| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೭. ಅಭಿಣ್ಹಪಚ್ಚವೇಕ್ಖಿತಬ್ಬಠಾನಸುತ್ತವಣ್ಣನಾ
7. Abhiṇhapaccavekkhitabbaṭhānasuttavaṇṇanā
೫೭. ಸತ್ತಮೇ ಜರಾಧಮ್ಮೋಮ್ಹೀತಿ ಜರಾಸಭಾವೋ ಅಮ್ಹಿ। ಜರಂ ಅನತೀತೋತಿ ಜರಂ ಅನತಿಕ್ಕನ್ತೋ, ಅನ್ತೋಜರಾಯ ಏವ ಚರಾಮಿ। ಸೇಸಪದೇಸುಪಿ ಏಸೇವ ನಯೋ। ಕಮ್ಮಸ್ಸಕೋತಿಆದೀಸು ಕಮ್ಮಂ ಮಯ್ಹಂ ಸಕಂ ಅತ್ತನೋ ಸನ್ತಕನ್ತಿ ಕಮ್ಮಸ್ಸಕೋ ಅಮ್ಹಿ। ಕಮ್ಮಸ್ಸ ದಾಯಾದೋತಿ ಕಮ್ಮದಾಯಾದೋ, ಕಮ್ಮಂ ಮಯ್ಹಂ ದಾಯಜ್ಜಂ ಸನ್ತಕನ್ತಿ ಅತ್ಥೋ। ಕಮ್ಮಂ ಮಯ್ಹಂ ಯೋನಿ ಕಾರಣನ್ತಿ ಕಮ್ಮಯೋನಿ। ಕಮ್ಮಂ ಮಯ್ಹಂ ಬನ್ಧೂತಿ ಕಮ್ಮಬನ್ಧು, ಕಮ್ಮಞಾತಕೋತಿ ಅತ್ಥೋ। ಕಮ್ಮಂ ಮಯ್ಹಂ ಪಟಿಸರಣಂ ಪತಿಟ್ಠಾತಿ ಕಮ್ಮಪಟಿಸರಣೋ। ತಸ್ಸ ದಾಯಾದೋ ಭವಿಸ್ಸಾಮೀತಿ ತಸ್ಸ ಕಮ್ಮಸ್ಸ ದಾಯಾದೋ ತೇನ ದಿನ್ನಫಲಪಟಿಗ್ಗಾಹಕೋ ಭವಿಸ್ಸಾಮೀತಿ ಅತ್ಥೋ। ಯೋಬ್ಬನಮದೋತಿ ಯೋಬ್ಬನಂ ಆರಬ್ಭ ಉಪ್ಪನ್ನಮದೋ। ಸೇಸೇಸುಪಿ ಏಸೇವ ನಯೋ। ಮಗ್ಗೋ ಸಞ್ಜಾಯತೀತಿ ಲೋಕುತ್ತರಮಗ್ಗೋ ಸಞ್ಜಾಯತಿ। ಸಂಯೋಜನಾನಿ ಸಬ್ಬಸೋ ಪಹೀಯನ್ತೀತಿ ದಸ ಸಂಯೋಜನಾನಿ ಸಬ್ಬಸೋ ಪಹೀಯನ್ತಿ। ಅನುಸಯಾ ಬ್ಯನ್ತೀಹೋನ್ತೀತಿ ಸತ್ತ ಅನುಸಯಾ ವಿಗತನ್ತಾ ಪರಿಚ್ಛಿನ್ನಾ ಪರಿವಟುಮಾ ಹೋನ್ತಿ। ಏವಮೇತ್ಥ ಹೇಟ್ಠಾ ಪಞ್ಚಸು ಠಾನೇಸು ವಿಪಸ್ಸನಾ ಕಥಿತಾ, ಇಮೇಸು ಪಞ್ಚಸು ಲೋಕುತ್ತರಮಗ್ಗೋ।
57. Sattame jarādhammomhīti jarāsabhāvo amhi. Jaraṃ anatītoti jaraṃ anatikkanto, antojarāya eva carāmi. Sesapadesupi eseva nayo. Kammassakotiādīsu kammaṃ mayhaṃ sakaṃ attano santakanti kammassako amhi. Kammassa dāyādoti kammadāyādo, kammaṃ mayhaṃ dāyajjaṃ santakanti attho. Kammaṃ mayhaṃ yoni kāraṇanti kammayoni. Kammaṃ mayhaṃ bandhūti kammabandhu, kammañātakoti attho. Kammaṃ mayhaṃ paṭisaraṇaṃ patiṭṭhāti kammapaṭisaraṇo. Tassa dāyādo bhavissāmīti tassa kammassa dāyādo tena dinnaphalapaṭiggāhako bhavissāmīti attho. Yobbanamadoti yobbanaṃ ārabbha uppannamado. Sesesupi eseva nayo. Maggo sañjāyatīti lokuttaramaggo sañjāyati. Saṃyojanāni sabbaso pahīyantīti dasa saṃyojanāni sabbaso pahīyanti. Anusayā byantīhontīti satta anusayā vigatantā paricchinnā parivaṭumā honti. Evamettha heṭṭhā pañcasu ṭhānesu vipassanā kathitā, imesu pañcasu lokuttaramaggo.
