| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၄. စုဒ္ဒသမဝဂ္ဂော
14. Cuddasamavaggo
(၁၄၃) ၈. အဗ္ယာကတကထာ
(143) 8. Abyākatakathā
၇၀၆. ဒိဋ္ဌိဂတံ အဗ္ယာကတန္တိ? အာမန္တာ။ ဝိပာကာဗ္ယာကတံ ကိရိယာဗ္ယာကတံ ရူပံ နိဗ္ဗာနံ စက္ခာယတနံ။ပေ.။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။ ဒိဋ္ဌိဂတံ အဗ္ယာကတန္တိ? အာမန္တာ။ ဒိဋ္ဌိဂတသမ္ပယုတ္တော ဖသ္သော အဗ္ယာကတောတိ? န ဟေဝံ ဝတ္တဗ္ဗေ။ပေ.။ ဒိဋ္ဌိဂတံ အဗ္ယာကတန္တိ? အာမန္တာ။ ဒိဋ္ဌိဂတသမ္ပယုတ္တာ ဝေဒနာ။ပေ.။ သညာ။ပေ.။ စေတနာ။ပေ.။ စိတ္တံ အဗ္ယာကတန္တိ? န ဟေဝံ ဝတ္တဗ္ဗေ။ပေ.။။
706. Diṭṭhigataṃ abyākatanti? Āmantā. Vipākābyākataṃ kiriyābyākataṃ rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayutto phasso abyākatoti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayuttā vedanā…pe… saññā…pe… cetanā…pe… cittaṃ abyākatanti? Na hevaṃ vattabbe…pe….
ဒိဋ္ဌိဂတသမ္ပယုတ္တော ဖသ္သော အကုသလောတိ? အာမန္တာ။ ဒိဋ္ဌိဂတံ အကုသလန္တိ? န ဟေဝံ ဝတ္တဗ္ဗေ။ပေ.။ ဒိဋ္ဌိဂတသမ္ပယုတ္တာ ဝေဒနာ သညာ စေတနာ စိတ္တံ အကုသလန္တိ? အာမန္တာ။ ဒိဋ္ဌိဂတံ အကုသလန္တိ? န ဟေဝံ ဝတ္တဗ္ဗေ။ပေ.။။
Diṭṭhigatasampayutto phasso akusaloti? Āmantā. Diṭṭhigataṃ akusalanti? Na hevaṃ vattabbe…pe… diṭṭhigatasampayuttā vedanā saññā cetanā cittaṃ akusalanti? Āmantā. Diṭṭhigataṃ akusalanti? Na hevaṃ vattabbe…pe….
၇၀၇. ဒိဋ္ဌိဂတံ အဗ္ယာကတန္တိ? အာမန္တာ။ အဖလံ အဝိပာကန္တိ? န ဟေဝံ ဝတ္တဗ္ဗေ။ပေ.။ နနု သဖလံ သဝိပာကန္တိ? အာမန္တာ။ ဟဉ္စိ သဖလံ သဝိပာကံ, နော စ ဝတ ရေ ဝတ္တဗ္ဗေ – ‘‘ဒိဋ္ဌိဂတံ အဗ္ယာကတ’’န္တိ။
707. Diṭṭhigataṃ abyākatanti? Āmantā. Aphalaṃ avipākanti? Na hevaṃ vattabbe…pe… nanu saphalaṃ savipākanti? Āmantā. Hañci saphalaṃ savipākaṃ, no ca vata re vattabbe – ‘‘diṭṭhigataṃ abyākata’’nti.
ဒိဋ္ဌိဂတံ အဗ္ယာကတန္တိ? အာမန္တာ။ နနု မိစ္ဆာဒိဋ္ဌိပရမာနိ ဝဇ္ဇာနိ 1 ဝုတ္တာနိ ဘဂဝတာတိ? အာမန္တာ။ ဟဉ္စိ မိစ္ဆာဒိဋ္ဌိပရမာနိ ဝဇ္ဇာနိ ဝုတ္တာနိ ဘဂဝတာ, နော စ ဝတ ရေ ဝတ္တဗ္ဗေ – ‘‘ဒိဋ္ဌိဂတံ အဗ္ယာကတ’’န္တိ။
Diṭṭhigataṃ abyākatanti? Āmantā. Nanu micchādiṭṭhiparamāni vajjāni 2 vuttāni bhagavatāti? Āmantā. Hañci micchādiṭṭhiparamāni vajjāni vuttāni bhagavatā, no ca vata re vattabbe – ‘‘diṭṭhigataṃ abyākata’’nti.
ဒိဋ္ဌိဂတံ အဗ္ယာကတန္တိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာဒိဋ္ဌိသ္သ ခော အဟံ, ပုဏ္ဏ, ဒ္ဝိန္နံ ဂတီနံ အညတရံ ဂတိံ ဝဒာမိ – နိရယံ ဝာ တိရစ္ဆာနယောနိံ ဝာ’’တိ 9! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဒိဋ္ဌိဂတံ အဗ္ယာကတ’’န္တိ။
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhissa kho ahaṃ, puṇṇa, dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti 10! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
၇၀၈. န ဝတ္တဗ္ဗံ – ‘‘ဒိဋ္ဌိဂတံ အဗ္ယာကတ’’န္တိ? အာမန္တာ။ နနု ဝုတ္တံ ဘဂဝတာ – ‘‘‘သသ္သတော လောကော’တိ ခော, ဝစ္ဆ, အဗ္ယာကတမေတံ, ‘အသသ္သတော လောကော’တိ ခော, ဝစ္ဆ, အဗ္ယာကတမေတံ, ‘အန္တဝာ လောကော’တိ ခော, ဝစ္ဆ, အဗ္ယာကတမေတံ, ‘အနန္တဝာ လောကော’တိ ခော, ဝစ္ဆ။ပေ.။ ‘တံ ဇီဝံ တံ သရီရ’န္တိ ခော, ဝစ္ဆ။ပေ.။ ‘အညံ ဇီဝံ အညံ သရီရ’န္တိ ခော , ဝစ္ဆ။ပေ.။ ‘ဟောတိ တထာဂတော ပရံ မရဏာ’တိ ခော, ဝစ္ဆ။ပေ.။ ‘န ဟောတိ တထာဂတော ပရံ မရဏာ’တိ ခော, ဝစ္ဆ။ပေ.။ ‘ဟောတိ စ န စ ဟောတိ တထာဂတော ပရံ မရဏာ’တိ ခော, ဝစ္ဆ။ပေ.။ ‘နေဝ ဟောတိ န န ဟောတိ တထာဂတော ပရံ မရဏာ’တိ ခော, ဝစ္ဆ, အဗ္ယာကတမေတ’’န္တိ 11! အတ္ထေဝ သုတ္တန္တောတိ? အာမန္တာ။ တေန ဟိ ဒိဋ္ဌိဂတံ အဗ္ယာကတန္တိ။
708. Na vattabbaṃ – ‘‘diṭṭhigataṃ abyākata’’nti? Āmantā. Nanu vuttaṃ bhagavatā – ‘‘‘sassato loko’ti kho, vaccha, abyākatametaṃ, ‘asassato loko’ti kho, vaccha, abyākatametaṃ, ‘antavā loko’ti kho, vaccha, abyākatametaṃ, ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho , vaccha…pe… ‘hoti tathāgato paraṃ maraṇā’ti kho, vaccha…pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, abyākatameta’’nti 12! Attheva suttantoti? Āmantā. Tena hi diṭṭhigataṃ abyākatanti.
ဒိဋ္ဌိဂတံ အဗ္ယာကတန္တိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာဒိဋ္ဌိကသ္သ, ဘိက္ခဝေ, ပုရိသပုဂ္ဂလသ္သ ယဉ္စေဝ ကာယကမ္မံ ယထာဒိဋ္ဌိသမတ္တံ သမာဒိန္နံ, ယဉ္စ ဝစီကမ္မံ။ပေ.။ ယဉ္စ မနောကမ္မံ, ယာ စ စေတနာ, ယာ စ ပတ္ထနာ, ယော စ ပဏိဓိ, ယေ စ သင္ခာရာ, သဗ္ဗေ တေ ဓမ္မာ အနိဋ္ဌာယ အကန္တာယ အမနာပာယ အဟိတာယ ဒုက္ခာယ သံဝတ္တန္တီ’’တိ 13! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဒိဋ္ဌိဂတံ အဗ္ယာကတ’’န္တိ။
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhisamattaṃ samādinnaṃ, yañca vacīkammaṃ…pe… yañca manokammaṃ, yā ca cetanā, yā ca patthanā, yo ca paṇidhi, ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattantī’’ti 14! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
အဗ္ယာကတကထာ နိဋ္ဌိတာ။
Abyākatakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. အဗ္ယာကတကထာဝဏ္ဏနာ • 8. Abyākatakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. အဗ္ယာကတကထာဝဏ္ဏနာ • 8. Abyākatakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. အဗ္ယာကတကထာဝဏ္ဏနာ • 8. Abyākatakathāvaṇṇanā
