| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩. অভিসমযকথা
3. Abhisamayakathā
১৯. অভিসমযোতি । কেন অভিসমেতি? চিত্তেন অভিসমেতি।
19.Abhisamayoti . Kena abhisameti? Cittena abhisameti.
হঞ্চি চিত্তেন অভিসমেতি, তেন হি অঞ্ঞাণী অভিসমেতি? ন অঞ্ঞাণী অভিসমেতি। ঞাণেন অভিসমেতি।
Hañci cittena abhisameti, tena hi aññāṇī abhisameti? Na aññāṇī abhisameti. Ñāṇena abhisameti.
হঞ্চি ঞাণেন অভিসমেতি, তেন হি অচিত্তেন চ ঞাণেন চ অচিত্তকো 1 অভিসমেতি? ন অচিত্তকো অভিসমেতি। চিত্তেন চ ঞাণেন চ অভিসমেতি।
Hañci ñāṇena abhisameti, tena hi acittena ca ñāṇena ca acittako 2 abhisameti? Na acittako abhisameti. Cittena ca ñāṇena ca abhisameti.
হঞ্চি চিত্তেন চ ঞাণেন চ অভিসমেতি, তেন হি কামাৰচরচিত্তেন চ ঞাণেন চ অভিসমেতি? ন কামাৰচরচিত্তেন চ ঞাণেন চ অভিসমেতি।
Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti? Na kāmāvacaracittena ca ñāṇena ca abhisameti.
তেন হি রূপাৰচরচিত্তেন চ ঞাণেন চ অভিসমেতি? ন রূপাৰচরচিত্তেন চ ঞাণেন চ অভিসমেতি।
Tena hi rūpāvacaracittena ca ñāṇena ca abhisameti? Na rūpāvacaracittena ca ñāṇena ca abhisameti.
তেন হি অরূপাৰচরচিত্তেন চ ঞাণেন চ অভিসমেতি? ন অরূপাৰচরচিত্তেন চ ঞাণেন চ অভিসমেতি।
Tena hi arūpāvacaracittena ca ñāṇena ca abhisameti? Na arūpāvacaracittena ca ñāṇena ca abhisameti.
তেন হি কম্মস্সকতচিত্তেন চ ঞাণেন চ অভিসমেতি? ন কম্মস্সকতচিত্তেন চ ঞাণেন চ অভিসমেতি।
Tena hi kammassakatacittena ca ñāṇena ca abhisameti? Na kammassakatacittena ca ñāṇena ca abhisameti.
তেন হি সচ্চানুলোমিকচিত্তেন চ ঞাণেন চ অভিসমেতি? ন সচ্চানুলোমিকচিত্তেন চ ঞাণেন চ অভিসমেতি।
Tena hi saccānulomikacittena ca ñāṇena ca abhisameti? Na saccānulomikacittena ca ñāṇena ca abhisameti.
তেন হি অতীতচিত্তেন চ ঞাণেন চ অভিসমেতি? ন অতীতচিত্তেন চ ঞাণেন চ অভিসমেতি।
Tena hi atītacittena ca ñāṇena ca abhisameti? Na atītacittena ca ñāṇena ca abhisameti.
তেন হি অনাগতচিত্তেন চ ঞাণেন চ অভিসমেতি? ন অনাগতচিত্তেন চ ঞাণেন চ অভিসমেতি।
Tena hi anāgatacittena ca ñāṇena ca abhisameti? Na anāgatacittena ca ñāṇena ca abhisameti.
তেন হি পচ্চুপ্পন্নলোকিযচিত্তেন চ ঞাণেন চ অভিসমেতি? ন পচ্চুপ্পন্নলোকিযচিত্তেন চ ঞাণেন চ অভিসমেতি। লোকুত্তরমগ্গক্খণে পচ্চুপ্পন্নচিত্তেন চ ঞাণেন চ অভিসমেতি।
Tena hi paccuppannalokiyacittena ca ñāṇena ca abhisameti? Na paccuppannalokiyacittena ca ñāṇena ca abhisameti. Lokuttaramaggakkhaṇe paccuppannacittena ca ñāṇena ca abhisameti.
