| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
3. අභිසමයකථා
3. Abhisamayakathā
19. අභිසමයොති . කෙන අභිසමෙති? චිත්‌තෙන අභිසමෙති.
19.Abhisamayoti . Kena abhisameti? Cittena abhisameti.
හඤ්‌චි චිත්‌තෙන අභිසමෙති, තෙන හි අඤ්‌ඤාණී අභිසමෙති? න අඤ්‌ඤාණී අභිසමෙති. ඤාණෙන අභිසමෙති.
Hañci cittena abhisameti, tena hi aññāṇī abhisameti? Na aññāṇī abhisameti. Ñāṇena abhisameti.
හඤ්‌චි ඤාණෙන අභිසමෙති, තෙන හි අචිත්‌තෙන ච ඤාණෙන ච අචිත්‌තකො 1 අභිසමෙති? න අචිත්‌තකො අභිසමෙති. චිත්‌තෙන ච ඤාණෙන ච අභිසමෙති.
Hañci ñāṇena abhisameti, tena hi acittena ca ñāṇena ca acittako 2 abhisameti? Na acittako abhisameti. Cittena ca ñāṇena ca abhisameti.
හඤ්‌චි චිත්‌තෙන ච ඤාණෙන ච අභිසමෙති, තෙන හි කාමාවචරචිත්‌තෙන ච ඤාණෙන ච අභිසමෙති? න කාමාවචරචිත්‌තෙන ච ඤාණෙන ච අභිසමෙති.
Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti? Na kāmāvacaracittena ca ñāṇena ca abhisameti.
තෙන හි රූපාවචරචිත්‌තෙන ච ඤාණෙන ච අභිසමෙති? න රූපාවචරචිත්‌තෙන ච ඤාණෙන ච අභිසමෙති.
Tena hi rūpāvacaracittena ca ñāṇena ca abhisameti? Na rūpāvacaracittena ca ñāṇena ca abhisameti.
තෙන හි අරූපාවචරචිත්‌තෙන ච ඤාණෙන ච අභිසමෙති? න අරූපාවචරචිත්‌තෙන ච ඤාණෙන ච අභිසමෙති.
Tena hi arūpāvacaracittena ca ñāṇena ca abhisameti? Na arūpāvacaracittena ca ñāṇena ca abhisameti.
තෙන හි කම්‌මස්‌සකතචිත්‌තෙන ච ඤාණෙන ච අභිසමෙති? න කම්‌මස්‌සකතචිත්‌තෙන ච ඤාණෙන ච අභිසමෙති.
Tena hi kammassakatacittena ca ñāṇena ca abhisameti? Na kammassakatacittena ca ñāṇena ca abhisameti.
තෙන හි සච්‌චානුලොමිකචිත්‌තෙන ච ඤාණෙන ච අභිසමෙති? න සච්‌චානුලොමිකචිත්‌තෙන ච ඤාණෙන ච අභිසමෙති.
Tena hi saccānulomikacittena ca ñāṇena ca abhisameti? Na saccānulomikacittena ca ñāṇena ca abhisameti.
තෙන හි අතීතචිත්‌තෙන ච ඤාණෙන ච අභිසමෙති? න අතීතචිත්‌තෙන ච ඤාණෙන ච අභිසමෙති.
Tena hi atītacittena ca ñāṇena ca abhisameti? Na atītacittena ca ñāṇena ca abhisameti.
තෙන හි අනාගතචිත්‌තෙන ච ඤාණෙන ච අභිසමෙති? න අනාගතචිත්‌තෙන ච ඤාණෙන ච අභිසමෙති.
Tena hi anāgatacittena ca ñāṇena ca abhisameti? Na anāgatacittena ca ñāṇena ca abhisameti.
තෙන හි පච්‌චුප්‌පන්‌නලොකියචිත්‌තෙන ච ඤාණෙන ච අභිසමෙති? න පච්‌චුප්‌පන්‌නලොකියචිත්‌තෙන ච ඤාණෙන ච අභිසමෙති. ලොකුත්‌තරමග්‌ගක්‌ඛණෙ පච්‌චුප්‌පන්‌නචිත්‌තෙන ච ඤාණෙන ච අභිසමෙති.
Tena hi paccuppannalokiyacittena ca ñāṇena ca abhisameti? Na paccuppannalokiyacittena ca ñāṇena ca abhisameti. Lokuttaramaggakkhaṇe paccuppannacittena ca ñāṇena ca abhisameti.
කථං ලොකුත්‌තරමග්‌ගක්‌ඛණෙ පච්‌චුප්‌පන්‌නචිත්‌තෙන ච ඤාණෙන ච අභිසමෙති? ලොකුත්‌තරමග්‌ගක්‌ඛණෙ උප්‌පාදාධිපතෙය්‍යං චිත්‌තං ඤාණස්‌ස හෙතු පච්‌චයො ච. තංසම්‌පයුත්‌තං නිරොධගොචරං දස්‌සනාධිපතෙය්‍යං ඤාණං චිත්‌තස්‌ස හෙතු පච්‌චයො ච. තංසම්‌පයුත්‌තං ඤාණං නිරොධගොචරං. එවං ලොකුත්‌තරමග්‌ගක්‌ඛණෙ පච්‌චුප්‌පන්‌නචිත්‌තෙන ච ඤාණෙන ච අභිසමෙති.
Kathaṃ lokuttaramaggakkhaṇe paccuppannacittena ca ñāṇena ca abhisameti? Lokuttaramaggakkhaṇe uppādādhipateyyaṃ cittaṃ ñāṇassa hetu paccayo ca. Taṃsampayuttaṃ nirodhagocaraṃ dassanādhipateyyaṃ ñāṇaṃ cittassa hetu paccayo ca. Taṃsampayuttaṃ ñāṇaṃ nirodhagocaraṃ. Evaṃ lokuttaramaggakkhaṇe paccuppannacittena ca ñāṇena ca abhisameti.
20. කිං නු එත්‌තකොයෙව අභිසමයොති? න හි. ලොකුත්‌තරමග්‌ගක්‌ඛණෙ දස්‌සනාභිසමයො සම්‌මාදිට්‌ඨි, අභිනිරොපනාභිසමයො සම්‌මාසඞ්‌කප්‌පො, පරිග්‌ගහාභිසමයො සම්‌මාවාචා, සමුට්‌ඨානාභිසමයො සම්‌මාකම්‌මන්‌තො, වොදානාභිසමයො සම්‌මාආජීවො, පග්‌ගහාභිසමයො සම්‌මාවායාමො, උපට්‌ඨානාභිසමයො සම්‌මාසති, අවික්‌ඛෙපාභිසමයො සම්‌මාසමාධි; උපට්‌ඨානාභිසමයො සතිසම්‌බොජ්‌ඣඞ්‌ගො, පවිචයාභිසමයො ධම්‌මවිචයසම්‌බොජ්‌ඣඞ්‌ගො, පග්‌ගහාභිසමයො වීරියසම්‌බොජ්‌ඣඞ්‌ගො, ඵරණාභිසමයො පීතිසම්‌බොජ්‌ඣඞ්‌ගො, උපසමාභිසමයො පස්‌සද්‌ධිසම්‌බොජ්‌ඣඞ්‌ගො, අවික්‌ඛෙපාභිසමයො සමාධිසම්‌බොජ්‌ඣඞ්‌ගො, පටිසඞ්‌ඛානාභිසමයො උපෙක්‌ඛාසම්‌බොජ්‌ඣඞ්‌ගො; අස්‌සද්‌ධියෙ අකම්‌පියාභිසමයො සද්‌ධාබලං, කොසජ්‌ජෙ අකම්‌පියාභිසමයො වීරියබලං, පමාදෙ අකම්‌පියාභිසමයො සතිබලං, උද්‌ධච්‌චෙ අකම්‌පියාභිසමයො සමාධිබලං, අවිජ්‌ජාය අකම්‌පියාභිසමයො පඤ්‌ඤාබලං; අධිමොක්‌ඛාභිසමයො සද්‌ධින්‌ද්‍රියං, පග්‌ගහාභිසමයො වීරියින්‌ද්‍රියං, උපට්‌ඨානාභිසමයො සතින්‌ද්‍රියං, අවික්‌ඛෙපාභිසමයො සමාධින්‌ද්‍රියං, දස්‌සනාභිසමයො පඤ්‌ඤින්‌ද්‍රියං. ආධිපතෙය්‍යට්‌ඨෙන ඉන්‌ද්‍රියාභිසමයො, අකම්‌පියට්‌ඨෙන බලාභිසමයො, නිය්‍යානට්‌ඨෙන බොජ්‌ඣඞ්‌ගාභිසමයො, හෙතුට්‌ඨෙන මග්‌ගාභිසමයො, උපට්‌ඨානට්‌ඨෙන සතිපට්‌ඨානාභිසමයො, පදහට්‌ඨෙන සම්‌මප්‌පධානාභිසමයො , ඉජ්‌ඣනට්‌ඨෙන ඉද්‌ධිපාදාභිසමයො, තථට්‌ඨෙන සච්‌චාභිසමයො, අවික්‌ඛෙපට්‌ඨෙන සමථාභිසමයො, අනුපස්‌සනට්‌ඨෙන විපස්‌සනාභිසමයො, එකරසට්‌ඨෙන සමථවිපස්‌සනාභිසමයො, අනතිවත්‌තනට්‌ඨෙන යුගනද්‌ධාභිසමයො, සංවරට්‌ඨෙන සීලවිසුද්‌ධිඅභිසමයො, අවික්‌ඛෙපට්‌ඨෙන විසුද්‌ධිඅභිසමයො, දස්‌සනට්‌ඨෙන දිට්‌ඨිවිසුද්‌ධිඅභිසමයො, මුත්‌තට්‌ඨෙන විමොක්‌ඛාභිසමයො, පටිවෙධට්‌ඨෙන විජ්‌ජාභිසමයො, පරිච්‌චාගට්‌ඨෙන විමුත්‌තිඅභිසමයො, සමුච්‌ඡෙදට්‌ඨෙන ඛයෙ ඤාණං අභිසමයො. ඡන්‌දො මූලට්‌ඨෙන අභිසමයො, මනසිකාරො සමුට්‌ඨානට්‌ඨෙන අභිසමයො, ඵස්‌සො සමොධානට්‌ඨෙන අභිසමයො, වෙදනා සමොසරණට්‌ඨෙන අභිසමයො, සමාධි පමුඛට්‌ඨෙන අභිසමයො , සති ආධිපතෙය්‍යට්‌ඨෙන අභිසමයො, පඤ්‌ඤා තතුත්‌තරට්‌ඨෙන අභිසමයො, විමුත්‌ති සාරට්‌ඨෙන අභිසමයො, අමතොගධං නිබ්‌බානං පරියොසානට්‌ඨෙන අභිසමයො.
20.Kiṃnu ettakoyeva abhisamayoti? Na hi.Lokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi; upaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo; assaddhiye akampiyābhisamayo saddhābalaṃ, kosajje akampiyābhisamayo vīriyabalaṃ, pamāde akampiyābhisamayo satibalaṃ, uddhacce akampiyābhisamayo samādhibalaṃ, avijjāya akampiyābhisamayo paññābalaṃ; adhimokkhābhisamayo saddhindriyaṃ, paggahābhisamayo vīriyindriyaṃ, upaṭṭhānābhisamayo satindriyaṃ, avikkhepābhisamayo samādhindriyaṃ, dassanābhisamayo paññindriyaṃ. Ādhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo , ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṃvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṃ abhisamayo. Chando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo , sati ādhipateyyaṭṭhena abhisamayo, paññā tatuttaraṭṭhena abhisamayo, vimutti sāraṭṭhena abhisamayo, amatogadhaṃ nibbānaṃ pariyosānaṭṭhena abhisamayo.
21. කිං නු එත්‌තකොයෙව අභිසමයොති? න හි. සොතාපත්‌තිමග්‌ගක්‌ඛණෙ දස්‌සනාභිසමයො සම්‌මාදිට්‌ඨි…පෙ.… අමතොගධං නිබ්‌බානං පරියොසානට්‌ඨෙන අභිසමයො.
21. Kiṃ nu ettakoyeva abhisamayoti? Na hi. Sotāpattimaggakkhaṇe dassanābhisamayo sammādiṭṭhi…pe… amatogadhaṃ nibbānaṃ pariyosānaṭṭhena abhisamayo.
කිං නු එත්‌තකොයෙව අභිසමයොති? න හි. සොතාපත්‌තිඵලක්‌ඛණෙ දස්‌සනාභිසමයො සම්‌මාදිට්‌ඨි…පෙ.… පටිප්‌පස්‌සද්‌ධට්‌ඨෙන අනුප්‌පාදෙ ඤාණං අභිසමයො. ඡන්‌දො මූලට්‌ඨෙන අභිසමයො…පෙ.… අමතොගධං 5 නිබ්‌බානං පරියොසානට්‌ඨෙන අභිසමයො.
Kiṃ nu ettakoyeva abhisamayoti? Na hi. Sotāpattiphalakkhaṇe dassanābhisamayo sammādiṭṭhi…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ 5 nibbānaṃ pariyosānaṭṭhena abhisamayo.
කිං නු එත්‌තකොයෙව අභිසමයොති?
Kiṃ nu ettakoyeva abhisamayoti?
න හි. සකදාගාමිමග්‌ගක්‌ඛණෙ…පෙ.… සකදාගාමිඵලක්‌ඛණෙ… අනාගාමිමග්‌ගක්‌ඛණෙ… අනාගාමිඵලක්‌ඛණෙ… අරහත්‌තමග්‌ගක්‌ඛණෙ…පෙ.… අරහත්‌තඵලක්‌ඛණෙ දස්‌සනාභිසමයො සම්‌මාදිට්‌ඨි, අභිනිරොපනාභිසමයො සම්‌මාසඞ්‌කප්‌පො…පෙ.… පටිප්‌පස්‌සද්‌ධට්‌ඨෙන අනුප්‌පාදෙ ඤාණං අභිසමයො. ඡන්‌දො මූලට්‌ඨෙන අභිසමයො…පෙ.… අමතොගධං නිබ්‌බානං පරියොසානට්‌ඨෙන අභිසමයො.
Na hi. Sakadāgāmimaggakkhaṇe…pe… sakadāgāmiphalakkhaṇe… anāgāmimaggakkhaṇe… anāgāmiphalakkhaṇe… arahattamaggakkhaṇe…pe… arahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ nibbānaṃ pariyosānaṭṭhena abhisamayo.
ය්‌වායං 3 කිලෙසෙ පජහති, අතීතෙ කිලෙසෙ පජහති…පෙ.… අනාගතෙ කිලෙසෙ පජහති, පච්‌චුප්‌පන්‌නෙ කිලෙසෙ පජහති, අතීතෙ කිලෙසෙ පජහතීති. හඤ්‌චි අතීතෙ කිලෙසෙ පජහති, තෙන හි ඛීණං ඛෙපෙති, නිරුද්‌ධං නිරොධෙති, විගතං විගමෙති, අත්‌ථඞ්‌ගතං අත්‌ථඞ්‌ගමෙති, අතීතං යං න අත්‌ථි තං පජහතීති? න අතීතෙ කිලෙසෙ පජහතීති. අනාගතෙ කිලෙසෙ පජහතීති. හඤ්‌චි අනාගතෙ කිලෙසෙ පජහති, තෙන හි අජාතං පජහති, අනිබ්‌බත්‌තං පජහති, අනුප්‌පන්‌නං පජහති, අපාතුභූතං පජහති, අනාගතං යං න අත්‌ථි තං පජහතීති? න අනාගතෙ කිලෙසෙ පජහතීති. පච්‌චුප්‌පන්‌නෙ කිලෙසෙ පජහතීති. හඤ්‌චි පච්‌චුප්‌පන්‌නෙ කිලෙසෙ පජහති, තෙන හි රත්‌තො රාගං පජහති, දුට්‌ඨො දොසං පජහති, මූළ්‌හො මොහං පජහති, විනිබද්‌ධො මානං පජහති, පරාමට්‌ඨො දිට්‌ඨිං පජහති ,
Yvāyaṃ 4 kilese pajahati, atīte kilese pajahati…pe… anāgate kilese pajahati, paccuppanne kilese pajahati, atīte kilese pajahatīti. Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ na atthi taṃ pajahatīti? Na atīte kilese pajahatīti. Anāgate kilese pajahatīti. Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ na atthi taṃ pajahatīti? Na anāgate kilese pajahatīti. Paccuppanne kilese pajahatīti. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ pajahati, mūḷho mohaṃ pajahati, vinibaddho mānaṃ pajahati, parāmaṭṭho diṭṭhiṃ pajahati ,
වික්‌ඛෙපගතො උද්‌ධච්‌චං පජහති, අනිට්‌ඨඞ්‌ගතො විචිකිච්‌ඡං පජහති, ථාමගතො අනුසයං පජහති, කණ්‌හසුක්‌කධම්‌මා යුගනද්‌ධා සමමෙව වත්‌තන්‌ති, සංකිලෙසිකා 5 මග්‌ගභාවනා හොති?
Vikkhepagato uddhaccaṃ pajahati, aniṭṭhaṅgato vicikicchaṃ pajahati, thāmagato anusayaṃ pajahati, kaṇhasukkadhammā yuganaddhā samameva vattanti, saṃkilesikā 6 maggabhāvanā hoti?
න හි අතීතෙ කිලෙසෙ පජහති, න අනාගතෙ කිලෙසෙ පජහති, න පච්‌චුප්‌පන්‌නෙ කිලෙසෙ පජහතීති. හඤ්‌චි න අතීතෙ කිලෙසෙ පජහති, න අනාගතෙ…පෙ.… න පච්‌චුප්‌පන්‌නෙ කිලෙසෙ පජහති, තෙන හි නත්‌ථි මග්‌ගභාවනා, නත්‌ථි ඵලසච්‌ඡිකිරියා, නත්‌ථි කිලෙසප්‌පහානං, නත්‌ථි ධම්‌මාභිසමයොති? අත්‌ථි මග්‌ගභාවනා, අත්‌ථි ඵලසච්‌ඡිකිරියා, අත්‌ථි කිලෙසප්‌පහානං, අත්‌ථි ධම්‌මාභිසමයො. යථා කථං විය? සෙය්‍යථාපි තරුණො රුක්‌ඛො අජාතඵලො. තමෙනං පුරිසො මූලං ඡින්‌දෙය්‍ය. යෙ තස්‌ස රුක්‌ඛස්‌ස අජාතඵලා, තෙ අජාතායෙව න ජායන්‌ති, අනිබ්‌බත්‌තායෙව න නිබ්‌බත්‌තන්‌ති, අනුප්‌පන්‌නායෙව න උප්‌පජ්‌ජන්‌ති, අපාතුභූතායෙව න පාතුභවන්‌ති. එවමෙවං උප්‌පාදො හෙතු, උප්‌පාදො පච්‌චයො කිලෙසානං නිබ්‌බත්‌තියාති. උප්‌පාදෙ ආදීනවං දිස්‌වා අනුප්‌පාදෙ චිත්‌තං පක්‌ඛන්‌දති. අනුප්‌පාදෙ චිත්‌තස්‌ස පක්‌ඛන්‌දත්‌තා යෙ උප්‌පාදපච්‌චයා කිලෙසා නිබ්‌බත්‌තෙය්‍යුං, තෙ අජාතායෙව න ජායන්‌ති, අනිබ්‌බත්‌තායෙව න නිබ්‌බත්‌තන්‌ති, අනුප්‌පන්‌නායෙව න උප්‌පජ්‌ජන්‌ති, අපාතුභූතායෙව න පාතුභවන්‌ති. එවං හෙතුනිරොධා දුක්‌ඛනිරොධො. පවත්‌තං හෙතු, නිමිත්‌තං හෙතු, ආයූහනා හෙතු. ආයූහනා පච්‌චයො කිලෙසානං නිබ්‌බත්‌තියාති. ආයූහනෙ ආදීනවං දිස්‌වා අනායූහනෙ චිත්‌තං පක්‌ඛන්‌දති. අනායූහනෙ චිත්‌තස්‌ස පක්‌ඛන්‌දත්‌තා, යෙ ආයූහනපච්‌චයා කිලෙසා නිබ්‌බත්‌තෙය්‍යුං, තෙ අජාතායෙව න ජායන්‌ති, අනිබ්‌බත්‌තායෙව න නිබ්‌බත්‌තන්‌ති, අනුප්‌පන්‌නායෙව න උප්‌පජ්‌ජන්‌ති, අපාතුභූතායෙව න පාතුභවන්‌ති. එවං හෙතුනිරොධා දුක්‌ඛනිරොධො. එවං අත්‌ථි මග්‌ගභාවනා, අත්‌ථි ඵලසච්‌ඡිකිරියා, අත්‌ථි කිලෙසප්‌පහානං, අත්‌ථි ධම්‌මාභිසමයොති.
Na hi atīte kilese pajahati, na anāgate kilese pajahati, na paccuppanne kilese pajahatīti. Hañci na atīte kilese pajahati, na anāgate…pe… na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti? Atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayo. Yathā kathaṃ viya? Seyyathāpi taruṇo rukkho ajātaphalo. Tamenaṃ puriso mūlaṃ chindeyya. Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evamevaṃ uppādo hetu, uppādo paccayo kilesānaṃ nibbattiyāti. Uppāde ādīnavaṃ disvā anuppāde cittaṃ pakkhandati. Anuppāde cittassa pakkhandattā ye uppādapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Pavattaṃ hetu, nimittaṃ hetu, āyūhanā hetu. Āyūhanā paccayo kilesānaṃ nibbattiyāti. Āyūhane ādīnavaṃ disvā anāyūhane cittaṃ pakkhandati. Anāyūhane cittassa pakkhandattā, ye āyūhanapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayoti.
අභිසමයකථා නිට්‌ඨිතා.
Abhisamayakathā niṭṭhitā.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / අභිසමයකථාවණ්‌ණනා • Abhisamayakathāvaṇṇanā
