| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. අභිනන්‌දමානසුත්‌තං
3. Abhinandamānasuttaṃ
65. සාවත්‌ථිනිදානං. අථ ඛො අඤ්‌ඤතරො භික්‌ඛු…පෙ.… එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘සාධු මෙ, භන්‌තෙ, භගවා සංඛිත්‌තෙන…පෙ.… පහිතත්‌තො විහරෙය්‍ය’’න්‌ති. ‘‘අභිනන්‌දමානො ඛො, භික්‌ඛු, බද්‌ධො මාරස්‌ස; අනභිනන්‌දමානො මුත්‌තො පාපිමතො’’ති. ‘‘අඤ්‌ඤාතං භගවා, අඤ්‌ඤාතං සුගතා’’ති.
65. Sāvatthinidānaṃ. Atha kho aññataro bhikkhu…pe… ekamantaṃ nisinno kho so bhikkhu bhagavantaṃ etadavoca – ‘‘sādhu me, bhante, bhagavā saṃkhittena…pe… pahitatto vihareyya’’nti. ‘‘Abhinandamāno kho, bhikkhu, baddho mārassa; anabhinandamāno mutto pāpimato’’ti. ‘‘Aññātaṃ bhagavā, aññātaṃ sugatā’’ti.
‘‘යථා කථං පන ත්‌වං, භික්‌ඛු, මයා සංඛිත්‌තෙන භාසිතස්‌ස විත්‌ථාරෙන අත්‌ථං ආජානාසී’’ති? ‘‘රූපං ඛො, භන්‌තෙ, අභිනන්‌දමානො බද්‌ධො මාරස්‌ස; අනභිනන්‌දමානො මුත්‌තො පාපිමතො. වෙදනං… සඤ්‌ඤං… සඞ්‌ඛාරෙ… විඤ්‌ඤාණං අභිනන්‌දමානො බද්‌ධො මාරස්‌ස; අනභිනන්‌දමානො මුත්‌තො පාපිමතො. ඉමස්‌ස ඛ්‌වාහං, භන්‌තෙ, භගවතා සංඛිත්‌තෙන භාසිතස්‌ස එවං විත්‌ථාරෙන අත්‌ථං ආජානාමී’’ති.
‘‘Yathā kathaṃ pana tvaṃ, bhikkhu, mayā saṃkhittena bhāsitassa vitthārena atthaṃ ājānāsī’’ti? ‘‘Rūpaṃ kho, bhante, abhinandamāno baddho mārassa; anabhinandamāno mutto pāpimato. Vedanaṃ… saññaṃ… saṅkhāre… viññāṇaṃ abhinandamāno baddho mārassa; anabhinandamāno mutto pāpimato. Imassa khvāhaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘සාධු සාධු, භික්‌ඛු! සාධු ඛො ත්‌වං, භික්‌ඛු, මයා සංඛිත්‌තෙන භාසිතස්‌ස විත්‌ථාරෙන අත්‌ථං ආජානාසි. රූපං ඛො, භික්‌ඛු, අභිනන්‌දමානො බද්‌ධො මාරස්‌ස; අනභිනන්‌දමානො මුත්‌තො පාපිමතො. වෙදනං… සඤ්‌ඤං… සඞ්‌ඛාරෙ … විඤ්‌ඤාණං අභිනන්‌දමානො බද්‌ධො මාරස්‌ස; අනභිනන්‌දමානො මුත්‌තො පාපිමතො. ඉමස්‌ස ඛො, භික්‌ඛු, මයා සංඛිත්‌තෙන භාසිතස්‌ස එවං විත්‌ථාරෙන අත්‌ථො දට්‌ඨබ්‌බො’’ති…පෙ.… අඤ්‌ඤතරො ච පන සො භික්‌ඛු අරහතං අහොසීති. තතියං.
‘‘Sādhu sādhu, bhikkhu! Sādhu kho tvaṃ, bhikkhu, mayā saṃkhittena bhāsitassa vitthārena atthaṃ ājānāsi. Rūpaṃ kho, bhikkhu, abhinandamāno baddho mārassa; anabhinandamāno mutto pāpimato. Vedanaṃ… saññaṃ… saṅkhāre … viññāṇaṃ abhinandamāno baddho mārassa; anabhinandamāno mutto pāpimato. Imassa kho, bhikkhu, mayā saṃkhittena bhāsitassa evaṃ vitthārena attho daṭṭhabbo’’ti…pe… aññataro ca pana so bhikkhu arahataṃ ahosīti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. අභිනන්‌දමානසුත්‌තවණ්‌ණනා • 3. Abhinandamānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-6. මඤ්‌ඤමානසුත්‌තාදිවණ්‌ණනා • 2-6. Maññamānasuttādivaṇṇanā
