| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. அப்³யாகதவக்³கோ³
6. Abyākatavaggo
1-2. அப்³யாகதஸுத்தாதி³வண்ணனா
1-2. Abyākatasuttādivaṇṇanā
54-55. ச²ட்ட²வக்³க³ஸ்ஸ பட²மங் ஸுவிஞ்ஞெய்யமேவ. து³தியே அதீதே அத்தபா⁴வே நிப்³ப³த்தகங் கம்மந்தி ‘‘புரிமகம்மப⁴வஸ்மிங் மோஹோ அவிஜ்ஜா, ஆயூஹனா ஸங்கா²ரா, நிகந்தி தண்ஹா, உபக³மனங் உபாதா³னங், சேதனா ப⁴வோ’’தி ஏவமாக³தங் ஸபரிக்கா²ரங் பஞ்சவித⁴ங் கம்மவட்டமாஹ. ஏதரஹி மே அத்தபா⁴வோ ந ஸியாதி விஞ்ஞாணனாமரூபஸளாயதனப²ஸ்ஸவேத³னாஸஹிதங் பச்சுப்பன்னங் பஞ்சவித⁴ங் விபாகவட்டமாஹ. யங் அத்தி²கந்தி யங் பரமத்த²தோ விஜ்ஜமானகங். தேனாஹ ‘‘பூ⁴த’’ந்தி. தஞ்ஹி பச்சயனிப்³ப³த்ததாய ‘‘பூ⁴த’’ந்தி வுச்சதி. தங் பஜஹாமீதி தப்படிப³த்³த⁴ச்ச²ந்த³ராக³ப்பஹானேன ததோ ஏவ ஆயதிங் அனுப்பத்தித⁴ம்மதாபாத³னவஸேன பஜஹாமி பரிச்சஜாமி. ஹரிதந்தந்தி (ம॰ நி॰ அட்ட²॰ 1.303) ஹரிதமேவ. அந்த-ஸத்³தே³ன பத³வட்³ட⁴னங் கதங் யதா² ‘‘வனந்தங் ஸுத்தந்த’’ந்தி, அல்லதிணாதீ³னி ஆக³ம்ம நிப்³பா³யதீதி அத்தோ². பத²ந்தந்தி மஹாமக்³க³ங். ஸேலந்தந்தி பப்³ப³தங். உத³கந்தந்தி உத³கங். ரமணீயங் வா பூ⁴மிபா⁴க³ந்தி திணகு³ம்பா³தி³ரஹிதங் விவித்தங் அப்³போ⁴காஸபூ⁴மிபா⁴க³ங். அனாஹாராதி அபச்சயா நிருபாதா³னா. ஸேஸமெத்த² உத்தானமேவ.
54-55. Chaṭṭhavaggassa paṭhamaṃ suviññeyyameva. Dutiye atīte attabhāve nibbattakaṃ kammanti ‘‘purimakammabhavasmiṃ moho avijjā, āyūhanā saṅkhārā, nikanti taṇhā, upagamanaṃ upādānaṃ, cetanā bhavo’’ti evamāgataṃ saparikkhāraṃ pañcavidhaṃ kammavaṭṭamāha. Etarahi me attabhāvo na siyāti viññāṇanāmarūpasaḷāyatanaphassavedanāsahitaṃ paccuppannaṃ pañcavidhaṃ vipākavaṭṭamāha. Yaṃ atthikanti yaṃ paramatthato vijjamānakaṃ. Tenāha ‘‘bhūta’’nti. Tañhi paccayanibbattatāya ‘‘bhūta’’nti vuccati. Taṃ pajahāmīti tappaṭibaddhacchandarāgappahānena tato eva āyatiṃ anuppattidhammatāpādanavasena pajahāmi pariccajāmi. Haritantanti (ma. ni. aṭṭha. 1.303) haritameva. Anta-saddena padavaḍḍhanaṃ kataṃ yathā ‘‘vanantaṃ suttanta’’nti, allatiṇādīni āgamma nibbāyatīti attho. Pathantanti mahāmaggaṃ. Selantanti pabbataṃ. Udakantanti udakaṃ. Ramaṇīyaṃ vā bhūmibhāganti tiṇagumbādirahitaṃ vivittaṃ abbhokāsabhūmibhāgaṃ. Anāhārāti apaccayā nirupādānā. Sesamettha uttānameva.
அப்³யாகதஸுத்தாதி³வண்ணனா நிட்டி²தா.
Abyākatasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. அப்³யாகதஸுத்தங் • 1. Abyākatasuttaṃ
2. புரிஸக³திஸுத்தங் • 2. Purisagatisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. அப்³யாகதஸுத்தவண்ணனா • 1. Abyākatasuttavaṇṇanā
2. புரிஸக³திஸுத்தவண்ணனா • 2. Purisagatisuttavaṇṇanā
