃ ekaṃ vatthayugañca adāsi.

    390. гад̣̇аа ад̣̇аасийд̇и жз ааха наавааяа д̇идтамаанааяа. габбагасса ад̣̇аабаяийд̇и г̇ажчанд̇им̣ наавам̣ табзд̇ваа д̇ад̇т̇а згасса нхаабид̇асса убаасагасса д̣̇аабзси , д̣̇иннамхи вад̇т̇аяуг̇зд̇и яож̇анаа. таанзд̇и таанасо д̇ан̇кан̣ан̃н̃зва. бзд̇асса д̣̇иссат̇аад̇и бзд̇асса сарийрз бан̃н̃ааяид̇т̇а, д̇асса ниваасанабаарубанавад̇т̇ам̣ самбаж̇ж̇и. д̇знааха ‘‘д̇ад̇о сувад̇т̇авасано, маалад̇хаарий алан̇гад̇о’’д̇и, сувад̇т̇авасано маалаабхаран̣зхи суман̣д̣ид̇абасаад̇хид̇о. таанз тид̇асса бзд̇асса, д̣̇агкин̣аа убагаббат̇аад̇и д̣̇агкин̣зяяадтаанз тид̇аа банзсаа д̣̇агкин̣аа д̇асса бзд̇асса яасмаа убагаббад̇и, винияог̇ам̣ аг̇амааси. д̇асмаа д̣̇аж̇ж̇зт̇а бзд̇аанам̣, анугамбааяа бунаббунанд̇и бзд̇аанам̣ анугамбааяа бзд̇з уд̣̇д̣̇исса бунаббунам̣ д̣̇агкин̣ам̣ д̣̇ад̣̇зяяаад̇и ад̇т̇о.

    390. Kadā adāsīti ce āha nāvāya tiṭṭhamānāya. Kappakassa adāpayīti gacchantiṃ nāvaṃ ṭhapetvā tattha ekassa nhāpitassa upāsakassa dāpesi , dinnamhi vatthayugeti yojanā. Ṭhāneti ṭhānaso taṅkhaṇaññeva. Petassa dissathāti petassa sarīre paññāyittha, tassa nivāsanapārupanavatthaṃ sampajji. Tenāha ‘‘tato suvatthavasano, māladhārī alaṅkato’’ti, suvatthavasano mālābharaṇehi sumaṇḍitapasādhito. Ṭhāne ṭhitassa petassa, dakkhiṇā upakappathāti dakkhiṇeyyaṭṭhāne ṭhitā panesā dakkhiṇā tassa petassa yasmā upakappati, viniyogaṃ agamāsi. Tasmā dajjetha petānaṃ, anukampāya punappunanti petānaṃ anukampāya pete uddissa punappunaṃ dakkhiṇaṃ dadeyyāti attho.

    ат̇а со голияамахаамад̇д̇о д̇ам̣ бзд̇ам̣ анугамбамаано д̣̇аанавид̇хим̣ самбаад̣̇зд̇ваа анусод̇ам̣ ааг̇анд̇ваа суурияз уг̇г̇ажчанд̇з б̣аараан̣асим̣ самбаабун̣и. бхаг̇аваа жа д̇зсам̣ ануг̇г̇ахад̇т̇ам̣ аагаасзна ааг̇анд̇ваа г̇ан̇г̇аад̇ийрз адтааси. голияамахаамад̇д̇оби нааваад̇о од̇арид̇ваа хадтабахадто бхаг̇аванд̇ам̣ ниманд̇зси – ‘‘ад̇хиваасзт̇а мз, бханд̇з, бхаг̇аваа аж̇ж̇ад̇анааяа бхад̇д̇ам̣ анугамбам̣ убаад̣̇ааяаа’’д̇и. ад̇хиваасзси бхаг̇аваа д̇ун̣хийбхаавзна. со бхаг̇авад̇о ад̇хиваасанам̣ вид̣̇ид̇ваа д̇аавад̣̇зва раман̣ийяз бхуумибхааг̇з маханд̇ам̣ саакааман̣д̣абам̣ убари жад̇уусу жа бассзсу наанаавирааг̇аван̣н̣авижид̇д̇авивид̇хавасанасамалан̇гад̇ам̣ гаарзд̇ваа д̇ад̇т̇а бхаг̇авад̇о аасанам̣ бан̃н̃аабзд̇ваа ад̣̇ааси. нисийд̣̇и бхаг̇аваа бан̃н̃ад̇д̇з аасанз.

    Atha so koliyamahāmatto taṃ petaṃ anukampamāno dānavidhiṃ sampādetvā anusotaṃ āgantvā sūriye uggacchante bārāṇasiṃ sampāpuṇi. Bhagavā ca tesaṃ anuggahatthaṃ ākāsena āgantvā gaṅgātīre aṭṭhāsi. Koliyamahāmattopi nāvāto otaritvā haṭṭhapahaṭṭho bhagavantaṃ nimantesi – ‘‘adhivāsetha me, bhante, bhagavā ajjatanāya bhattaṃ anukampaṃ upādāyā’’ti. Adhivāsesi bhagavā tuṇhībhāvena. So bhagavato adhivāsanaṃ viditvā tāvadeva ramaṇīye bhūmibhāge mahantaṃ sākhāmaṇḍapaṃ upari catūsu ca passesu nānāvirāgavaṇṇavicittavividhavasanasamalaṅkataṃ kāretvā tattha bhagavato āsanaṃ paññāpetvā adāsi. Nisīdi bhagavā paññatte āsane.