কথং লোকুত্তরমগ্গক্খণে পচ্চুপ্পন্নচিত্তেন চ ঞাণেন চ অভিসমেতি? লোকুত্তরমগ্গক্খণে উপ্পাদাধিপতেয্যং চিত্তং ঞাণস্স হেতু পচ্চযো চ। তংসম্পযুত্তং নিরোধগোচরং দস্সনাধিপতেয্যং ঞাণং চিত্তস্স হেতু পচ্চযো চ। তংসম্পযুত্তং ঞাণং নিরোধগোচরং। এৰং লোকুত্তরমগ্গক্খণে পচ্চুপ্পন্নচিত্তেন চ ঞাণেন চ অভিসমেতি।
Kathaṃ lokuttaramaggakkhaṇe paccuppannacittena ca ñāṇena ca abhisameti? Lokuttaramaggakkhaṇe uppādādhipateyyaṃ cittaṃ ñāṇassa hetu paccayo ca. Taṃsampayuttaṃ nirodhagocaraṃ dassanādhipateyyaṃ ñāṇaṃ cittassa hetu paccayo ca. Taṃsampayuttaṃ ñāṇaṃ nirodhagocaraṃ. Evaṃ lokuttaramaggakkhaṇe paccuppannacittena ca ñāṇena ca abhisameti.
২০. কিং নু এত্তকোযেৰ অভিসমযোতি? ন হি। লোকুত্তরমগ্গক্খণে দস্সনাভিসমযো সম্মাদিট্ঠি, অভিনিরোপনাভিসমযো সম্মাসঙ্কপ্পো, পরিগ্গহাভিসমযো সম্মাৰাচা, সমুট্ঠানাভিসমযো সম্মাকম্মন্তো, ৰোদানাভিসমযো সম্মাআজীৰো, পগ্গহাভিসমযো সম্মাৰাযামো, উপট্ঠানাভিসমযো সম্মাসতি, অৰিক্খেপাভিসমযো সম্মাসমাধি; উপট্ঠানাভিসমযো সতিসম্বোজ্ঝঙ্গো, পৰিচযাভিসমযো ধম্মৰিচযসম্বোজ্ঝঙ্গো, পগ্গহাভিসমযো ৰীরিযসম্বোজ্ঝঙ্গো, ফরণাভিসমযো পীতিসম্বোজ্ঝঙ্গো, উপসমাভিসমযো পস্সদ্ধিসম্বোজ্ঝঙ্গো, অৰিক্খেপাভিসমযো সমাধিসম্বোজ্ঝঙ্গো, পটিসঙ্খানাভিসমযো উপেক্খাসম্বোজ্ঝঙ্গো; অস্সদ্ধিযে অকম্পিযাভিসমযো সদ্ধাবলং, কোসজ্জে অকম্পিযাভিসমযো ৰীরিযবলং, পমাদে অকম্পিযাভিসমযো সতিবলং, উদ্ধচ্চে অকম্পিযাভিসমযো সমাধিবলং, অৰিজ্জায অকম্পিযাভিসমযো পঞ্ঞাবলং; অধিমোক্খাভিসমযো সদ্ধিন্দ্রিযং, পগ্গহাভিসমযো ৰীরিযিন্দ্রিযং, উপট্ঠানাভিসমযো সতিন্দ্রিযং, অৰিক্খেপাভিসমযো সমাধিন্দ্রিযং, দস্সনাভিসমযো পঞ্ঞিন্দ্রিযং। আধিপতেয্যট্ঠেন ইন্দ্রিযাভিসমযো, অকম্পিযট্ঠেন বলাভিসমযো, নিয্যানট্ঠেন বোজ্ঝঙ্গাভিসমযো, হেতুট্ঠেন মগ্গাভিসমযো, উপট্ঠানট্ঠেন সতিপট্ঠানাভিসমযো, পদহট্ঠেন সম্মপ্পধানাভিসমযো , ইজ্ঝনট্ঠেন ইদ্ধিপাদাভিসমযো, তথট্ঠেন সচ্চাভিসমযো, অৰিক্খেপট্ঠেন সমথাভিসমযো, অনুপস্সনট্ঠেন ৰিপস্সনাভিসমযো, একরসট্ঠেন সমথৰিপস্সনাভিসমযো, অনতিৰত্তনট্ঠেন যুগনদ্ধাভিসমযো, সংৰরট্ঠেন সীলৰিসুদ্ধিঅভিসমযো, অৰিক্খেপট্ঠেন ৰিসুদ্ধিঅভিসমযো, দস্সনট্ঠেন দিট্ঠিৰিসুদ্ধিঅভিসমযো, মুত্তট্ঠেন ৰিমোক্খাভিসমযো, পটিৰেধট্ঠেন