| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৪. চুদ্দসমৰগ্গো
14. Cuddasamavaggo
(১৪৩) ৮. অব্যাকতকথা
(143) 8. Abyākatakathā
৭০৬. দিট্ঠিগতং অব্যাকতন্তি? আমন্তা। ৰিপাকাব্যাকতং কিরিযাব্যাকতং রূপং নিব্বানং চক্খাযতনং…পে॰… ফোট্ঠব্বাযতনন্তি? ন হেৰং ৰত্তব্বে…পে॰… দিট্ঠিগতং অব্যাকতন্তি? আমন্তা। দিট্ঠিগতসম্পযুত্তো ফস্সো অব্যাকতোতি? ন হেৰং ৰত্তব্বে…পে॰… দিট্ঠিগতং অব্যাকতন্তি? আমন্তা। দিট্ঠিগতসম্পযুত্তা ৰেদনা…পে॰… সঞ্ঞা…পে॰… চেতনা…পে॰… চিত্তং অব্যাকতন্তি? ন হেৰং ৰত্তব্বে…পে॰…।
706. Diṭṭhigataṃ abyākatanti? Āmantā. Vipākābyākataṃ kiriyābyākataṃ rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayutto phasso abyākatoti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayuttā vedanā…pe… saññā…pe… cetanā…pe… cittaṃ abyākatanti? Na hevaṃ vattabbe…pe….
দিট্ঠিগতসম্পযুত্তো ফস্সো অকুসলোতি? আমন্তা। দিট্ঠিগতং অকুসলন্তি? ন হেৰং ৰত্তব্বে…পে॰… দিট্ঠিগতসম্পযুত্তা ৰেদনা সঞ্ঞা চেতনা চিত্তং অকুসলন্তি? আমন্তা। দিট্ঠিগতং অকুসলন্তি? ন হেৰং ৰত্তব্বে…পে॰…।
Diṭṭhigatasampayutto phasso akusaloti? Āmantā. Diṭṭhigataṃ akusalanti? Na hevaṃ vattabbe…pe… diṭṭhigatasampayuttā vedanā saññā cetanā cittaṃ akusalanti? Āmantā. Diṭṭhigataṃ akusalanti? Na hevaṃ vattabbe…pe….
৭০৭. দিট্ঠিগতং অব্যাকতন্তি? আমন্তা। অফলং অৰিপাকন্তি? ন হেৰং ৰত্তব্বে…পে॰… ননু সফলং সৰিপাকন্তি? আমন্তা। হঞ্চি সফলং সৰিপাকং, নো চ ৰত রে ৰত্তব্বে – ‘‘দিট্ঠিগতং অব্যাকত’’ন্তি।
707. Diṭṭhigataṃ abyākatanti? Āmantā. Aphalaṃ avipākanti? Na hevaṃ vattabbe…pe… nanu saphalaṃ savipākanti? Āmantā. Hañci saphalaṃ savipākaṃ, no ca vata re vattabbe – ‘‘diṭṭhigataṃ abyākata’’nti.
দিট্ঠিগতং অব্যাকতন্তি? আমন্তা। ননু মিচ্ছাদিট্ঠিপরমানি ৰজ্জানি 1 ৰুত্তানি ভগৰতাতি? আমন্তা। হঞ্চি মিচ্ছাদিট্ঠিপরমানি ৰজ্জানি ৰুত্তানি ভগৰতা, নো চ ৰত রে ৰত্তব্বে – ‘‘দিট্ঠিগতং অব্যাকত’’ন্তি।
Diṭṭhigataṃ abyākatanti? Āmantā. Nanu micchādiṭṭhiparamāni vajjāni 2 vuttāni bhagavatāti? Āmantā. Hañci micchādiṭṭhiparamāni vajjāni vuttāni bhagavatā, no ca vata re vattabbe – ‘‘diṭṭhigataṃ abyākata’’nti.
দিট্ঠিগতং অব্যাকতন্তি? আমন্তা। ননু ৰুত্তং ভগৰতা – ‘‘মিচ্ছাদিট্ঠিস্স খো অহং, পুণ্ণ, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’তি 9! অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘দিট্ঠিগতং অব্যাকত’’ন্তি।
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhissa kho ahaṃ, puṇṇa, dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti 10! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
৭০৮. ন ৰত্তব্বং – ‘‘দিট্ঠিগতং অব্যাকত’’ন্তি? আমন্তা। ননু ৰুত্তং ভগৰতা – ‘‘‘সস্সতো লোকো’তি খো, ৰচ্ছ, অব্যাকতমেতং, ‘অসস্সতো লোকো’তি খো, ৰচ্ছ, অব্যাকতমেতং, ‘অন্তৰা লোকো’তি খো, ৰচ্ছ, অব্যাকতমেতং, ‘অনন্তৰা লোকো’তি খো, ৰচ্ছ…পে॰… ‘তং জীৰং তং সরীর’ন্তি খো, ৰচ্ছ…পে॰… ‘অঞ্ঞং জীৰং অঞ্ঞং সরীর’ন্তি খো , ৰচ্ছ…পে॰… ‘হোতি তথাগতো পরং মরণা’তি খো, ৰচ্ছ…পে॰… ‘ন হোতি তথাগতো পরং মরণা’তি খো, ৰচ্ছ…পে॰… ‘হোতি চ ন চ হোতি তথাগতো পরং মরণা’তি খো, ৰচ্ছ…পে॰… ‘নেৰ হোতি ন ন হোতি তথাগতো পরং মরণা’তি খো, ৰচ্ছ, অব্যাকতমেত’’ন্তি 11! অত্থেৰ সুত্তন্তোতি? আমন্তা। তেন হি দিট্ঠিগতং অব্যাকতন্তি।
708. Na vattabbaṃ – ‘‘diṭṭhigataṃ abyākata’’nti? Āmantā. Nanu vuttaṃ bhagavatā – ‘‘‘sassato loko’ti kho, vaccha, abyākatametaṃ, ‘asassato loko’ti kho, vaccha, abyākatametaṃ, ‘antavā loko’ti kho, vaccha, abyākatametaṃ, ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho , vaccha…pe… ‘hoti tathāgato paraṃ maraṇā’ti kho, vaccha…pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, abyākatameta’’nti 12! Attheva suttantoti? Āmantā. Tena hi diṭṭhigataṃ abyākatanti.
দিট্ঠিগতং অব্যাকতন্তি? আমন্তা। ননু ৰুত্তং ভগৰতা – ‘‘মিচ্ছাদিট্ঠিকস্স, ভিক্খৰে, পুরিসপুগ্গলস্স যঞ্চেৰ কাযকম্মং যথাদিট্ঠিসমত্তং সমাদিন্নং, যঞ্চ ৰচীকম্মং…পে॰… যঞ্চ মনোকম্মং, যা চ চেতনা, যা চ পত্থনা, যো চ পণিধি, যে চ সঙ্খারা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তী’’তি 13! অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘দিট্ঠিগতং অব্যাকত’’ন্তি।
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhisamattaṃ samādinnaṃ, yañca vacīkammaṃ…pe… yañca manokammaṃ, yā ca cetanā, yā ca patthanā, yo ca paṇidhi, ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattantī’’ti 14! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
অব্যাকতকথা নিট্ঠিতা।
Abyākatakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. অব্যাকতকথাৰণ্ণনা • 8. Abyākatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৮. অব্যাকতকথাৰণ্ণনা • 8. Abyākatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৮. অব্যাকতকথাৰণ্ণনা • 8. Abyākatakathāvaṇṇanā