    ат̇а со махаамад̇д̇о бхаг̇аванд̇ам̣ убасан̇гамид̇ваа г̇анд̇хабубпаад̣̇ийхи бууж̇зд̇ваа ванд̣̇ид̇ваа згаманд̇ам̣ нисинно хздтаа ад̇д̇ано вуд̇д̇аважанам̣ бзд̇асса жа бадиважанам̣ бхаг̇авад̇о аарожзси. бхаг̇аваа ‘‘бхигкусан̇гхо ааг̇ажчад̇уу’’д̇и жинд̇зси. жинд̇ид̇асамананд̇арамзва б̣уд̣̇д̇хаанубхаавасан̃жод̣̇ид̇о суван̣н̣ахам̣саг̇ан̣о вияа д̇хад̇арадтахам̣сарааж̇ам̣ бхигкусан̇гхо д̇хаммарааж̇ам̣ самбариваарзси. д̇аавад̣̇зва махааж̇ано саннибад̇и ‘‘ул̣аараа д̇хаммад̣̇зсанаа бхависсад̇ий’’д̇и. д̇ам̣ д̣̇исваа басаннамаанасо махаамад̇д̇о б̣уд̣̇д̇хаббамукам̣ бхигкусан̇гхам̣ бан̣ийд̇зна каад̣̇анийязна бхож̇анийязна санд̇аббзси. бхаг̇аваа гад̇абхад̇д̇агижжо махааж̇анасса анугамбааяа ‘‘б̣аараан̣асисамийбаг̇аамаваасино саннибад̇анд̇уу’’д̇и ад̇хидтааси. саб̣б̣з жа д̇з ид̣̇д̇хиб̣алзна махааж̇анаа саннибад̇им̣су, ул̣аарз жасса бзд̇з баагадз агааси. д̇зсу гзжи чиннабхиннабилод̇игакан̣д̣ад̇хараа, гзжи ад̇д̇ано гзсзхзва бадижчаад̣̇ид̇агобинаа, гзжи наг̇г̇аа яат̇ааж̇аад̇аруубаа куббибаасаабхибхууд̇аа д̇ажабарияонад̣̇д̇хаа адтимад̇д̇асарийраа ид̇о жид̇о жа бариб̣бхаманд̇аа махааж̇анасса бажжагкад̇о бан̃н̃ааяим̣су.

    Atha so mahāmatto bhagavantaṃ upasaṅkamitvā gandhapupphādīhi pūjetvā vanditvā ekamantaṃ nisinno heṭṭhā attano vuttavacanaṃ petassa ca paṭivacanaṃ bhagavato ārocesi. Bhagavā ‘‘bhikkhusaṅgho āgacchatū’’ti cintesi. Cintitasamanantarameva buddhānubhāvasañcodito suvaṇṇahaṃsagaṇo viya dhataraṭṭhahaṃsarājaṃ bhikkhusaṅgho dhammarājaṃ samparivāresi. Tāvadeva mahājano sannipati ‘‘uḷārā dhammadesanā bhavissatī’’ti. Taṃ disvā pasannamānaso mahāmatto buddhappamukhaṃ bhikkhusaṅghaṃ paṇītena khādanīyena bhojanīyena santappesi. Bhagavā katabhattakicco mahājanassa anukampāya ‘‘bārāṇasisamīpagāmavāsino sannipatantū’’ti adhiṭṭhāsi. Sabbe ca te iddhibalena mahājanā sannipatiṃsu, uḷāre cassa pete pākaṭe akāsi. Tesu keci chinnabhinnapilotikakhaṇḍadharā, keci attano keseheva paṭicchāditakopinā, keci naggā yathājātarūpā khuppipāsābhibhūtā tacapariyonaddhā aṭṭhimattasarīrā ito cito ca paribbhamantā mahājanassa paccakkhato paññāyiṃsu.

    ат̇а бхаг̇аваа д̇ат̇ааруубам̣ ид̣̇д̇хаабхисан̇каарам̣ абхисан̇кааси, яат̇аа д̇з згаж̇жхам̣ саннибад̇ид̇ваа ад̇д̇анаа гад̇ам̣ баабагаммам̣ махааж̇анасса бавзд̣̇зсум̣. д̇амад̇т̇ам̣ д̣̇ийбзнд̇аа сан̇г̇ийд̇игаараа –

    Atha bhagavā tathārūpaṃ iddhābhisaṅkhāraṃ abhisaṅkhāsi, yathā te ekajjhaṃ sannipatitvā attanā kataṃ pāpakammaṃ mahājanassa pavedesuṃ. Tamatthaṃ dīpentā saṅgītikārā –

    392.

    392.

    ‘‘саад̇уннавасанаа згз, ан̃н̃з гзсаниваасанаа;

    ‘‘Sātunnavasanā eke, aññe kesanivāsanā;

    бзд̇аа бхад̇д̇ааяа г̇ажчанд̇и, баггаманд̇и д̣̇исод̣̇исам̣.

    Petā bhattāya gacchanti, pakkamanti disodisaṃ.

    393.

    393.

