| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೨೨. ಬಾವೀಸತಿಮವಗ್ಗೋ
22. Bāvīsatimavaggo
(೨೧೫) ೮. ಅಬ್ಯಾಕತಕಥಾ
(215) 8. Abyākatakathā
೯೦೧. ಸಬ್ಬಂ ಸುಪಿನಗತಸ್ಸ ಚಿತ್ತಂ ಅಬ್ಯಾಕತನ್ತಿ? ಆಮನ್ತಾ। ಸುಪಿನನ್ತೇನ ಪಾಣಂ ಹನೇಯ್ಯಾತಿ? ಆಮನ್ತಾ। ಹಞ್ಚಿ ಸುಪಿನನ್ತೇನ ಪಾಣಂ ಹನೇಯ್ಯ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಂ ಸುಪಿನಗತಸ್ಸ ಚಿತ್ತಂ ಅಬ್ಯಾಕತ’’ನ್ತಿ।
901. Sabbaṃ supinagatassa cittaṃ abyākatanti? Āmantā. Supinantena pāṇaṃ haneyyāti? Āmantā. Hañci supinantena pāṇaṃ haneyya, no ca vata re vattabbe – ‘‘sabbaṃ supinagatassa cittaṃ abyākata’’nti.
ಸುಪಿನನ್ತೇನ ಅದಿನ್ನಂ ಆದಿಯೇಯ್ಯ…ಪೇ॰… ಮುಸಾ ಭಣೇಯ್ಯ, ಪಿಸುಣಂ ಭಣೇಯ್ಯ, ಫರುಸಂ ಭಣೇಯ್ಯ, ಸಮ್ಫಂ ಪಲಪೇಯ್ಯ, ಸನ್ಧಿಂ ಛಿನ್ದೇಯ್ಯ, ನಿಲ್ಲೋಪಂ ಹರೇಯ್ಯ, ಏಕಾಗಾರಿಕಂ ಕರೇಯ್ಯ, ಪರಿಪನ್ಥೇ ತಿಟ್ಠೇಯ್ಯ, ಪರದಾರಂ ಗಚ್ಛೇಯ್ಯ, ಗಾಮಘಾತಕಂ ಕರೇಯ್ಯ, ನಿಗಮಘಾತಕಂ ಕರೇಯ್ಯ, ಸುಪಿನನ್ತೇನ ಮೇಥುನಂ ಧಮ್ಮಂ ಪಟಿಸೇವೇಯ್ಯ , ಸುಪಿನಗತಸ್ಸ ಅಸುಚಿ ಮುಚ್ಚೇಯ್ಯ, ಸುಪಿನನ್ತೇನ ದಾನಂ ದದೇಯ್ಯ, ಚೀವರಂ ದದೇಯ್ಯ, ಪಿಣ್ಡಪಾತಂ ದದೇಯ್ಯ, ಸೇನಾಸನಂ ದದೇಯ್ಯ, ಗಿಲಾನಪಚ್ಚಯಭೇಸಜ್ಜಪರಿಕ್ಖಾರಂ ದದೇಯ್ಯ, ಖಾದನೀಯಂ ದದೇಯ್ಯ, ಭೋಜನೀಯಂ ದದೇಯ್ಯ, ಪಾನೀಯಂ ದದೇಯ್ಯ, ಚೇತಿಯಂ ವನ್ದೇಯ್ಯ, ಚೇತಿಯೇ ಮಾಲಂ ಆರೋಪೇಯ್ಯ, ಗನ್ಧಂ ಆರೋಪೇಯ್ಯ , ವಿಲೇಪನಂ ಆರೋಪೇಯ್ಯ…ಪೇ॰… ಚೇತಿಯಂ ಅಭಿದಕ್ಖಿಣಂ ಕರೇಯ್ಯಾತಿ? ಆಮನ್ತಾ । ಹಞ್ಚಿ ಸುಪಿನನ್ತೇನ ಚೇತಿಯಂ ಅಭಿದಕ್ಖಿಣಂ ಕರೇಯ್ಯ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಂ ಸುಪಿನಗತಸ್ಸ ಚಿತ್ತಂ ಅಬ್ಯಾಕತ’’ನ್ತಿ।
Supinantena adinnaṃ ādiyeyya…pe… musā bhaṇeyya, pisuṇaṃ bhaṇeyya, pharusaṃ bhaṇeyya, samphaṃ palapeyya, sandhiṃ chindeyya, nillopaṃ hareyya, ekāgārikaṃ kareyya, paripanthe tiṭṭheyya, paradāraṃ gaccheyya, gāmaghātakaṃ kareyya, nigamaghātakaṃ kareyya, supinantena methunaṃ dhammaṃ paṭiseveyya , supinagatassa asuci mucceyya, supinantena dānaṃ dadeyya, cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyya, khādanīyaṃ dadeyya, bhojanīyaṃ dadeyya, pānīyaṃ dadeyya, cetiyaṃ vandeyya, cetiye mālaṃ āropeyya, gandhaṃ āropeyya , vilepanaṃ āropeyya…pe… cetiyaṃ abhidakkhiṇaṃ kareyyāti? Āmantā . Hañci supinantena cetiyaṃ abhidakkhiṇaṃ kareyya, no ca vata re vattabbe – ‘‘sabbaṃ supinagatassa cittaṃ abyākata’’nti.
೯೦೨. ನ ವತ್ತಬ್ಬಂ – ‘‘ಸಬ್ಬಂ ಸುಪಿನಗತಸ್ಸ ಚಿತ್ತಂ ಅಬ್ಯಾಕತ’’ನ್ತಿ? ಆಮನ್ತಾ। ನನು ಸುಪಿನಗತಸ್ಸ ಚಿತ್ತಂ ಅಬ್ಬೋಹಾರಿಯಂ ವುತ್ತಂ ಭಗವತಾತಿ? ಆಮನ್ತಾ। ಹಞ್ಚಿ ಸುಪಿನಗತಸ್ಸ ಚಿತ್ತಂ ಅಬ್ಬೋಹಾರಿಯಂ ವುತ್ತಂ ಭಗವತಾ, ತೇನ ವತ ರೇ ವತ್ತಬ್ಬೇ – ‘‘ಸಬ್ಬಂ ಸುಪಿನಗತಸ್ಸ ಚಿತ್ತಂ ಅಬ್ಯಾಕತ’’ನ್ತಿ।
902. Na vattabbaṃ – ‘‘sabbaṃ supinagatassa cittaṃ abyākata’’nti? Āmantā. Nanu supinagatassa cittaṃ abbohāriyaṃ vuttaṃ bhagavatāti? Āmantā. Hañci supinagatassa cittaṃ abbohāriyaṃ vuttaṃ bhagavatā, tena vata re vattabbe – ‘‘sabbaṃ supinagatassa cittaṃ abyākata’’nti.
ಅಬ್ಯಾಕತಕಥಾ ನಿಟ್ಠಿತಾ।
Abyākatakathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೮. ಅಬ್ಯಾಕತಕಥಾವಣ್ಣನಾ • 8. Abyākatakathāvaṇṇanā
