| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣. អភិញ្ញាបរិញ្ញាបហានសុត្តំ
3. Abhiññāpariññāpahānasuttaṃ
២៥. ‘‘សព្ពំ អភិញ្ញា បរិញ្ញា បហានាយ វោ, ភិក្ខវេ, ធម្មំ ទេសេស្សាមិ។ តំ សុណាថ។ កតមោ ច, ភិក្ខវេ, សព្ពំ អភិញ្ញា បរិញ្ញា បហានាយ ធម្មោ? ចក្ខុំ, ភិក្ខវេ, អភិញ្ញា បរិញ្ញា បហាតព្ពំ, រូបា អភិញ្ញា បរិញ្ញា បហាតព្ពា , ចក្ខុវិញ្ញាណំ អភិញ្ញា បរិញ្ញា បហាតព្ពំ, ចក្ខុសម្ផស្សោ អភិញ្ញា បរិញ្ញា បហាតព្ពោ, យម្បិទំ ចក្ខុសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ អភិញ្ញា បរិញ្ញា បហាតព្ពំ…បេ.… ជិវ្ហា អភិញ្ញា បរិញ្ញា បហាតព្ពា, រសា អភិញ្ញា បរិញ្ញា បហាតព្ពា, ជិវ្ហាវិញ្ញាណំ អភិញ្ញា បរិញ្ញា បហាតព្ពំ, ជិវ្ហាសម្ផស្សោ អភិញ្ញា បរិញ្ញា បហាតព្ពោ, យម្បិទំ ជិវ្ហាសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ អភិញ្ញា បរិញ្ញា បហាតព្ពំ។ កាយោ អភិញ្ញា បរិញ្ញា បហាតព្ពោ… មនោ អភិញ្ញា បរិញ្ញា បហាតព្ពោ, ធម្មា អភិញ្ញា បរិញ្ញា បហាតព្ពា, មនោវិញ្ញាណំ អភិញ្ញា បរិញ្ញា បហាតព្ពំ, មនោសម្ផស្សោ អភិញ្ញា បរិញ្ញា បហាតព្ពោ, យម្បិទំ មនោសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ អភិញ្ញា បរិញ្ញា បហាតព្ពំ។ អយំ ខោ, ភិក្ខវេ, សព្ពំ អភិញ្ញា បរិញ្ញា បហានាយ ធម្មោ’’តិ។ តតិយំ។
25. ‘‘Sabbaṃ abhiññā pariññā pahānāya vo, bhikkhave, dhammaṃ desessāmi. Taṃ suṇātha. Katamo ca, bhikkhave, sabbaṃ abhiññā pariññā pahānāya dhammo? Cakkhuṃ, bhikkhave, abhiññā pariññā pahātabbaṃ, rūpā abhiññā pariññā pahātabbā , cakkhuviññāṇaṃ abhiññā pariññā pahātabbaṃ, cakkhusamphasso abhiññā pariññā pahātabbo, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ…pe… jivhā abhiññā pariññā pahātabbā, rasā abhiññā pariññā pahātabbā, jivhāviññāṇaṃ abhiññā pariññā pahātabbaṃ, jivhāsamphasso abhiññā pariññā pahātabbo, yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ. Kāyo abhiññā pariññā pahātabbo… mano abhiññā pariññā pahātabbo, dhammā abhiññā pariññā pahātabbā, manoviññāṇaṃ abhiññā pariññā pahātabbaṃ, manosamphasso abhiññā pariññā pahātabbo, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ. Ayaṃ kho, bhikkhave, sabbaṃ abhiññā pariññā pahānāya dhammo’’ti. Tatiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. អភិញ្ញាបរិញ្ញាបហានសុត្តវណ្ណនា • 3. Abhiññāpariññāpahānasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៣. អភិញ្ញាបរិញ្ញាបហានសុត្តវណ្ណនា • 3. Abhiññāpariññāpahānasuttavaṇṇanā