    ‘‘д̣̇уурз згз бад̇хаавид̇ваа, алад̣̇д̇хаава нивад̇д̇арз;

    ‘‘Dūre eke padhāvitvā, aladdhāva nivattare;

    чаад̇аа бамужчид̇аа бханд̇аа, бхуумияам̣ бадисумбхид̇аа.

    Chātā pamucchitā bhantā, bhūmiyaṃ paṭisumbhitā.

    394.

    394.

    ‘‘гзжи д̇ад̇т̇а бабад̇ид̇ваа, бхуумияам̣ бадисумбхид̇аа;

    ‘‘Keci tattha papatitvā, bhūmiyaṃ paṭisumbhitā;

    буб̣б̣з агад̇агаляаан̣аа, аг̇г̇ид̣̇ад̣дхаава аад̇абз.

    Pubbe akatakalyāṇā, aggidaḍḍhāva ātape.

    395.

    395.

    ‘‘маяам̣ буб̣б̣з баабад̇хаммаа, гхаран̣ий гуламаад̇аро;

    ‘‘Mayaṃ pubbe pāpadhammā, gharaṇī kulamātaro;

    санд̇зсу д̣̇зяяад̇хаммзсу, д̣̇ийбам̣ наагамха ад̇д̇ано.

    Santesu deyyadhammesu, dīpaṃ nākamha attano.

    396.

    396.

    ‘‘бахууд̇ам̣ аннабаанамби, абиссу авагирийяад̇и;

    ‘‘Pahūtaṃ annapānampi, apissu avakirīyati;

    саммаг̇г̇ад̇з баб̣б̣аж̇ид̇з, на жа гин̃жи ад̣̇амхасз.

    Sammaggate pabbajite, na ca kiñci adamhase.

    397.

    397.

    ‘‘агаммагаамаа аласаа, саад̣̇угаамаа махаг̇гхасаа;

    ‘‘Akammakāmā alasā, sādukāmā mahagghasā;

    аалобабин̣д̣ад̣̇аад̇ааро, бадиг̇г̇ахз барибхаасимхасз.

    Ālopapiṇḍadātāro, paṭiggahe paribhāsimhase.

    398.

    398.

    ‘‘д̇з гхараа д̇аа жа д̣̇аасияо, д̇аанзваабхаран̣аани но;

    ‘‘Te gharā tā ca dāsiyo, tānevābharaṇāni no;

    д̇з ан̃н̃з барижаарзнд̇и, маяам̣ д̣̇угкасса бхааг̇ино.

    Te aññe paricārenti, mayaṃ dukkhassa bhāgino.

    399.

    399.

    ‘‘взн̣ий ваа аван̃н̃аа хонд̇и, рат̇агаарий жа д̣̇уб̣бхигаа;

    ‘‘Veṇī vā avaññā honti, rathakārī ca dubbhikā;

    жан̣д̣аалий габан̣аа хонд̇и, габбагаа жа бунаббунам̣.

    Caṇḍālī kapaṇā honti, kappakā ca punappunaṃ.

    400.

    400.

    ‘‘яаани яаани нихийнаани, гулаани габан̣аани жа;

    ‘‘Yāni yāni nihīnāni, kulāni kapaṇāni ca;

    д̇зсу д̇зсвзва ж̇ааяанд̇и, зсаа мажчарино г̇ад̇и.

    Tesu tesveva jāyanti, esā maccharino gati.

    401.

    401.

    ‘‘буб̣б̣з жа гад̇агаляаан̣аа, д̣̇ааяагаа вийд̇амажчараа;

    ‘‘Pubbe ca katakalyāṇā, dāyakā vītamaccharā;

    саг̇г̇ам̣ д̇з барибуурзнд̇и, обхаасзнд̇и жа нанд̣̇анам̣.

    Saggaṃ te paripūrenti, obhāsenti ca nandanaṃ.

    402.

    402.

    ‘‘взж̇аяанд̇з жа баасаад̣̇з, рамид̇ваа гаамагаамино;

    ‘‘Vejayante ca pāsāde, ramitvā kāmakāmino;

    ужжаагулзсу ж̇ааяанд̇и, сабхог̇зсу д̇ад̇о жуд̇аа.

    Uccākulesu jāyanti, sabhogesu tato cutā.

    403.

    403.

    ‘‘гуудааг̇аарз жа баасаад̣̇з, баллан̇гз бонагад̇т̇ад̇з;

    ‘‘Kūṭāgāre ca pāsāde, pallaṅke ponakatthate;

    б̣ийж̇ид̇ан̇г̇аа морахад̇т̇зхи, гулз ж̇аад̇аа яасассино.

    Bījitaṅgā morahatthehi, kule jātā yasassino.

    404.

    404.

    ‘‘ан̇гад̇о ан̇гам̣ г̇ажчанд̇и, маалад̇хаарий алан̇гад̇аа;

    ‘‘Aṅkato aṅkaṃ gacchanti, māladhārī alaṅkatā;

    д̇хаад̇ияо убад̇идтанд̇и, сааяам̣ баад̇ам̣ сукзсино.

    Dhātiyo upatiṭṭhanti, sāyaṃ pātaṃ sukhesino.

    405.

    405.

    ‘‘наяид̣̇ам̣ агад̇абун̃н̃аанам̣, гад̇абун̃н̃аанамзвид̣̇ам̣;

    ‘‘Nayidaṃ akatapuññānaṃ, katapuññānamevidaṃ;

    асогам̣ нанд̣̇анам̣ раммам̣, д̇ид̣̇асаанам̣ махааванам̣.