ಇದಾನಿ ಗಾಥಾಹಿ ಕೂಟಂ ಗಣ್ಹನ್ತೋ ಬ್ಯಾಧಿಧಮ್ಮಾತಿಆದಿಮಾಹ। ತತ್ಥ ಞತ್ವಾ ಧಮ್ಮಂ ನಿರೂಪಧಿನ್ತಿ ಉಪಧಿರಹಿತಂ ಅರಹತ್ತಮಗ್ಗಂ ಞತ್ವಾ। ಸಬ್ಬೇ ಮದೇ ಅಭಿಭೋಸ್ಮೀತಿ ಸಬ್ಬೇ ಇಮೇ ತಯೋಪಿ ಮದೇ ಅಧಿಭವಿಂ, ಅತಿಕ್ಕಮ್ಮ ಠಿತೋಸ್ಮೀತಿ ಅತ್ಥೋ। ನೇಕ್ಖಮ್ಮಂ ದಟ್ಠು ಖೇಮತೋತಿ ಪಬ್ಬಜ್ಜಂ ಖೇಮತೋ ದಿಸ್ವಾ। ತಸ್ಸ ಮೇ ಅಹು ಉಸ್ಸಾಹೋ, ನಿಬ್ಬಾನಂ ಅಭಿಪಸ್ಸತೋತಿ ತಸ್ಸ ಮಯ್ಹಂ ನಿಬ್ಬಾನಂ ಅಭಿಪಸ್ಸನ್ತಸ್ಸ ವಾಯಾಮೋ ಅಹೋಸಿ। ಅನಿವತ್ತಿ ಭವಿಸ್ಸಾಮೀತಿ ಪಬ್ಬಜ್ಜತೋ ಅನಿವತ್ತಿಕೋ ಭವಿಸ್ಸಾಮಿ, ಬ್ರಹ್ಮಚರಿಯವಾಸತೋ ಅನಿವತ್ತಿಕೋ, ಸಬ್ಬಞ್ಞುತಞ್ಞಾಣತೋ ಅನಿವತ್ತಿಕೋ ಭವಿಸ್ಸಾಮಿ। ಬ್ರಹ್ಮಚರಿಯಪರಾಯಣೋತಿ ಮಗ್ಗಬ್ರಹ್ಮಚರಿಯಪರಾಯಣೋ। ಇಮಿನಾ ಲೋಕುತ್ತರೋ ಅಟ್ಠಙ್ಗಿಕೋ ಮಗ್ಗೋ ಕಥಿತೋತಿ।
Idāni gāthāhi kūṭaṃ gaṇhanto byādhidhammātiādimāha. Tattha ñatvā dhammaṃ nirūpadhinti upadhirahitaṃ arahattamaggaṃ ñatvā. Sabbe made abhibhosmīti sabbe ime tayopi made adhibhaviṃ, atikkamma ṭhitosmīti attho. Nekkhammaṃ daṭṭhu khematoti pabbajjaṃ khemato disvā. Tassa me ahu ussāho, nibbānaṃ abhipassatoti tassa mayhaṃ nibbānaṃ abhipassantassa vāyāmo ahosi. Anivatti bhavissāmīti pabbajjato anivattiko bhavissāmi, brahmacariyavāsato anivattiko, sabbaññutaññāṇato anivattiko bhavissāmi. Brahmacariyaparāyaṇoti maggabrahmacariyaparāyaṇo. Iminā lokuttaro aṭṭhaṅgiko maggo kathitoti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಅಭಿಣ್ಹಪಚ್ಚವೇಕ್ಖಿತಬ್ಬಠಾನಸುತ್ತಂ • 7. Abhiṇhapaccavekkhitabbaṭhānasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭. ಅಭಿಣ್ಹಪಚ್ಚವೇಕ್ಖಿತಬ್ಬಟ್ಠಾನಸುತ್ತವಣ್ಣನಾ • 7. Abhiṇhapaccavekkhitabbaṭṭhānasuttavaṇṇanā