ৰিজ্জাভিসমযো, পরিচ্চাগট্ঠেন ৰিমুত্তিঅভিসমযো, সমুচ্ছেদট্ঠেন খযে ঞাণং অভিসমযো। ছন্দো মূলট্ঠেন অভিসমযো, মনসিকারো সমুট্ঠানট্ঠেন অভিসমযো, ফস্সো সমোধানট্ঠেন অভিসমযো, ৰেদনা সমোসরণট্ঠেন অভিসমযো, সমাধি পমুখট্ঠেন অভিসমযো , সতি আধিপতেয্যট্ঠেন অভিসমযো, পঞ্ঞা ততুত্তরট্ঠেন অভিসমযো, ৰিমুত্তি সারট্ঠেন অভিসমযো, অমতোগধং নিব্বানং পরিযোসানট্ঠেন অভিসমযো।
20.Kiṃnu ettakoyeva abhisamayoti? Na hi.Lokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi; upaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo; assaddhiye akampiyābhisamayo saddhābalaṃ, kosajje akampiyābhisamayo vīriyabalaṃ, pamāde akampiyābhisamayo satibalaṃ, uddhacce akampiyābhisamayo samādhibalaṃ, avijjāya akampiyābhisamayo paññābalaṃ; adhimokkhābhisamayo saddhindriyaṃ, paggahābhisamayo vīriyindriyaṃ, upaṭṭhānābhisamayo satindriyaṃ, avikkhepābhisamayo samādhindriyaṃ, dassanābhisamayo paññindriyaṃ. Ādhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo , ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṃvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṃ abhisamayo. Chando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo , sati ādhipateyyaṭṭhena abhisamayo, paññā tatuttaraṭṭhena abhisamayo, vimutti sāraṭṭhena abhisamayo, amatogadhaṃ nibbānaṃ pariyosānaṭṭhena abhisamayo.
২১. কিং নু এত্তকোযেৰ অভিসমযোতি? ন হি। সোতাপত্তিমগ্গক্খণে দস্সনাভিসমযো সম্মাদিট্ঠি…পে॰… অমতোগধং নিব্বানং পরিযোসানট্ঠেন অভিসমযো।
21. Kiṃ nu ettakoyeva abhisamayoti? Na hi. Sotāpattimaggakkhaṇe dassanābhisamayo sammādiṭṭhi…pe… amatogadhaṃ nibbānaṃ pariyosānaṭṭhena abhisamayo.
কিং নু এত্তকোযেৰ অভিসমযোতি? ন হি। সোতাপত্তিফলক্খণে দস্সনাভিসমযো সম্মাদিট্ঠি…পে॰… পটিপ্পস্সদ্ধট্ঠেন অনুপ্পাদে ঞাণং অভিসমযো। ছন্দো মূলট্ঠেন অভিসমযো…পে॰… অমতোগধং ৫ নিব্বানং পরিযোসানট্ঠেন অভিসমযো।
Kiṃ nu ettakoyeva abhisamayoti? Na hi. Sotāpattiphalakkhaṇe dassanābhisamayo sammādiṭṭhi…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ 5 nibbānaṃ pariyosānaṭṭhena abhisamayo.