    Asokaṃ nandanaṃ rammaṃ, tidasānaṃ mahāvanaṃ.

    406.

    406.

    ‘‘сукам̣ агад̇абун̃н̃аанам̣, ид̇ха над̇т̇и барад̇т̇а жа;

    ‘‘Sukhaṃ akatapuññānaṃ, idha natthi parattha ca;

    сукан̃жа гад̇абун̃н̃аанам̣, ид̇ха жзва барад̇т̇а жа.

    Sukhañca katapuññānaṃ, idha ceva parattha ca.

    407.

    407.

    ‘‘д̇зсам̣ сахаб̣яагаамаанам̣, гад̇д̇аб̣б̣ам̣ гусалам̣ б̣ахум̣;

    ‘‘Tesaṃ sahabyakāmānaṃ, kattabbaṃ kusalaṃ bahuṃ;

    гад̇абун̃н̃аа хи мод̣̇анд̇и, саг̇г̇з бхог̇асаман̇г̇ино’’д̇и. – г̇аат̇ааяо авожум̣;

    Katapuññā hi modanti, sagge bhogasamaṅgino’’ti. – gāthāyo avocuṃ;

    392. д̇ад̇т̇а саад̇уннавасанаад̇и чиннабхиннабилод̇игакан̣д̣аниваасанаа. згзд̇и згажжз. гзсаниваасанаад̇и гзсзхзва бадижчаад̣̇ид̇агобинаа. бхад̇д̇ааяа г̇ажчанд̇ийд̇и ‘‘аббзва наама ид̇о г̇ад̇аа яад̇т̇а ваа д̇ад̇т̇а ваа гин̃жи ужчидтабхад̇д̇ам̣ ваа вамид̇абхад̇д̇ам̣ ваа г̇аб̣бхамалаад̣̇игам̣ ваа лабхзяяаамаа’’д̇и гад̇т̇ажид̣̇зва адтад̇ваа гхаасад̇т̇ааяа г̇ажчанд̇и. баггаманд̇и д̣̇исод̣̇исанд̇и д̣̇исад̇о д̣̇исам̣ анзгаяож̇ананд̇аригам̣ таанам̣ баггаманд̇и.

    392. Tattha sātunnavasanāti chinnabhinnapilotikakhaṇḍanivāsanā. Eketi ekacce. Kesanivāsanāti keseheva paṭicchāditakopinā. Bhattāya gacchantīti ‘‘appeva nāma ito gatā yattha vā tattha vā kiñci ucchiṭṭhabhattaṃ vā vamitabhattaṃ vā gabbhamalādikaṃ vā labheyyāmā’’ti katthacideva aṭṭhatvā ghāsatthāya gacchanti. Pakkamanti disodisanti disato disaṃ anekayojanantarikaṃ ṭhānaṃ pakkamanti.

    393. д̣̇уурзд̇и д̣̇уурзва таанз. згзд̇и згажжз бзд̇аа. бад̇хаавид̇ваад̇и гхаасад̇т̇ааяа убад̇хаавид̇ваа. алад̣̇д̇хаава нивад̇д̇арзд̇и гин̃жи гхаасам̣ ваа баанийяам̣ ваа алабхид̇ваа зва нивад̇д̇анд̇и. бамужчид̇аад̇и куббибаасаад̣̇ид̣̇угкзна сан̃ж̇аад̇амужчаа. бханд̇аад̇и бариб̣бхаманд̇аа. бхуумияам̣ бадисумбхид̇аад̇и д̇ааяа зва мужчааяа уббад̇д̇ияаа тад̇ваа авагкид̇д̇амад̇д̇игаабин̣д̣аа вияа виссуссид̇ваа бат̇авияам̣ бад̇ид̇аа.

    393.Dūreti dūreva ṭhāne. Eketi ekacce petā. Padhāvitvāti ghāsatthāya upadhāvitvā. Aladdhāva nivattareti kiñci ghāsaṃ vā pānīyaṃ vā alabhitvā eva nivattanti. Pamucchitāti khuppipāsādidukkhena sañjātamucchā. Bhantāti paribbhamantā. Bhūmiyaṃ paṭisumbhitāti tāya eva mucchāya uppattiyā ṭhatvā avakkhittamattikāpiṇḍā viya vissussitvā pathaviyaṃ patitā.

    394. д̇ад̇т̇аад̇и г̇ад̇адтаанз. бхуумияам̣ бадисумбхид̇аад̇и бабаад̇з бад̇ид̇аа вияа ж̇игхажчаад̣̇ид̣̇угкзна таад̇ум̣ асамад̇т̇абхаавзна бхуумияам̣ бад̇ид̇аа, д̇ад̇т̇а ваа г̇ад̇адтаанз гхаасаад̣̇ийнам̣ алаабхзна чиннаасаа худ̇ваа гзнажи бадимукам̣ сумбхид̇аа бот̇ид̇аа вияа бхуумияам̣ бад̇ид̇аа хонд̇ийд̇и ад̇т̇о. буб̣б̣з агад̇агаляаан̣аад̇и буримабхавз агад̇агусалаа. аг̇г̇ид̣̇ад̣дхаава аад̇абзд̇и нид̣̇аагхагаалз аад̇абадтаанз аг̇г̇инаа д̣̇ад̣дхаа вияа, куббибаасаг̇г̇инаа д̣аяхамаанаа махаад̣̇угкам̣ анубхаванд̇ийд̇и ад̇т̇о.

