| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๓. อภิสมยกถา
3. Abhisamayakathā
๑๙. อภิสมโยติ ฯ เกน อภิสเมติ? จิเตฺตน อภิสเมติฯ
19.Abhisamayoti . Kena abhisameti? Cittena abhisameti.
หญฺจิ จิเตฺตน อภิสเมติ, เตน หิ อญฺญาณี อภิสเมติ? น อญฺญาณี อภิสเมติฯ ญาเณน อภิสเมติฯ
Hañci cittena abhisameti, tena hi aññāṇī abhisameti? Na aññāṇī abhisameti. Ñāṇena abhisameti.
หญฺจิ ญาเณน อภิสเมติ, เตน หิ อจิเตฺตน จ ญาเณน จ อจิตฺตโก 1 อภิสเมติ? น อจิตฺตโก อภิสเมติฯ จิเตฺตน จ ญาเณน จ อภิสเมติฯ
Hañci ñāṇena abhisameti, tena hi acittena ca ñāṇena ca acittako 2 abhisameti? Na acittako abhisameti. Cittena ca ñāṇena ca abhisameti.
หญฺจิ จิเตฺตน จ ญาเณน จ อภิสเมติ, เตน หิ กามาวจรจิเตฺตน จ ญาเณน จ อภิสเมติ? น กามาวจรจิเตฺตน จ ญาเณน จ อภิสเมติฯ
Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti? Na kāmāvacaracittena ca ñāṇena ca abhisameti.
เตน หิ รูปาวจรจิเตฺตน จ ญาเณน จ อภิสเมติ? น รูปาวจรจิเตฺตน จ ญาเณน จ อภิสเมติฯ
Tena hi rūpāvacaracittena ca ñāṇena ca abhisameti? Na rūpāvacaracittena ca ñāṇena ca abhisameti.
เตน หิ อรูปาวจรจิเตฺตน จ ญาเณน จ อภิสเมติ? น อรูปาวจรจิเตฺตน จ ญาเณน จ อภิสเมติฯ
Tena hi arūpāvacaracittena ca ñāṇena ca abhisameti? Na arūpāvacaracittena ca ñāṇena ca abhisameti.
เตน หิ กมฺมสฺสกตจิเตฺตน จ ญาเณน จ อภิสเมติ? น กมฺมสฺสกตจิเตฺตน จ ญาเณน จ อภิสเมติฯ
Tena hi kammassakatacittena ca ñāṇena ca abhisameti? Na kammassakatacittena ca ñāṇena ca abhisameti.
เตน หิ สจฺจานุโลมิกจิเตฺตน จ ญาเณน จ อภิสเมติ? น สจฺจานุโลมิกจิเตฺตน จ ญาเณน จ อภิสเมติฯ
Tena hi saccānulomikacittena ca ñāṇena ca abhisameti? Na saccānulomikacittena ca ñāṇena ca abhisameti.
เตน หิ อตีตจิเตฺตน จ ญาเณน จ อภิสเมติ? น อตีตจิเตฺตน จ ญาเณน จ อภิสเมติฯ
Tena hi atītacittena ca ñāṇena ca abhisameti? Na atītacittena ca ñāṇena ca abhisameti.
เตน หิ อนาคตจิเตฺตน จ ญาเณน จ อภิสเมติ? น อนาคตจิเตฺตน จ ญาเณน จ อภิสเมติฯ
Tena hi anāgatacittena ca ñāṇena ca abhisameti? Na anāgatacittena ca ñāṇena ca abhisameti.
เตน หิ ปจฺจุปฺปนฺนโลกิยจิเตฺตน จ ญาเณน จ อภิสเมติ? น ปจฺจุปฺปนฺนโลกิยจิเตฺตน จ ญาเณน จ อภิสเมติฯ โลกุตฺตรมคฺคกฺขเณ ปจฺจุปฺปนฺนจิเตฺตน จ ญาเณน จ อภิสเมติฯ
Tena hi paccuppannalokiyacittena ca ñāṇena ca abhisameti? Na paccuppannalokiyacittena ca ñāṇena ca abhisameti. Lokuttaramaggakkhaṇe paccuppannacittena ca ñāṇena ca abhisameti.
