| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
11. ஆசரியானாசரியபஞ்ஹோ
11. Ācariyānācariyapañho
11. ‘‘ப⁴ந்தே, நாக³ஸேன, பா⁴ஸிதம்பேதங் ப⁴க³வதா –
11. ‘‘Bhante, nāgasena, bhāsitampetaṃ bhagavatā –
‘‘‘ந மே ஆசரியோ அத்தி², ஸதி³ஸோ மே ந விஜ்ஜதி;
‘‘‘Na me ācariyo atthi, sadiso me na vijjati;
ஸதே³வகஸ்மிங் லோகஸ்மிங், நத்தி² மே படிபுக்³க³லோ’தி 1.
Sadevakasmiṃ lokasmiṃ, natthi me paṭipuggalo’ti 2.
‘‘புன ச ப⁴ணிதங் ‘இதி கோ², பி⁴க்க²வே, ஆளாரோ காலாமோ ஆசரியோ மே ஸமானோ அந்தேவாஸிங் மங் ஸமானங் அத்தனா ஸமஸமங் ட²பேஸி, உளாராய ச மங் பூஜாய பூஜேஸீ’தி. யதி³, ப⁴ந்தே நாக³ஸேன, ததா²க³தேன ப⁴ணிதங் ‘ந மே ஆசரியோ அத்தி², ஸதி³ஸோ மே ந விஜ்ஜதி. ஸதே³வகஸ்மிங் லோகஸ்மிங், நத்தி² மே படிபுக்³க³லோ’தி, தேன ஹி ‘இதி கோ², பி⁴க்க²வே, ஆளாரோ காலாமோ ஆசரியோ மே ஸமானோ அந்தேவாஸிங் மங் ஸமானங் அத்தனா ஸமஸமங் ட²பேஸீ’தி யங் வசனங், தங் மிச்சா². யதி³ ததா²க³தேன ப⁴ணிதங் ‘இதி கோ², பி⁴க்க²வே, ஆளாரோ காலாமோ ஆசரியோ மே ஸமானோ அந்தேவாஸிங் மங் ஸமானங் அத்தனா ஸமஸமங் ட²பேஸீ’தி, தேன ஹி ‘ந மே ஆசரியோ அத்தி², ஸதி³ஸோ மே ந விஜ்ஜதி. ஸதே³வகஸ்மிங் லோகஸ்மிங், நத்தி² மே படிபுக்³க³லோ’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
‘‘Puna ca bhaṇitaṃ ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesi, uḷārāya ca maṃ pūjāya pūjesī’ti. Yadi, bhante nāgasena, tathāgatena bhaṇitaṃ ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti, tena hi ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesī’ti yaṃ vacanaṃ, taṃ micchā. Yadi tathāgatena bhaṇitaṃ ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesī’ti, tena hi ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங் , மஹாராஜ, ததா²க³தேன ‘ந மே ஆசரியோ அத்தி², ஸதி³ஸோ மே ந விஜ்ஜதி. ஸதே³வகஸ்மிங் லோகஸ்மிங், நத்தி² மே படிபுக்³க³லோ’தி, ப⁴ணிதஞ்ச ‘இதி கோ², பி⁴க்க²வே, ஆளாரோ காலாமோ ஆசரியோ மே ஸமானோ அந்தேவாஸிங் மங் ஸமானங் அத்தனா ஸமஸமங் ட²பேஸி, உளாராய ச மங் பூஜாய பூஜேஸீ’தி.
‘‘Bhāsitampetaṃ , mahārāja, tathāgatena ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti, bhaṇitañca ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesi, uḷārāya ca maṃ pūjāya pūjesī’ti.
‘‘தஞ்ச பன வசனங் புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஆசரியபா⁴வங் ஸந்தா⁴ய பா⁴ஸிதங்.
‘‘Tañca pana vacanaṃ pubbeva sambodhā anabhisambuddhassa bodhisattasseva sato ācariyabhāvaṃ sandhāya bhāsitaṃ.
‘பஞ்சிமே, மஹாராஜ, புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸ ஸதோ ஆசரியா, யேஹி அனுஸிட்டோ² போ³தி⁴ஸத்தோ தத்த² தத்த² தி³வஸங் வீதினாமேஸி. கதமே பஞ்ச? யே தே, மஹாராஜ, அட்ட² ப்³ராஹ்மணா ஜாதமத்தே போ³தி⁴ஸத்தே லக்க²ணானி பரிக்³க³ண்ஹிங்ஸு, ஸெய்யதீ²த³ங், ராமோ த⁴ஜோ லக்க²ணோ மந்தீ யஞ்ஞோ ஸுயாமோ ஸுபோ⁴ஜோ ஸுத³த்தோதி. தே தஸ்ஸ ஸொத்தி²ங் பவேத³யித்வா ரக்கா²கம்மங் அகங்ஸு, தே ச பட²மங் ஆசரியா.
‘Pañcime, mahārāja, pubbeva sambodhā anabhisambuddhassa bodhisattassa sato ācariyā, yehi anusiṭṭho bodhisatto tattha tattha divasaṃ vītināmesi. Katame pañca? Ye te, mahārāja, aṭṭha brāhmaṇā jātamatte bodhisatte lakkhaṇāni pariggaṇhiṃsu, seyyathīdaṃ, rāmo dhajo lakkhaṇo mantī yañño suyāmo subhojo sudattoti. Te tassa sotthiṃ pavedayitvā rakkhākammaṃ akaṃsu, te ca paṭhamaṃ ācariyā.
‘‘புன சபரங், மஹாராஜ, போ³தி⁴ஸத்தஸ்ஸ பிதா ஸுத்³தோ⁴த³னோ ராஜா யங் தேன ஸமயேன அபி⁴ஜாதங் உதி³ச்சஜாதிமந்தங் பத³கங் வெய்யாகரணங் ச²ளங்க³வந்தங் ஸப்³ப³மித்தங் நாம ப்³ராஹ்மணங் உபனெத்வா ஸோவண்ணேன பி⁴ங்கா³ரேன 3 உத³கங் ஓணோஜெத்வா ‘இமங் குமாரங் ஸிக்கா²பேஹீ’தி அதா³ஸி, அயங் து³தியோ ஆசரியோ.
‘‘Puna caparaṃ, mahārāja, bodhisattassa pitā suddhodano rājā yaṃ tena samayena abhijātaṃ udiccajātimantaṃ padakaṃ veyyākaraṇaṃ chaḷaṅgavantaṃ sabbamittaṃ nāma brāhmaṇaṃ upanetvā sovaṇṇena bhiṅgārena 4 udakaṃ oṇojetvā ‘imaṃ kumāraṃ sikkhāpehī’ti adāsi, ayaṃ dutiyo ācariyo.
‘‘புன சபரங், மஹாராஜ, யா ஸா தே³வதா போ³தி⁴ஸத்தங் ஸங்வேஜேஸீ, யஸ்ஸா வசனங் ஸுத்வா போ³தி⁴ஸத்தோ ஸங்விக்³கோ³ உப்³பி³க்³கோ³ தஸ்மிங் யேவ க²ணே நெக்க²ம்மங் நிக்க²மித்வா பப்³ப³ஜி, அயங் ததியோ ஆசரியோ.
‘‘Puna caparaṃ, mahārāja, yā sā devatā bodhisattaṃ saṃvejesī, yassā vacanaṃ sutvā bodhisatto saṃviggo ubbiggo tasmiṃ yeva khaṇe nekkhammaṃ nikkhamitvā pabbaji, ayaṃ tatiyo ācariyo.
‘‘புன சபரங், மஹாராஜ, ஆளாரோ காலாமோ ஆகிஞ்சஞ்ஞாயதனஸ்ஸ பரிகம்மங் ஆசிக்கி², அயங் சதுத்தோ² ஆசரியோ.
‘‘Puna caparaṃ, mahārāja, āḷāro kālāmo ākiñcaññāyatanassa parikammaṃ ācikkhi, ayaṃ catuttho ācariyo.
‘‘புன சபரங், மஹாராஜ, உத³கோ ராமபுத்தோ நேவஸஞ்ஞானாஸஞ்ஞாயதனஸ்ஸ பரிகம்மங் ஆசிக்கி² 5, அயங் பஞ்சமோ ஆசரியோ. இமே கோ², மஹாராஜ, புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸ ஸதோ பஞ்ச ஆசரியா. தே ச பன ஆசரியா லோகியே த⁴ம்மே. இமஸ்மிஞ்ச பன, மஹாராஜ, லோகுத்தரே த⁴ம்மே ஸப்³ப³ஞ்ஞுதஞாணப்படிவேதா⁴ய நத்தி² ததா²க³தஸ்ஸ அனுத்தரோ அனுஸாஸகோ, ஸயம்பூ⁴ , மஹாராஜ, ததா²க³தோ அனாசரியகோ, தஸ்மா காரணா ததா²க³தேன ப⁴ணிதங் ‘ந மே ஆசரியோ அத்தி², ஸதி³ஸோ மே ந விஜ்ஜதி. ஸதே³வகஸ்மிங் லோகஸ்மிங், நத்தி² மே படிபுக்³க³லோ’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Puna caparaṃ, mahārāja, udako rāmaputto nevasaññānāsaññāyatanassa parikammaṃ ācikkhi 6, ayaṃ pañcamo ācariyo. Ime kho, mahārāja, pubbeva sambodhā anabhisambuddhassa bodhisattassa sato pañca ācariyā. Te ca pana ācariyā lokiye dhamme. Imasmiñca pana, mahārāja, lokuttare dhamme sabbaññutañāṇappaṭivedhāya natthi tathāgatassa anuttaro anusāsako, sayambhū , mahārāja, tathāgato anācariyako, tasmā kāraṇā tathāgatena bhaṇitaṃ ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ஆசரியானாசரியபஞ்ஹோ ஏகாத³ஸமோ.
Ācariyānācariyapañho ekādasamo.
ஸந்த²வவக்³கோ³ பஞ்சமோ.
Santhavavaggo pañcamo.
இமஸ்மிங் வக்³கே³ ஏகாத³ஸ பஞ்ஹோ.
Imasmiṃ vagge ekādasa pañho.
மெண்ட³கபஞ்ஹோ நிட்டி²தோ.
Meṇḍakapañho niṭṭhito.
Footnotes:
