| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
22. பா³வீஸதிமவக்³கோ³
22. Bāvīsatimavaggo
(215) 8. அப்³யாகதகதா²
(215) 8. Abyākatakathā
901. ஸப்³ப³ங் ஸுபினக³தஸ்ஸ சித்தங் அப்³யாகதந்தி? ஆமந்தா. ஸுபினந்தேன பாணங் ஹனெய்யாதி? ஆமந்தா. ஹஞ்சி ஸுபினந்தேன பாணங் ஹனெய்ய, நோ ச வத ரே வத்தப்³பே³ – ‘‘ஸப்³ப³ங் ஸுபினக³தஸ்ஸ சித்தங் அப்³யாகத’’ந்தி.
901. Sabbaṃ supinagatassa cittaṃ abyākatanti? Āmantā. Supinantena pāṇaṃ haneyyāti? Āmantā. Hañci supinantena pāṇaṃ haneyya, no ca vata re vattabbe – ‘‘sabbaṃ supinagatassa cittaṃ abyākata’’nti.
ஸுபினந்தேன அதி³ன்னங் ஆதி³யெய்ய…பே॰… முஸா ப⁴ணெய்ய, பிஸுணங் ப⁴ணெய்ய, ப²ருஸங் ப⁴ணெய்ய, ஸம்ப²ங் பலபெய்ய, ஸந்தி⁴ங் சி²ந்தெ³ய்ய, நில்லோபங் ஹரெய்ய, ஏகாகா³ரிகங் கரெய்ய, பரிபந்தே² திட்டெ²ய்ய, பரதா³ரங் க³ச்செ²ய்ய, கா³மகா⁴தகங் கரெய்ய, நிக³மகா⁴தகங் கரெய்ய, ஸுபினந்தேன மேது²னங் த⁴ம்மங் படிஸேவெய்ய , ஸுபினக³தஸ்ஸ அஸுசி முச்செய்ய, ஸுபினந்தேன தா³னங் த³தெ³ய்ய, சீவரங் த³தெ³ய்ய, பிண்ட³பாதங் த³தெ³ய்ய, ஸேனாஸனங் த³தெ³ய்ய, கி³லானபச்சயபே⁴ஸஜ்ஜபரிக்கா²ரங் த³தெ³ய்ய, கா²த³னீயங் த³தெ³ய்ய, போ⁴ஜனீயங் த³தெ³ய்ய, பானீயங் த³தெ³ய்ய, சேதியங் வந்தெ³ய்ய, சேதியே மாலங் ஆரோபெய்ய, க³ந்த⁴ங் ஆரோபெய்ய , விலேபனங் ஆரோபெய்ய…பே॰… சேதியங் அபி⁴த³க்கி²ணங் கரெய்யாதி? ஆமந்தா . ஹஞ்சி ஸுபினந்தேன சேதியங் அபி⁴த³க்கி²ணங் கரெய்ய, நோ ச வத ரே வத்தப்³பே³ – ‘‘ஸப்³ப³ங் ஸுபினக³தஸ்ஸ சித்தங் அப்³யாகத’’ந்தி.
Supinantena adinnaṃ ādiyeyya…pe… musā bhaṇeyya, pisuṇaṃ bhaṇeyya, pharusaṃ bhaṇeyya, samphaṃ palapeyya, sandhiṃ chindeyya, nillopaṃ hareyya, ekāgārikaṃ kareyya, paripanthe tiṭṭheyya, paradāraṃ gaccheyya, gāmaghātakaṃ kareyya, nigamaghātakaṃ kareyya, supinantena methunaṃ dhammaṃ paṭiseveyya , supinagatassa asuci mucceyya, supinantena dānaṃ dadeyya, cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyya, khādanīyaṃ dadeyya, bhojanīyaṃ dadeyya, pānīyaṃ dadeyya, cetiyaṃ vandeyya, cetiye mālaṃ āropeyya, gandhaṃ āropeyya , vilepanaṃ āropeyya…pe… cetiyaṃ abhidakkhiṇaṃ kareyyāti? Āmantā . Hañci supinantena cetiyaṃ abhidakkhiṇaṃ kareyya, no ca vata re vattabbe – ‘‘sabbaṃ supinagatassa cittaṃ abyākata’’nti.
902. ந வத்தப்³ப³ங் – ‘‘ஸப்³ப³ங் ஸுபினக³தஸ்ஸ சித்தங் அப்³யாகத’’ந்தி? ஆமந்தா. நனு ஸுபினக³தஸ்ஸ சித்தங் அப்³போ³ஹாரியங் வுத்தங் ப⁴க³வதாதி? ஆமந்தா. ஹஞ்சி ஸுபினக³தஸ்ஸ சித்தங் அப்³போ³ஹாரியங் வுத்தங் ப⁴க³வதா, தேன வத ரே வத்தப்³பே³ – ‘‘ஸப்³ப³ங் ஸுபினக³தஸ்ஸ சித்தங் அப்³யாகத’’ந்தி.
902. Na vattabbaṃ – ‘‘sabbaṃ supinagatassa cittaṃ abyākata’’nti? Āmantā. Nanu supinagatassa cittaṃ abbohāriyaṃ vuttaṃ bhagavatāti? Āmantā. Hañci supinagatassa cittaṃ abbohāriyaṃ vuttaṃ bhagavatā, tena vata re vattabbe – ‘‘sabbaṃ supinagatassa cittaṃ abyākata’’nti.
அப்³யாகதகதா² நிட்டி²தா.
Abyākatakathā niṭṭhitā.
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 8. அப்³யாகதகதா²வண்ணனா • 8. Abyākatakathāvaṇṇanā
