| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. අචරිංසුත්‌තං
3. Acariṃsuttaṃ
116. සාවත්‌ථියං විහරති…පෙ.… ‘‘පථවීධාතුයාහං, භික්‌ඛවෙ, අස්‌සාදපරියෙසනං අචරිං, යො පථවීධාතුයා අස්‌සාදො තදජ්‌ඣගමං, යාවතා පථවීධාතුයා අස්‌සාදො පඤ්‌ඤාය මෙ සො සුදිට්‌ඨො. පථවීධාතුයාහං, භික්‌ඛවෙ, ආදීනවපරියෙසනං අචරිං, යො පථවීධාතුයා ආදීනවො තදජ්‌ඣගමං , යාවතා පථවීධාතුයා ආදීනවො පඤ්‌ඤාය මෙ සො සුදිට්‌ඨො. පථවීධාතුයාහං, භික්‌ඛවෙ, නිස්‌සරණපරියෙසනං අචරිං, යං පථවීධාතුයා නිස්‌සරණං තදජ්‌ඣගමං, යාවතා පථවීධාතුයා නිස්‌සරණං පඤ්‌ඤාය මෙ තං සුදිට්‌ඨං’’.
116. Sāvatthiyaṃ viharati…pe… ‘‘pathavīdhātuyāhaṃ, bhikkhave, assādapariyesanaṃ acariṃ, yo pathavīdhātuyā assādo tadajjhagamaṃ, yāvatā pathavīdhātuyā assādo paññāya me so sudiṭṭho. Pathavīdhātuyāhaṃ, bhikkhave, ādīnavapariyesanaṃ acariṃ, yo pathavīdhātuyā ādīnavo tadajjhagamaṃ , yāvatā pathavīdhātuyā ādīnavo paññāya me so sudiṭṭho. Pathavīdhātuyāhaṃ, bhikkhave, nissaraṇapariyesanaṃ acariṃ, yaṃ pathavīdhātuyā nissaraṇaṃ tadajjhagamaṃ, yāvatā pathavīdhātuyā nissaraṇaṃ paññāya me taṃ sudiṭṭhaṃ’’.
‘‘ආපොධාතුයාහං, භික්‌ඛවෙ…පෙ.… තෙජොධාතුයාහං, භික්‌ඛවෙ… වායොධාතුයාහං, භික්‌ඛවෙ, අස්‌සාදපරියෙසනං අචරිං, යො වායොධාතුයා අස්‌සාදො තදජ්‌ඣගමං, යාවතා වායොධාතුයා අස්‌සාදො පඤ්‌ඤාය මෙ සො සුදිට්‌ඨො. වායොධාතුයාහං, භික්‌ඛවෙ, ආදීනවපරියෙසනං අචරිං, යො වායොධාතුයා ආදීනවො තදජ්‌ඣගමං, යාවතා වායොධාතුයා ආදීනවො පඤ්‌ඤාය මෙ සො සුදිට්‌ඨො. වායොධාතුයාහං, භික්‌ඛවෙ, නිස්‌සරණපරියෙසනං අචරිං, යං වායොධාතුයා නිස්‌සරණං තදජ්‌ඣගමං, යාවතා වායොධාතුයා නිස්‌සරණං පඤ්‌ඤාය මෙ තං සුදිට්‌ඨං.
‘‘Āpodhātuyāhaṃ, bhikkhave…pe… tejodhātuyāhaṃ, bhikkhave… vāyodhātuyāhaṃ, bhikkhave, assādapariyesanaṃ acariṃ, yo vāyodhātuyā assādo tadajjhagamaṃ, yāvatā vāyodhātuyā assādo paññāya me so sudiṭṭho. Vāyodhātuyāhaṃ, bhikkhave, ādīnavapariyesanaṃ acariṃ, yo vāyodhātuyā ādīnavo tadajjhagamaṃ, yāvatā vāyodhātuyā ādīnavo paññāya me so sudiṭṭho. Vāyodhātuyāhaṃ, bhikkhave, nissaraṇapariyesanaṃ acariṃ, yaṃ vāyodhātuyā nissaraṇaṃ tadajjhagamaṃ, yāvatā vāyodhātuyā nissaraṇaṃ paññāya me taṃ sudiṭṭhaṃ.
‘‘යාවකීවඤ්‌චාහං, භික්‌ඛවෙ, ඉමාසං චතුන්‌නං ධාතූනං අස්‌සාදඤ්‌ච අස්‌සාදතො ආදීනවඤ්‌ච ආදීනවතො නිස්‌සරණඤ්‌ච නිස්‌සරණතො යථාභූතං න අබ්‌භඤ්‌ඤාසිං, නෙව තාවාහං, භික්‌ඛවෙ, සදෙවකෙ ලොකෙ සමාරකෙ සබ්‍රහ්‌මකෙ සස්‌සමණබ්‍රාහ්‌මණියා පජාය සදෙවමනුස්‌සාය අනුත්‌තරං සම්‌මාසම්‌බොධිං අභිසම්‌බුද්‌ධොති පච්‌චඤ්‌ඤාසිං.
‘‘Yāvakīvañcāhaṃ, bhikkhave, imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ na abbhaññāsiṃ, neva tāvāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddhoti paccaññāsiṃ.
‘‘යතො ච ඛ්‌වාහං, භික්‌ඛවෙ, ඉමාසං චතුන්‌නං ධාතූනං අස්‌සාදඤ්‌ච අස්‌සාදතො ආදීනවඤ්‌ච ආදීනවතො නිස්‌සරණඤ්‌ච නිස්‌සරණතො යථාභූතං අබ්‌භඤ්‌ඤාසිං, අථාහං, භික්‌ඛවෙ, සදෙවකෙ ලොකෙ සමාරකෙ සබ්‍රහ්‌මකෙ සස්‌සමණබ්‍රාහ්‌මණියා පජාය සදෙවමනුස්‌සාය අනුත්‌තරං සම්‌මාසම්‌බොධිං අභිසම්‌බුද්‌ධොති පච්‌චඤ්‌ඤාසිං. ඤාණඤ්‌ච පන මෙ දස්‌සනං උදපාදි – ‘අකුප්‌පා මෙ විමුත්‌ති, අයමන්‌තිමා ජාති, නත්‌ථි දානි පුනබ්‌භවො’’’ති. තතියං.
‘‘Yato ca khvāhaṃ, bhikkhave, imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññāsiṃ, athāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya anuttaraṃ sammāsambodhiṃ abhisambuddhoti paccaññāsiṃ. Ñāṇañca pana me dassanaṃ udapādi – ‘akuppā me vimutti, ayamantimā jāti, natthi dāni punabbhavo’’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. අචරිංසුත්‌තවණ්‌ණනා • 3. Acariṃsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. අචරිංසුත්‌තවණ්‌ණනා • 3. Acariṃsuttavaṇṇanā
