| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. அசரிங்ஸுத்தங்
3. Acariṃsuttaṃ
116. ஸாவத்தி²யங் விஹரதி…பே॰… ‘‘பத²வீதா⁴துயாஹங், பி⁴க்க²வே, அஸ்ஸாத³பரியேஸனங் அசரிங், யோ பத²வீதா⁴துயா அஸ்ஸாதோ³ தத³ஜ்ஜ²க³மங், யாவதா பத²வீதா⁴துயா அஸ்ஸாதோ³ பஞ்ஞாய மே ஸோ ஸுதி³ட்டோ². பத²வீதா⁴துயாஹங், பி⁴க்க²வே, ஆதீ³னவபரியேஸனங் அசரிங், யோ பத²வீதா⁴துயா ஆதீ³னவோ தத³ஜ்ஜ²க³மங் , யாவதா பத²வீதா⁴துயா ஆதீ³னவோ பஞ்ஞாய மே ஸோ ஸுதி³ட்டோ². பத²வீதா⁴துயாஹங், பி⁴க்க²வே, நிஸ்ஸரணபரியேஸனங் அசரிங், யங் பத²வீதா⁴துயா நிஸ்ஸரணங் தத³ஜ்ஜ²க³மங், யாவதா பத²வீதா⁴துயா நிஸ்ஸரணங் பஞ்ஞாய மே தங் ஸுதி³ட்ட²ங்’’.
116. Sāvatthiyaṃ viharati…pe… ‘‘pathavīdhātuyāhaṃ, bhikkhave, assādapariyesanaṃ acariṃ, yo pathavīdhātuyā assādo tadajjhagamaṃ, yāvatā pathavīdhātuyā assādo paññāya me so sudiṭṭho. Pathavīdhātuyāhaṃ, bhikkhave, ādīnavapariyesanaṃ acariṃ, yo pathavīdhātuyā ādīnavo tadajjhagamaṃ , yāvatā pathavīdhātuyā ādīnavo paññāya me so sudiṭṭho. Pathavīdhātuyāhaṃ, bhikkhave, nissaraṇapariyesanaṃ acariṃ, yaṃ pathavīdhātuyā nissaraṇaṃ tadajjhagamaṃ, yāvatā pathavīdhātuyā nissaraṇaṃ paññāya me taṃ sudiṭṭhaṃ’’.
‘‘ஆபோதா⁴துயாஹங், பி⁴க்க²வே…பே॰… தேஜோதா⁴துயாஹங், பி⁴க்க²வே… வாயோதா⁴துயாஹங், பி⁴க்க²வே, அஸ்ஸாத³பரியேஸனங் அசரிங், யோ வாயோதா⁴துயா அஸ்ஸாதோ³ தத³ஜ்ஜ²க³மங், யாவதா வாயோதா⁴துயா அஸ்ஸாதோ³ பஞ்ஞாய மே ஸோ ஸுதி³ட்டோ². வாயோதா⁴துயாஹங், பி⁴க்க²வே, ஆதீ³னவபரியேஸனங் அசரிங், யோ வாயோதா⁴துயா ஆதீ³னவோ தத³ஜ்ஜ²க³மங், யாவதா வாயோதா⁴துயா ஆதீ³னவோ பஞ்ஞாய மே ஸோ ஸுதி³ட்டோ². வாயோதா⁴துயாஹங், பி⁴க்க²வே, நிஸ்ஸரணபரியேஸனங் அசரிங், யங் வாயோதா⁴துயா நிஸ்ஸரணங் தத³ஜ்ஜ²க³மங், யாவதா வாயோதா⁴துயா நிஸ்ஸரணங் பஞ்ஞாய மே தங் ஸுதி³ட்ட²ங்.
‘‘Āpodhātuyāhaṃ, bhikkhave…pe… tejodhātuyāhaṃ, bhikkhave… vāyodhātuyāhaṃ, bhikkhave, assādapariyesanaṃ acariṃ, yo vāyodhātuyā assādo tadajjhagamaṃ, yāvatā vāyodhātuyā assādo paññāya me so sudiṭṭho. Vāyodhātuyāhaṃ, bhikkhave, ādīnavapariyesanaṃ acariṃ, yo vāyodhātuyā ādīnavo tadajjhagamaṃ, yāvatā vāyodhātuyā ādīnavo paññāya me so sudiṭṭho. Vāyodhātuyāhaṃ, bhikkhave, nissaraṇapariyesanaṃ acariṃ, yaṃ vāyodhātuyā nissaraṇaṃ tadajjhagamaṃ, yāvatā vāyodhātuyā nissaraṇaṃ paññāya me taṃ sudiṭṭhaṃ.
‘‘யாவகீவஞ்சாஹங், பி⁴க்க²வே, இமாஸங் சதுன்னங் தா⁴தூனங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங் ந அப்³ப⁴ஞ்ஞாஸிங், நேவ தாவாஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴தி பச்சஞ்ஞாஸிங்.
‘‘Yāvakīvañcāhaṃ, bhikkhave, imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ na abbhaññāsiṃ, neva tāvāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddhoti paccaññāsiṃ.
‘‘யதோ ச க்²வாஹங், பி⁴க்க²வே, இமாஸங் சதுன்னங் தா⁴தூனங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங் அப்³ப⁴ஞ்ஞாஸிங், அதா²ஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴தி பச்சஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – ‘அகுப்பா மே விமுத்தி, அயமந்திமா ஜாதி, நத்தி² தா³னி புனப்³ப⁴வோ’’’தி. ததியங்.
‘‘Yato ca khvāhaṃ, bhikkhave, imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsiṃ, athāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddhoti paccaññāsiṃ. Ñāṇañca pana me dassanaṃ udapādi – ‘akuppā me vimutti, ayamantimā jāti, natthi dāni punabbhavo’’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. அசரிங்ஸுத்தவண்ணனா • 3. Acariṃsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அசரிங்ஸுத்தவண்ணனா • 3. Acariṃsuttavaṇṇanā
