| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. அபி⁴ஸமயந்தராயகரபஞ்ஹோ
7. Abhisamayantarāyakarapañho
7. ‘‘ப⁴ந்தே நாக³ஸேன, இத⁴ யோ கோசி கி³ஹீ பாராஜிகங் அஜ்ஜா²பன்னோ ப⁴வெய்ய, ஸோ அபரேன ஸமயேன பப்³பா³ஜெய்ய, அத்தனாபி ஸோ ந ஜானெய்ய ‘கி³ஹிபாராஜிகங் அஜ்ஜா²பன்னொஸ்மீ’தி, நபி தஸ்ஸ அஞ்ஞோ கோசி ஆசிக்கெ²ய்ய ‘கி³ஹிபாராஜிகங் அஜ்ஜா²பன்னோஸீ’தி. ஸோ ச தத²த்தாய படிபஜ்ஜெய்ய, அபி நு தஸ்ஸ த⁴ம்மாபி⁴ஸமயோ ப⁴வெய்யா’’தி? ‘‘ந ஹி, மஹாராஜா’’தி. ‘‘கேன, ப⁴ந்தே, காரணேனா’’தி? ‘‘யோ தஸ்ஸ ஹேது த⁴ம்மாபி⁴ஸமயாய, ஸோ தஸ்ஸ ஸமுச்சி²ன்னோ, தஸ்மா த⁴ம்மாபி⁴ஸமயோ ந ப⁴வதீ’’தி.
7. ‘‘Bhante nāgasena, idha yo koci gihī pārājikaṃ ajjhāpanno bhaveyya, so aparena samayena pabbājeyya, attanāpi so na jāneyya ‘gihipārājikaṃ ajjhāpannosmī’ti, napi tassa añño koci ācikkheyya ‘gihipārājikaṃ ajjhāpannosī’ti. So ca tathattāya paṭipajjeyya, api nu tassa dhammābhisamayo bhaveyyā’’ti? ‘‘Na hi, mahārājā’’ti. ‘‘Kena, bhante, kāraṇenā’’ti? ‘‘Yo tassa hetu dhammābhisamayāya, so tassa samucchinno, tasmā dhammābhisamayo na bhavatī’’ti.
‘‘ப⁴ந்தே நாக³ஸேன, தும்ஹே ப⁴ணத² ‘ஜானந்தஸ்ஸ குக்குச்சங் ஹோதி, குக்குச்சே ஸதி ஆவரணங் ஹோதி, ஆவடே சித்தே த⁴ம்மாபி⁴ஸமயோ ந ஹோதீ’தி. இமஸ்ஸ பன அஜானந்தஸ்ஸ அகுக்குச்சஜாதஸ்ஸ ஸந்தசித்தஸ்ஸ விஹரதோ கேன காரணேன த⁴ம்மாபி⁴ஸமயோ ந ஹோதி, விஸமேன விஸமேனேஸோ பஞ்ஹோ க³ச்ச²தி, சிந்தெத்வா விஸஜ்ஜேதா²’’தி.
‘‘Bhante nāgasena, tumhe bhaṇatha ‘jānantassa kukkuccaṃ hoti, kukkucce sati āvaraṇaṃ hoti, āvaṭe citte dhammābhisamayo na hotī’ti. Imassa pana ajānantassa akukkuccajātassa santacittassa viharato kena kāraṇena dhammābhisamayo na hoti, visamena visameneso pañho gacchati, cintetvā visajjethā’’ti.
‘‘ருஹதி , மஹாராஜ, ஸுகட்டே² ஸுகலலே மண்ட³கெ²த்தே ஸாரத³ங் ஸுக²ஸயிதங் பீ³ஜ’’ந்தி? ‘‘ஆம, ப⁴ந்தே’’தி. ‘‘அபி நு, மஹாராஜ, தஞ்ஞேவ பீ³ஜங் க⁴னஸேலஸிலாதலே ருஹெய்யா’’தி? ‘‘ந ஹி, ப⁴ந்தே’’தி. ‘‘கிஸ்ஸ பன, மஹாராஜ, தஞ்ஞேவ பீ³ஜங் கலலே ருஹதி, கிஸ்ஸ க⁴னஸேலே ந ருஹதீ’’தி? ‘‘நத்தி², ப⁴ந்தே, தஸ்ஸ பீ³ஜஸ்ஸ ருஹனாய க⁴னஸேலே ஹேது, அஹேதுனா பீ³ஜங் ந ருஹதீ’’தி. ‘‘ஏவமேவ கோ², மஹாராஜ, யேன ஹேதுனா தஸ்ஸ த⁴ம்மாபி⁴ஸமயோ ப⁴வெய்ய, ஸோ தஸ்ஸ ஹேது ஸமுச்சி²ன்னோ, அஹேதுனா த⁴ம்மாபி⁴ஸமயோ ந ஹோதி.
