| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
အာစရိယဂုဏံ
Ācariyaguṇaṃ
‘‘ဘန္တေ နာဂသေန, အယံ ဘူမိဘာဂော အဋ္ဌ မန္တဒောသဝိဝဇ္ဇိတော, အဟဉ္စ လောကေ ပရမော မန္တိသဟာယော 1, ဂုယ္ဟမနုရက္ခီ စာဟံ ယာဝာဟံ ဇီဝိသ္သာမိ တာဝ ဂုယ္ဟမနုရက္ခိသ္သာမိ, အဋ္ဌဟိ စ မေ ကာရဏေဟိ ဗုဒ္ဓိ ပရိဏာမံ ဂတာ, ဒုလ္လဘော ဧတရဟိ မာဒိသော အန္တေဝာသီ, သမ္မာ ပဋိပန္နေ အန္တေဝာသိကေ ယေ အာစရိယာနံ ပဉ္စဝီသတိ အာစရိယဂုဏာ, တေဟိ ဂုဏေဟိ အာစရိယေန သမ္မာ ပဋိပဇ္ဇိတဗ္ဗံ။ ကတမေ ပဉ္စဝီသတိ ဂုဏာ?
‘‘Bhante nāgasena, ayaṃ bhūmibhāgo aṭṭha mantadosavivajjito, ahañca loke paramo mantisahāyo 2, guyhamanurakkhī cāhaṃ yāvāhaṃ jīvissāmi tāva guyhamanurakkhissāmi, aṭṭhahi ca me kāraṇehi buddhi pariṇāmaṃ gatā, dullabho etarahi mādiso antevāsī, sammā paṭipanne antevāsike ye ācariyānaṃ pañcavīsati ācariyaguṇā, tehi guṇehi ācariyena sammā paṭipajjitabbaṃ. Katame pañcavīsati guṇā?
‘‘ဣဓ, ဘန္တေ နာဂသေန, အာစရိယေန အန္တေဝာသိမ္ဟိ သတတံ သမိတံ အာရက္ခာ ဥပဋ္ဌပေတဗ္ဗာ, အသေဝနသေဝနာ ဇာနိတဗ္ဗာ, ပမတ္တာပ္ပမတ္တာ ဇာနိတဗ္ဗာ, သေယ္ယဝကာသော ဇာနိတဗ္ဗော, ဂေလညံ ဇာနိတဗ္ဗံ, ဘောဇနသ္သ 3 လဒ္ဓာလဒ္ဓံ ဇာနိတဗ္ဗံ, ဝိသေသော ဇာနိတဗ္ဗော, ပတ္တဂတံ သံဝိဘဇိတဗ္ဗံ, အသ္သာသိတဗ္ဗော ‘မာ ဘာယိ, အတ္ထော တေ အဘိက္ကမတီ’တိ, ‘ဣမိနာ ပုဂ္ဂလေန ပဋိစရတီ’တိ 4 ပဋိစာရော ဇာနိတဗ္ဗော, ဂာမေ ပဋိစာရော ဇာနိတဗ္ဗော, ဝိဟာရေ ပဋိစာရော ဇာနိတဗ္ဗော, န တေန ဟာသော ဒဝော ကာတဗ္ဗော 5, တေန သဟ အာလာပော ကာတဗ္ဗော, ဆိဒ္ဒံ ဒိသ္ဝာ အဓိဝာသေတဗ္ဗံ, သက္ကစ္စကာရိနာ ဘဝိတဗ္ဗံ, အခဏ္ဍကာရိနာ ဘဝိတဗ္ဗံ, အရဟသ္သကာရိနာ ဘဝိတဗ္ဗံ, နိရဝသေသကာရိနာ ဘဝိတဗ္ဗံ, ‘ဇနေမိမံ 6 သိပ္ပေသူ’တိ ဇနကစိတ္တံ ဥပဋ္ဌပေတဗ္ဗံ, ‘ကထံ အယံ န ပရိဟာယေယ္ယာ’တိ ဝဍ္ဎိစိတ္တံ ဥပဋ္ဌပေတဗ္ဗံ, ‘ဗလဝံ ဣမံ ကရောမိ သိက္ခာဗလေနာ’တိ စိတ္တံ ဥပဋ္ဌပေတဗ္ဗံ, မေတ္တစိတ္တံ ဥပဋ္ဌပေတဗ္ဗံ, အာပဒာသု န ဝိဇဟိတဗ္ဗံ, ကရဏီယေ နပ္ပမဇ္ဇိတဗ္ဗံ, ခလိတေ ဓမ္မေန ပဂ္ဂဟေတဗ္ဗောတိ။ ဣမေ ခော, ဘန္တေ, ပဉ္စဝီသတိ အာစရိယသ္သ အာစရိယဂုဏာ, တေဟိ ဂုဏေဟိ မယိ သမ္မာ ပဋိပဇ္ဇသ္သု, သံသယော မေ, ဘန္တေ, ဥပ္ပန္နော, အတ္ထိ မေဏ္ဍကပဉ္ဟာ ဇိနဘာသိတာ , အနာဂတေ အဒ္ဓာနေ တတ္ထ ဝိဂ္ဂဟော ဥပ္ပဇ္ဇိသ္သတိ, အနာဂတေ စ အဒ္ဓာနေ ဒုလ္လဘာ ဘဝိသ္သန္တိ တုမ္ဟာဒိသာ ဗုဒ္ဓိမန္တော, တေသု မေ ပဉ္ဟေသု စက္ခုံ ဒေဟိ ပရဝာဒာနံ နိဂ္ဂဟာယာ’’တိ။
‘‘Idha, bhante nāgasena, ācariyena antevāsimhi satataṃ samitaṃ ārakkhā upaṭṭhapetabbā, asevanasevanā jānitabbā, pamattāppamattā jānitabbā, seyyavakāso jānitabbo, gelaññaṃ jānitabbaṃ, bhojanassa 7 laddhāladdhaṃ jānitabbaṃ, viseso jānitabbo, pattagataṃ saṃvibhajitabbaṃ, assāsitabbo ‘mā bhāyi, attho te abhikkamatī’ti, ‘iminā puggalena paṭicaratī’ti 8 paṭicāro jānitabbo, gāme paṭicāro jānitabbo, vihāre paṭicāro jānitabbo, na tena hāso davo kātabbo 9, tena saha ālāpo kātabbo, chiddaṃ disvā adhivāsetabbaṃ, sakkaccakārinā bhavitabbaṃ, akhaṇḍakārinā bhavitabbaṃ, arahassakārinā bhavitabbaṃ, niravasesakārinā bhavitabbaṃ, ‘janemimaṃ 10 sippesū’ti janakacittaṃ upaṭṭhapetabbaṃ, ‘kathaṃ ayaṃ na parihāyeyyā’ti vaḍḍhicittaṃ upaṭṭhapetabbaṃ, ‘balavaṃ imaṃ karomi sikkhābalenā’ti cittaṃ upaṭṭhapetabbaṃ, mettacittaṃ upaṭṭhapetabbaṃ, āpadāsu na vijahitabbaṃ, karaṇīye nappamajjitabbaṃ, khalite dhammena paggahetabboti. Ime kho, bhante, pañcavīsati ācariyassa ācariyaguṇā, tehi guṇehi mayi sammā paṭipajjassu, saṃsayo me, bhante, uppanno, atthi meṇḍakapañhā jinabhāsitā , anāgate addhāne tattha viggaho uppajjissati, anāgate ca addhāne dullabhā bhavissanti tumhādisā buddhimanto, tesu me pañhesu cakkhuṃ dehi paravādānaṃ niggahāyā’’ti.
Footnotes:
