| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
14. චුද්‌දසමවග්‌ගො
14. Cuddasamavaggo
(143) 8. අබ්‍යාකතකථා
(143) 8. Abyākatakathā
706. දිට්‌ඨිගතං අබ්‍යාකතන්‌ති? ආමන්‌තා. විපාකාබ්‍යාකතං කිරියාබ්‍යාකතං රූපං නිබ්‌බානං චක්‌ඛායතනං…පෙ.… ඵොට්‌ඨබ්‌බායතනන්‌ති? න හෙවං වත්‌තබ්‌බෙ…පෙ.… දිට්‌ඨිගතං අබ්‍යාකතන්‌ති? ආමන්‌තා. දිට්‌ඨිගතසම්‌පයුත්‌තො ඵස්‌සො අබ්‍යාකතොති? න හෙවං වත්‌තබ්‌බෙ…පෙ.… දිට්‌ඨිගතං අබ්‍යාකතන්‌ති? ආමන්‌තා. දිට්‌ඨිගතසම්‌පයුත්‌තා වෙදනා…පෙ.… සඤ්‌ඤා…පෙ.… චෙතනා…පෙ.… චිත්‌තං අබ්‍යාකතන්‌ති? න හෙවං වත්‌තබ්‌බෙ…පෙ.….
706. Diṭṭhigataṃ abyākatanti? Āmantā. Vipākābyākataṃ kiriyābyākataṃ rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayutto phasso abyākatoti? Na hevaṃ vattabbe…pe… diṭṭhigataṃ abyākatanti? Āmantā. Diṭṭhigatasampayuttā vedanā…pe… saññā…pe… cetanā…pe… cittaṃ abyākatanti? Na hevaṃ vattabbe…pe….
දිට්‌ඨිගතසම්‌පයුත්‌තො ඵස්‌සො අකුසලොති? ආමන්‌තා. දිට්‌ඨිගතං අකුසලන්‌ති? න හෙවං වත්‌තබ්‌බෙ…පෙ.… දිට්‌ඨිගතසම්‌පයුත්‌තා වෙදනා සඤ්‌ඤා චෙතනා චිත්‌තං අකුසලන්‌ති? ආමන්‌තා. දිට්‌ඨිගතං අකුසලන්‌ති? න හෙවං වත්‌තබ්‌බෙ…පෙ.….
Diṭṭhigatasampayutto phasso akusaloti? Āmantā. Diṭṭhigataṃ akusalanti? Na hevaṃ vattabbe…pe… diṭṭhigatasampayuttā vedanā saññā cetanā cittaṃ akusalanti? Āmantā. Diṭṭhigataṃ akusalanti? Na hevaṃ vattabbe…pe….
707. දිට්‌ඨිගතං අබ්‍යාකතන්‌ති? ආමන්‌තා. අඵලං අවිපාකන්‌ති? න හෙවං වත්‌තබ්‌බෙ…පෙ.… නනු සඵලං සවිපාකන්‌ති? ආමන්‌තා. හඤ්‌චි සඵලං සවිපාකං, නො ච වත රෙ වත්‌තබ්‌බෙ – ‘‘දිට්‌ඨිගතං අබ්‍යාකත’’න්‌ති.
707. Diṭṭhigataṃ abyākatanti? Āmantā. Aphalaṃ avipākanti? Na hevaṃ vattabbe…pe… nanu saphalaṃ savipākanti? Āmantā. Hañci saphalaṃ savipākaṃ, no ca vata re vattabbe – ‘‘diṭṭhigataṃ abyākata’’nti.
දිට්‌ඨිගතං අබ්‍යාකතන්‌ති? ආමන්‌තා. නනු මිච්‌ඡාදිට්‌ඨිපරමානි වජ්‌ජානි 1 වුත්‌තානි භගවතාති? ආමන්‌තා. හඤ්‌චි මිච්‌ඡාදිට්‌ඨිපරමානි වජ්‌ජානි වුත්‌තානි භගවතා, නො ච වත රෙ වත්‌තබ්‌බෙ – ‘‘දිට්‌ඨිගතං අබ්‍යාකත’’න්‌ති.
Diṭṭhigataṃ abyākatanti? Āmantā. Nanu micchādiṭṭhiparamāni vajjāni 2 vuttāni bhagavatāti? Āmantā. Hañci micchādiṭṭhiparamāni vajjāni vuttāni bhagavatā, no ca vata re vattabbe – ‘‘diṭṭhigataṃ abyākata’’nti.
දිට්‌ඨිගතං අබ්‍යාකතන්‌ති? ආමන්‌තා. නනු වුත්‌තං භගවතා – ‘‘මිච්‌ඡාදිට්‌ඨිස්‌ස ඛො අහං, පුණ්‌ණ, ද්‌වින්‌නං ගතීනං අඤ්‌ඤතරං ගතිං වදාමි – නිරයං වා තිරච්‌ඡානයොනිං වා’’ති 9! අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘දිට්‌ඨිගතං අබ්‍යාකත’’න්‌ති.
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhissa kho ahaṃ, puṇṇa, dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti 10! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
708. න වත්‌තබ්‌බං – ‘‘දිට්‌ඨිගතං අබ්‍යාකත’’න්‌ති? ආමන්‌තා. නනු වුත්‌තං භගවතා – ‘‘‘සස්‌සතො ලොකො’ති ඛො, වච්‌ඡ, අබ්‍යාකතමෙතං, ‘අසස්‌සතො ලොකො’ති ඛො, වච්‌ඡ, අබ්‍යාකතමෙතං, ‘අන්‌තවා ලොකො’ති ඛො, වච්‌ඡ, අබ්‍යාකතමෙතං, ‘අනන්‌තවා ලොකො’ති ඛො, වච්‌ඡ…පෙ.… ‘තං ජීවං තං සරීර’න්‌ති ඛො, වච්‌ඡ…පෙ.… ‘අඤ්‌ඤං ජීවං අඤ්‌ඤං සරීර’න්‌ති ඛො , වච්‌ඡ…පෙ.… ‘හොති තථාගතො පරං මරණා’ති ඛො, වච්‌ඡ…පෙ.… ‘න හොති තථාගතො පරං මරණා’ති ඛො, වච්‌ඡ…පෙ.… ‘හොති ච න ච හොති තථාගතො පරං මරණා’ති ඛො, වච්‌ඡ…පෙ.… ‘නෙව හොති න න හොති තථාගතො පරං මරණා’ති ඛො, වච්‌ඡ, අබ්‍යාකතමෙත’’න්‌ති 11! අත්‌ථෙව සුත්‌තන්‌තොති? ආමන්‌තා. තෙන හි දිට්‌ඨිගතං අබ්‍යාකතන්‌ති.
708. Na vattabbaṃ – ‘‘diṭṭhigataṃ abyākata’’nti? Āmantā. Nanu vuttaṃ bhagavatā – ‘‘‘sassato loko’ti kho, vaccha, abyākatametaṃ, ‘asassato loko’ti kho, vaccha, abyākatametaṃ, ‘antavā loko’ti kho, vaccha, abyākatametaṃ, ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho , vaccha…pe… ‘hoti tathāgato paraṃ maraṇā’ti kho, vaccha…pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, abyākatameta’’nti 12! Attheva suttantoti? Āmantā. Tena hi diṭṭhigataṃ abyākatanti.
දිට්‌ඨිගතං අබ්‍යාකතන්‌ති? ආමන්‌තා. නනු වුත්‌තං භගවතා – ‘‘මිච්‌ඡාදිට්‌ඨිකස්‌ස, භික්‌ඛවෙ, පුරිසපුග්‌ගලස්‌ස යඤ්‌චෙව කායකම්‌මං යථාදිට්‌ඨිසමත්‌තං සමාදින්‌නං, යඤ්‌ච වචීකම්‌මං…පෙ.… යඤ්‌ච මනොකම්‌මං, යා ච චෙතනා, යා ච පත්‌ථනා, යො ච පණිධි, යෙ ච සඞ්‌ඛාරා, සබ්‌බෙ තෙ ධම්‌මා අනිට්‌ඨාය අකන්‌තාය අමනාපාය අහිතාය දුක්‌ඛාය සංවත්‌තන්‌තී’’ති 13! අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘දිට්‌ඨිගතං අබ්‍යාකත’’න්‌ති.
Diṭṭhigataṃ abyākatanti? Āmantā. Nanu vuttaṃ bhagavatā – ‘‘micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhisamattaṃ samādinnaṃ, yañca vacīkammaṃ…pe… yañca manokammaṃ, yā ca cetanā, yā ca patthanā, yo ca paṇidhi, ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattantī’’ti 14! Attheva suttantoti? Āmantā. Tena hi na vattabbaṃ – ‘‘diṭṭhigataṃ abyākata’’nti.
අබ්‍යාකතකථා නිට්‌ඨිතා.
Abyākatakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. අබ්‍යාකතකථාවණ්‌ණනා • 8. Abyākatakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 8. අබ්‍යාකතකථාවණ්‌ණනා • 8. Abyākatakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 8. අබ්‍යාකතකථාවණ්‌ණනා • 8. Abyākatakathāvaṇṇanā
