| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. ཨབྱཱཀརཎཱིཡཔཉྷོ
2. Abyākaraṇīyapañho
༢. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ནཏྠཱནནྡ ཏཐཱགཏསྶ དྷམྨེསུ ཨཱཙརིཡམུཊྛཱི’ཏི, པུན ཙ ཐེརེན མཱལུཀྱཔུཏྟེན 1 པཉྷཾ པུཊྛོ ན བྱཱཀཱསི། ཨེསོ ཁོ, བྷནྟེ ནཱགསེན, པཉྷོ དྭཡནྟོ 2 ཨེཀནྟནིསྶིཏོ བྷཝིསྶཏི ཨཛཱནནེན ཝཱ གུཡ྄ཧཀརཎེན ཝཱ། ཡདི, བྷནྟེ ནཱགསེན, བྷགཝཏཱ བྷཎིཏཾ ‘ནཏྠཱནནྡ ཏཐཱགཏསྶ དྷམྨེསུ ཨཱཙརིཡམུཊྛཱི’ཏི, ཏེན ཧི ཐེརསྶ མཱལུཀྱཔུཏྟསྶ ཨཛཱནནྟེན ན བྱཱཀཏཾ། ཡདི ཛཱནནྟེན ན བྱཱཀཏཾ, ཏེན ཧི ཨཏྠི ཏཐཱགཏསྶ དྷམྨེསུ ཨཱཙརིཡམུཊྛི། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
2. ‘‘Bhante nāgasena, bhāsitampetaṃ bhagavatā ‘natthānanda tathāgatassa dhammesu ācariyamuṭṭhī’ti, puna ca therena mālukyaputtena 3 pañhaṃ puṭṭho na byākāsi. Eso kho, bhante nāgasena, pañho dvayanto 4 ekantanissito bhavissati ajānanena vā guyhakaraṇena vā. Yadi, bhante nāgasena, bhagavatā bhaṇitaṃ ‘natthānanda tathāgatassa dhammesu ācariyamuṭṭhī’ti, tena hi therassa mālukyaputtassa ajānantena na byākataṃ. Yadi jānantena na byākataṃ, tena hi atthi tathāgatassa dhammesu ācariyamuṭṭhi. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ནཏྠཱནནྡ ཏཐཱགཏསྶ དྷམྨེསུ ཨཱཙརིཡམུཊྛཱི’ཏི, ཨབྱཱཀཏོ ཙ ཐེརེན མཱལུཀྱཔུཏྟེན པུཙྪིཏོ པཉྷོ, ཏཉྩ པན ན ཨཛཱནནྟེན ན གུཡ྄ཧཀརཎེན། ཙཏྟཱརིམཱནི, མཧཱརཱཛ, པཉྷབྱཱཀརཎཱནི། ཀཏམཱནི ཙཏྟཱརི? ཨེཀཾསབྱཱཀརཎཱིཡོ པཉྷོ ཝིབྷཛྫབྱཱཀརཎཱིཡོ པཉྷོ པཊིཔུཙྪཱབྱཱཀརཎཱིཡོ པཉྷོ ཋཔནཱིཡོ པཉྷོཏི།
‘‘Bhāsitampetaṃ, mahārāja, bhagavatā ‘natthānanda tathāgatassa dhammesu ācariyamuṭṭhī’ti, abyākato ca therena mālukyaputtena pucchito pañho, tañca pana na ajānantena na guyhakaraṇena. Cattārimāni, mahārāja, pañhabyākaraṇāni. Katamāni cattāri? Ekaṃsabyākaraṇīyo pañho vibhajjabyākaraṇīyo pañho paṭipucchābyākaraṇīyo pañho ṭhapanīyo pañhoti.
‘‘ཀཏམོ ཙ, མཧཱརཱཛ, ཨེཀཾསབྱཱཀརཎཱིཡོ པཉྷོ? ‘རཱུཔཾ ཨནིཙྩ’ནྟི ཨེཀཾསབྱཱཀརཎཱིཡོ པཉྷོ, ‘ཝེདནཱ ཨནིཙྩཱ’ཏི…པེ॰… ‘སཉྙཱ ཨནིཙྩཱ’ཏི…པེ॰… ‘སངྑཱརཱ ཨནིཙྩཱ’ཏི…པེ॰… ‘ཝིཉྙཱཎཾ ཨནིཙྩ’’ནྟི ཨེཀཾསབྱཱཀརཎཱིཡོ པཉྷོ, ཨཡཾ ཨེཀཾསབྱཱཀརཎཱིཡོ པཉྷོ།
‘‘Katamo ca, mahārāja, ekaṃsabyākaraṇīyo pañho? ‘Rūpaṃ anicca’nti ekaṃsabyākaraṇīyo pañho, ‘vedanā aniccā’ti…pe… ‘saññā aniccā’ti…pe… ‘saṅkhārā aniccā’ti…pe… ‘viññāṇaṃ anicca’’nti ekaṃsabyākaraṇīyo pañho, ayaṃ ekaṃsabyākaraṇīyo pañho.
‘‘ཀཏམོ ཝིབྷཛྫབྱཱཀརཎཱིཡོ པཉྷོ? ‘ཨནིཙྩཾ པན རཱུཔ’ནྟི ཝིབྷཛྫབྱཱཀརཎཱིཡོ པཉྷོ, ‘ཨནིཙྩཱ པན ཝེདནཱ’ཏི…པེ॰… ‘ཨནིཙྩཱ པན སཉྙཱ’ཏི…པེ॰… ‘ཨནིཙྩཱ པན སངྑཱརཱ’ཏི…པེ॰… ‘ཨནིཙྩཾ པན ཝིཉྙཱཎ’ནྟི ཝིབྷཛྫབྱཱཀརཎཱིཡོ པཉྷོ, ཨཡཾ ཝིབྷཛྫབྱཱཀརཎཱིཡོ པཉྷོ།
‘‘Katamo vibhajjabyākaraṇīyo pañho? ‘Aniccaṃ pana rūpa’nti vibhajjabyākaraṇīyo pañho, ‘aniccā pana vedanā’ti…pe… ‘aniccā pana saññā’ti…pe… ‘aniccā pana saṅkhārā’ti…pe… ‘aniccaṃ pana viññāṇa’nti vibhajjabyākaraṇīyo pañho, ayaṃ vibhajjabyākaraṇīyo pañho.
‘‘ཀཏམོ པཊིཔུཙྪཱབྱཱཀརཎཱིཡོ པཉྷོ? ‘ཀིཾ ནུ ཁོ ཙཀྑུནཱ སབྦཾ ཝིཛཱནཱཏཱི’ཏི ཨཡཾ པཊིཔུཙྪཱབྱཱཀརཎཱིཡོ པཉྷོ།
‘‘Katamo paṭipucchābyākaraṇīyo pañho? ‘Kiṃ nu kho cakkhunā sabbaṃ vijānātī’ti ayaṃ paṭipucchābyākaraṇīyo pañho.
‘‘ཀཏམོ ཋཔནཱིཡོ པཉྷོ? ‘སསྶཏོ ལོཀོ’ཏི ཋཔནཱིཡོ པཉྷོ, ‘ཨསསྶཏོ ལོཀོ’ཏི། ‘ཨནྟཝཱ ལོཀོ’ཏི། ‘ཨནནྟཝཱ ལོཀོ’ཏི། ‘ཨནྟཝཱ ཙ ཨནནྟཝཱ ཙ ལོཀོ’ཏི། ‘ནེཝནྟཝཱ ནཱནནྟཝཱ ལོཀོ’ཏི། ‘ཏཾ ཛཱིཝཾ ཏཾ སརཱིར’ནྟི། ‘ཨཉྙཾ ཛཱིཝཾ ཨཉྙཾ སརཱིར’ནྟི། ‘ཧོཏི ཏཐཱགཏོ པརཾ མརཎཱ’ཏི། ‘ན ཧོཏི ཏཐཱགཏོ པརཾ མརཎཱ’ཏི། ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏི། ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཋཔནཱིཡོ པཉྷོ, ཨཡཾ ཋཔནཱིཡོ པཉྷོ།
‘‘Katamo ṭhapanīyo pañho? ‘Sassato loko’ti ṭhapanīyo pañho, ‘asassato loko’ti. ‘Antavā loko’ti. ‘Anantavā loko’ti. ‘Antavā ca anantavā ca loko’ti. ‘Nevantavā nānantavā loko’ti. ‘Taṃ jīvaṃ taṃ sarīra’nti. ‘Aññaṃ jīvaṃ aññaṃ sarīra’nti. ‘Hoti tathāgato paraṃ maraṇā’ti. ‘Na hoti tathāgato paraṃ maraṇā’ti. ‘Hoti ca na ca hoti tathāgato paraṃ maraṇā’ti. ‘Neva hoti na na hoti tathāgato paraṃ maraṇā’ti ṭhapanīyo pañho, ayaṃ ṭhapanīyo pañho.
‘‘བྷགཝཱ, མཧཱརཱཛ, ཐེརསྶ མཱལུཀྱཔུཏྟསྶ ཏཾ ཋཔནཱིཡཾ པཉྷཾ ན བྱཱཀཱསི། སོ པན པཉྷོ ཀིཾ ཀཱརཎཱ ཋཔནཱིཡོ? ན ཏསྶ དཱིཔནཱཡ ཧེཏུ ཝཱ ཀཱརཎཾ ཝཱ ཨཏྠི, ཏསྨཱ སོ པཉྷོ ཋཔནཱིཡོ། ནཏྠི བུདྡྷཱནཾ བྷགཝནྟཱནཾ ཨཀཱརཎམཧེཏུཀཾ གིརམུདཱིརཎ’’ནྟི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Bhagavā, mahārāja, therassa mālukyaputtassa taṃ ṭhapanīyaṃ pañhaṃ na byākāsi. So pana pañho kiṃ kāraṇā ṭhapanīyo? Na tassa dīpanāya hetu vā kāraṇaṃ vā atthi, tasmā so pañho ṭhapanīyo. Natthi buddhānaṃ bhagavantānaṃ akāraṇamahetukaṃ giramudīraṇa’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
ཨབྱཱཀརཎཱིཡཔཉྷོ དུཏིཡོ།
Abyākaraṇīyapañho dutiyo.
Footnotes:
