| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
7. අභිණ්‌හපච්‌චවෙක්‌ඛිතබ්‌බඨානසුත්‌තවණ්‌ණනා
7. Abhiṇhapaccavekkhitabbaṭhānasuttavaṇṇanā
57. සත්‌තමෙ ජරාධම්‌මොම්‌හීති ජරාසභාවො අම්‌හි. ජරං අනතීතොති ජරං අනතික්‌කන්‌තො, අන්‌තොජරාය එව චරාමි. සෙසපදෙසුපි එසෙව නයො. කම්‌මස්‌සකොතිආදීසු කම්‌මං මය්‌හං සකං අත්‌තනො සන්‌තකන්‌ති කම්‌මස්‌සකො අම්‌හි. කම්‌මස්‌ස දායාදොති කම්‌මදායාදො, කම්‌මං මය්‌හං දායජ්‌ජං සන්‌තකන්‌ති අත්‌ථො. කම්‌මං මය්‌හං යොනි කාරණන්‌ති කම්‌මයොනි. කම්‌මං මය්‌හං බන්‌ධූති කම්‌මබන්‌ධු, කම්‌මඤාතකොති අත්‌ථො. කම්‌මං මය්‌හං පටිසරණං පතිට්‌ඨාති කම්‌මපටිසරණො. තස්‌ස දායාදො භවිස්‌සාමීති තස්‌ස කම්‌මස්‌ස දායාදො තෙන දින්‌නඵලපටිග්‌ගාහකො භවිස්‌සාමීති අත්‌ථො. යොබ්‌බනමදොති යොබ්‌බනං ආරබ්‌භ උප්‌පන්‌නමදො. සෙසෙසුපි එසෙව නයො. මග්‌ගො සඤ්‌ජායතීති ලොකුත්‌තරමග්‌ගො සඤ්‌ජායති. සංයොජනානි සබ්‌බසො පහීයන්‌තීති දස සංයොජනානි සබ්‌බසො පහීයන්‌ති. අනුසයා බ්‍යන්‌තීහොන්‌තීති සත්‌ත අනුසයා විගතන්‌තා පරිච්‌ඡින්‌නා පරිවටුමා හොන්‌ති. එවමෙත්‌ථ හෙට්‌ඨා පඤ්‌චසු ඨානෙසු විපස්‌සනා කථිතා, ඉමෙසු පඤ්‌චසු ලොකුත්‌තරමග්‌ගො.
57. Sattame jarādhammomhīti jarāsabhāvo amhi. Jaraṃ anatītoti jaraṃ anatikkanto, antojarāya eva carāmi. Sesapadesupi eseva nayo. Kammassakotiādīsu kammaṃ mayhaṃ sakaṃ attano santakanti kammassako amhi. Kammassa dāyādoti kammadāyādo, kammaṃ mayhaṃ dāyajjaṃ santakanti attho. Kammaṃ mayhaṃ yoni kāraṇanti kammayoni. Kammaṃ mayhaṃ bandhūti kammabandhu, kammañātakoti attho. Kammaṃ mayhaṃ paṭisaraṇaṃ patiṭṭhāti kammapaṭisaraṇo. Tassa dāyādo bhavissāmīti tassa kammassa dāyādo tena dinnaphalapaṭiggāhako bhavissāmīti attho. Yobbanamadoti yobbanaṃ ārabbha uppannamado. Sesesupi eseva nayo. Maggo sañjāyatīti lokuttaramaggo sañjāyati. Saṃyojanāni sabbaso pahīyantīti dasa saṃyojanāni sabbaso pahīyanti. Anusayā byantīhontīti satta anusayā vigatantā paricchinnā parivaṭumā honti. Evamettha heṭṭhā pañcasu ṭhānesu vipassanā kathitā, imesu pañcasu lokuttaramaggo.
ඉදානි ගාථාහි කූටං ගණ්‌හන්‌තො බ්‍යාධිධම්‌මාතිආදිමාහ. තත්‌ථ ඤත්‌වා ධම්‌මං නිරූපධින්‌ති උපධිරහිතං අරහත්‌තමග්‌ගං ඤත්‌වා. සබ්‌බෙ මදෙ අභිභොස්‌මීති සබ්‌බෙ ඉමෙ තයොපි මදෙ අධිභවිං, අතික්‌කම්‌ම ඨිතොස්‌මීති අත්‌ථො. නෙක්‌ඛම්‌මං දට්‌ඨු ඛෙමතොති පබ්‌බජ්‌ජං ඛෙමතො දිස්‌වා. තස්‌ස මෙ අහු උස්‌සාහො, නිබ්‌බානං අභිපස්‌සතොති තස්‌ස මය්‌හං නිබ්‌බානං අභිපස්‌සන්‌තස්‌ස වායාමො අහොසි. අනිවත්‌ති භවිස්‌සාමීති පබ්‌බජ්‌ජතො අනිවත්‌තිකො භවිස්‌සාමි, බ්‍රහ්‌මචරියවාසතො අනිවත්‌තිකො, සබ්‌බඤ්‌ඤුතඤ්‌ඤාණතො අනිවත්‌තිකො භවිස්‌සාමි. බ්‍රහ්‌මචරියපරායණොති මග්‌ගබ්‍රහ්‌මචරියපරායණො. ඉමිනා ලොකුත්‌තරො අට්‌ඨඞ්‌ගිකො මග්‌ගො කථිතොති.
Idāni gāthāhi kūṭaṃ gaṇhanto byādhidhammātiādimāha. Tattha ñatvā dhammaṃ nirūpadhinti upadhirahitaṃ arahattamaggaṃ ñatvā. Sabbe made abhibhosmīti sabbe ime tayopi made adhibhaviṃ, atikkamma ṭhitosmīti attho. Nekkhammaṃ daṭṭhu khematoti pabbajjaṃ khemato disvā. Tassa me ahu ussāho, nibbānaṃ abhipassatoti tassa mayhaṃ nibbānaṃ abhipassantassa vāyāmo ahosi. Anivatti bhavissāmīti pabbajjato anivattiko bhavissāmi, brahmacariyavāsato anivattiko, sabbaññutaññāṇato anivattiko bhavissāmi. Brahmacariyaparāyaṇoti maggabrahmacariyaparāyaṇo. Iminā lokuttaro aṭṭhaṅgiko maggo kathitoti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. අභිණ්‌හපච්‌චවෙක්‌ඛිතබ්‌බඨානසුත්‌තං • 7. Abhiṇhapaccavekkhitabbaṭhānasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7. අභිණ්‌හපච්‌චවෙක්‌ඛිතබ්‌බට්‌ඨානසුත්‌තවණ්‌ණනා • 7. Abhiṇhapaccavekkhitabbaṭṭhānasuttavaṇṇanā
