| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. ཨབྷིསམཡནྟརཱཡཀརཔཉྷོ
7. Abhisamayantarāyakarapañho
༧. ‘‘བྷནྟེ ནཱགསེན, ཨིདྷ ཡོ ཀོཙི གིཧཱི པཱརཱཛིཀཾ ཨཛ྄ཛྷཱཔནྣོ བྷཝེཡྻ, སོ ཨཔརེན སམཡེན པབྦཱཛེཡྻ, ཨཏྟནཱཔི སོ ན ཛཱནེཡྻ ‘གིཧིཔཱརཱཛིཀཾ ཨཛ྄ཛྷཱཔནྣོསྨཱི’ཏི, ནཔི ཏསྶ ཨཉྙོ ཀོཙི ཨཱཙིཀྑེཡྻ ‘གིཧིཔཱརཱཛིཀཾ ཨཛ྄ཛྷཱཔནྣོསཱི’ཏི། སོ ཙ ཏཐཏྟཱཡ པཊིཔཛྫེཡྻ, ཨཔི ནུ ཏསྶ དྷམྨཱབྷིསམཡོ བྷཝེཡྻཱ’’ཏི? ‘‘ན ཧི, མཧཱརཱཛཱ’’ཏི། ‘‘ཀེན, བྷནྟེ, ཀཱརཎེནཱ’’ཏི? ‘‘ཡོ ཏསྶ ཧེཏུ དྷམྨཱབྷིསམཡཱཡ, སོ ཏསྶ སམུཙྪིནྣོ, ཏསྨཱ དྷམྨཱབྷིསམཡོ ན བྷཝཏཱི’’ཏི།
7. ‘‘Bhante nāgasena, idha yo koci gihī pārājikaṃ ajjhāpanno bhaveyya, so aparena samayena pabbājeyya, attanāpi so na jāneyya ‘gihipārājikaṃ ajjhāpannosmī’ti, napi tassa añño koci ācikkheyya ‘gihipārājikaṃ ajjhāpannosī’ti. So ca tathattāya paṭipajjeyya, api nu tassa dhammābhisamayo bhaveyyā’’ti? ‘‘Na hi, mahārājā’’ti. ‘‘Kena, bhante, kāraṇenā’’ti? ‘‘Yo tassa hetu dhammābhisamayāya, so tassa samucchinno, tasmā dhammābhisamayo na bhavatī’’ti.
‘‘བྷནྟེ ནཱགསེན, ཏུམྷེ བྷཎཐ ‘ཛཱནནྟསྶ ཀུཀྐུཙྩཾ ཧོཏི, ཀུཀྐུཙྩེ སཏི ཨཱཝརཎཾ ཧོཏི, ཨཱཝཊེ ཙིཏྟེ དྷམྨཱབྷིསམཡོ ན ཧོཏཱི’ཏི། ཨིམསྶ པན ཨཛཱནནྟསྶ ཨཀུཀྐུཙྩཛཱཏསྶ སནྟཙིཏྟསྶ ཝིཧརཏོ ཀེན ཀཱརཎེན དྷམྨཱབྷིསམཡོ ན ཧོཏི, ཝིསམེན ཝིསམེནེསོ པཉྷོ གཙྪཏི, ཙིནྟེཏྭཱ ཝིསཛྫེཐཱ’’ཏི།
‘‘Bhante nāgasena, tumhe bhaṇatha ‘jānantassa kukkuccaṃ hoti, kukkucce sati āvaraṇaṃ hoti, āvaṭe citte dhammābhisamayo na hotī’ti. Imassa pana ajānantassa akukkuccajātassa santacittassa viharato kena kāraṇena dhammābhisamayo na hoti, visamena visameneso pañho gacchati, cintetvā visajjethā’’ti.
‘‘རུཧཏི , མཧཱརཱཛ, སུཀཊྛེ སུཀལལེ མཎྜཁེཏྟེ སཱརདཾ སུཁསཡིཏཾ བཱིཛ’’ནྟི? ‘‘ཨཱམ, བྷནྟེ’’ཏི། ‘‘ཨཔི ནུ, མཧཱརཱཛ, ཏཉྙེཝ བཱིཛཾ གྷནསེལསིལཱཏལེ རུཧེཡྻཱ’’ཏི? ‘‘ན ཧི, བྷནྟེ’’ཏི། ‘‘ཀིསྶ པན, མཧཱརཱཛ, ཏཉྙེཝ བཱིཛཾ ཀལལེ རུཧཏི, ཀིསྶ གྷནསེལེ ན རུཧཏཱི’’ཏི? ‘‘ནཏྠི, བྷནྟེ, ཏསྶ བཱིཛསྶ རུཧནཱཡ གྷནསེལེ ཧེཏུ, ཨཧེཏུནཱ བཱིཛཾ ན རུཧཏཱི’’ཏི། ‘‘ཨེཝམེཝ ཁོ, མཧཱརཱཛ, ཡེན ཧེཏུནཱ ཏསྶ དྷམྨཱབྷིསམཡོ བྷཝེཡྻ, སོ ཏསྶ ཧེཏུ སམུཙྪིནྣོ, ཨཧེཏུནཱ དྷམྨཱབྷིསམཡོ ན ཧོཏི།
‘‘Ruhati , mahārāja, sukaṭṭhe sukalale maṇḍakhette sāradaṃ sukhasayitaṃ bīja’’nti? ‘‘Āma, bhante’’ti. ‘‘Api nu, mahārāja, taññeva bījaṃ ghanaselasilātale ruheyyā’’ti? ‘‘Na hi, bhante’’ti. ‘‘Kissa pana, mahārāja, taññeva bījaṃ kalale ruhati, kissa ghanasele na ruhatī’’ti? ‘‘Natthi, bhante, tassa bījassa ruhanāya ghanasele hetu, ahetunā bījaṃ na ruhatī’’ti. ‘‘Evameva kho, mahārāja, yena hetunā tassa dhammābhisamayo bhaveyya, so tassa hetu samucchinno, ahetunā dhammābhisamayo na hoti.
‘‘ཡཐཱ ཝཱ པན, མཧཱརཱཛ, དཎྜལེཌྜུལགུལ༹མུགྒརཱ པཐཝིཡཱ ཋཱནམུཔགཙྪནྟི, ཨཔི ནུ, མཧཱརཱཛ, ཏེ ཡེཝ དཎྜལེཌྜུལགུལ༹མུགྒརཱ གགནེ ཋཱནམུཔགཙྪནྟཱི’’ཏི? ‘‘ན ཧི བྷནྟེ’’ཏི། ‘‘ཀིཾ པནེཏྠ, མཧཱརཱཛ, ཀཱརཎཾ, ཡེན ཀཱརཎེན ཏེ ཡེཝ དཎྜལེཌྜུལགུལ༹མུགྒརཱ པཐཝིཡཱ ཋཱནམུཔགཙྪནྟི, ཀེན ཀཱརཎེན གགནེ ན ཏིཊྛནྟཱི’’ཏི? ‘‘ནཏྠི, བྷནྟེ, ཏེསཾ དཎྜལེཌྜུལགུལ༹མུགྒརཱནཾ པཏིཊྛཱནཱཡ ཨཱཀཱསེ ཧེཏུ, ཨཧེཏུནཱ ན ཏིཊྛནྟཱི’’ཏི ། ‘‘ཨེཝམེཝ ཁོ, མཧཱརཱཛ, ཏསྶ ཏེན དོསེན ཨབྷིསམཡཧེཏུ སམུཙྪིནྣོ, ཧེཏུསམུགྒྷཱཏེ ཨཧེཏུནཱ ཨབྷིསམཡོ ན ཧོཏཱིཏི།
‘‘Yathā vā pana, mahārāja, daṇḍaleḍḍulaguḷamuggarā pathaviyā ṭhānamupagacchanti, api nu, mahārāja, te yeva daṇḍaleḍḍulaguḷamuggarā gagane ṭhānamupagacchantī’’ti? ‘‘Na hi bhante’’ti. ‘‘Kiṃ panettha, mahārāja, kāraṇaṃ, yena kāraṇena te yeva daṇḍaleḍḍulaguḷamuggarā pathaviyā ṭhānamupagacchanti, kena kāraṇena gagane na tiṭṭhantī’’ti? ‘‘Natthi, bhante, tesaṃ daṇḍaleḍḍulaguḷamuggarānaṃ patiṭṭhānāya ākāse hetu, ahetunā na tiṭṭhantī’’ti . ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā abhisamayo na hotīti.
‘‘ཡཐཱ ཝཱ པན, མཧཱརཱཛ, ཐལེ ཨགྒི ཛལཏི, ཨཔི ནུ ཁོ, མཧཱརཱཛ, སོ ཡེཝ ཨགྒི ཨུདཀེ ཛལཏཱི’’ཏི? ‘‘ན ཧི, བྷནྟེ’’ཏི། ‘‘ཀིཾ པནེཏྠ, མཧཱརཱཛ, ཀཱརཎཾ, ཡེན ཀཱརཎེན སོ ཡེཝ ཨགྒི ཐལེ ཛལཏི, ཀེན ཀཱརཎེན ཨུདཀེ ན ཛལཏཱི’’ཏི? ‘‘ནཏྠི, བྷནྟེ, ཨགྒིསྶ ཛལནཱཡ ཨུདཀེ ཧེཏུ, ཨཧེཏུནཱ ན ཛལཏཱི’’ཏི། ‘‘ཨེཝམེཝ ཁོ, མཧཱརཱཛ, ཏསྶ ཏེན དོསེན ཨབྷིསམཡཧེཏུ སམུཙྪིནྣོ, ཧེཏུསམུགྒྷཱཏེ ཨཧེཏུནཱ དྷམྨཱབྷིསམཡོ ན ཧོཏཱི’’ཏི།
‘‘Yathā vā pana, mahārāja, thale aggi jalati, api nu kho, mahārāja, so yeva aggi udake jalatī’’ti? ‘‘Na hi, bhante’’ti. ‘‘Kiṃ panettha, mahārāja, kāraṇaṃ, yena kāraṇena so yeva aggi thale jalati, kena kāraṇena udake na jalatī’’ti? ‘‘Natthi, bhante, aggissa jalanāya udake hetu, ahetunā na jalatī’’ti. ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā dhammābhisamayo na hotī’’ti.
‘‘བྷནྟེ ནཱགསེན, པུནཔེཏཾ ཨཏྠཾ ཙིནྟེཧི, ན མེ ཏཏྠ ཙིཏྟསཉྙཏྟི བྷཝཏི, ཨཛཱནནྟསྶ ཨསཏི ཀུཀྐུཙྩེ ཨཱཝརཎཾ ཧོཏཱིཏི, ཀཱརཎེན མཾ སཉྙཱཔེཧཱི’’ཏི། ‘‘ཨཔི ནུ, མཧཱརཱཛ, ཝིསཾ ཧལཱཧལཾ ཨཛཱནནྟེན ཁཱཡིཏཾ ཛཱིཝིཏཾ ཧརཏཱི’’ཏི? ‘‘ཨཱམ, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨཛཱནནྟེནཔི ཀཏཾ པཱཔཾ ཨབྷིསམཡནྟརཱཡཀརཾ ཧོཏི།
‘‘Bhante nāgasena, punapetaṃ atthaṃ cintehi, na me tattha cittasaññatti bhavati, ajānantassa asati kukkucce āvaraṇaṃ hotīti, kāraṇena maṃ saññāpehī’’ti. ‘‘Api nu, mahārāja, visaṃ halāhalaṃ ajānantena khāyitaṃ jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘ཨཔི ནུ, མཧཱརཱཛ, ཨགྒི ཨཛཱནིཏྭཱ ཨཀྐམནྟཾ ཌཧཏཱི’’ཏི? ‘‘ཨཱམ, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨཛཱནནྟེནཔི ཀཏཾ པཱཔཾ ཨབྷིསམཡནྟརཱཡཀརཾ ཧོཏི།
‘‘Api nu, mahārāja, aggi ajānitvā akkamantaṃ ḍahatī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘ཨཔི ནུ, མཧཱརཱཛ, ཨཛཱནནྟཾ ཨཱསཱིཝིསོ ཌཾསིཏྭཱ ཛཱིཝིཏཾ ཧརཏཱི’’ཏི? ‘‘ཨཱམ, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨཛཱནནྟེནཔི ཀཏཾ པཱཔཾ ཨབྷིསམཡནྟརཱཡཀརཾ ཧོཏི།
‘‘Api nu, mahārāja, ajānantaṃ āsīviso ḍaṃsitvā jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘ནནུ, མཧཱརཱཛ, ཀཱལིངྒརཱཛཱ སམཎཀོལཉྙོ སཏྟརཏནཔརིཀིཎྞོ ཧཏྠིརཏནམབྷིརུཡ྄ཧ ཀུལདསྶནཱཡ གཙྪནྟོ ཨཛཱནནྟོཔི ནཱསཀྑི བོདྷིམཎྜསྶ ཨུཔརིཏོ གནྟུཾ, ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན ཨཛཱནནྟེནཔི ཀཏཾ པཱཔཾ ཨབྷིསམཡནྟརཱཡཀརཾ ཧོཏཱི’’ཏི? ‘‘ཛིནབྷཱསིཏཾ , བྷནྟེ ནཱགསེན, ཀཱརཎཾ ན སཀྐཱ པཊིཀྐོསིཏུཾ, ཨེསོཝེཏསྶ ཨཏྠོ ཏཐཱ སམྤཊིཙྪཱམཱི’’ཏི།
‘‘Nanu, mahārāja, kāliṅgarājā samaṇakolañño sattaratanaparikiṇṇo hatthiratanamabhiruyha kuladassanāya gacchanto ajānantopi nāsakkhi bodhimaṇḍassa uparito gantuṃ, idamettha, mahārāja, kāraṇaṃ, yena kāraṇena ajānantenapi kataṃ pāpaṃ abhisamayantarāyakaraṃ hotī’’ti? ‘‘Jinabhāsitaṃ , bhante nāgasena, kāraṇaṃ na sakkā paṭikkosituṃ, esovetassa attho tathā sampaṭicchāmī’’ti.
ཨབྷིསམཡནྟརཱཡཀརཔཉྷོ སཏྟམོ།
Abhisamayantarāyakarapañho sattamo.
