| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༡. ཨཱཙརིཡཱནཱཙརིཡཔཉྷོ
11. Ācariyānācariyapañho
༡༡. ‘‘བྷནྟེ, ནཱགསེན, བྷཱསིཏམྤེཏཾ བྷགཝཏཱ –
11. ‘‘Bhante, nāgasena, bhāsitampetaṃ bhagavatā –
‘‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི།
‘‘‘Na me ācariyo atthi, sadiso me na vijjati;
‘‘པུན ཙ བྷཎིཏཾ ‘ཨིཏི ཁོ, བྷིཀྑཝེ, ཨཱལཱ༹རོ ཀཱལཱམོ ཨཱཙརིཡོ མེ སམཱནོ ཨནྟེཝཱསིཾ མཾ སམཱནཾ ཨཏྟནཱ སམསམཾ ཋཔེསི, ཨུལཱ༹རཱཡ ཙ མཾ པཱུཛཱཡ པཱུཛེསཱི’ཏི། ཡདི, བྷནྟེ ནཱགསེན, ཏཐཱགཏེན བྷཎིཏཾ ‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི། སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ’ཏི, ཏེན ཧི ‘ཨིཏི ཁོ, བྷིཀྑཝེ, ཨཱལཱ༹རོ ཀཱལཱམོ ཨཱཙརིཡོ མེ སམཱནོ ཨནྟེཝཱསིཾ མཾ སམཱནཾ ཨཏྟནཱ སམསམཾ ཋཔེསཱི’ཏི ཡཾ ཝཙནཾ, ཏཾ མིཙྪཱ། ཡདི ཏཐཱགཏེན བྷཎིཏཾ ‘ཨིཏི ཁོ, བྷིཀྑཝེ, ཨཱལཱ༹རོ ཀཱལཱམོ ཨཱཙརིཡོ མེ སམཱནོ ཨནྟེཝཱསིཾ མཾ སམཱནཾ ཨཏྟནཱ སམསམཾ ཋཔེསཱི’ཏི, ཏེན ཧི ‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི། སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ’ཏི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
‘‘Puna ca bhaṇitaṃ ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesi, uḷārāya ca maṃ pūjāya pūjesī’ti. Yadi, bhante nāgasena, tathāgatena bhaṇitaṃ ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti, tena hi ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesī’ti yaṃ vacanaṃ, taṃ micchā. Yadi tathāgatena bhaṇitaṃ ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesī’ti, tena hi ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ , མཧཱརཱཛ, ཏཐཱགཏེན ‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི། སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ’ཏི, བྷཎིཏཉྩ ‘ཨིཏི ཁོ, བྷིཀྑཝེ, ཨཱལཱ༹རོ ཀཱལཱམོ ཨཱཙརིཡོ མེ སམཱནོ ཨནྟེཝཱསིཾ མཾ སམཱནཾ ཨཏྟནཱ སམསམཾ ཋཔེསི, ཨུལཱ༹རཱཡ ཙ མཾ པཱུཛཱཡ པཱུཛེསཱི’ཏི།
‘‘Bhāsitampetaṃ , mahārāja, tathāgatena ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti, bhaṇitañca ‘iti kho, bhikkhave, āḷāro kālāmo ācariyo me samāno antevāsiṃ maṃ samānaṃ attanā samasamaṃ ṭhapesi, uḷārāya ca maṃ pūjāya pūjesī’ti.
‘‘ཏཉྩ པན ཝཙནཾ པུབྦེཝ སམྦོདྷཱ ཨནབྷིསམྦུདྡྷསྶ བོདྷིསཏྟསྶེཝ སཏོ ཨཱཙརིཡབྷཱཝཾ སནྡྷཱཡ བྷཱསིཏཾ།
‘‘Tañca pana vacanaṃ pubbeva sambodhā anabhisambuddhassa bodhisattasseva sato ācariyabhāvaṃ sandhāya bhāsitaṃ.
‘པཉྩིམེ, མཧཱརཱཛ, པུབྦེཝ སམྦོདྷཱ ཨནབྷིསམྦུདྡྷསྶ བོདྷིསཏྟསྶ སཏོ ཨཱཙརིཡཱ, ཡེཧི ཨནུསིཊྛོ བོདྷིསཏྟོ ཏཏྠ ཏཏྠ དིཝསཾ ཝཱིཏིནཱམེསི། ཀཏམེ པཉྩ? ཡེ ཏེ, མཧཱརཱཛ, ཨཊྛ བྲཱཧྨཎཱ ཛཱཏམཏྟེ བོདྷིསཏྟེ ལཀྑཎཱནི པརིགྒཎྷིཾསུ, སེཡྻཐཱིདཾ, རཱམོ དྷཛོ ལཀྑཎོ མནྟཱི ཡཉྙོ སུཡཱམོ སུབྷོཛོ སུདཏྟོཏི། ཏེ ཏསྶ སོཏྠིཾ པཝེདཡིཏྭཱ རཀྑཱཀམྨཾ ཨཀཾསུ, ཏེ ཙ པཋམཾ ཨཱཙརིཡཱ།
‘Pañcime, mahārāja, pubbeva sambodhā anabhisambuddhassa bodhisattassa sato ācariyā, yehi anusiṭṭho bodhisatto tattha tattha divasaṃ vītināmesi. Katame pañca? Ye te, mahārāja, aṭṭha brāhmaṇā jātamatte bodhisatte lakkhaṇāni pariggaṇhiṃsu, seyyathīdaṃ, rāmo dhajo lakkhaṇo mantī yañño suyāmo subhojo sudattoti. Te tassa sotthiṃ pavedayitvā rakkhākammaṃ akaṃsu, te ca paṭhamaṃ ācariyā.
‘‘པུན ཙཔརཾ, མཧཱརཱཛ, བོདྷིསཏྟསྶ པིཏཱ སུདྡྷོདནོ རཱཛཱ ཡཾ ཏེན སམཡེན ཨབྷིཛཱཏཾ ཨུདིཙྩཛཱཏིམནྟཾ པདཀཾ ཝེཡྻཱཀརཎཾ ཚལ༹ངྒཝནྟཾ སབྦམིཏྟཾ ནཱམ བྲཱཧྨཎཾ ཨུཔནེཏྭཱ སོཝཎྞེན བྷིངྒཱརེན 3 ཨུདཀཾ ཨོཎོཛེཏྭཱ ‘ཨིམཾ ཀུམཱརཾ སིཀྑཱཔེཧཱི’ཏི ཨདཱསི, ཨཡཾ དུཏིཡོ ཨཱཙརིཡོ།
‘‘Puna caparaṃ, mahārāja, bodhisattassa pitā suddhodano rājā yaṃ tena samayena abhijātaṃ udiccajātimantaṃ padakaṃ veyyākaraṇaṃ chaḷaṅgavantaṃ sabbamittaṃ nāma brāhmaṇaṃ upanetvā sovaṇṇena bhiṅgārena 4 udakaṃ oṇojetvā ‘imaṃ kumāraṃ sikkhāpehī’ti adāsi, ayaṃ dutiyo ācariyo.
‘‘པུན ཙཔརཾ, མཧཱརཱཛ, ཡཱ སཱ དེཝཏཱ བོདྷིསཏྟཾ སཾཝེཛེསཱི, ཡསྶཱ ཝཙནཾ སུཏྭཱ བོདྷིསཏྟོ སཾཝིགྒོ ཨུབྦིགྒོ ཏསྨིཾ ཡེཝ ཁཎེ ནེཀྑམྨཾ ནིཀྑམིཏྭཱ པབྦཛི, ཨཡཾ ཏཏིཡོ ཨཱཙརིཡོ།
‘‘Puna caparaṃ, mahārāja, yā sā devatā bodhisattaṃ saṃvejesī, yassā vacanaṃ sutvā bodhisatto saṃviggo ubbiggo tasmiṃ yeva khaṇe nekkhammaṃ nikkhamitvā pabbaji, ayaṃ tatiyo ācariyo.
‘‘པུན ཙཔརཾ, མཧཱརཱཛ, ཨཱལཱ༹རོ ཀཱལཱམོ ཨཱཀིཉྩཉྙཱཡཏནསྶ པརིཀམྨཾ ཨཱཙིཀྑི, ཨཡཾ ཙཏུཏྠོ ཨཱཙརིཡོ།
‘‘Puna caparaṃ, mahārāja, āḷāro kālāmo ākiñcaññāyatanassa parikammaṃ ācikkhi, ayaṃ catuttho ācariyo.
‘‘པུན ཙཔརཾ, མཧཱརཱཛ, ཨུདཀོ རཱམཔུཏྟོ ནེཝསཉྙཱནཱསཉྙཱཡཏནསྶ པརིཀམྨཾ ཨཱཙིཀྑི 5, ཨཡཾ པཉྩམོ ཨཱཙརིཡོ། ཨིམེ ཁོ, མཧཱརཱཛ, པུབྦེཝ སམྦོདྷཱ ཨནབྷིསམྦུདྡྷསྶ བོདྷིསཏྟསྶ སཏོ པཉྩ ཨཱཙརིཡཱ། ཏེ ཙ པན ཨཱཙརིཡཱ ལོཀིཡེ དྷམྨེ། ཨིམསྨིཉྩ པན, མཧཱརཱཛ, ལོཀུཏྟརེ དྷམྨེ སབྦཉྙུཏཉཱཎཔྤཊིཝེདྷཱཡ ནཏྠི ཏཐཱགཏསྶ ཨནུཏྟརོ ཨནུསཱསཀོ, སཡམྦྷཱུ , མཧཱརཱཛ, ཏཐཱགཏོ ཨནཱཙརིཡཀོ, ཏསྨཱ ཀཱརཎཱ ཏཐཱགཏེན བྷཎིཏཾ ‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི། སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Puna caparaṃ, mahārāja, udako rāmaputto nevasaññānāsaññāyatanassa parikammaṃ ācikkhi 6, ayaṃ pañcamo ācariyo. Ime kho, mahārāja, pubbeva sambodhā anabhisambuddhassa bodhisattassa sato pañca ācariyā. Te ca pana ācariyā lokiye dhamme. Imasmiñca pana, mahārāja, lokuttare dhamme sabbaññutañāṇappaṭivedhāya natthi tathāgatassa anuttaro anusāsako, sayambhū , mahārāja, tathāgato anācariyako, tasmā kāraṇā tathāgatena bhaṇitaṃ ‘na me ācariyo atthi, sadiso me na vijjati. Sadevakasmiṃ lokasmiṃ, natthi me paṭipuggalo’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ཨཱཙརིཡཱནཱཙརིཡཔཉྷོ ཨེཀཱདསམོ།
Ācariyānācariyapañho ekādasamo.
སནྠཝཝགྒོ པཉྩམོ།
Santhavavaggo pañcamo.
ཨིམསྨིཾ ཝགྒེ ཨེཀཱདས པཉྷོ།
Imasmiṃ vagge ekādasa pañho.
མེཎྜཀཔཉྷོ ནིཊྛིཏོ།
Meṇḍakapañho niṭṭhito.
Footnotes:
