| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
६. अब्याकतवग्गो
6. Abyākatavaggo
१. अब्याकतसुत्तवण्णना
1. Abyākatasuttavaṇṇanā
५४. छट्ठवग्गस्स पठमे अब्याकतवत्थूसूति एकंसादिवसेन अकथितवत्थूसु। तथागतोति सत्तो। दिट्ठिगतमेतन्ति मिच्छादिट्ठिमत्तकमेतं, न ताय दिट्ठिया गहितसत्तो नाम अत्थि। पटिपदन्ति अरियमग्गं। न छम्भतीति दिट्ठिवसेन न कम्पति। सेसपदेसुपि एसेव नयो। तण्हागतन्ति दिट्ठितण्हा। सञ्ञागतादीसुपि एसेव नयो। दिट्ठिसञ्ञा एव हेत्थ सञ्ञागतं, दिट्ठिनिस्सितमानोयेव दिट्ठिमञ्ञितमेव वा मञ्ञितं, दिट्ठिपपञ्चोव पपञ्चितं, दिट्ठुपादानमेव उपादानं, दिट्ठिया विरूपं पटिसरणभावोयेव विप्पटिसारो नामाति वेदितब्बो। एत्थ च दिट्ठिग्गहणेन द्वासट्ठि दिट्ठियो, दिट्ठिनिरोधगामिनिपटिपदागहणेन सोतापत्तिमग्गो गहितोति।
54. Chaṭṭhavaggassa paṭhame abyākatavatthūsūti ekaṃsādivasena akathitavatthūsu. Tathāgatoti satto. Diṭṭhigatametanti micchādiṭṭhimattakametaṃ, na tāya diṭṭhiyā gahitasatto nāma atthi. Paṭipadanti ariyamaggaṃ. Na chambhatīti diṭṭhivasena na kampati. Sesapadesupi eseva nayo. Taṇhāgatanti diṭṭhitaṇhā. Saññāgatādīsupi eseva nayo. Diṭṭhisaññā eva hettha saññāgataṃ, diṭṭhinissitamānoyeva diṭṭhimaññitameva vā maññitaṃ, diṭṭhipapañcova papañcitaṃ, diṭṭhupādānameva upādānaṃ, diṭṭhiyā virūpaṃ paṭisaraṇabhāvoyeva vippaṭisāro nāmāti veditabbo. Ettha ca diṭṭhiggahaṇena dvāsaṭṭhi diṭṭhiyo, diṭṭhinirodhagāminipaṭipadāgahaṇena sotāpattimaggo gahitoti.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १. अब्याकतसुत्तं • 1. Abyākatasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-२. अब्याकतसुत्तादिवण्णना • 1-2. Abyākatasuttādivaṇṇanā