กถํ โลกุตฺตรมคฺคกฺขเณ ปจฺจุปฺปนฺนจิเตฺตน จ ญาเณน จ อภิสเมติ? โลกุตฺตรมคฺคกฺขเณ อุปฺปาทาธิปเตยฺยํ จิตฺตํ ญาณสฺส เหตุ ปจฺจโย จฯ ตํสมฺปยุตฺตํ นิโรธโคจรํ ทสฺสนาธิปเตยฺยํ ญาณํ จิตฺตสฺส เหตุ ปจฺจโย จฯ ตํสมฺปยุตฺตํ ญาณํ นิโรธโคจรํฯ เอวํ โลกุตฺตรมคฺคกฺขเณ ปจฺจุปฺปนฺนจิเตฺตน จ ญาเณน จ อภิสเมติฯ
Kathaṃ lokuttaramaggakkhaṇe paccuppannacittena ca ñāṇena ca abhisameti? Lokuttaramaggakkhaṇe uppādādhipateyyaṃ cittaṃ ñāṇassa hetu paccayo ca. Taṃsampayuttaṃ nirodhagocaraṃ dassanādhipateyyaṃ ñāṇaṃ cittassa hetu paccayo ca. Taṃsampayuttaṃ ñāṇaṃ nirodhagocaraṃ. Evaṃ lokuttaramaggakkhaṇe paccuppannacittena ca ñāṇena ca abhisameti.
๒๐. กิํ นุ เอตฺตโกเยว อภิสมโยติ? น หิฯ โลกุตฺตรมคฺคกฺขเณ ทสฺสนาภิสมโย สมฺมาทิฎฺฐิ, อภินิโรปนาภิสมโย สมฺมาสงฺกโปฺป, ปริคฺคหาภิสมโย สมฺมาวาจา, สมุฎฺฐานาภิสมโย สมฺมากมฺมโนฺต, โวทานาภิสมโย สมฺมาอาชีโว, ปคฺคหาภิสมโย สมฺมาวายาโม, อุปฎฺฐานาภิสมโย สมฺมาสติ, อวิเกฺขปาภิสมโย สมฺมาสมาธิ; อุปฎฺฐานาภิสมโย สติสโมฺพชฺฌโงฺค, ปวิจยาภิสมโย ธมฺมวิจยสโมฺพชฺฌโงฺค, ปคฺคหาภิสมโย วีริยสโมฺพชฺฌโงฺค, ผรณาภิสมโย ปีติสโมฺพชฺฌโงฺค, อุปสมาภิสมโย ปสฺสทฺธิสโมฺพชฺฌโงฺค, อวิเกฺขปาภิสมโย สมาธิสโมฺพชฺฌโงฺค, ปฎิสงฺขานาภิสมโย อุเปกฺขาสโมฺพชฺฌโงฺค; อสฺสทฺธิเย อกมฺปิยาภิสมโย สทฺธาพลํ, โกสเชฺช อกมฺปิยาภิสมโย วีริยพลํ, ปมาเท อกมฺปิยาภิสมโย สติพลํ, อุทฺธเจฺจ อกมฺปิยาภิสมโย สมาธิพลํ, อวิชฺชาย อกมฺปิยาภิสมโย ปญฺญาพลํ; อธิโมกฺขาภิสมโย สทฺธินฺทฺริยํ, ปคฺคหาภิสมโย วีริยินฺทฺริยํ, อุปฎฺฐานาภิสมโย สตินฺทฺริยํ, อวิเกฺขปาภิสมโย สมาธินฺทฺริยํ, ทสฺสนาภิสมโย ปญฺญินฺทฺริยํฯ อาธิปเตยฺยเฎฺฐน อินฺทฺริยาภิสมโย, อกมฺปิยเฎฺฐน พลาภิสมโย, นิยฺยานเฎฺฐน โพชฺฌงฺคาภิสมโย, เหตุเฎฺฐน มคฺคาภิสมโย, อุปฎฺฐานเฎฺฐน สติปฎฺฐานาภิสมโย, ปทหเฎฺฐน สมฺมปฺปธานาภิสมโย , อิชฺฌนเฎฺฐน อิทฺธิปาทาภิสมโย, ตถเฎฺฐน สจฺจาภิสมโย, อวิเกฺขปเฎฺฐน สมถาภิสมโย, อนุปสฺสนเฎฺฐน วิปสฺสนาภิสมโย, เอกรสเฎฺฐน สมถวิปสฺสนาภิสมโย, อนติวตฺตนเฎฺฐน ยุคนทฺธาภิสมโย, สํวรเฎฺฐน สีลวิสุทฺธิอภิสมโย, อวิเกฺขปเฎฺฐน วิสุทฺธิอภิสมโย, ทสฺสนเฎฺฐน ทิฎฺฐิวิสุทฺธิอภิสมโย, มุตฺตเฎฺฐน วิโมกฺขาภิสมโย, ปฎิเวธเฎฺฐน วิชฺชาภิสมโย, ปริจฺจาคเฎฺฐน วิมุตฺติอภิสมโย, สมุเจฺฉทเฎฺฐน ขเย ญาณํ อภิสมโยฯ ฉโนฺท มูลเฎฺฐน อภิสมโย, มนสิกาโร สมุฎฺฐานเฎฺฐน อภิสมโย, ผโสฺส สโมธานเฎฺฐน อภิสมโย, เวทนา สโมสรณเฎฺฐน อภิสมโย, สมาธิ ปมุขเฎฺฐน อภิสมโย , สติ อาธิปเตยฺยเฎฺฐน อภิสมโย, ปญฺญา ตตุตฺตรเฎฺฐน อภิสมโย, วิมุตฺติ สารเฎฺฐน อภิสมโย, อมโตคธํ นิพฺพานํ ปริโยสานเฎฺฐน อภิสมโยฯ
20.Kiṃnu ettakoyeva abhisamayoti? Na hi.Lokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi; upaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo; assaddhiye akampiyābhisamayo saddhābalaṃ, kosajje akampiyābhisamayo vīriyabalaṃ, pamāde akampiyābhisamayo satibalaṃ, uddhacce akampiyābhisamayo samādhibalaṃ, avijjāya akampiyābhisamayo paññābalaṃ; adhimokkhābhisamayo saddhindriyaṃ, paggahābhisamayo vīriyindriyaṃ, upaṭṭhānābhisamayo satindriyaṃ, avikkhepābhisamayo samādhindriyaṃ, dassanābhisamayo paññindriyaṃ. Ādhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo , ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṃvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṃ abhisamayo. Chando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo , sati ādhipateyyaṭṭhena abhisamayo, paññā tatuttaraṭṭhena abhisamayo, vimutti sāraṭṭhena abhisamayo, amatogadhaṃ nibbānaṃ pariyosānaṭṭhena abhisamayo.
๒๑. กิํ นุ เอตฺตโกเยว อภิสมโยติ? น หิฯ โสตาปตฺติมคฺคกฺขเณ ทสฺสนาภิสมโย สมฺมาทิฎฺฐิ…เป.… อมโตคธํ นิพฺพานํ ปริโยสานเฎฺฐน อภิสมโยฯ
21. Kiṃ nu ettakoyeva abhisamayoti? Na hi. Sotāpattimaggakkhaṇe dassanābhisamayo sammādiṭṭhi…pe… amatogadhaṃ nibbānaṃ pariyosānaṭṭhena abhisamayo.
กิํ นุ เอตฺตโกเยว อภิสมโยติ? น หิฯ โสตาปตฺติผลกฺขเณ ทสฺสนาภิสมโย สมฺมาทิฎฺฐิ…เป.… ปฎิปฺปสฺสทฺธเฎฺฐน อนุปฺปาเท ญาณํ อภิสมโยฯ ฉโนฺท มูลเฎฺฐน อภิสมโย…เป.… อมโตคธํ ๕ นิพฺพานํ ปริโยสานเฎฺฐน อภิสมโยฯ
Kiṃ nu ettakoyeva abhisamayoti? Na hi. Sotāpattiphalakkhaṇe dassanābhisamayo sammādiṭṭhi…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ 5 nibbānaṃ pariyosānaṭṭhena abhisamayo.
กิํ นุ เอตฺตโกเยว อภิสมโยติ?
Kiṃ nu ettakoyeva abhisamayoti?
น หิฯ สกทาคามิมคฺคกฺขเณ…เป.… สกทาคามิผลกฺขเณ… อนาคามิมคฺคกฺขเณ… อนาคามิผลกฺขเณ… อรหตฺตมคฺคกฺขเณ…เป.… อรหตฺตผลกฺขเณ ทสฺสนาภิสมโย สมฺมาทิฎฺฐิ, อภินิโรปนาภิสมโย สมฺมาสงฺกโปฺป…เป.… ปฎิปฺปสฺสทฺธเฎฺฐน อนุปฺปาเท ญาณํ อภิสมโยฯ ฉโนฺท มูลเฎฺฐน อภิสมโย…เป.… อมโตคธํ นิพฺพานํ ปริโยสานเฎฺฐน อภิสมโยฯ
Na hi. Sakadāgāmimaggakkhaṇe…pe… sakadāgāmiphalakkhaṇe… anāgāmimaggakkhaṇe… anāgāmiphalakkhaṇe… arahattamaggakkhaṇe…pe… arahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ nibbānaṃ pariyosānaṭṭhena abhisamayo.
ยฺวายํ 3 กิเลเส ปชหติ, อตีเต กิเลเส ปชหติ…เป.… อนาคเต กิเลเส ปชหติ, ปจฺจุปฺปเนฺน กิเลเส ปชหติ, อตีเต กิเลเส ปชหตีติฯ หญฺจิ อตีเต กิเลเส ปชหติ, เตน หิ ขีณํ เขเปติ, นิรุทฺธํ นิโรเธติ, วิคตํ วิคเมติ, อตฺถงฺคตํ อตฺถงฺคเมติ, อตีตํ ยํ น อตฺถิ ตํ ปชหตีติ? น อตีเต กิเลเส ปชหตีติฯ อนาคเต กิเลเส ปชหตีติฯ หญฺจิ อนาคเต กิเลเส ปชหติ, เตน หิ อชาตํ ปชหติ, อนิพฺพตฺตํ ปชหติ, อนุปฺปนฺนํ ปชหติ, อปาตุภูตํ ปชหติ, อนาคตํ ยํ น อตฺถิ ตํ ปชหตีติ? น อนาคเต กิเลเส ปชหตีติฯ ปจฺจุปฺปเนฺน กิเลเส ปชหตีติฯ หญฺจิ ปจฺจุปฺปเนฺน กิเลเส ปชหติ, เตน หิ รโตฺต ราคํ ปชหติ, ทุโฎฺฐ โทสํ ปชหติ, มูโฬฺห โมหํ ปชหติ, วินิพโทฺธ มานํ ปชหติ, ปรามโฎฺฐ ทิฎฺฐิํ ปชหติ ,
Yvāyaṃ 4 kilese pajahati, atīte kilese pajahati…pe… anāgate kilese pajahati, paccuppanne kilese pajahati, atīte kilese pajahatīti. Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ na atthi taṃ pajahatīti? Na atīte kilese pajahatīti. Anāgate kilese pajahatīti. Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ na atthi taṃ pajahatīti? Na anāgate kilese pajahatīti. Paccuppanne kilese pajahatīti. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ pajahati, mūḷho mohaṃ pajahati, vinibaddho mānaṃ pajahati, parāmaṭṭho diṭṭhiṃ pajahati ,
วิเกฺขปคโต อุทฺธจฺจํ ปชหติ, อนิฎฺฐงฺคโต วิจิกิจฺฉํ ปชหติ, ถามคโต อนุสยํ ปชหติ, กณฺหสุกฺกธมฺมา ยุคนทฺธา สมเมว วตฺตนฺติ, สํกิเลสิกา 5 มคฺคภาวนา โหติ?
Vikkhepagato uddhaccaṃ pajahati, aniṭṭhaṅgato vicikicchaṃ pajahati, thāmagato anusayaṃ pajahati, kaṇhasukkadhammā yuganaddhā samameva vattanti, saṃkilesikā 6 maggabhāvanā hoti?