কিং নু এত্তকোযেৰ অভিসমযোতি?
Kiṃ nu ettakoyeva abhisamayoti?
ন হি। সকদাগামিমগ্গক্খণে…পে॰… সকদাগামিফলক্খণে… অনাগামিমগ্গক্খণে… অনাগামিফলক্খণে… অরহত্তমগ্গক্খণে…পে॰… অরহত্তফলক্খণে দস্সনাভিসমযো সম্মাদিট্ঠি, অভিনিরোপনাভিসমযো সম্মাসঙ্কপ্পো…পে॰… পটিপ্পস্সদ্ধট্ঠেন অনুপ্পাদে ঞাণং অভিসমযো। ছন্দো মূলট্ঠেন অভিসমযো…পে॰… অমতোগধং নিব্বানং পরিযোসানট্ঠেন অভিসমযো।
Na hi. Sakadāgāmimaggakkhaṇe…pe… sakadāgāmiphalakkhaṇe… anāgāmimaggakkhaṇe… anāgāmiphalakkhaṇe… arahattamaggakkhaṇe…pe… arahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ nibbānaṃ pariyosānaṭṭhena abhisamayo.
য্ৰাযং 3 কিলেসে পজহতি, অতীতে কিলেসে পজহতি…পে॰… অনাগতে কিলেসে পজহতি, পচ্চুপ্পন্নে কিলেসে পজহতি, অতীতে কিলেসে পজহতীতি। হঞ্চি অতীতে কিলেসে পজহতি, তেন হি খীণং খেপেতি, নিরুদ্ধং নিরোধেতি, ৰিগতং ৰিগমেতি, অত্থঙ্গতং অত্থঙ্গমেতি, অতীতং যং ন অত্থি তং পজহতীতি? ন অতীতে কিলেসে পজহতীতি। অনাগতে কিলেসে পজহতীতি। হঞ্চি অনাগতে কিলেসে পজহতি, তেন হি অজাতং পজহতি, অনিব্বত্তং পজহতি, অনুপ্পন্নং পজহতি, অপাতুভূতং পজহতি, অনাগতং যং ন অত্থি তং পজহতীতি? ন অনাগতে কিলেসে পজহতীতি। পচ্চুপ্পন্নে কিলেসে পজহতীতি। হঞ্চি পচ্চুপ্পন্নে কিলেসে পজহতি, তেন হি রত্তো রাগং পজহতি, দুট্ঠো দোসং পজহতি, মূল়্হো মোহং পজহতি, ৰিনিবদ্ধো মানং পজহতি, পরামট্ঠো দিট্ঠিং পজহতি ,
Yvāyaṃ 4 kilese pajahati, atīte kilese pajahati…pe… anāgate kilese pajahati, paccuppanne kilese pajahati, atīte kilese pajahatīti. Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ na atthi taṃ pajahatīti? Na atīte kilese pajahatīti. Anāgate kilese pajahatīti. Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ na atthi taṃ pajahatīti? Na anāgate kilese pajahatīti. Paccuppanne kilese pajahatīti. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ pajahati, mūḷho mohaṃ pajahati, vinibaddho mānaṃ pajahati, parāmaṭṭho diṭṭhiṃ pajahati ,
ৰিক্খেপগতো উদ্ধচ্চং পজহতি, অনিট্ঠঙ্গতো ৰিচিকিচ্ছং পজহতি, থামগতো অনুসযং পজহতি, কণ্হসুক্কধম্মা যুগনদ্ধা সমমেৰ ৰত্তন্তি, সংকিলেসিকা 5 মগ্গভাৰনা হোতি?
Vikkhepagato uddhaccaṃ pajahati, aniṭṭhaṅgato vicikicchaṃ pajahati, thāmagato anusayaṃ pajahati, kaṇhasukkadhammā yuganaddhā samameva vattanti, saṃkilesikā 6 maggabhāvanā hoti?
ন হি অতীতে কিলেসে পজহতি, ন অনাগতে কিলেসে পজহতি, ন পচ্চুপ্পন্নে কিলেসে পজহতীতি। হঞ্চি ন অতীতে কিলেসে পজহতি, ন অনাগতে…পে॰… ন পচ্চুপ্পন্নে কিলেসে পজহতি, তেন হি নত্থি মগ্গভাৰনা, নত্থি ফলসচ্ছিকিরিযা, নত্থি কিলেসপ্পহানং, নত্থি ধম্মাভিসমযোতি? অত্থি মগ্গভাৰনা, অত্থি ফলসচ্ছিকিরিযা, অত্থি কিলেসপ্পহানং, অত্থি ধম্মাভিসমযো। যথা কথং ৰিয? সেয্যথাপি তরুণো রুক্খো অজাতফলো। তমেনং পুরিসো মূলং ছিন্দেয্য। যে তস্স রুক্খস্স অজাতফলা, তে অজাতাযেৰ ন জাযন্তি, অনিব্বত্তাযেৰ ন নিব্বত্তন্তি, অনুপ্পন্নাযেৰ ন উপ্পজ্জন্তি, অপাতুভূতাযেৰ ন পাতুভৰন্তি। এৰমেৰং উপ্পাদো হেতু, উপ্পাদো পচ্চযো কিলেসানং নিব্বত্তিযাতি। উপ্পাদে আদীনৰং দিস্ৰা অনুপ্পাদে চিত্তং পক্খন্দতি। অনুপ্পাদে চিত্তস্স পক্খন্দত্তা যে উপ্পাদপচ্চযা কিলেসা নিব্বত্তেয্যুং, তে অজাতাযেৰ ন জাযন্তি, অনিব্বত্তাযেৰ ন নিব্বত্তন্তি, অনুপ্পন্নাযেৰ ন উপ্পজ্জন্তি, অপাতুভূতাযেৰ ন পাতুভৰন্তি। এৰং হেতুনিরোধা দুক্খনিরোধো। পৰত্তং হেতু, নিমিত্তং হেতু, আযূহনা হেতু। আযূহনা পচ্চযো কিলেসানং নিব্বত্তিযাতি। আযূহনে আদীনৰং দিস্ৰা অনাযূহনে চিত্তং পক্খন্দতি। অনাযূহনে চিত্তস্স পক্খন্দত্তা, যে আযূহনপচ্চযা কিলেসা নিব্বত্তেয্যুং, তে অজাতাযেৰ ন জাযন্তি, অনিব্বত্তাযেৰ ন নিব্বত্তন্তি, অনুপ্পন্নাযেৰ ন উপ্পজ্জন্তি, অপাতুভূতাযেৰ ন পাতুভৰন্তি। এৰং হেতুনিরোধা দুক্খনিরোধো। এৰং অত্থি মগ্গভাৰনা, অত্থি ফলসচ্ছিকিরিযা, অত্থি কিলেসপ্পহানং, অত্থি ধম্মাভিসমযোতি।
Na hi atīte kilese pajahati, na anāgate kilese pajahati, na paccuppanne kilese pajahatīti. Hañci na atīte kilese pajahati, na anāgate…pe… na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti? Atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayo. Yathā kathaṃ viya? Seyyathāpi taruṇo rukkho ajātaphalo. Tamenaṃ puriso mūlaṃ chindeyya. Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evamevaṃ uppādo hetu, uppādo paccayo kilesānaṃ nibbattiyāti. Uppāde ādīnavaṃ disvā anuppāde cittaṃ pakkhandati. Anuppāde cittassa pakkhandattā ye uppādapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Pavattaṃ hetu, nimittaṃ hetu, āyūhanā hetu. Āyūhanā paccayo kilesānaṃ nibbattiyāti. Āyūhane ādīnavaṃ disvā anāyūhane cittaṃ pakkhandati. Anāyūhane cittassa pakkhandattā, ye āyūhanapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayoti.
অভিসমযকথা নিট্ঠিতা।
Abhisamayakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / অভিসমযকথাৰণ্ণনা • Abhisamayakathāvaṇṇanā
