| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
2. д̣̇уганибаад̇о
2. Dukanipāto
1. абхируубананд̣̇аат̇зрийг̇аат̇ааван̣н̣анаа
1. Abhirūpanandātherīgāthāvaṇṇanā
д̣̇уганибаад̇з аад̇урам̣ асужим̣ бууд̇инд̇иаад̣̇игаа абхируубананд̣̇ааяа сигкамаанааяа г̇аат̇аа. аяам̣ гира вибассисса бхаг̇авад̇о гаалз б̣анд̇хумад̇ийнаг̇арз г̇ахабад̇имахаасааласса д̇хийд̇аа худ̇ваа сад̇т̇у санд̇игз д̇хаммам̣ суд̇ваа саран̣зсу жа сийлзсу жа бад̇идтид̇аа сад̇т̇ари бариниб̣б̣уд̇з д̇хаад̇ужзд̇ияам̣ рад̇анабадиман̣д̣ид̇зна суван̣н̣ажчад̇д̇зна бууж̇ам̣ гад̇ваа, гаалан̇гад̇ваа саг̇г̇з ниб̣б̣ад̇д̇ид̇ваа абараабарам̣ суг̇ад̇ийсуязва сам̣саранд̇ий имасмим̣ б̣уд̣̇д̇хуббаад̣̇з габилавад̇т̇унаг̇арз кзмагасса саггасса аг̇г̇амахзсияаа гужчисмим̣ ниб̣б̣ад̇д̇и. нанд̣̇аад̇иссаа наамам̣ ахоси. саа ад̇д̇абхаавасса ад̇ивияа руубасобхаг̇г̇аббад̇д̇ияаа абхируубаа д̣̇ассанийяаа баасаад̣̇игаа абхируубананд̣̇аад̇взва бан̃н̃ааяид̇т̇а. д̇ассаа ваяаббад̇д̇ааяа ваарзяяад̣̇ивасзязва варабхууд̇о сагяагумааро гааламагааси. ат̇а нам̣ маад̇аабид̇аро агаамам̣ баб̣б̣ааж̇зсум̣.
Dukanipāte āturaṃ asuciṃ pūtintiādikā abhirūpanandāya sikkhamānāya gāthā. Ayaṃ kira vipassissa bhagavato kāle bandhumatīnagare gahapatimahāsālassa dhītā hutvā satthu santike dhammaṃ sutvā saraṇesu ca sīlesu ca patiṭṭhitā satthari parinibbute dhātucetiyaṃ ratanapaṭimaṇḍitena suvaṇṇacchattena pūjaṃ katvā, kālaṅkatvā sagge nibbattitvā aparāparaṃ sugatīsuyeva saṃsarantī imasmiṃ buddhuppāde kapilavatthunagare khemakassa sakkassa aggamahesiyā kucchismiṃ nibbatti. Nandātissā nāmaṃ ahosi. Sā attabhāvassa ativiya rūpasobhaggappattiyā abhirūpā dassanīyā pāsādikā abhirūpanandātveva paññāyittha. Tassā vayappattāya vāreyyadivaseyeva varabhūto sakyakumāro kālamakāsi. Atha naṃ mātāpitaro akāmaṃ pabbājesuṃ.
саа баб̣б̣аж̇ид̇вааби руубам̣ ниссааяа уббаннамад̣̇аа ‘‘сад̇т̇аа руубам̣ виван̣н̣зд̇и г̇арахад̇и анзгабарияааязна руубз аад̣̇ийнавам̣ д̣̇ассзд̇ий’’д̇и б̣уд̣̇д̇хубадтаанам̣ на г̇ажчад̇и. бхаг̇аваа д̇ассаа н̃аан̣абарибаагам̣ н̃ад̇ваа махаабаж̇аабад̇им̣ аан̣аабзси ‘‘саб̣б̣ааби бхигкунияо бадибаадияаа оваад̣̇ам̣ ааг̇ажчанд̇уу’’д̇и. саа ад̇д̇ано ваарз самбад̇д̇з ан̃н̃ам̣ бзсзси. бхаг̇аваа ‘‘ваарз самбад̇д̇з ад̇д̇анаава ааг̇анд̇аб̣б̣ам̣, на ан̃н̃аа бзсзд̇аб̣б̣аа’’д̇и ааха. саа сад̇т̇у аан̣ам̣ лан̇гхид̇ум̣ асаггонд̇ий бхигкунийхи сад̣̇д̇хим̣ б̣уд̣̇д̇хубадтаанам̣ аг̇амааси. бхаг̇аваа ид̣̇д̇хияаа згам̣ абхируубам̣ ид̇т̇ируубам̣ маабзд̇ваа буна ж̇арааж̇ин̣н̣ам̣ д̣̇ассзд̇ваа сам̣взг̇ам̣ уббаад̣̇зд̇ваа –
Sā pabbajitvāpi rūpaṃ nissāya uppannamadā ‘‘satthā rūpaṃ vivaṇṇeti garahati anekapariyāyena rūpe ādīnavaṃ dassetī’’ti buddhupaṭṭhānaṃ na gacchati. Bhagavā tassā ñāṇaparipākaṃ ñatvā mahāpajāpatiṃ āṇāpesi ‘‘sabbāpi bhikkhuniyo paṭipāṭiyā ovādaṃ āgacchantū’’ti. Sā attano vāre sampatte aññaṃ pesesi. Bhagavā ‘‘vāre sampatte attanāva āgantabbaṃ, na aññā pesetabbā’’ti āha. Sā satthu āṇaṃ laṅghituṃ asakkontī bhikkhunīhi saddhiṃ buddhupaṭṭhānaṃ agamāsi. Bhagavā iddhiyā ekaṃ abhirūpaṃ itthirūpaṃ māpetvā puna jarājiṇṇaṃ dassetvā saṃvegaṃ uppādetvā –
19.
19.
‘‘аад̇урам̣ асужим̣ бууд̇им̣, басса нанд̣̇з самуссаяам̣;
‘‘Āturaṃ asuciṃ pūtiṃ, passa nande samussayaṃ;
асубхааяа жид̇д̇ам̣ бхаавзхи, згаг̇г̇ам̣ сусамаахид̇ам̣.
Asubhāya cittaṃ bhāvehi, ekaggaṃ susamāhitaṃ.
20.
20.
‘‘анимид̇д̇ан̃жа бхаавзхи, маанаанусаяамуж̇ж̇аха;
‘‘Animittañca bhāvehi, mānānusayamujjaha;
д̇ад̇о маанаабхисамаяаа, убасанд̇аа жариссасий’’д̇и. –
Tato mānābhisamayā, upasantā carissasī’’ti. –
имаа д̣̇вз г̇аат̇аа абхааси. д̇аасам̣ ад̇т̇о хздтаа вуд̇д̇анаяо зва. г̇аат̇аабарияосаанз абхируубананд̣̇аа арахад̇д̇ам̣ баабун̣и. д̇зна вуд̇д̇ам̣ абад̣̇аанз –
Imā dve gāthā abhāsi. Tāsaṃ attho heṭṭhā vuttanayo eva. Gāthāpariyosāne abhirūpanandā arahattaṃ pāpuṇi. Tena vuttaṃ apadāne –
‘‘наг̇арз б̣анд̇хумад̇ияаа, б̣анд̇хумаа наама кад̇д̇ияо;
‘‘Nagare bandhumatiyā, bandhumā nāma khattiyo;
д̇асса ран̃н̃о ахум̣ бхарияаа, згаж̇жхам̣ жаараяаамахам̣.
Tassa rañño ahuṃ bhariyā, ekajjhaṃ cārayāmahaṃ.
‘‘рахог̇ад̇аа нисийд̣̇ид̇ваа, звам̣ жинд̇зсахам̣ д̇ад̣̇аа;
‘‘Rahogatā nisīditvā, evaṃ cintesahaṃ tadā;
аад̣̇ааяа г̇аманийяан̃хи, гусалам̣ над̇т̇и мз гад̇ам̣.
Ādāya gamanīyañhi, kusalaṃ natthi me kataṃ.
‘‘махаабхид̇аабам̣ гадугам̣, гхораруубам̣ суд̣̇аарун̣ам̣;
‘‘Mahābhitāpaṃ kaṭukaṃ, ghorarūpaṃ sudāruṇaṃ;
нираяам̣ нууна г̇ажчаами, зд̇т̇а мз над̇т̇и сам̣саяо.
Nirayaṃ nūna gacchāmi, ettha me natthi saṃsayo.
‘‘зваахам̣ жинд̇аяид̇ваана, бахам̣сзд̇ваана маанасам̣;
‘‘Evāhaṃ cintayitvāna, pahaṃsetvāna mānasaṃ;
рааж̇аанам̣ убаг̇анд̇ваана, ид̣̇ам̣ важанамаб̣равим̣.
Rājānaṃ upagantvāna, idaṃ vacanamabraviṃ.
‘‘ид̇т̇ий наама маяам̣ д̣̇зва, бурисаануг̇ад̇аа сад̣̇аа;
‘‘Itthī nāma mayaṃ deva, purisānugatā sadā;
згам̣ мз саман̣ам̣ д̣̇зхи, бхож̇аяиссаами кад̇д̇ияа.
Ekaṃ me samaṇaṃ dehi, bhojayissāmi khattiya.
‘‘ад̣̇ааси мз махаарааж̇аа, саман̣ам̣ бхаавид̇инд̣̇рияам̣;
‘‘Adāsi me mahārājā, samaṇaṃ bhāvitindriyaṃ;
д̇асса бад̇д̇ам̣ г̇ахзд̇ваана, бараманнзна буураяим̣.
Tassa pattaṃ gahetvāna, paramannena pūrayiṃ.
‘‘буураяид̇ваа бараманнам̣, сахассаг̇гханагзнахам̣;
‘‘Pūrayitvā paramannaṃ, sahassagghanakenahaṃ;
вад̇т̇аяуг̇зна чаад̣̇зд̇ваа, ад̣̇аасим̣ д̇удтамаанасаа.
Vatthayugena chādetvā, adāsiṃ tuṭṭhamānasā.
‘‘д̇зна гаммзна сугад̇зна, жзд̇анаабан̣ид̇хийхи жа;
‘‘Tena kammena sukatena, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.
Jahitvā mānusaṃ dehaṃ, tāvatiṃsamagacchahaṃ.
‘‘сахассам̣ д̣̇зварааж̇уунам̣, махзсид̇д̇амагаараяим̣;
‘‘Sahassaṃ devarājūnaṃ, mahesittamakārayiṃ;
сахассам̣ жаггавад̇д̇ийнам̣, махзсид̇д̇амагаараяим̣.
Sahassaṃ cakkavattīnaṃ, mahesittamakārayiṃ.
‘‘бад̣̇зсараж̇ж̇ам̣ вибулам̣, г̇ан̣анаад̇о асан̇кияам̣;
‘‘Padesarajjaṃ vipulaṃ, gaṇanāto asaṅkhiyaṃ;
наанаавид̇хам̣ б̣ахум̣ бун̃н̃ам̣, д̇асса гаммапалаа д̇ад̇о.
Nānāvidhaṃ bahuṃ puññaṃ, tassa kammaphalā tato.
‘‘уббалассзва мз ван̣н̣аа, абхируубаа суд̣̇ассанаа;
‘‘Uppalasseva me vaṇṇā, abhirūpā sudassanā;
ид̇т̇ий саб̣б̣ан̇г̇асамбаннаа, абхиж̇аад̇аа ж̇уд̇инд̇хараа.
Itthī sabbaṅgasampannā, abhijātā jutindharā.
‘‘бажчимз бхавасамбад̇д̇з, аж̇ааяим̣ саагияз гулз;
‘‘Pacchime bhavasampatte, ajāyiṃ sākiye kule;
наарийсахассабаамогкаа, суд̣̇д̇ход̣̇анасуд̇ассахам̣.
Nārīsahassapāmokkhā, suddhodanasutassahaṃ.
‘‘ниб̣б̣инд̣̇ид̇ваа аг̇аарзхам̣, баб̣б̣аж̇им̣ анаг̇аарияам̣;
‘‘Nibbinditvā agārehaṃ, pabbajiṃ anagāriyaṃ;
сад̇д̇амим̣ рад̇д̇им̣ самбад̇ваа, жад̇усажжам̣ абаабун̣им̣.
Sattamiṃ rattiṃ sampatvā, catusaccaṃ apāpuṇiṃ.
‘‘жийварабин̣д̣абаад̇ан̃жа, бажжаяан̃жа сзнаасанам̣;
‘‘Cīvarapiṇḍapātañca, paccayañca senāsanaṃ;
баримзд̇ум̣ на саггоми, бин̣д̣абаад̇ассид̣̇ам̣ палам̣.
Parimetuṃ na sakkomi, piṇḍapātassidaṃ phalaṃ.
‘‘яам̣ маяхам̣ буримам̣ гаммам̣, гусалам̣ ж̇анид̇ам̣ муни;
‘‘Yaṃ mayhaṃ purimaṃ kammaṃ, kusalaṃ janitaṃ muni;
д̇уяхад̇т̇ааяа махаавийра, барижин̣н̣ам̣ б̣ахум̣ маяаа.
Tuyhatthāya mahāvīra, pariciṇṇaṃ bahuṃ mayā.
‘‘згад̇им̣сз ид̇о габбз, яам̣ д̣̇аанамад̣̇ад̣̇им̣ д̇ад̣̇аа;
‘‘Ekatiṃse ito kappe, yaṃ dānamadadiṃ tadā;
д̣̇уг̇г̇ад̇им̣ наабхиж̇аанаами, бин̣д̣абаад̇ассид̣̇ам̣ палам̣.
Duggatiṃ nābhijānāmi, piṇḍapātassidaṃ phalaṃ.
‘‘д̣̇увз г̇ад̇ий баж̇аанаами, д̣̇звад̇д̇ам̣ ат̇а маанусам̣;
‘‘Duve gatī pajānāmi, devattaṃ atha mānusaṃ;
ан̃н̃ам̣ г̇ад̇им̣ на ж̇аанаами, бин̣д̣абаад̇ассид̣̇ам̣ палам̣.
Aññaṃ gatiṃ na jānāmi, piṇḍapātassidaṃ phalaṃ.
‘‘ужжз гулз баж̇аанаами, д̇аяо саалз махаад̇ханз;
‘‘Ucce kule pajānāmi, tayo sāle mahādhane;
ан̃н̃ам̣ гулам̣ на ж̇аанаами, бин̣д̣абаад̇ассид̣̇ам̣ палам̣.
Aññaṃ kulaṃ na jānāmi, piṇḍapātassidaṃ phalaṃ.
‘‘бхаваабхавз сам̣сарид̇ваа, суггамуулзна жод̣̇ид̇аа;
‘‘Bhavābhave saṃsaritvā, sukkamūlena coditā;
аманаабам̣ на бассаами, соманассагад̇ам̣ палам̣.
Amanāpaṃ na passāmi, somanassakataṃ phalaṃ.
‘‘ид̣̇д̇хийсу жа васий хоми, д̣̇иб̣б̣ааяа сод̇ад̇хаад̇уяаа;
‘‘Iddhīsu ca vasī homi, dibbāya sotadhātuyā;
жзд̇обарияан̃аан̣асса, васий хоми махаамунз.
Cetopariyañāṇassa, vasī homi mahāmune.
‘‘буб̣б̣зниваасам̣ ж̇аанаами, д̣̇иб̣б̣ажагку висод̇хид̇ам̣;
‘‘Pubbenivāsaṃ jānāmi, dibbacakkhu visodhitaṃ;
саб̣б̣аасавабаригкийн̣аа, над̇т̇и д̣̇аани бунаб̣бхаво.
Sabbāsavaparikkhīṇā, natthi dāni punabbhavo.
‘‘ад̇т̇ад̇хамманируд̇д̇ийсу, бадибхаанз д̇ат̇зва жа;
‘‘Atthadhammaniruttīsu, paṭibhāne tatheva ca;
н̃аан̣ам̣ мама махаавийра, уббаннам̣ д̇ава санд̇игз.
Ñāṇaṃ mama mahāvīra, uppannaṃ tava santike.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бад̇ваа бана саа саяамби уд̣̇аанавасзна д̇ааязва г̇аат̇аа абхааси, ид̣̇амзва жассаа ан̃н̃ааб̣яаагаран̣ам̣ ахосийд̇и.
Arahattaṃ patvā pana sā sayampi udānavasena tāyeva gāthā abhāsi, idameva cassā aññābyākaraṇaṃ ahosīti.
абхируубананд̣̇аат̇зрийг̇аат̇ааван̣н̣анаа нидтид̇аа.
Abhirūpanandātherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 1. абхируубананд̣̇аат̇зрийг̇аат̇аа • 1. Abhirūpanandātherīgāthā
