| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
8. අබ්‍යාකතකථාවණ්‌ණනා
8. Abyākatakathāvaṇṇanā
901-902. ඉදානි අබ්‍යාකතකථා නාම හොති. තත්‌ථ ‘‘අත්‌ථෙසා, භික්‌ඛවෙ, චෙතනා, සා ච ඛො අබ්‌බොහාරිකා’’ති (පාරා. 235) වචනතො ‘‘සබ්‌බං සුපිනගතස්‌ස චිත්‌තං අබ්‍යාකත’’න්‌ති යෙසං ලද්‌ධි, සෙය්‍යථාපි එකච්‌චානං උත්‌තරාපථකානඤ්‌ඤෙව, තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස. සෙසමෙත්‌ථ යථා පාළිමෙව නිය්‍යාති. සුපිනගතස්‌ස චිත්‌තං අබ්‌බොහාරිකන්‌ති ඉදං ආපත්‌තිං සන්‌ධාය වුත්‌තං. සුපිනගතස්‌ස හි පාණාතිපාතාදිවසෙන කිඤ්‌චාපි අකුසලචිත්‌තං පවත්‌තති, වත්‌ථුවිකොපනං පන නත්‌ථීති න සක්‌කා තත්‌ථ ආපත්‌තිං පඤ්‌ඤපෙතුං. ඉමිනා කාරණෙන තං අබ්‌බොහාරිකං, න අබ්‍යාකතත්‌තාති.
901-902. Idāni abyākatakathā nāma hoti. Tattha ‘‘atthesā, bhikkhave, cetanā, sā ca kho abbohārikā’’ti (pārā. 235) vacanato ‘‘sabbaṃ supinagatassa cittaṃ abyākata’’nti yesaṃ laddhi, seyyathāpi ekaccānaṃ uttarāpathakānaññeva, te sandhāya pucchā sakavādissa, paṭiññā itarassa. Sesamettha yathā pāḷimeva niyyāti. Supinagatassa cittaṃ abbohārikanti idaṃ āpattiṃ sandhāya vuttaṃ. Supinagatassa hi pāṇātipātādivasena kiñcāpi akusalacittaṃ pavattati, vatthuvikopanaṃ pana natthīti na sakkā tattha āpattiṃ paññapetuṃ. Iminā kāraṇena taṃ abbohārikaṃ, na abyākatattāti.
අබ්‍යාකතකථාවණ්‌ණනා.
Abyākatakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (215) 8. අබ්‍යාකතකථා • (215) 8. Abyākatakathā
