| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. အဗ္ယာကတဝဂ္ဂော
6. Abyākatavaggo
၁. အဗ္ယာကတသုတ္တဝဏ္ဏနာ
1. Abyākatasuttavaṇṇanā
၅၄. ဆဋ္ဌဝဂ္ဂသ္သ ပဌမေ အဗ္ယာကတဝတ္ထူသူတိ ဧကံသာဒိဝသေန အကထိတဝတ္ထူသု။ တထာဂတောတိ သတ္တော။ ဒိဋ္ဌိဂတမေတန္တိ မိစ္ဆာဒိဋ္ဌိမတ္တကမေတံ, န တာယ ဒိဋ္ဌိယာ ဂဟိတသတ္တော နာမ အတ္ထိ။ ပဋိပဒန္တိ အရိယမဂ္ဂံ။ န ဆမ္ဘတီတိ ဒိဋ္ဌိဝသေန န ကမ္ပတိ။ သေသပဒေသုပိ ဧသေဝ နယော။ တဏ္ဟာဂတန္တိ ဒိဋ္ဌိတဏ္ဟာ။ သညာဂတာဒီသုပိ ဧသေဝ နယော။ ဒိဋ္ဌိသညာ ဧဝ ဟေတ္ထ သညာဂတံ, ဒိဋ္ဌိနိသ္သိတမာနောယေဝ ဒိဋ္ဌိမညိတမေဝ ဝာ မညိတံ, ဒိဋ္ဌိပပဉ္စောဝ ပပဉ္စိတံ, ဒိဋ္ဌုပာဒာနမေဝ ဥပာဒာနံ, ဒိဋ္ဌိယာ ဝိရူပံ ပဋိသရဏဘာဝောယေဝ ဝိပ္ပဋိသာရော နာမာတိ ဝေဒိတဗ္ဗော။ ဧတ္ထ စ ဒိဋ္ဌိဂ္ဂဟဏေန ဒ္ဝာသဋ္ဌိ ဒိဋ္ဌိယော, ဒိဋ္ဌိနိရောဓဂာမိနိပဋိပဒာဂဟဏေန သောတာပတ္တိမဂ္ဂော ဂဟိတောတိ။
54. Chaṭṭhavaggassa paṭhame abyākatavatthūsūti ekaṃsādivasena akathitavatthūsu. Tathāgatoti satto. Diṭṭhigatametanti micchādiṭṭhimattakametaṃ, na tāya diṭṭhiyā gahitasatto nāma atthi. Paṭipadanti ariyamaggaṃ. Na chambhatīti diṭṭhivasena na kampati. Sesapadesupi eseva nayo. Taṇhāgatanti diṭṭhitaṇhā. Saññāgatādīsupi eseva nayo. Diṭṭhisaññā eva hettha saññāgataṃ, diṭṭhinissitamānoyeva diṭṭhimaññitameva vā maññitaṃ, diṭṭhipapañcova papañcitaṃ, diṭṭhupādānameva upādānaṃ, diṭṭhiyā virūpaṃ paṭisaraṇabhāvoyeva vippaṭisāro nāmāti veditabbo. Ettha ca diṭṭhiggahaṇena dvāsaṭṭhi diṭṭhiyo, diṭṭhinirodhagāminipaṭipadāgahaṇena sotāpattimaggo gahitoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. အဗ္ယာကတသုတ္တံ • 1. Abyākatasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၂. အဗ္ယာကတသုတ္တာဒိဝဏ္ဏနာ • 1-2. Abyākatasuttādivaṇṇanā