    394.Tatthāti gataṭṭhāne. Bhūmiyaṃ paṭisumbhitāti papāte patitā viya jighacchādidukkhena ṭhātuṃ asamatthabhāvena bhūmiyaṃ patitā, tattha vā gataṭṭhāne ghāsādīnaṃ alābhena chinnāsā hutvā kenaci paṭimukhaṃ sumbhitā pothitā viya bhūmiyaṃ patitā hontīti attho. Pubbe akatakalyāṇāti purimabhave akatakusalā. Aggidaḍḍhāva ātapeti nidāghakāle ātapaṭṭhāne agginā daḍḍhā viya, khuppipāsagginā ḍayhamānā mahādukkhaṃ anubhavantīti attho.

    395. буб̣б̣зд̇и ад̇ийд̇абхавз. баабад̇хаммаад̇и иссугиймажчарийаад̣̇ибхаавзна лаамагасабхааваа. гхаран̣ийд̇и гхарасааминияо. гуламаад̇арод̇и гулад̣̇аарагаанам̣ маад̇аро, гулабурисаанам̣ ваа маад̇аро. д̣̇ийбанд̇и бад̇идтам̣, бун̃н̃анд̇и ад̇т̇о. д̇ан̃хи сад̇д̇аанам̣ суг̇ад̇ийсу бад̇идтаабхаавад̇о ‘‘бад̇идтаа’’д̇и вужжад̇и. наагамхаад̇и на гаримха.

    395.Pubbeti atītabhave. Pāpadhammāti issukīmaccharīādibhāvena lāmakasabhāvā. Gharaṇīti gharasāminiyo. Kulamātaroti kuladārakānaṃ mātaro, kulapurisānaṃ vā mātaro. Dīpanti patiṭṭhaṃ, puññanti attho. Tañhi sattānaṃ sugatīsu patiṭṭhābhāvato ‘‘patiṭṭhā’’ti vuccati. Nākamhāti na karimha.

    396. бахууд̇анд̇и б̣ахум̣. аннабаанамбийд̇и аннан̃жа баанан̃жа. абиссу авагирийяад̇ийд̇и сууд̇и нибаад̇амад̇д̇ам̣, аби авагирийяад̇и чаддийяад̇и. саммаг̇г̇ад̇зд̇и саммаа г̇ад̇з саммаа бадибаннз саммаа бадибаннааяа. баб̣б̣аж̇ид̇зд̇и баб̣б̣аж̇ид̇ааяа. самбад̣̇аанз хи ид̣̇ам̣ бхуммаважанам̣. саммаг̇г̇ад̇з ваа баб̣б̣аж̇ид̇з сад̇и лаб̣бхамаанзд̇и ад̇т̇о. на жа гин̃жи ад̣̇амхасзд̇и ‘‘гин̃жимад̇д̇амби д̣̇зяяад̇хаммам̣ наад̣̇амхаа’’д̇и виббадисаараабхибхууд̇аа вад̣̇анд̇и.

    396.Pahūtanti bahuṃ. Annapānampīti annañca pānañca. Apissu avakirīyatīti sūti nipātamattaṃ, api avakirīyati chaṭṭīyati. Sammaggateti sammā gate sammā paṭipanne sammā paṭipannāya. Pabbajiteti pabbajitāya. Sampadāne hi idaṃ bhummavacanaṃ. Sammaggate vā pabbajite sati labbhamāneti attho. Na ca kiñci adamhaseti ‘‘kiñcimattampi deyyadhammaṃ nādamhā’’ti vippaṭisārābhibhūtā vadanti.

    397. агаммагаамаад̇и саад̇хууд̇и агад̇д̇аб̣б̣ам̣ гаммам̣ агусалам̣ гаамзнд̇ийд̇и агаммагаамаа, саад̇хуухи ваа гад̇д̇аб̣б̣ам̣ гусалам̣ гаамзнд̇ийд̇и гаммагаамаа, на гаммагаамаад̇и агаммагаамаа , гусалад̇хаммзсу ажчанд̣̇игаад̇и ад̇т̇о. аласаад̇и гусийд̇аа гусалагаммагаран̣з ниб̣б̣ийрияаа. саад̣̇угаамаад̇и саад̇амад̇хуравад̇т̇убияаа. махаг̇гхасаад̇и махаабхож̇анаа, убхаязнааби сунд̣̇аран̃жа мад̇хуран̃жа бхож̇анам̣ лабхид̇ваа ад̇т̇игаанам̣ гин̃жи ад̣̇ад̇ваа саяамзва бхун̃ж̇ид̇аарод̇и д̣̇ассзд̇и. аалобабин̣д̣ад̣̇аад̇аарод̇и аалобамад̇д̇ассаби бхож̇анабин̣д̣асса д̣̇ааяагаа. бадиг̇г̇ахзд̇и д̇асса бадиг̇г̇ан̣ханагз. барибхаасимхасзд̇и барибхавам̣ гаронд̇аа бхаасимха, аваман̃н̃имха уббан̣д̣имхаа жаад̇и ад̇т̇о.

    397.Akammakāmāti sādhūti akattabbaṃ kammaṃ akusalaṃ kāmentīti akammakāmā, sādhūhi vā kattabbaṃ kusalaṃ kāmentīti kammakāmā, na kammakāmāti akammakāmā , kusaladhammesu acchandikāti attho. Alasāti kusītā kusalakammakaraṇe nibbīriyā. Sādukāmāti sātamadhuravatthupiyā. Mahagghasāti mahābhojanā, ubhayenāpi sundarañca madhurañca bhojanaṃ labhitvā atthikānaṃ kiñci adatvā sayameva bhuñjitāroti dasseti. Ālopapiṇḍadātāroti ālopamattassapi bhojanapiṇḍassa dāyakā. Paṭiggaheti tassa paṭiggaṇhanake. Paribhāsimhaseti paribhavaṃ karontā bhāsimha, avamaññimha uppaṇḍimhā cāti attho.

    398. д̇з гхараад̇и яад̇т̇а маяам̣ буб̣б̣з ‘‘амхаагам̣ гхара’’нд̇и мамад̇д̇ам̣ агаримхаа, д̇аани гхараани яат̇аатид̇аани, ид̣̇аани но на гин̃жи убагаббад̇ийд̇и ад̇хиббааяо. д̇аа жа д̣̇аасияо д̇аанзваабхаран̣аани нод̇и зд̇т̇ааби зсзва наяо. д̇ад̇т̇а нод̇и амхаагам̣. д̇зд̇и д̇з гхараад̣̇игз. ан̃н̃з барижаарзнд̇и, барибхог̇аад̣̇ивасзна винияог̇ам̣ гаронд̇ийд̇и ад̇т̇о. маяам̣ д̣̇угкасса бхааг̇инод̇и маяам̣ бана буб̣б̣з гзвалам̣ гийл̣анаббасуд̇аа худ̇ваа саабад̇зяяам̣ бахааяа г̇аманийяам̣ ануг̇аамигам̣ гаад̇ум̣ аж̇аананд̇аа ид̣̇аани куббибаасаад̣̇ид̣̇угкасса бхааг̇ино бхаваамаад̇и ад̇д̇аанам̣ г̇араханд̇аа вад̣̇анд̇и.

    398.Te gharāti yattha mayaṃ pubbe ‘‘amhākaṃ ghara’’nti mamattaṃ akarimhā, tāni gharāni yathāṭhitāni, idāni no na kiñci upakappatīti adhippāyo. Tā ca dāsiyo tānevābharaṇāni noti etthāpi eseva nayo. Tattha noti amhākaṃ. Teti te gharādike. Aññe paricārenti, paribhogādivasena viniyogaṃ karontīti attho. Mayaṃ dukkhassa bhāginoti mayaṃ pana pubbe kevalaṃ kīḷanappasutā hutvā sāpateyyaṃ pahāya gamanīyaṃ anugāmikaṃ kātuṃ ajānantā idāni khuppipāsādidukkhassa bhāgino bhavāmāti attānaṃ garahantā vadanti.

    399. ид̣̇аани яасмаа бзд̇аяонид̇о жавид̇ваа мануссзсу уббаж̇ж̇анд̇ааби сад̇д̇аа язбхуяязна д̇ассзва гаммасса вибаагаавасзсзна хийнаж̇аад̇игаа габан̣авуд̇д̇инова хонд̇и, д̇асмаа д̇амад̇т̇ам̣ д̣̇ассзд̇ум̣ ‘‘взн̣иваа’’д̇иаад̣̇инаа д̣̇вз г̇аат̇аа вуд̇д̇аа. д̇ад̇т̇а взн̣иваад̇и взнаж̇аад̇игаа, вилийвагаараа нал̣агаараа хонд̇ийд̇и ад̇т̇о. ваа-сад̣̇д̣̇о анияамад̇т̇о. аван̃н̃аад̇и аван̃н̃зяяаа, аваж̇аанид̇аб̣б̣аад̇и вуд̇д̇ам̣ ход̇и. ‘‘вамбханаа’’д̇и ваа баато, барзхи б̣аад̇ханийяаад̇и ад̇т̇о. рат̇агаарийд̇и жаммагаарино. д̣̇уб̣бхигаад̇и мид̇д̇ад̣̇уб̣бхигаа мид̇д̇аанам̣ б̣аад̇хигаа. жан̣д̣аалийд̇и жан̣д̣аалаж̇аад̇игаа. габан̣аад̇и ваниб̣б̣агаа ад̇ивияа гаарун̃н̃аббад̇д̇аа . габбагаад̇и габбагаж̇аад̇игаа, саб̣б̣ад̇т̇а ‘‘хонд̇и бунаббуна’’нд̇и яож̇анаа, абараабарамби имзсу нихийнагулзсу уббаж̇ж̇анд̇ийд̇и вуд̇д̇ам̣ ход̇и.

    399. Idāni yasmā petayonito cavitvā manussesu uppajjantāpi sattā yebhuyyena tasseva kammassa vipākāvasesena hīnajātikā kapaṇavuttinova honti, tasmā tamatthaṃ dassetuṃ ‘‘veṇivā’’tiādinā dve gāthā vuttā. Tattha veṇivāti venajātikā, vilīvakārā naḷakārā hontīti attho. Vā-saddo aniyamattho. Avaññāti avaññeyyā, avajānitabbāti vuttaṃ hoti. ‘‘Vambhanā’’ti vā pāṭho, parehi bādhanīyāti attho. Rathakārīti cammakārino. Dubbhikāti mittadubbhikā mittānaṃ bādhikā. Caṇḍālīti caṇḍālajātikā. Kapaṇāti vanibbakā ativiya kāruññappattā . Kappakāti kappakajātikā, sabbattha ‘‘honti punappuna’’nti yojanā, aparāparampi imesu nihīnakulesu uppajjantīti vuttaṃ hoti.

    400. д̇зсу д̇зсвзва ж̇ааяанд̇ийд̇и яаани яаани ан̃н̃ааниби нзсаад̣̇абуггусагулаад̣̇ийни габан̣аани ад̇ивияа вамбханияаани барамад̣̇уг̇г̇ад̇аани жа, д̇зсу д̇зсу зва нихийнагулзсу мажчарияамалзна бзд̇зсу ниб̣б̣ад̇д̇ид̇ваа д̇ад̇о жуд̇аа ниб̣б̣ад̇д̇анд̇и. д̇знааха ‘‘зсаа мажчарино г̇ад̇ий’’д̇и.

    400.Tesu tesveva jāyantīti yāni yāni aññānipi nesādapukkusakulādīni kapaṇāni ativiya vambhaniyāni paramaduggatāni ca, tesu tesu eva nihīnakulesu macchariyamalena petesu nibbattitvā tato cutā nibbattanti. Tenāha ‘‘esā maccharino gatī’’ti.

    401. звам̣ агад̇абун̃н̃аанам̣ сад̇д̇аанам̣ г̇ад̇им̣ д̣̇ассзд̇ваа ид̣̇аани гад̇абун̃н̃аанам̣ г̇ад̇им̣ д̣̇ассзд̇ум̣ ‘‘буб̣б̣з жа гад̇агаляаан̣аа’’д̇и сад̇д̇а г̇аат̇аа вуд̇д̇аа. д̇ад̇т̇а саг̇г̇ам̣ д̇з барибуурзнд̇ийд̇и яз буб̣б̣з буримаж̇аад̇ияам̣ гад̇агаляаан̣аа д̣̇ааяагаа д̣̇аанабун̃н̃аабхирад̇аа виг̇ад̇амаламажчзраа, д̇з ад̇д̇ано руубасамбад̇д̇ияаа жзва бариваарасамбад̇д̇ияаа жа саг̇г̇ам̣ д̣̇звалогам̣ барибуурзнд̇и барибун̣н̣ам̣ гаронд̇и. обхаасзнд̇и жа нанд̣̇ананд̇и на гзвалам̣ барибуурзнд̇иязва, ат̇а ко габбаругкаад̣̇ийнам̣ бабхаахи сабхаавзнзва обхаасамаанамби нанд̣̇анаванам̣ ад̇д̇ано вад̇т̇аабхаран̣аж̇уд̇ийхи сарийраббабхааяа жа абхибхавид̇ваа жзва обхаасзд̇ваа жа ж̇од̇знд̇и.

    401. Evaṃ akatapuññānaṃ sattānaṃ gatiṃ dassetvā idāni katapuññānaṃ gatiṃ dassetuṃ ‘‘pubbe ca katakalyāṇā’’ti satta gāthā vuttā. Tattha saggaṃ te paripūrentīti ye pubbe purimajātiyaṃ katakalyāṇā dāyakā dānapuññābhiratā vigatamalamaccherā, te attano rūpasampattiyā ceva parivārasampattiyā ca saggaṃ devalokaṃ paripūrenti paripuṇṇaṃ karonti. Obhāsenti ca nandananti na kevalaṃ paripūrentiyeva, atha kho kapparukkhādīnaṃ pabhāhi sabhāveneva obhāsamānampi nandanavanaṃ attano vatthābharaṇajutīhi sarīrappabhāya ca abhibhavitvā ceva obhāsetvā ca jotenti.

    402. гаамагааминод̇и яат̇ижчид̇зсу гаамаг̇ун̣зсу яат̇аагаамам̣ барибхог̇аванд̇о. ужжаагулзсууд̇и ужжзсу кад̇д̇ияагулаад̣̇ийсу гулзсу. сабхог̇зсууд̇и махаавибхавзсу. д̇ад̇о жуд̇аад̇и д̇ад̇о д̣̇звалогад̇о жуд̇аа.

    402.Kāmakāminoti yathicchitesu kāmaguṇesu yathākāmaṃ paribhogavanto. Uccākulesūti uccesu khattiyakulādīsu kulesu. Sabhogesūti mahāvibhavesu. Tato cutāti tato devalokato cutā.

    403. гуудааг̇аарз жа баасаад̣̇зд̇и гуудааг̇аарз жа баасаад̣̇з жа. б̣ийж̇ид̇ан̇г̇аад̇и б̣ийж̇ияамаанад̣̇зхаа. морахад̇т̇зхийд̇и морабин̃чабадиман̣д̣ид̇аб̣ийж̇анийхад̇т̇зхи. яасассинод̇и бариваараванд̇о раманд̇ийд̇и ад̇хиббааяо.

    403.Kūṭāgāreca pāsādeti kūṭāgāre ca pāsāde ca. Bījitaṅgāti bījiyamānadehā. Morahatthehīti morapiñchapaṭimaṇḍitabījanīhatthehi. Yasassinoti parivāravanto ramantīti adhippāyo.

    404. ан̇гад̇о ан̇гам̣ г̇ажчанд̇ийд̇и д̣̇аарагагаалзби н̃аад̇ийнам̣ д̇хаад̇ийнан̃жа ан̇гадтаанад̇о ан̇гадтаанамзва г̇ажчанд̇и, на бхуумид̇аланд̇и ад̇хиббааяо. убад̇идтанд̇ийд̇и убадтаанам̣ гаронд̇и. сукзсинод̇и сукамижчанд̇аа, ‘‘маа сийд̇ам̣ ваа ун̣хам̣ ваа’’д̇и аббагамби д̣̇угкам̣ барихаранд̇аа убад̇идтанд̇ийд̇и ад̇хиббааяо.

    404.Aṅkato aṅkaṃ gacchantīti dārakakālepi ñātīnaṃ dhātīnañca aṅkaṭṭhānato aṅkaṭṭhānameva gacchanti, na bhūmitalanti adhippāyo. Upatiṭṭhantīti upaṭṭhānaṃ karonti. Sukhesinoti sukhamicchantā, ‘‘mā sītaṃ vā uṇhaṃ vā’’ti appakampi dukkhaṃ pariharantā upatiṭṭhantīti adhippāyo.

    405. наяид̣̇ам̣ агад̇абун̃н̃аананд̇и ид̣̇ам̣ согавад̇т̇уабхаавад̇о асогам̣ раммам̣ раман̣ийяам̣ д̇ид̣̇асаанам̣ д̇аавад̇им̣сад̣̇зваанам̣ махааванам̣ махааубаванабхууд̇ам̣ нанд̣̇анам̣ нанд̣̇анаванам̣ агад̇абун̃н̃аанам̣ на ход̇и, д̇зхи лад̣̇д̇хум̣ на саггаад̇и ад̇т̇о.

    405.Nayidaṃ akatapuññānanti idaṃ sokavatthuabhāvato asokaṃ rammaṃ ramaṇīyaṃ tidasānaṃ tāvatiṃsadevānaṃ mahāvanaṃ mahāupavanabhūtaṃ nandanaṃ nandanavanaṃ akatapuññānaṃ na hoti, tehi laddhuṃ na sakkāti attho.

    406. ид̇хаад̇и имасмим̣ мануссалогз висзсад̇о бун̃н̃ам̣ гарийяад̇и, д̇ам̣ санд̇хааяааха. ид̇хаад̇и ваа д̣̇идтад̇хаммз. барад̇т̇аад̇и самбарааяз.

    406.Idhāti imasmiṃ manussaloke visesato puññaṃ karīyati, taṃ sandhāyāha. Idhāti vā diṭṭhadhamme. Paratthāti samparāye.

    407. д̇зсанд̇и д̇зхи яат̇аавуд̇д̇зхи д̣̇звзхи. сахаб̣яагаамаананд̇и сахабхаавам̣ ижчанд̇зхи. бхог̇асаман̇г̇инод̇и бхог̇зхи саманнааг̇ад̇аа, д̣̇иб̣б̣зхи бан̃жагаамаг̇ун̣зхи самаббид̇аа мод̣̇анд̇ийд̇и ад̇т̇о. сзсам̣ уд̇д̇аанад̇т̇амзва.

    407.Tesanti tehi yathāvuttehi devehi. Sahabyakāmānanti sahabhāvaṃ icchantehi. Bhogasamaṅginoti bhogehi samannāgatā, dibbehi pañcakāmaguṇehi samappitā modantīti attho. Sesaṃ uttānatthameva.

    звам̣ д̇зхи бзд̇зхи саад̇хааран̣ад̇о ад̇д̇анаа гад̇агаммасса жа г̇ад̇ияаа бун̃н̃агаммасса жа г̇ад̇ияаа бавзд̣̇ид̇ааяа сам̣виг̇г̇аманасса гол̣ияаамажжабамукасса д̇ад̇т̇а саннибад̇ид̇асса махааж̇анасса аж̇жхаасаяаануруубам̣ бхаг̇аваа вид̇т̇аарзна д̇хаммам̣ д̣̇зсзси. д̣̇зсанаабарияосаанз жад̇ураасийд̇ияаа баан̣асахассаанам̣ д̇хаммаабхисамаяо ахосийд̇и.

    Evaṃ tehi petehi sādhāraṇato attanā katakammassa ca gatiyā puññakammassa ca gatiyā paveditāya saṃviggamanassa koḷiyāmaccapamukhassa tattha sannipatitassa mahājanassa ajjhāsayānurūpaṃ bhagavā vitthārena dhammaṃ desesi. Desanāpariyosāne caturāsītiyā pāṇasahassānaṃ dhammābhisamayo ahosīti.

    абхиж̇ж̇амаанабзд̇авад̇т̇уван̣н̣анаа нидтид̇аа.

    Abhijjamānapetavatthuvaṇṇanā niṭṭhitā.




    Next: 2. саан̣аваасид̇т̇зрабзд̇авад̇т̇уван̣н̣анаа • 2. Sāṇavāsittherapetavatthuvaṇṇanā




    Related texts:



    д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 1. абхиж̇ж̇амаанабзд̇авад̇т̇у • 1. Abhijjamānapetavatthu


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact