| Library / Tipiṭaka / തിപിടക • Tipiṭaka / പടിസമ്ഭിദാമഗ്ഗപാളി • Paṭisambhidāmaggapāḷi |
൩. അഭിസമയകഥാ
3. Abhisamayakathā
൧൯. അഭിസമയോതി . കേന അഭിസമേതി? ചിത്തേന അഭിസമേതി.
19.Abhisamayoti . Kena abhisameti? Cittena abhisameti.
ഹഞ്ചി ചിത്തേന അഭിസമേതി, തേന ഹി അഞ്ഞാണീ അഭിസമേതി? ന അഞ്ഞാണീ അഭിസമേതി. ഞാണേന അഭിസമേതി.
Hañci cittena abhisameti, tena hi aññāṇī abhisameti? Na aññāṇī abhisameti. Ñāṇena abhisameti.
ഹഞ്ചി ഞാണേന അഭിസമേതി, തേന ഹി അചിത്തേന ച ഞാണേന ച അചിത്തകോ 1 അഭിസമേതി? ന അചിത്തകോ അഭിസമേതി. ചിത്തേന ച ഞാണേന ച അഭിസമേതി.
Hañci ñāṇena abhisameti, tena hi acittena ca ñāṇena ca acittako 2 abhisameti? Na acittako abhisameti. Cittena ca ñāṇena ca abhisameti.
ഹഞ്ചി ചിത്തേന ച ഞാണേന ച അഭിസമേതി, തേന ഹി കാമാവചരചിത്തേന ച ഞാണേന ച അഭിസമേതി? ന കാമാവചരചിത്തേന ച ഞാണേന ച അഭിസമേതി.
Hañci cittena ca ñāṇena ca abhisameti, tena hi kāmāvacaracittena ca ñāṇena ca abhisameti? Na kāmāvacaracittena ca ñāṇena ca abhisameti.
തേന ഹി രൂപാവചരചിത്തേന ച ഞാണേന ച അഭിസമേതി? ന രൂപാവചരചിത്തേന ച ഞാണേന ച അഭിസമേതി.
Tena hi rūpāvacaracittena ca ñāṇena ca abhisameti? Na rūpāvacaracittena ca ñāṇena ca abhisameti.
തേന ഹി അരൂപാവചരചിത്തേന ച ഞാണേന ച അഭിസമേതി? ന അരൂപാവചരചിത്തേന ച ഞാണേന ച അഭിസമേതി.
Tena hi arūpāvacaracittena ca ñāṇena ca abhisameti? Na arūpāvacaracittena ca ñāṇena ca abhisameti.
തേന ഹി കമ്മസ്സകതചിത്തേന ച ഞാണേന ച അഭിസമേതി? ന കമ്മസ്സകതചിത്തേന ച ഞാണേന ച അഭിസമേതി.
Tena hi kammassakatacittena ca ñāṇena ca abhisameti? Na kammassakatacittena ca ñāṇena ca abhisameti.
തേന ഹി സച്ചാനുലോമികചിത്തേന ച ഞാണേന ച അഭിസമേതി? ന സച്ചാനുലോമികചിത്തേന ച ഞാണേന ച അഭിസമേതി.
Tena hi saccānulomikacittena ca ñāṇena ca abhisameti? Na saccānulomikacittena ca ñāṇena ca abhisameti.
തേന ഹി അതീതചിത്തേന ച ഞാണേന ച അഭിസമേതി? ന അതീതചിത്തേന ച ഞാണേന ച അഭിസമേതി.
Tena hi atītacittena ca ñāṇena ca abhisameti? Na atītacittena ca ñāṇena ca abhisameti.
തേന ഹി അനാഗതചിത്തേന ച ഞാണേന ച അഭിസമേതി? ന അനാഗതചിത്തേന ച ഞാണേന ച അഭിസമേതി.
Tena hi anāgatacittena ca ñāṇena ca abhisameti? Na anāgatacittena ca ñāṇena ca abhisameti.
തേന ഹി പച്ചുപ്പന്നലോകിയചിത്തേന ച ഞാണേന ച അഭിസമേതി? ന പച്ചുപ്പന്നലോകിയചിത്തേന ച ഞാണേന ച അഭിസമേതി. ലോകുത്തരമഗ്ഗക്ഖണേ പച്ചുപ്പന്നചിത്തേന ച ഞാണേന ച അഭിസമേതി.
Tena hi paccuppannalokiyacittena ca ñāṇena ca abhisameti? Na paccuppannalokiyacittena ca ñāṇena ca abhisameti. Lokuttaramaggakkhaṇe paccuppannacittena ca ñāṇena ca abhisameti.
കഥം ലോകുത്തരമഗ്ഗക്ഖണേ പച്ചുപ്പന്നചിത്തേന ച ഞാണേന ച അഭിസമേതി? ലോകുത്തരമഗ്ഗക്ഖണേ ഉപ്പാദാധിപതേയ്യം ചിത്തം ഞാണസ്സ ഹേതു പച്ചയോ ച. തംസമ്പയുത്തം നിരോധഗോചരം ദസ്സനാധിപതേയ്യം ഞാണം ചിത്തസ്സ ഹേതു പച്ചയോ ച. തംസമ്പയുത്തം ഞാണം നിരോധഗോചരം. ഏവം ലോകുത്തരമഗ്ഗക്ഖണേ പച്ചുപ്പന്നചിത്തേന ച ഞാണേന ച അഭിസമേതി.
Kathaṃ lokuttaramaggakkhaṇe paccuppannacittena ca ñāṇena ca abhisameti? Lokuttaramaggakkhaṇe uppādādhipateyyaṃ cittaṃ ñāṇassa hetu paccayo ca. Taṃsampayuttaṃ nirodhagocaraṃ dassanādhipateyyaṃ ñāṇaṃ cittassa hetu paccayo ca. Taṃsampayuttaṃ ñāṇaṃ nirodhagocaraṃ. Evaṃ lokuttaramaggakkhaṇe paccuppannacittena ca ñāṇena ca abhisameti.
൨൦. കിം നു ഏത്തകോയേവ അഭിസമയോതി? ന ഹി. ലോകുത്തരമഗ്ഗക്ഖണേ ദസ്സനാഭിസമയോ സമ്മാദിട്ഠി, അഭിനിരോപനാഭിസമയോ സമ്മാസങ്കപ്പോ, പരിഗ്ഗഹാഭിസമയോ സമ്മാവാചാ, സമുട്ഠാനാഭിസമയോ സമ്മാകമ്മന്തോ, വോദാനാഭിസമയോ സമ്മാആജീവോ, പഗ്ഗഹാഭിസമയോ സമ്മാവായാമോ, ഉപട്ഠാനാഭിസമയോ സമ്മാസതി, അവിക്ഖേപാഭിസമയോ സമ്മാസമാധി; ഉപട്ഠാനാഭിസമയോ സതിസമ്ബോജ്ഝങ്ഗോ, പവിചയാഭിസമയോ ധമ്മവിചയസമ്ബോജ്ഝങ്ഗോ, പഗ്ഗഹാഭിസമയോ വീരിയസമ്ബോജ്ഝങ്ഗോ, ഫരണാഭിസമയോ പീതിസമ്ബോജ്ഝങ്ഗോ, ഉപസമാഭിസമയോ പസ്സദ്ധിസമ്ബോജ്ഝങ്ഗോ, അവിക്ഖേപാഭിസമയോ സമാധിസമ്ബോജ്ഝങ്ഗോ, പടിസങ്ഖാനാഭിസമയോ ഉപേക്ഖാസമ്ബോജ്ഝങ്ഗോ; അസ്സദ്ധിയേ അകമ്പിയാഭിസമയോ സദ്ധാബലം, കോസജ്ജേ അകമ്പിയാഭിസമയോ വീരിയബലം, പമാദേ അകമ്പിയാഭിസമയോ സതിബലം, ഉദ്ധച്ചേ അകമ്പിയാഭിസമയോ സമാധിബലം, അവിജ്ജായ അകമ്പിയാഭിസമയോ പഞ്ഞാബലം; അധിമോക്ഖാഭിസമയോ സദ്ധിന്ദ്രിയം, പഗ്ഗഹാഭിസമയോ വീരിയിന്ദ്രിയം, ഉപട്ഠാനാഭിസമയോ സതിന്ദ്രിയം, അവിക്ഖേപാഭിസമയോ സമാധിന്ദ്രിയം, ദസ്സനാഭിസമയോ പഞ്ഞിന്ദ്രിയം. ആധിപതേയ്യട്ഠേന ഇന്ദ്രിയാഭിസമയോ, അകമ്പിയട്ഠേന ബലാഭിസമയോ, നിയ്യാനട്ഠേന ബോജ്ഝങ്ഗാഭിസമയോ, ഹേതുട്ഠേന മഗ്ഗാഭിസമയോ, ഉപട്ഠാനട്ഠേന സതിപട്ഠാനാഭിസമയോ, പദഹട്ഠേന സമ്മപ്പധാനാഭിസമയോ , ഇജ്ഝനട്ഠേന ഇദ്ധിപാദാഭിസമയോ, തഥട്ഠേന സച്ചാഭിസമയോ, അവിക്ഖേപട്ഠേന സമഥാഭിസമയോ, അനുപസ്സനട്ഠേന വിപസ്സനാഭിസമയോ, ഏകരസട്ഠേന സമഥവിപസ്സനാഭിസമയോ, അനതിവത്തനട്ഠേന യുഗനദ്ധാഭിസമയോ, സംവരട്ഠേന സീലവിസുദ്ധിഅഭിസമയോ, അവിക്ഖേപട്ഠേന വിസുദ്ധിഅഭിസമയോ, ദസ്സനട്ഠേന ദിട്ഠിവിസുദ്ധിഅഭിസമയോ, മുത്തട്ഠേന വിമോക്ഖാഭിസമയോ, പടിവേധട്ഠേന വിജ്ജാഭിസമയോ, പരിച്ചാഗട്ഠേന വിമുത്തിഅഭിസമയോ, സമുച്ഛേദട്ഠേന ഖയേ ഞാണം അഭിസമയോ. ഛന്ദോ മൂലട്ഠേന അഭിസമയോ, മനസികാരോ സമുട്ഠാനട്ഠേന അഭിസമയോ, ഫസ്സോ സമോധാനട്ഠേന അഭിസമയോ, വേദനാ സമോസരണട്ഠേന അഭിസമയോ, സമാധി പമുഖട്ഠേന അഭിസമയോ , സതി ആധിപതേയ്യട്ഠേന അഭിസമയോ, പഞ്ഞാ തതുത്തരട്ഠേന അഭിസമയോ, വിമുത്തി സാരട്ഠേന അഭിസമയോ, അമതോഗധം നിബ്ബാനം പരിയോസാനട്ഠേന അഭിസമയോ.
20.Kiṃnu ettakoyeva abhisamayoti? Na hi.Lokuttaramaggakkhaṇe dassanābhisamayo sammādiṭṭhi, abhiniropanābhisamayo sammāsaṅkappo, pariggahābhisamayo sammāvācā, samuṭṭhānābhisamayo sammākammanto, vodānābhisamayo sammāājīvo, paggahābhisamayo sammāvāyāmo, upaṭṭhānābhisamayo sammāsati, avikkhepābhisamayo sammāsamādhi; upaṭṭhānābhisamayo satisambojjhaṅgo, pavicayābhisamayo dhammavicayasambojjhaṅgo, paggahābhisamayo vīriyasambojjhaṅgo, pharaṇābhisamayo pītisambojjhaṅgo, upasamābhisamayo passaddhisambojjhaṅgo, avikkhepābhisamayo samādhisambojjhaṅgo, paṭisaṅkhānābhisamayo upekkhāsambojjhaṅgo; assaddhiye akampiyābhisamayo saddhābalaṃ, kosajje akampiyābhisamayo vīriyabalaṃ, pamāde akampiyābhisamayo satibalaṃ, uddhacce akampiyābhisamayo samādhibalaṃ, avijjāya akampiyābhisamayo paññābalaṃ; adhimokkhābhisamayo saddhindriyaṃ, paggahābhisamayo vīriyindriyaṃ, upaṭṭhānābhisamayo satindriyaṃ, avikkhepābhisamayo samādhindriyaṃ, dassanābhisamayo paññindriyaṃ. Ādhipateyyaṭṭhena indriyābhisamayo, akampiyaṭṭhena balābhisamayo, niyyānaṭṭhena bojjhaṅgābhisamayo, hetuṭṭhena maggābhisamayo, upaṭṭhānaṭṭhena satipaṭṭhānābhisamayo, padahaṭṭhena sammappadhānābhisamayo , ijjhanaṭṭhena iddhipādābhisamayo, tathaṭṭhena saccābhisamayo, avikkhepaṭṭhena samathābhisamayo, anupassanaṭṭhena vipassanābhisamayo, ekarasaṭṭhena samathavipassanābhisamayo, anativattanaṭṭhena yuganaddhābhisamayo, saṃvaraṭṭhena sīlavisuddhiabhisamayo, avikkhepaṭṭhena visuddhiabhisamayo, dassanaṭṭhena diṭṭhivisuddhiabhisamayo, muttaṭṭhena vimokkhābhisamayo, paṭivedhaṭṭhena vijjābhisamayo, pariccāgaṭṭhena vimuttiabhisamayo, samucchedaṭṭhena khaye ñāṇaṃ abhisamayo. Chando mūlaṭṭhena abhisamayo, manasikāro samuṭṭhānaṭṭhena abhisamayo, phasso samodhānaṭṭhena abhisamayo, vedanā samosaraṇaṭṭhena abhisamayo, samādhi pamukhaṭṭhena abhisamayo , sati ādhipateyyaṭṭhena abhisamayo, paññā tatuttaraṭṭhena abhisamayo, vimutti sāraṭṭhena abhisamayo, amatogadhaṃ nibbānaṃ pariyosānaṭṭhena abhisamayo.
൨൧. കിം നു ഏത്തകോയേവ അഭിസമയോതി? ന ഹി. സോതാപത്തിമഗ്ഗക്ഖണേ ദസ്സനാഭിസമയോ സമ്മാദിട്ഠി…പേ॰… അമതോഗധം നിബ്ബാനം പരിയോസാനട്ഠേന അഭിസമയോ.
21. Kiṃ nu ettakoyeva abhisamayoti? Na hi. Sotāpattimaggakkhaṇe dassanābhisamayo sammādiṭṭhi…pe… amatogadhaṃ nibbānaṃ pariyosānaṭṭhena abhisamayo.
കിം നു ഏത്തകോയേവ അഭിസമയോതി? ന ഹി. സോതാപത്തിഫലക്ഖണേ ദസ്സനാഭിസമയോ സമ്മാദിട്ഠി…പേ॰… പടിപ്പസ്സദ്ധട്ഠേന അനുപ്പാദേ ഞാണം അഭിസമയോ. ഛന്ദോ മൂലട്ഠേന അഭിസമയോ…പേ॰… അമതോഗധം ൫ നിബ്ബാനം പരിയോസാനട്ഠേന അഭിസമയോ.
Kiṃ nu ettakoyeva abhisamayoti? Na hi. Sotāpattiphalakkhaṇe dassanābhisamayo sammādiṭṭhi…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ 5 nibbānaṃ pariyosānaṭṭhena abhisamayo.
കിം നു ഏത്തകോയേവ അഭിസമയോതി?
Kiṃ nu ettakoyeva abhisamayoti?
ന ഹി. സകദാഗാമിമഗ്ഗക്ഖണേ…പേ॰… സകദാഗാമിഫലക്ഖണേ… അനാഗാമിമഗ്ഗക്ഖണേ… അനാഗാമിഫലക്ഖണേ… അരഹത്തമഗ്ഗക്ഖണേ…പേ॰… അരഹത്തഫലക്ഖണേ ദസ്സനാഭിസമയോ സമ്മാദിട്ഠി, അഭിനിരോപനാഭിസമയോ സമ്മാസങ്കപ്പോ…പേ॰… പടിപ്പസ്സദ്ധട്ഠേന അനുപ്പാദേ ഞാണം അഭിസമയോ. ഛന്ദോ മൂലട്ഠേന അഭിസമയോ…പേ॰… അമതോഗധം നിബ്ബാനം പരിയോസാനട്ഠേന അഭിസമയോ.
Na hi. Sakadāgāmimaggakkhaṇe…pe… sakadāgāmiphalakkhaṇe… anāgāmimaggakkhaṇe… anāgāmiphalakkhaṇe… arahattamaggakkhaṇe…pe… arahattaphalakkhaṇe dassanābhisamayo sammādiṭṭhi, abhiniropanābhisamayo sammāsaṅkappo…pe… paṭippassaddhaṭṭhena anuppāde ñāṇaṃ abhisamayo. Chando mūlaṭṭhena abhisamayo…pe… amatogadhaṃ nibbānaṃ pariyosānaṭṭhena abhisamayo.
യ്വായം 3 കിലേസേ പജഹതി, അതീതേ കിലേസേ പജഹതി…പേ॰… അനാഗതേ കിലേസേ പജഹതി, പച്ചുപ്പന്നേ കിലേസേ പജഹതി, അതീതേ കിലേസേ പജഹതീതി. ഹഞ്ചി അതീതേ കിലേസേ പജഹതി, തേന ഹി ഖീണം ഖേപേതി, നിരുദ്ധം നിരോധേതി, വിഗതം വിഗമേതി, അത്ഥങ്ഗതം അത്ഥങ്ഗമേതി, അതീതം യം ന അത്ഥി തം പജഹതീതി? ന അതീതേ കിലേസേ പജഹതീതി. അനാഗതേ കിലേസേ പജഹതീതി. ഹഞ്ചി അനാഗതേ കിലേസേ പജഹതി, തേന ഹി അജാതം പജഹതി, അനിബ്ബത്തം പജഹതി, അനുപ്പന്നം പജഹതി, അപാതുഭൂതം പജഹതി, അനാഗതം യം ന അത്ഥി തം പജഹതീതി? ന അനാഗതേ കിലേസേ പജഹതീതി. പച്ചുപ്പന്നേ കിലേസേ പജഹതീതി. ഹഞ്ചി പച്ചുപ്പന്നേ കിലേസേ പജഹതി, തേന ഹി രത്തോ രാഗം പജഹതി, ദുട്ഠോ ദോസം പജഹതി, മൂള്ഹോ മോഹം പജഹതി, വിനിബദ്ധോ മാനം പജഹതി, പരാമട്ഠോ ദിട്ഠിം പജഹതി ,
Yvāyaṃ 4 kilese pajahati, atīte kilese pajahati…pe… anāgate kilese pajahati, paccuppanne kilese pajahati, atīte kilese pajahatīti. Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṅgameti, atītaṃ yaṃ na atthi taṃ pajahatīti? Na atīte kilese pajahatīti. Anāgate kilese pajahatīti. Hañci anāgate kilese pajahati, tena hi ajātaṃ pajahati, anibbattaṃ pajahati, anuppannaṃ pajahati, apātubhūtaṃ pajahati, anāgataṃ yaṃ na atthi taṃ pajahatīti? Na anāgate kilese pajahatīti. Paccuppanne kilese pajahatīti. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ pajahati, mūḷho mohaṃ pajahati, vinibaddho mānaṃ pajahati, parāmaṭṭho diṭṭhiṃ pajahati ,
വിക്ഖേപഗതോ ഉദ്ധച്ചം പജഹതി, അനിട്ഠങ്ഗതോ വിചികിച്ഛം പജഹതി, ഥാമഗതോ അനുസയം പജഹതി, കണ്ഹസുക്കധമ്മാ യുഗനദ്ധാ സമമേവ വത്തന്തി, സംകിലേസികാ 5 മഗ്ഗഭാവനാ ഹോതി?
Vikkhepagato uddhaccaṃ pajahati, aniṭṭhaṅgato vicikicchaṃ pajahati, thāmagato anusayaṃ pajahati, kaṇhasukkadhammā yuganaddhā samameva vattanti, saṃkilesikā 6 maggabhāvanā hoti?
ന ഹി അതീതേ കിലേസേ പജഹതി, ന അനാഗതേ കിലേസേ പജഹതി, ന പച്ചുപ്പന്നേ കിലേസേ പജഹതീതി. ഹഞ്ചി ന അതീതേ കിലേസേ പജഹതി, ന അനാഗതേ…പേ॰… ന പച്ചുപ്പന്നേ കിലേസേ പജഹതി, തേന ഹി നത്ഥി മഗ്ഗഭാവനാ, നത്ഥി ഫലസച്ഛികിരിയാ, നത്ഥി കിലേസപ്പഹാനം, നത്ഥി ധമ്മാഭിസമയോതി? അത്ഥി മഗ്ഗഭാവനാ, അത്ഥി ഫലസച്ഛികിരിയാ, അത്ഥി കിലേസപ്പഹാനം, അത്ഥി ധമ്മാഭിസമയോ. യഥാ കഥം വിയ? സേയ്യഥാപി തരുണോ രുക്ഖോ അജാതഫലോ. തമേനം പുരിസോ മൂലം ഛിന്ദേയ്യ. യേ തസ്സ രുക്ഖസ്സ അജാതഫലാ, തേ അജാതായേവ ന ജായന്തി, അനിബ്ബത്തായേവ ന നിബ്ബത്തന്തി, അനുപ്പന്നായേവ ന ഉപ്പജ്ജന്തി, അപാതുഭൂതായേവ ന പാതുഭവന്തി. ഏവമേവം ഉപ്പാദോ ഹേതു, ഉപ്പാദോ പച്ചയോ കിലേസാനം നിബ്ബത്തിയാതി. ഉപ്പാദേ ആദീനവം ദിസ്വാ അനുപ്പാദേ ചിത്തം പക്ഖന്ദതി. അനുപ്പാദേ ചിത്തസ്സ പക്ഖന്ദത്താ യേ ഉപ്പാദപച്ചയാ കിലേസാ നിബ്ബത്തേയ്യും, തേ അജാതായേവ ന ജായന്തി, അനിബ്ബത്തായേവ ന നിബ്ബത്തന്തി, അനുപ്പന്നായേവ ന ഉപ്പജ്ജന്തി, അപാതുഭൂതായേവ ന പാതുഭവന്തി. ഏവം ഹേതുനിരോധാ ദുക്ഖനിരോധോ. പവത്തം ഹേതു, നിമിത്തം ഹേതു, ആയൂഹനാ ഹേതു. ആയൂഹനാ പച്ചയോ കിലേസാനം നിബ്ബത്തിയാതി. ആയൂഹനേ ആദീനവം ദിസ്വാ അനായൂഹനേ ചിത്തം പക്ഖന്ദതി. അനായൂഹനേ ചിത്തസ്സ പക്ഖന്ദത്താ, യേ ആയൂഹനപച്ചയാ കിലേസാ നിബ്ബത്തേയ്യും, തേ അജാതായേവ ന ജായന്തി, അനിബ്ബത്തായേവ ന നിബ്ബത്തന്തി, അനുപ്പന്നായേവ ന ഉപ്പജ്ജന്തി, അപാതുഭൂതായേവ ന പാതുഭവന്തി. ഏവം ഹേതുനിരോധാ ദുക്ഖനിരോധോ. ഏവം അത്ഥി മഗ്ഗഭാവനാ, അത്ഥി ഫലസച്ഛികിരിയാ, അത്ഥി കിലേസപ്പഹാനം, അത്ഥി ധമ്മാഭിസമയോതി.
Na hi atīte kilese pajahati, na anāgate kilese pajahati, na paccuppanne kilese pajahatīti. Hañci na atīte kilese pajahati, na anāgate…pe… na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti? Atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayo. Yathā kathaṃ viya? Seyyathāpi taruṇo rukkho ajātaphalo. Tamenaṃ puriso mūlaṃ chindeyya. Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evamevaṃ uppādo hetu, uppādo paccayo kilesānaṃ nibbattiyāti. Uppāde ādīnavaṃ disvā anuppāde cittaṃ pakkhandati. Anuppāde cittassa pakkhandattā ye uppādapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Pavattaṃ hetu, nimittaṃ hetu, āyūhanā hetu. Āyūhanā paccayo kilesānaṃ nibbattiyāti. Āyūhane ādīnavaṃ disvā anāyūhane cittaṃ pakkhandati. Anāyūhane cittassa pakkhandattā, ye āyūhanapaccayā kilesā nibbatteyyuṃ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti. Evaṃ hetunirodhā dukkhanirodho. Evaṃ atthi maggabhāvanā, atthi phalasacchikiriyā, atthi kilesappahānaṃ, atthi dhammābhisamayoti.
അഭിസമയകഥാ നിട്ഠിതാ.
Abhisamayakathā niṭṭhitā.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / പടിസമ്ഭിദാമഗ്ഗ-അട്ഠകഥാ • Paṭisambhidāmagga-aṭṭhakathā / അഭിസമയകഥാവണ്ണനാ • Abhisamayakathāvaṇṇanā
