| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২২. বাৰীসতিমৰগ্গো
22. Bāvīsatimavaggo
(২১৫) ৮. অব্যাকতকথা
(215) 8. Abyākatakathā
৯০১. সব্বং সুপিনগতস্স চিত্তং অব্যাকতন্তি? আমন্তা। সুপিনন্তেন পাণং হনেয্যাতি? আমন্তা। হঞ্চি সুপিনন্তেন পাণং হনেয্য, নো চ ৰত রে ৰত্তব্বে – ‘‘সব্বং সুপিনগতস্স চিত্তং অব্যাকত’’ন্তি।
901. Sabbaṃ supinagatassa cittaṃ abyākatanti? Āmantā. Supinantena pāṇaṃ haneyyāti? Āmantā. Hañci supinantena pāṇaṃ haneyya, no ca vata re vattabbe – ‘‘sabbaṃ supinagatassa cittaṃ abyākata’’nti.
সুপিনন্তেন অদিন্নং আদিযেয্য…পে॰… মুসা ভণেয্য, পিসুণং ভণেয্য, ফরুসং ভণেয্য, সম্ফং পলপেয্য, সন্ধিং ছিন্দেয্য, নিল্লোপং হরেয্য, একাগারিকং করেয্য, পরিপন্থে তিট্ঠেয্য, পরদারং গচ্ছেয্য, গামঘাতকং করেয্য, নিগমঘাতকং করেয্য, সুপিনন্তেন মেথুনং ধম্মং পটিসেৰেয্য , সুপিনগতস্স অসুচি মুচ্চেয্য, সুপিনন্তেন দানং দদেয্য, চীৰরং দদেয্য, পিণ্ডপাতং দদেয্য, সেনাসনং দদেয্য, গিলানপচ্চযভেসজ্জপরিক্খারং দদেয্য, খাদনীযং দদেয্য, ভোজনীযং দদেয্য, পানীযং দদেয্য, চেতিযং ৰন্দেয্য, চেতিযে মালং আরোপেয্য, গন্ধং আরোপেয্য , ৰিলেপনং আরোপেয্য…পে॰… চেতিযং অভিদক্খিণং করেয্যাতি? আমন্তা । হঞ্চি সুপিনন্তেন চেতিযং অভিদক্খিণং করেয্য, নো চ ৰত রে ৰত্তব্বে – ‘‘সব্বং সুপিনগতস্স চিত্তং অব্যাকত’’ন্তি।
Supinantena adinnaṃ ādiyeyya…pe… musā bhaṇeyya, pisuṇaṃ bhaṇeyya, pharusaṃ bhaṇeyya, samphaṃ palapeyya, sandhiṃ chindeyya, nillopaṃ hareyya, ekāgārikaṃ kareyya, paripanthe tiṭṭheyya, paradāraṃ gaccheyya, gāmaghātakaṃ kareyya, nigamaghātakaṃ kareyya, supinantena methunaṃ dhammaṃ paṭiseveyya , supinagatassa asuci mucceyya, supinantena dānaṃ dadeyya, cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyya, khādanīyaṃ dadeyya, bhojanīyaṃ dadeyya, pānīyaṃ dadeyya, cetiyaṃ vandeyya, cetiye mālaṃ āropeyya, gandhaṃ āropeyya , vilepanaṃ āropeyya…pe… cetiyaṃ abhidakkhiṇaṃ kareyyāti? Āmantā . Hañci supinantena cetiyaṃ abhidakkhiṇaṃ kareyya, no ca vata re vattabbe – ‘‘sabbaṃ supinagatassa cittaṃ abyākata’’nti.
৯০২. ন ৰত্তব্বং – ‘‘সব্বং সুপিনগতস্স চিত্তং অব্যাকত’’ন্তি? আমন্তা। ননু সুপিনগতস্স চিত্তং অব্বোহারিযং ৰুত্তং ভগৰতাতি? আমন্তা। হঞ্চি সুপিনগতস্স চিত্তং অব্বোহারিযং ৰুত্তং ভগৰতা, তেন ৰত রে ৰত্তব্বে – ‘‘সব্বং সুপিনগতস্স চিত্তং অব্যাকত’’ন্তি।
902. Na vattabbaṃ – ‘‘sabbaṃ supinagatassa cittaṃ abyākata’’nti? Āmantā. Nanu supinagatassa cittaṃ abbohāriyaṃ vuttaṃ bhagavatāti? Āmantā. Hañci supinagatassa cittaṃ abbohāriyaṃ vuttaṃ bhagavatā, tena vata re vattabbe – ‘‘sabbaṃ supinagatassa cittaṃ abyākata’’nti.
অব্যাকতকথা নিট্ঠিতা।
Abyākatakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. অব্যাকতকথাৰণ্ণনা • 8. Abyākatakathāvaṇṇanā