‘‘Ruhati , mahārāja, sukaṭṭhe sukalale maṇḍakhette sāradaṃ sukhasayitaṃ bīja’’nti? ‘‘Āma, bhante’’ti. ‘‘Api nu, mahārāja, taññeva bījaṃ ghanaselasilātale ruheyyā’’ti? ‘‘Na hi, bhante’’ti. ‘‘Kissa pana, mahārāja, taññeva bījaṃ kalale ruhati, kissa ghanasele na ruhatī’’ti? ‘‘Natthi, bhante, tassa bījassa ruhanāya ghanasele hetu, ahetunā bījaṃ na ruhatī’’ti. ‘‘Evameva kho, mahārāja, yena hetunā tassa dhammābhisamayo bhaveyya, so tassa hetu samucchinno, ahetunā dhammābhisamayo na hoti.
‘‘யதா² வா பன, மஹாராஜ, த³ண்ட³லெட்³டு³லகு³ளமுக்³க³ரா பத²வியா டா²னமுபக³ச்ச²ந்தி, அபி நு, மஹாராஜ, தே யேவ த³ண்ட³லெட்³டு³லகு³ளமுக்³க³ரா க³க³னே டா²னமுபக³ச்ச²ந்தீ’’தி? ‘‘ந ஹி ப⁴ந்தே’’தி. ‘‘கிங் பனெத்த², மஹாராஜ, காரணங், யேன காரணேன தே யேவ த³ண்ட³லெட்³டு³லகு³ளமுக்³க³ரா பத²வியா டா²னமுபக³ச்ச²ந்தி, கேன காரணேன க³க³னே ந திட்ட²ந்தீ’’தி? ‘‘நத்தி², ப⁴ந்தே, தேஸங் த³ண்ட³லெட்³டு³லகு³ளமுக்³க³ரானங் பதிட்டா²னாய ஆகாஸே ஹேது, அஹேதுனா ந திட்ட²ந்தீ’’தி . ‘‘ஏவமேவ கோ², மஹாராஜ, தஸ்ஸ தேன தோ³ஸேன அபி⁴ஸமயஹேது ஸமுச்சி²ன்னோ, ஹேதுஸமுக்³கா⁴தே அஹேதுனா அபி⁴ஸமயோ ந ஹோதீதி.
‘‘Yathā vā pana, mahārāja, daṇḍaleḍḍulaguḷamuggarā pathaviyā ṭhānamupagacchanti, api nu, mahārāja, te yeva daṇḍaleḍḍulaguḷamuggarā gagane ṭhānamupagacchantī’’ti? ‘‘Na hi bhante’’ti. ‘‘Kiṃ panettha, mahārāja, kāraṇaṃ, yena kāraṇena te yeva daṇḍaleḍḍulaguḷamuggarā pathaviyā ṭhānamupagacchanti, kena kāraṇena gagane na tiṭṭhantī’’ti? ‘‘Natthi, bhante, tesaṃ daṇḍaleḍḍulaguḷamuggarānaṃ patiṭṭhānāya ākāse hetu, ahetunā na tiṭṭhantī’’ti . ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā abhisamayo na hotīti.
‘‘யதா² வா பன, மஹாராஜ, த²லே அக்³கி³ ஜலதி, அபி நு கோ², மஹாராஜ, ஸோ யேவ அக்³கி³ உத³கே ஜலதீ’’தி? ‘‘ந ஹி, ப⁴ந்தே’’தி. ‘‘கிங் பனெத்த², மஹாராஜ, காரணங், யேன காரணேன ஸோ யேவ அக்³கி³ த²லே ஜலதி, கேன காரணேன உத³கே ந ஜலதீ’’தி? ‘‘நத்தி², ப⁴ந்தே, அக்³கி³ஸ்ஸ ஜலனாய உத³கே ஹேது, அஹேதுனா ந ஜலதீ’’தி. ‘‘ஏவமேவ கோ², மஹாராஜ, தஸ்ஸ தேன தோ³ஸேன அபி⁴ஸமயஹேது ஸமுச்சி²ன்னோ, ஹேதுஸமுக்³கா⁴தே அஹேதுனா த⁴ம்மாபி⁴ஸமயோ ந ஹோதீ’’தி.
‘‘Yathā vā pana, mahārāja, thale aggi jalati, api nu kho, mahārāja, so yeva aggi udake jalatī’’ti? ‘‘Na hi, bhante’’ti. ‘‘Kiṃ panettha, mahārāja, kāraṇaṃ, yena kāraṇena so yeva aggi thale jalati, kena kāraṇena udake na jalatī’’ti? ‘‘Natthi, bhante, aggissa jalanāya udake hetu, ahetunā na jalatī’’ti. ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā dhammābhisamayo na hotī’’ti.
‘‘ப⁴ந்தே நாக³ஸேன, புனபேதங் அத்த²ங் சிந்தேஹி, ந மே தத்த² சித்தஸஞ்ஞத்தி ப⁴வதி, அஜானந்தஸ்ஸ அஸதி குக்குச்சே ஆவரணங் ஹோதீதி, காரணேன மங் ஸஞ்ஞாபேஹீ’’தி. ‘‘அபி நு, மஹாராஜ, விஸங் ஹலாஹலங் அஜானந்தேன கா²யிதங் ஜீவிதங் ஹரதீ’’தி? ‘‘ஆம, ப⁴ந்தே’’தி. ‘‘ஏவமேவ கோ², மஹாராஜ, அஜானந்தேனபி கதங் பாபங் அபி⁴ஸமயந்தராயகரங் ஹோதி.
‘‘Bhante nāgasena, punapetaṃ atthaṃ cintehi, na me tattha cittasaññatti bhavati, ajānantassa asati kukkucce āvaraṇaṃ hotīti, kāraṇena maṃ saññāpehī’’ti. ‘‘Api nu, mahārāja, visaṃ halāhalaṃ ajānantena khāyitaṃ jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘அபி நு, மஹாராஜ, அக்³கி³ அஜானித்வா அக்கமந்தங் ட³ஹதீ’’தி? ‘‘ஆம, ப⁴ந்தே’’தி. ‘‘ஏவமேவ கோ², மஹாராஜ, அஜானந்தேனபி கதங் பாபங் அபி⁴ஸமயந்தராயகரங் ஹோதி.
‘‘Api nu, mahārāja, aggi ajānitvā akkamantaṃ ḍahatī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘அபி நு, மஹாராஜ, அஜானந்தங் ஆஸீவிஸோ ட³ங்ஸித்வா ஜீவிதங் ஹரதீ’’தி? ‘‘ஆம, ப⁴ந்தே’’தி. ‘‘ஏவமேவ கோ², மஹாராஜ, அஜானந்தேனபி கதங் பாபங் அபி⁴ஸமயந்தராயகரங் ஹோதி.
‘‘Api nu, mahārāja, ajānantaṃ āsīviso ḍaṃsitvā jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘நனு, மஹாராஜ, காலிங்க³ராஜா ஸமணகோலஞ்ஞோ ஸத்தரதனபரிகிண்ணோ ஹத்தி²ரதனமபி⁴ருய்ஹ குலத³ஸ்ஸனாய க³ச்ச²ந்தோ அஜானந்தோபி நாஸக்கி² போ³தி⁴மண்ட³ஸ்ஸ உபரிதோ க³ந்துங், இத³மெத்த², மஹாராஜ, காரணங், யேன காரணேன அஜானந்தேனபி கதங் பாபங் அபி⁴ஸமயந்தராயகரங் ஹோதீ’’தி? ‘‘ஜினபா⁴ஸிதங் , ப⁴ந்தே நாக³ஸேன, காரணங் ந ஸக்கா படிக்கோஸிதுங், ஏஸோவேதஸ்ஸ அத்தோ² ததா² ஸம்படிச்சா²மீ’’தி.
‘‘Nanu, mahārāja, kāliṅgarājā samaṇakolañño sattaratanaparikiṇṇo hatthiratanamabhiruyha kuladassanāya gacchanto ajānantopi nāsakkhi bodhimaṇḍassa uparito gantuṃ, idamettha, mahārāja, kāraṇaṃ, yena kāraṇena ajānantenapi kataṃ pāpaṃ abhisamayantarāyakaraṃ hotī’’ti? ‘‘Jinabhāsitaṃ , bhante nāgasena, kāraṇaṃ na sakkā paṭikkosituṃ, esovetassa attho tathā sampaṭicchāmī’’ti.
அபி⁴ஸமயந்தராயகரபஞ்ஹோ ஸத்தமோ.
Abhisamayantarāyakarapañho sattamo.
