| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. අභිඤ්‌ඤාපරිඤ්‌ඤාපහානසුත්‌තං
3. Abhiññāpariññāpahānasuttaṃ
25. ‘‘සබ්‌බං අභිඤ්‌ඤා පරිඤ්‌ඤා පහානාය වො, භික්‌ඛවෙ, ධම්‌මං දෙසෙස්‌සාමි. තං සුණාථ. කතමො ච, භික්‌ඛවෙ, සබ්‌බං අභිඤ්‌ඤා පරිඤ්‌ඤා පහානාය ධම්‌මො? චක්‌ඛුං, භික්‌ඛවෙ, අභිඤ්‌ඤා පරිඤ්‌ඤා පහාතබ්‌බං, රූපා අභිඤ්‌ඤා පරිඤ්‌ඤා පහාතබ්‌බා , චක්‌ඛුවිඤ්‌ඤාණං අභිඤ්‌ඤා පරිඤ්‌ඤා පහාතබ්‌බං, චක්‌ඛුසම්‌ඵස්‌සො අභිඤ්‌ඤා පරිඤ්‌ඤා පහාතබ්‌බො, යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අභිඤ්‌ඤා පරිඤ්‌ඤා පහාතබ්‌බං…පෙ.… ජිව්‌හා අභිඤ්‌ඤා පරිඤ්‌ඤා පහාතබ්‌බා, රසා අභිඤ්‌ඤා පරිඤ්‌ඤා පහාතබ්‌බා, ජිව්‌හාවිඤ්‌ඤාණං අභිඤ්‌ඤා පරිඤ්‌ඤා පහාතබ්‌බං, ජිව්‌හාසම්‌ඵස්‌සො අභිඤ්‌ඤා පරිඤ්‌ඤා පහාතබ්‌බො, යම්‌පිදං ජිව්‌හාසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අභිඤ්‌ඤා පරිඤ්‌ඤා පහාතබ්‌බං. කායො අභිඤ්‌ඤා පරිඤ්‌ඤා පහාතබ්‌බො… මනො අභිඤ්‌ඤා පරිඤ්‌ඤා පහාතබ්‌බො, ධම්‌මා අභිඤ්‌ඤා පරිඤ්‌ඤා පහාතබ්‌බා, මනොවිඤ්‌ඤාණං අභිඤ්‌ඤා පරිඤ්‌ඤා පහාතබ්‌බං, මනොසම්‌ඵස්‌සො අභිඤ්‌ඤා පරිඤ්‌ඤා පහාතබ්‌බො, යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අභිඤ්‌ඤා පරිඤ්‌ඤා පහාතබ්‌බං. අයං ඛො, භික්‌ඛවෙ, සබ්‌බං අභිඤ්‌ඤා පරිඤ්‌ඤා පහානාය ධම්‌මො’’ති. තතියං.
25. ‘‘Sabbaṃ abhiññā pariññā pahānāya vo, bhikkhave, dhammaṃ desessāmi. Taṃ suṇātha. Katamo ca, bhikkhave, sabbaṃ abhiññā pariññā pahānāya dhammo? Cakkhuṃ, bhikkhave, abhiññā pariññā pahātabbaṃ, rūpā abhiññā pariññā pahātabbā , cakkhuviññāṇaṃ abhiññā pariññā pahātabbaṃ, cakkhusamphasso abhiññā pariññā pahātabbo, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ…pe… jivhā abhiññā pariññā pahātabbā, rasā abhiññā pariññā pahātabbā, jivhāviññāṇaṃ abhiññā pariññā pahātabbaṃ, jivhāsamphasso abhiññā pariññā pahātabbo, yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ. Kāyo abhiññā pariññā pahātabbo… mano abhiññā pariññā pahātabbo, dhammā abhiññā pariññā pahātabbā, manoviññāṇaṃ abhiññā pariññā pahātabbaṃ, manosamphasso abhiññā pariññā pahātabbo, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi abhiññā pariññā pahātabbaṃ. Ayaṃ kho, bhikkhave, sabbaṃ abhiññā pariññā pahānāya dhammo’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. අභිඤ්‌ඤාපරිඤ්‌ඤාපහානසුත්‌තවණ්‌ණනා • 3. Abhiññāpariññāpahānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. අභිඤ්‌ඤාපරිඤ්‌ඤාපහානසුත්‌තවණ්‌ණනා • 3. Abhiññāpariññāpahānasuttavaṇṇanā
