| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. அபி⁴ண்ஹபச்சவெக்கி²தப்³ப³டா²னஸுத்தவண்ணனா
7. Abhiṇhapaccavekkhitabbaṭhānasuttavaṇṇanā
57. ஸத்தமே ஜராத⁴ம்மொம்ஹீதி ஜராஸபா⁴வோ அம்ஹி. ஜரங் அனதீதோதி ஜரங் அனதிக்கந்தோ, அந்தோஜராய ஏவ சராமி. ஸேஸபதே³ஸுபி ஏஸேவ நயோ. கம்மஸ்ஸகோதிஆதீ³ஸு கம்மங் மய்ஹங் ஸகங் அத்தனோ ஸந்தகந்தி கம்மஸ்ஸகோ அம்ஹி. கம்மஸ்ஸ தா³யாதோ³தி கம்மதா³யாதோ³, கம்மங் மய்ஹங் தா³யஜ்ஜங் ஸந்தகந்தி அத்தோ². கம்மங் மய்ஹங் யோனி காரணந்தி கம்மயோனி. கம்மங் மய்ஹங் ப³ந்தூ⁴தி கம்மப³ந்து⁴, கம்மஞாதகோதி அத்தோ². கம்மங் மய்ஹங் படிஸரணங் பதிட்டா²தி கம்மபடிஸரணோ. தஸ்ஸ தா³யாதோ³ ப⁴விஸ்ஸாமீதி தஸ்ஸ கம்மஸ்ஸ தா³யாதோ³ தேன தி³ன்னப²லபடிக்³கா³ஹகோ ப⁴விஸ்ஸாமீதி அத்தோ². யொப்³ப³னமதோ³தி யொப்³ப³னங் ஆரப்³ப⁴ உப்பன்னமதோ³. ஸேஸேஸுபி ஏஸேவ நயோ. மக்³கோ³ ஸஞ்ஜாயதீதி லோகுத்தரமக்³கோ³ ஸஞ்ஜாயதி. ஸங்யோஜனானி ஸப்³ப³ஸோ பஹீயந்தீதி த³ஸ ஸங்யோஜனானி ஸப்³ப³ஸோ பஹீயந்தி. அனுஸயா ப்³யந்தீஹொந்தீதி ஸத்த அனுஸயா விக³தந்தா பரிச்சி²ன்னா பரிவடுமா ஹொந்தி. ஏவமெத்த² ஹெட்டா² பஞ்சஸு டா²னேஸு விபஸ்ஸனா கதி²தா, இமேஸு பஞ்சஸு லோகுத்தரமக்³கோ³.
57. Sattame jarādhammomhīti jarāsabhāvo amhi. Jaraṃ anatītoti jaraṃ anatikkanto, antojarāya eva carāmi. Sesapadesupi eseva nayo. Kammassakotiādīsu kammaṃ mayhaṃ sakaṃ attano santakanti kammassako amhi. Kammassa dāyādoti kammadāyādo, kammaṃ mayhaṃ dāyajjaṃ santakanti attho. Kammaṃ mayhaṃ yoni kāraṇanti kammayoni. Kammaṃ mayhaṃ bandhūti kammabandhu, kammañātakoti attho. Kammaṃ mayhaṃ paṭisaraṇaṃ patiṭṭhāti kammapaṭisaraṇo. Tassa dāyādo bhavissāmīti tassa kammassa dāyādo tena dinnaphalapaṭiggāhako bhavissāmīti attho. Yobbanamadoti yobbanaṃ ārabbha uppannamado. Sesesupi eseva nayo. Maggo sañjāyatīti lokuttaramaggo sañjāyati. Saṃyojanāni sabbaso pahīyantīti dasa saṃyojanāni sabbaso pahīyanti. Anusayā byantīhontīti satta anusayā vigatantā paricchinnā parivaṭumā honti. Evamettha heṭṭhā pañcasu ṭhānesu vipassanā kathitā, imesu pañcasu lokuttaramaggo.
இதா³னி கா³தா²ஹி கூடங் க³ண்ஹந்தோ ப்³யாதி⁴த⁴ம்மாதிஆதி³மாஹ. தத்த² ஞத்வா த⁴ம்மங் நிரூபதி⁴ந்தி உபதி⁴ரஹிதங் அரஹத்தமக்³க³ங் ஞத்வா. ஸப்³பே³ மதே³ அபி⁴பொ⁴ஸ்மீதி ஸப்³பே³ இமே தயோபி மதே³ அதி⁴ப⁴விங், அதிக்கம்ம டி²தொஸ்மீதி அத்தோ². நெக்க²ம்மங் த³ட்டு² கே²மதோதி பப்³ப³ஜ்ஜங் கே²மதோ தி³ஸ்வா. தஸ்ஸ மே அஹு உஸ்ஸாஹோ, நிப்³பா³னங் அபி⁴பஸ்ஸதோதி தஸ்ஸ மய்ஹங் நிப்³பா³னங் அபி⁴பஸ்ஸந்தஸ்ஸ வாயாமோ அஹோஸி. அனிவத்தி ப⁴விஸ்ஸாமீதி பப்³ப³ஜ்ஜதோ அனிவத்திகோ ப⁴விஸ்ஸாமி, ப்³ரஹ்மசரியவாஸதோ அனிவத்திகோ, ஸப்³ப³ஞ்ஞுதஞ்ஞாணதோ அனிவத்திகோ ப⁴விஸ்ஸாமி. ப்³ரஹ்மசரியபராயணோதி மக்³க³ப்³ரஹ்மசரியபராயணோ. இமினா லோகுத்தரோ அட்ட²ங்கி³கோ மக்³கோ³ கதி²தோதி.
Idāni gāthāhi kūṭaṃ gaṇhanto byādhidhammātiādimāha. Tattha ñatvā dhammaṃ nirūpadhinti upadhirahitaṃ arahattamaggaṃ ñatvā. Sabbe made abhibhosmīti sabbe ime tayopi made adhibhaviṃ, atikkamma ṭhitosmīti attho. Nekkhammaṃ daṭṭhu khematoti pabbajjaṃ khemato disvā. Tassa me ahu ussāho, nibbānaṃ abhipassatoti tassa mayhaṃ nibbānaṃ abhipassantassa vāyāmo ahosi. Anivatti bhavissāmīti pabbajjato anivattiko bhavissāmi, brahmacariyavāsato anivattiko, sabbaññutaññāṇato anivattiko bhavissāmi. Brahmacariyaparāyaṇoti maggabrahmacariyaparāyaṇo. Iminā lokuttaro aṭṭhaṅgiko maggo kathitoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. அபி⁴ண்ஹபச்சவெக்கி²தப்³ப³டா²னஸுத்தங் • 7. Abhiṇhapaccavekkhitabbaṭhānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. அபி⁴ண்ஹபச்சவெக்கி²தப்³ப³ட்டா²னஸுத்தவண்ணனா • 7. Abhiṇhapaccavekkhitabbaṭṭhānasuttavaṇṇanā