น หิ อตีเต กิเลเส ปชหติ, น อนาคเต กิเลเส ปชหติ, น ปจฺจุปฺปเนฺน กิเลเส ปชหตีติฯ หญฺจิ น อตีเต กิเลเส ปชหติ, น อนาคเต…เป.… น ปจฺจุปฺปเนฺน กิเลเส ปชหติ, เตน หิ นตฺถิ มคฺคภาวนา, นตฺถิ ผลสจฺฉิกิริยา, นตฺถิ กิเลสปฺปหานํ, นตฺถิ ธมฺมาภิสมโยติ? อตฺถิ มคฺคภาวนา, อตฺถิ ผลสจฺฉิกิริยา, อตฺถิ กิเลสปฺปหานํ, อตฺถิ ธมฺมาภิสมโยฯ ยถา กถํ วิย? เสยฺยถาปิ ตรุโณ รุโกฺข อชาตผโลฯ ตเมนํ ปุริโส มูลํ ฉิเนฺทยฺยฯ เย ตสฺส รุกฺขสฺส อชาตผลา, เต อชาตาเยว น ชายนฺติ, อนิพฺพตฺตาเยว น นิพฺพตฺตนฺติ, อนุปฺปนฺนาเยว น อุปฺปชฺชนฺติ, อปาตุภูตาเยว น ปาตุภวนฺติฯ เอวเมวํ อุปฺปาโท เหตุ, อุปฺปาโท ปจฺจโย กิเลสานํ นิพฺพตฺติยาติฯ อุปฺปาเท อาทีนวํ ทิสฺวา อนุปฺปาเท จิตฺตํ ปกฺขนฺทติฯ อนุปฺปาเท จิตฺตสฺส ปกฺขนฺทตฺตา เย อุปฺปาทปจฺจยา กิเลสา นิพฺพเตฺตยฺยุํ, เต อชาตาเยว น ชายนฺติ, อนิพฺพตฺตาเยว น นิพฺพตฺตนฺติ, อนุปฺปนฺนาเยว น อุปฺปชฺชนฺติ, อปาตุภูตาเยว น ปาตุภวนฺติฯ เอวํ เหตุนิโรธา ทุกฺขนิโรโธฯ ปวตฺตํ เหตุ, นิมิตฺตํ เหตุ, อายูหนา เหตุฯ อายูหนา ปจฺจโย กิเลสานํ นิพฺพตฺติยาติฯ อายูหเน อาทีนวํ ทิสฺวา อนายูหเน จิตฺตํ ปกฺขนฺทติฯ อนายูหเน จิตฺตสฺส ปกฺขนฺทตฺตา, เย อายูหนปจฺจยา กิเลสา นิพฺพเตฺตยฺยุํ, เต อชาตาเยว น ชายนฺติ, อนิพฺพตฺตาเยว น นิพฺพตฺตนฺติ, อนุปฺปนฺนาเยว น อุปฺปชฺชนฺติ, อปาตุภูตาเยว น ปาตุภวนฺติฯ เอวํ เหตุนิโรธา ทุกฺขนิโรโธฯ เอวํ อตฺถิ มคฺคภาวนา, อตฺถิ ผลสจฺฉิกิริยา, อตฺถิ กิเลสปฺปหานํ, อตฺถิ ธมฺมาภิสมโยติฯ
Na hi atīte kilese pajahati, na anāgate kilese pajahati, na paccuppanne kilese pajahatīti. Hañci na atīte kilese pajahati, na anāgate…pe… na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti? Atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayo. Yathā kathaṃ viya? Seyyathāpi taruṇo rukkho ajātaphalo. Tamenaṃ puriso mūlaṃ chindeyya. Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evamevaṃ uppādo hetu, uppādo paccayo kilesānaṃ nibbattiyāti. Uppāde ādīnavaṃ disvā anuppāde cittaṃ pakkhandati. Anuppāde cittassa pakkhandattā ye uppādapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Pavattaṃ hetu, nimittaṃ hetu, āyūhanā hetu. Āyūhanā paccayo kilesānaṃ nibbattiyāti. Āyūhane ādīnavaṃ disvā anāyūhane cittaṃ pakkhandati. Anāyūhane cittassa pakkhandattā, ye āyūhanapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayoti.
อภิสมยกถา นิฎฺฐิตาฯ
Abhisamayakathā niṭṭhitā.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / อภิสมยกถาวณฺณนา • Abhisamayakathāvaṇṇanā
