| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
6. අබ්‍යාකතවග්‌ගො
6. Abyākatavaggo
1-2. අබ්‍යාකතසුත්‌තාදිවණ්‌ණනා
1-2. Abyākatasuttādivaṇṇanā
54-55. ඡට්‌ඨවග්‌ගස්‌ස පඨමං සුවිඤ්‌ඤෙය්‍යමෙව. දුතියෙ අතීතෙ අත්‌තභාවෙ නිබ්‌බත්‌තකං කම්‌මන්‌ති ‘‘පුරිමකම්‌මභවස්‌මිං මොහො අවිජ්‌ජා, ආයූහනා සඞ්‌ඛාරා, නිකන්‌ති තණ්‌හා, උපගමනං උපාදානං, චෙතනා භවො’’ති එවමාගතං සපරික්‌ඛාරං පඤ්‌චවිධං කම්‌මවට්‌ටමාහ. එතරහි මෙ අත්‌තභාවො න සියාති විඤ්‌ඤාණනාමරූපසළායතනඵස්‌සවෙදනාසහිතං පච්‌චුප්‌පන්‌නං පඤ්‌චවිධං විපාකවට්‌ටමාහ. යං අත්‌ථිකන්‌ති යං පරමත්‌ථතො විජ්‌ජමානකං. තෙනාහ ‘‘භූත’’න්‌ති. තඤ්‌හි පච්‌චයනිබ්‌බත්‌තතාය ‘‘භූත’’න්‌ති වුච්‌චති. තං පජහාමීති තප්‌පටිබද්‌ධච්‌ඡන්‌දරාගප්‌පහානෙන තතො එව ආයතිං අනුප්‌පත්‌තිධම්‌මතාපාදනවසෙන පජහාමි පරිච්‌චජාමි. හරිතන්‌තන්‌ති (ම. නි. අට්‌ඨ. 1.303) හරිතමෙව. අන්‌ත-සද්‌දෙන පදවඩ්‌ඪනං කතං යථා ‘‘වනන්‌තං සුත්‌තන්‌ත’’න්‌ති, අල්‌ලතිණාදීනි ආගම්‌ම නිබ්‌බායතීති අත්‌ථො. පථන්‌තන්‌ති මහාමග්‌ගං. සෙලන්‌තන්‌ති පබ්‌බතං. උදකන්‌තන්‌ති උදකං. රමණීයං වා භූමිභාගන්‌ති තිණගුම්‌බාදිරහිතං විවිත්‌තං අබ්‌භොකාසභූමිභාගං. අනාහාරාති අපච්‌චයා නිරුපාදානා. සෙසමෙත්‌ථ උත්‌තානමෙව.
54-55. Chaṭṭhavaggassa paṭhamaṃ suviññeyyameva. Dutiye atīte attabhāve nibbattakaṃ kammanti ‘‘purimakammabhavasmiṃ moho avijjā, āyūhanā saṅkhārā, nikanti taṇhā, upagamanaṃ upādānaṃ, cetanā bhavo’’ti evamāgataṃ saparikkhāraṃ pañcavidhaṃ kammavaṭṭamāha. Etarahi me attabhāvo na siyāti viññāṇanāmarūpasaḷāyatanaphassavedanāsahitaṃ paccuppannaṃ pañcavidhaṃ vipākavaṭṭamāha. Yaṃ atthikanti yaṃ paramatthato vijjamānakaṃ. Tenāha ‘‘bhūta’’nti. Tañhi paccayanibbattatāya ‘‘bhūta’’nti vuccati. Taṃ pajahāmīti tappaṭibaddhacchandarāgappahānena tato eva āyatiṃ anuppattidhammatāpādanavasena pajahāmi pariccajāmi. Haritantanti (ma. ni. aṭṭha. 1.303) haritameva. Anta-saddena padavaḍḍhanaṃ kataṃ yathā ‘‘vanantaṃ suttanta’’nti, allatiṇādīni āgamma nibbāyatīti attho. Pathantanti mahāmaggaṃ. Selantanti pabbataṃ. Udakantanti udakaṃ. Ramaṇīyaṃ vā bhūmibhāganti tiṇagumbādirahitaṃ vivittaṃ abbhokāsabhūmibhāgaṃ. Anāhārāti apaccayā nirupādānā. Sesamettha uttānameva.
අබ්‍යාකතසුත්‌තාදිවණ්‌ණනා නිට්‌ඨිතා.
Abyākatasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. අබ්‍යාකතසුත්‌තං • 1. Abyākatasuttaṃ
2. පුරිසගතිසුත්‌තං • 2. Purisagatisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
1. අබ්‍යාකතසුත්‌තවණ්‌ණනා • 1. Abyākatasuttavaṇṇanā
2. පුරිසගතිසුත්‌තවණ්‌ණනා • 2. Purisagatisuttavaṇṇanā
