| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
ཨཱཙརིཡགུཎཾ
Ācariyaguṇaṃ
‘‘བྷནྟེ ནཱགསེན, ཨཡཾ བྷཱུམིབྷཱགོ ཨཊྛ མནྟདོསཝིཝཛྫིཏོ, ཨཧཉྩ ལོཀེ པརམོ མནྟིསཧཱཡོ 1, གུཡ྄ཧམནུརཀྑཱི ཙཱཧཾ ཡཱཝཱཧཾ ཛཱིཝིསྶཱམི ཏཱཝ གུཡ྄ཧམནུརཀྑིསྶཱམི, ཨཊྛཧི ཙ མེ ཀཱརཎེཧི བུདྡྷི པརིཎཱམཾ གཏཱ, དུལླབྷོ ཨེཏརཧི མཱདིསོ ཨནྟེཝཱསཱི, སམྨཱ པཊིཔནྣེ ཨནྟེཝཱསིཀེ ཡེ ཨཱཙརིཡཱནཾ པཉྩཝཱིསཏི ཨཱཙརིཡགུཎཱ, ཏེཧི གུཎེཧི ཨཱཙརིཡེན སམྨཱ པཊིཔཛྫིཏབྦཾ། ཀཏམེ པཉྩཝཱིསཏི གུཎཱ?
‘‘Bhante nāgasena, ayaṃ bhūmibhāgo aṭṭha mantadosavivajjito, ahañca loke paramo mantisahāyo 2, guyhamanurakkhī cāhaṃ yāvāhaṃ jīvissāmi tāva guyhamanurakkhissāmi, aṭṭhahi ca me kāraṇehi buddhi pariṇāmaṃ gatā, dullabho etarahi mādiso antevāsī, sammā paṭipanne antevāsike ye ācariyānaṃ pañcavīsati ācariyaguṇā, tehi guṇehi ācariyena sammā paṭipajjitabbaṃ. Katame pañcavīsati guṇā?
‘‘ཨིདྷ, བྷནྟེ ནཱགསེན, ཨཱཙརིཡེན ཨནྟེཝཱསིམྷི སཏཏཾ སམིཏཾ ཨཱརཀྑཱ ཨུཔཊྛཔེཏབྦཱ, ཨསེཝནསེཝནཱ ཛཱནིཏབྦཱ, པམཏྟཱཔྤམཏྟཱ ཛཱནིཏབྦཱ, སེཡྻཝཀཱསོ ཛཱནིཏབྦོ, གེལཉྙཾ ཛཱནིཏབྦཾ, བྷོཛནསྶ 3 ལདྡྷཱལདྡྷཾ ཛཱནིཏབྦཾ, ཝིསེསོ ཛཱནིཏབྦོ, པཏྟགཏཾ སཾཝིབྷཛིཏབྦཾ, ཨསྶཱསིཏབྦོ ‘མཱ བྷཱཡི, ཨཏྠོ ཏེ ཨབྷིཀྐམཏཱི’ཏི, ‘ཨིམིནཱ པུགྒལེན པཊིཙརཏཱི’ཏི 4 པཊིཙཱརོ ཛཱནིཏབྦོ, གཱམེ པཊིཙཱརོ ཛཱནིཏབྦོ, ཝིཧཱརེ པཊིཙཱརོ ཛཱནིཏབྦོ, ན ཏེན ཧཱསོ དཝོ ཀཱཏབྦོ 5, ཏེན སཧ ཨཱལཱཔོ ཀཱཏབྦོ, ཚིདྡཾ དིསྭཱ ཨདྷིཝཱསེཏབྦཾ, སཀྐཙྩཀཱརིནཱ བྷཝིཏབྦཾ, ཨཁཎྜཀཱརིནཱ བྷཝིཏབྦཾ, ཨརཧསྶཀཱརིནཱ བྷཝིཏབྦཾ, ནིརཝསེསཀཱརིནཱ བྷཝིཏབྦཾ, ‘ཛནེམིམཾ 6 སིཔྤེསཱུ’ཏི ཛནཀཙིཏྟཾ ཨུཔཊྛཔེཏབྦཾ, ‘ཀཐཾ ཨཡཾ ན པརིཧཱཡེཡྻཱ’ཏི ཝཌྜྷིཙིཏྟཾ ཨུཔཊྛཔེཏབྦཾ, ‘བལཝཾ ཨིམཾ ཀརོམི སིཀྑཱབལེནཱ’ཏི ཙིཏྟཾ ཨུཔཊྛཔེཏབྦཾ, མེཏྟཙིཏྟཾ ཨུཔཊྛཔེཏབྦཾ, ཨཱཔདཱསུ ན ཝིཛཧིཏབྦཾ, ཀརཎཱིཡེ ནཔྤམཛྫིཏབྦཾ, ཁལིཏེ དྷམྨེན པགྒཧེཏབྦོཏི། ཨིམེ ཁོ, བྷནྟེ, པཉྩཝཱིསཏི ཨཱཙརིཡསྶ ཨཱཙརིཡགུཎཱ, ཏེཧི གུཎེཧི མཡི སམྨཱ པཊིཔཛྫསྶུ, སཾསཡོ མེ, བྷནྟེ, ཨུཔྤནྣོ, ཨཏྠི མེཎྜཀཔཉྷཱ ཛིནབྷཱསིཏཱ , ཨནཱགཏེ ཨདྡྷཱནེ ཏཏྠ ཝིགྒཧོ ཨུཔྤཛྫིསྶཏི, ཨནཱགཏེ ཙ ཨདྡྷཱནེ དུལླབྷཱ བྷཝིསྶནྟི ཏུམྷཱདིསཱ བུདྡྷིམནྟོ, ཏེསུ མེ པཉྷེསུ ཙཀྑུཾ དེཧི པརཝཱདཱནཾ ནིགྒཧཱཡཱ’’ཏི།
‘‘Idha, bhante nāgasena, ācariyena antevāsimhi satataṃ samitaṃ ārakkhā upaṭṭhapetabbā, asevanasevanā jānitabbā, pamattāppamattā jānitabbā, seyyavakāso jānitabbo, gelaññaṃ jānitabbaṃ, bhojanassa 7 laddhāladdhaṃ jānitabbaṃ, viseso jānitabbo, pattagataṃ saṃvibhajitabbaṃ, assāsitabbo ‘mā bhāyi, attho te abhikkamatī’ti, ‘iminā puggalena paṭicaratī’ti 8 paṭicāro jānitabbo, gāme paṭicāro jānitabbo, vihāre paṭicāro jānitabbo, na tena hāso davo kātabbo 9, tena saha ālāpo kātabbo, chiddaṃ disvā adhivāsetabbaṃ, sakkaccakārinā bhavitabbaṃ, akhaṇḍakārinā bhavitabbaṃ, arahassakārinā bhavitabbaṃ, niravasesakārinā bhavitabbaṃ, ‘janemimaṃ 10 sippesū’ti janakacittaṃ upaṭṭhapetabbaṃ, ‘kathaṃ ayaṃ na parihāyeyyā’ti vaḍḍhicittaṃ upaṭṭhapetabbaṃ, ‘balavaṃ imaṃ karomi sikkhābalenā’ti cittaṃ upaṭṭhapetabbaṃ, mettacittaṃ upaṭṭhapetabbaṃ, āpadāsu na vijahitabbaṃ, karaṇīye nappamajjitabbaṃ, khalite dhammena paggahetabboti. Ime kho, bhante, pañcavīsati ācariyassa ācariyaguṇā, tehi guṇehi mayi sammā paṭipajjassu, saṃsayo me, bhante, uppanno, atthi meṇḍakapañhā jinabhāsitā , anāgate addhāne tattha viggaho uppajjissati, anāgate ca addhāne dullabhā bhavissanti tumhādisā buddhimanto, tesu me pañhesu cakkhuṃ dehi paravādānaṃ niggahāyā’’ti.
Footnotes:
