| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
аажарияабарамбарагат̇ааван̣н̣анаа
Ācariyaparamparakathāvaṇṇanā
гзнаабхад̇анд̇и имам̣ бан̃хам̣ виссаж̇ж̇знд̇зна ж̇амб̣уд̣̇ийбз д̇аава яаава д̇ад̇ияасан̇г̇ийд̇и, д̇аава д̣̇ассзд̇ваа ид̣̇аани сийхал̣ад̣̇ийбз аажарияабарамбарам̣ д̣̇ассзд̇ум̣ д̇ад̇ияасан̇г̇ахад̇о бана уд̣̇д̇ханд̇иаад̣̇и аарад̣̇д̇хам̣. имам̣ д̣̇ийбанд̇и д̇амб̣абан̣н̣ид̣̇ийбам̣. д̇асмим̣ д̣̇ийбз нисийд̣̇ид̇ваа аажариязна адтагат̇ааяа гад̇ад̇д̇аа ‘‘имам̣ д̣̇ийба’’нд̇и вуд̇д̇ам̣. ган̃жи гааланд̇и ажжанд̇асам̣яог̇з убаяог̇аважанам̣, гисмин̃жи гаалзд̇и ад̇т̇о. бораан̣аад̇и сийхал̣ад̣̇ийбз сийхал̣адтагат̇аагаарагаа. бхад̣̇д̣̇анаамод̇и бхад̣̇д̣̇асаалад̇т̇зро. ааг̇ум̣ баабам̣ на гаронд̇ийд̇и нааг̇аа. винаяабидагам̣ ваажаяим̣сууд̇и самб̣анд̇хо. д̇амб̣абан̣н̣ияаад̇и бхуммаважанам̣. нигааяз бан̃жаад̇и винаяаабхид̇хаммаанам̣ висум̣ г̇ахид̇ад̇д̇аа д̇аб̣б̣инимуд̇д̇аа бан̃жа нигааяаа г̇ахзд̇аб̣б̣аа. багаран̣зд̇и абхид̇хаммабагаран̣з ваажзсунд̇и яож̇анаа. д̇ийн̣и бидагаани свааг̇ад̇аани ассаад̇и ‘‘д̇збидаго’’д̇и вад̇д̇аб̣б̣з ‘‘д̇ибздаго’’д̇и чанд̣̇аанурагкан̣ад̇т̇ам̣ вуд̇д̇ам̣. д̇аарагарааж̇аад̇и жанд̣̇имаа. бубпанаамод̇и зд̇т̇а махаабад̣̇умад̇т̇зро суманад̇т̇зро жа н̃аад̇аб̣б̣од̇и д̣̇вигкад̇д̇ум̣ ‘‘бубпанаамо’’д̇и вуд̇д̇ам̣.
Kenābhatanti imaṃ pañhaṃ vissajjentena jambudīpe tāva yāva tatiyasaṅgīti, tāva dassetvā idāni sīhaḷadīpe ācariyaparamparaṃ dassetuṃ tatiyasaṅgahato pana uddhantiādi āraddhaṃ. Imaṃ dīpanti tambapaṇṇidīpaṃ. Tasmiṃ dīpe nisīditvā ācariyena aṭṭhakathāya katattā ‘‘imaṃ dīpa’’nti vuttaṃ. Kañci kālanti accantasaṃyoge upayogavacanaṃ, kismiñci kāleti attho. Porāṇāti sīhaḷadīpe sīhaḷaṭṭhakathākārakā. Bhaddanāmoti bhaddasālatthero. Āguṃ pāpaṃ na karontīti nāgā. Vinayapiṭakaṃ vācayiṃsūti sambandho. Tambapaṇṇiyāti bhummavacanaṃ. Nikāye pañcāti vinayābhidhammānaṃ visuṃ gahitattā tabbinimuttā pañca nikāyā gahetabbā. Pakaraṇeti abhidhammapakaraṇe vācesunti yojanā. Tīṇi piṭakāni svāgatāni assāti ‘‘tepiṭako’’ti vattabbe ‘‘tipeṭako’’ti chandānurakkhaṇatthaṃ vuttaṃ. Tārakarājāti candimā. Pupphanāmoti ettha mahāpadumatthero sumanatthero ca ñātabboti dvikkhattuṃ ‘‘pupphanāmo’’ti vuttaṃ.
ванаваасинд̇и ванаваасийрадтам̣. гарагавассанд̇и химабаад̇анагавассам̣, гарагад̇хаараасад̣̇исам̣ ваа вассам̣. хараабзд̇ваад̇и уд̣̇агогхзна хараабзд̇ваа. чиннабхиннабадад̇харод̇и сад̇т̇агзна чиннам̣ ран̇г̇зна бхиннам̣ бадам̣ д̇хааран̣аго. бхан̣д̣ууд̇и мун̣д̣аго. магкам̣ асахамаанод̇и т̇зрасса аанубхаавам̣ бадижжа ад̇д̇ано уббаннам̣ барзсам̣ г̇ун̣амагканалагкан̣ам̣ магкам̣ д̇ат̇аа бавад̇д̇ам̣ год̇хам̣ асахамаано. асанияо паланд̇ийд̇и г̇аж̇ж̇анд̇аа бад̇анд̇и. мз мама бхаяабхзравам̣ ж̇анзд̇ум̣ бадиб̣ало на асса на бхавзяяаад̇и яож̇анаа. ан̃н̃ад̣̇ад̇т̇ууд̇и згам̣сзна. гасмийраг̇анд̇хаараад̇и гасмийраг̇анд̇хаарарадтаваасино. исиваад̇абадиваад̇аад̇и бхигкуунам̣ жийваражаланагааяажаланзхи сан̃ж̇анид̇аваад̇зхи барид̇о саманд̇ад̇о б̣ийж̇аяамаанаа ахзсум̣. д̇хаммажагкунд̇и хздтаамаг̇г̇ад̇д̇аяз н̃аан̣ам̣. анамад̇аг̇г̇ияанд̇и анамад̇аг̇г̇асам̣яуд̇д̇ам̣ (сам̣. ни. 2.124 аад̣̇аяо). самад̇хигаанийд̇и саад̇хигаани. бан̃жа радтаанийд̇и бан̃жа жинарадтаани. взг̇асаад̇и взг̇зна. саманд̇ад̇о рагкам̣ табзсийд̇и д̇зсам̣ аббавзсанад̇т̇ааяа ад̇хидтаанавасзна рагкам̣ табзси. ад̣дхуд̣дхаани сахассаанийд̇и ад̣дхзна жад̇уд̇т̇аани ад̣дхуд̣дхаани, ад̇ирзгабан̃жасад̇аани д̇ийн̣и сахассаанийд̇и ад̇т̇о. д̣̇ияад̣дхасахассанд̇и ад̣дхзна д̣̇уд̇ияам̣ д̣̇ияад̣дхам̣, ад̇ирзгабан̃жасад̇игам̣ сахассанд̇и ад̇т̇о. нид̣̇д̇хамзд̇ваанаад̇и балаабзд̇ваа.
Vanavāsinti vanavāsīraṭṭhaṃ. Karakavassanti himapātanakavassaṃ, karakadhārāsadisaṃ vā vassaṃ. Harāpetvāti udakoghena harāpetvā. Chinnabhinnapaṭadharoti satthakena chinnaṃ raṅgena bhinnaṃ paṭaṃ dhāraṇako. Bhaṇḍūti muṇḍako. Makkhaṃ asahamānoti therassa ānubhāvaṃ paṭicca attano uppannaṃ paresaṃ guṇamakkhanalakkhaṇaṃ makkhaṃ tathā pavattaṃ kodhaṃ asahamāno. Asaniyo phalantīti gajjantā patanti. Me mama bhayabheravaṃ janetuṃ paṭibalo na assa na bhaveyyāti yojanā. Aññadatthūti ekaṃsena. Kasmīragandhārāti kasmīragandhāraraṭṭhavāsino. Isivātapaṭivātāti bhikkhūnaṃ cīvaracalanakāyacalanehi sañjanitavātehi parito samantato bījayamānā ahesuṃ. Dhammacakkhunti heṭṭhāmaggattaye ñāṇaṃ. Anamataggiyanti anamataggasaṃyuttaṃ (saṃ. ni. 2.124 ādayo). Samadhikānīti sādhikāni. Pañca raṭṭhānīti pañca cinaraṭṭhāni. Vegasāti vegena. Samantato rakkhaṃ ṭhapesīti tesaṃ appavesanatthāya adhiṭṭhānavasena rakkhaṃ ṭhapesi. Aḍḍhuḍḍhāni sahassānīti aḍḍhena catutthāni aḍḍhuḍḍhāni, atirekapañcasatāni tīṇi sahassānīti attho. Diyaḍḍhasahassanti aḍḍhena dutiyaṃ diyaḍḍhaṃ, atirekapañcasatikaṃ sahassanti attho. Niddhametvānāti palāpetvā.
рааж̇аг̇аханаг̇арабаривад̇д̇агзнаад̇и рааж̇аг̇аханаг̇арам̣ баривад̇д̇зд̇ваа д̇ад̇о б̣ахи д̇ам̣ бад̣̇агкин̣ам̣ гад̇ваа г̇ад̇амаг̇г̇зна, г̇аманзна ваа. ааробзсийд̇и бадибаад̣̇зси. бал̣инаад̇и аагаасам̣ багканд̣̇им̣су. наг̇уд̇д̇амзд̇и жзд̇ияаг̇иримааха. бурад̇од̇и баажийнад̣̇исаабхааг̇з. бурасздтассаад̇и сздтасса анураад̇хабурасса. силагуудамхийд̇и звам̣наамагз баб̣б̣ад̇агуудз. сийхагумаарасса буд̇д̇од̇и зд̇т̇а ‘‘галин̇г̇арааж̇ад̇хийд̇у гужчисмим̣ сийхасса ж̇аад̇о сийхагумааро’’д̇и вад̣̇анд̇и. ж̇здтамаасасса бун̣н̣амияам̣ ж̇здтанагкад̇д̇ам̣ ваа мууланагкад̇д̇ам̣ ваа ход̇ийд̇и ааха ‘‘ж̇здтамууланагкад̇д̇ам̣ наама ход̇ий’’д̇и. миг̇аанам̣ ваанад̇о хим̣санад̇о б̣аад̇ханад̇о миг̇авам̣, миг̇авиж̇жханагийл̣аа. рохид̇амиг̇аруубанд̇и г̇оган̣н̣амиг̇авзсам̣. рат̇аяадтиббамаан̣аад̇и рат̇абад̇од̣̇аббамаан̣аа. згаа лад̇ааяадти наамаад̇и згаа раж̇ад̇амаяаа ган̃жаналад̇ааяа бадиман̣д̣ид̇ад̇д̇аа звам̣ лад̣̇д̇ханаамаа. бубпаяадтияам̣ нийлаад̣̇ийни бубпаани, сагун̣аяадтияам̣ наанаббагаараа миг̇абагкино вижид̇д̇агаммагад̇аа вияа кааяанд̇ийд̇и д̣̇адтаб̣б̣ам̣. рааж̇агагуд̇хабхан̣д̣аанийд̇и рааж̇аарахауд̇д̇амабхан̣д̣аани. сан̇канд̇и д̣̇агкин̣ааваддам̣ абхисзгасан̇кам̣. вад̣дхамаананд̇и алан̇гааражун̣н̣ам̣, ‘‘нахаанажун̣н̣а’’нд̇и гзжи. вадам̣саганд̇и ган̣н̣абил̣анд̇ханам̣ вадам̣саганд̇и вуд̇д̇ам̣ ход̇и. нанд̣̇ияаавадданд̇и нанд̣̇ияааваддабубпаагаарзна ман̇г̇алад̇т̇ам̣ суван̣н̣зна гад̇ам̣. ган̃н̃анд̇и кад̇д̇ияагумаарим̣. хад̇т̇абун̃чананд̇и бийд̇аван̣н̣ам̣ махаг̇гхахад̇т̇абун̃чанавад̇т̇ам̣. арун̣аван̣н̣амад̇д̇иганд̇и нааг̇абхаванасамбхавам̣. вад̇т̇агодиганд̇и вад̇т̇аяуг̇амзва. нааг̇амаахаданд̇и нааг̇зхи аахадам̣. амад̇осад̇ханд̇и звам̣наамигаа г̇ул̣игаж̇аад̇и. амад̇асад̣̇исагижжад̇д̇аа звам̣ вужжад̇и. бхуумад̇т̇аран̣асан̇кзбзнаад̇и бхуумад̇т̇аран̣аагаарзна. уббаад̇абаатагаад̇и нимид̇д̇абаатагаа. алам̣ г̇ажчаамаад̇и ‘‘бурасса ажжаасаннад̇д̇аа сааруббам̣ на ход̇ий’’д̇и бадигкибанд̇о ааха. ад̣дханавамаанам̣ баан̣асахассаананд̇и (а. ни. 6.53) бан̃жасад̇аад̇хигаанам̣ адтаннам̣ баан̣асахассаанам̣. аббамаад̣̇асуд̇д̇анд̇и ан̇г̇уд̇д̇аранигааяз махаааббамаад̣̇асуд̇д̇ам̣, рааж̇оваад̣̇асуд̇д̇анд̇и вуд̇д̇ам̣ ход̇и.
Rājagahanagaraparivattakenāti rājagahanagaraṃ parivattetvā tato bahi taṃ padakkhiṇaṃ katvā gatamaggena, gamanena vā. Āropesīti paṭipādesi. Paḷināti ākāsaṃ pakkhandiṃsu. Naguttameti cetiyagirimāha. Puratoti pācīnadisābhāge. Puraseṭṭhassāti seṭṭhassa anurādhapurassa. Silakūṭamhīti evaṃnāmake pabbatakūṭe. Sīhakumārassa puttoti ettha ‘‘kaliṅgarājadhītu kucchismiṃ sīhassa jāto sīhakumāro’’ti vadanti. Jeṭṭhamāsassa puṇṇamiyaṃ jeṭṭhanakkhattaṃ vā mūlanakkhattaṃ vā hotīti āha ‘‘jeṭṭhamūlanakkhattaṃ nāma hotī’’ti. Migānaṃ vānato hiṃsanato bādhanato migavaṃ, migavijjhanakīḷā. Rohitamigarūpanti gokaṇṇamigavesaṃ. Rathayaṭṭhippamāṇāti rathapatodappamāṇā. Ekā latāyaṭṭhi nāmāti ekā rajatamayā kañcanalatāya paṭimaṇḍitattā evaṃ laddhanāmā. Pupphayaṭṭhiyaṃ nīlādīni pupphāni, sakuṇayaṭṭhiyaṃ nānappakārā migapakkhino vicittakammakatā viya khāyantīti daṭṭhabbaṃ. Rājakakudhabhaṇḍānīti rājārahauttamabhaṇḍāni. Saṅkhanti dakkhiṇāvaṭṭaṃ abhisekasaṅkhaṃ. Vaḍḍhamānanti alaṅkāracuṇṇaṃ, ‘‘nahānacuṇṇa’’nti keci. Vaṭaṃsakanti kaṇṇapiḷandhanaṃ vaṭaṃsakanti vuttaṃ hoti. Nandiyāvaṭṭanti nandiyāvaṭṭapupphākārena maṅgalatthaṃ suvaṇṇena kataṃ. Kaññanti khattiyakumāriṃ. Hatthapuñchananti pītavaṇṇaṃ mahagghahatthapuñchanavatthaṃ. Aruṇavaṇṇamattikanti nāgabhavanasambhavaṃ. Vatthakoṭikanti vatthayugameva. Nāgamāhaṭanti nāgehi āhaṭaṃ. Amatosadhanti evaṃnāmikā guḷikajāti. Amatasadisakiccattā evaṃ vuccati. Bhūmattharaṇasaṅkhepenāti bhūmattharaṇākārena. Uppātapāṭhakāti nimittapāṭhakā. Alaṃ gacchāmāti ‘‘purassa accāsannattā sāruppaṃ na hotī’’ti paṭikkhipanto āha. Aḍḍhanavamānaṃ pāṇasahassānanti (a. ni. 6.53) pañcasatādhikānaṃ aṭṭhannaṃ pāṇasahassānaṃ. Appamādasuttanti aṅguttaranikāye mahāappamādasuttaṃ, rājovādasuttanti vuttaṃ hoti.
махажжаад̇и махад̇аа. убасан̇гаманд̇од̇и ад̇ивияа гиланд̇аруубо худ̇ваа убасан̇гамийд̇и ад̇т̇о. д̇умхз ж̇аананад̇т̇анд̇и самб̣анд̇хо. бан̃жабан̣н̣аасааяаад̇и зд̇т̇а ‘‘жад̇убан̃н̃аасааяаад̇и вад̇д̇аб̣б̣ам̣. зван̃хи сад̇и убари вужжамаанам̣ д̣̇ваасадти араханд̇од̇и важанам̣ самзд̇ий’’д̇и саарад̇т̇ад̣̇ийбанияам̣ (саарад̇т̇а. дий. 1.аажарияабарамбарагат̇ааван̣н̣анаа) вуд̇д̇ам̣. д̣̇асабхаад̇игасамаагуланд̇и мудасивасса буд̇д̇зхи д̣̇зваанам̣бияад̇иссаад̣̇ийхи д̣̇асахи бхаад̇игзхи самаагин̣н̣ам̣. жирад̣̇идто саммаасамб̣уд̣̇д̇ход̇и д̇хаад̇уяо санд̇хааяааха. саб̣б̣ад̇аал̣ааважарзд̇и саб̣б̣аани д̇урияабхан̣д̣аани, д̇ам̣сахажарид̇з ваа ваад̣̇агз. убадтаабзд̇ваад̇и убахаарагаараабанавасзна саннибаад̇зд̇ваа. вад̣дхамаанагажчааяааяаад̇и бажчаабхад̇д̇ам̣. богкаравассанд̇и богкарабад̇д̇з вияа ад̇змид̇угаамаанам̣ убари ад̇змзд̇ваа бавад̇д̇анагавассам̣. махаавийрод̇и сад̇т̇увохаарзна д̇хаад̇у зва вуд̇д̇аа. бажчимад̣̇исаабхимукова худ̇ваа абасагганд̇од̇и зд̇т̇а бурад̇т̇аабхимуко тид̇ова бидтид̇о абасагганзна бажчимад̣̇исааяа г̇ажчанд̇о д̇аад̣̇исобасан̇гаманам̣ санд̇хааяа ‘‘бажчимад̣̇исаабхимуко’’д̇и вуд̇д̇о. ‘‘махзж̇авад̇т̇у наама звам̣наамагам̣ д̣̇звадтаана’’нд̇и вад̣̇анд̇и.
Mahaccāti mahatā. Upasaṅkamantoti ativiya kilantarūpo hutvā upasaṅkamīti attho. Tumhe jānanatthanti sambandho. Pañcapaṇṇāsāyāti ettha ‘‘catupaññāsāyāti vattabbaṃ. Evañhi sati upari vuccamānaṃ dvāsaṭṭhi arahantoti vacanaṃ sametī’’ti sāratthadīpaniyaṃ (sārattha. ṭī. 1.ācariyaparamparakathāvaṇṇanā) vuttaṃ. Dasabhātikasamākulanti muṭasivassa puttehi devānaṃpiyatissādīhi dasahi bhātikehi samākiṇṇaṃ. Ciradiṭṭho sammāsambuddhoti dhātuyo sandhāyāha. Sabbatāḷāvacareti sabbāni turiyabhaṇḍāni, taṃsahacarite vā vādake. Upaṭṭhāpetvāti upahārakārāpanavasena sannipātetvā. Vaḍḍhamānakacchāyāyāti pacchābhattaṃ. Pokkharavassanti pokkharapatte viya atemitukāmānaṃ upari atemetvā pavattanakavassaṃ. Mahāvīroti satthuvohārena dhātu eva vuttā. Pacchimadisābhimukhova hutvā apasakkantoti ettha puratthābhimukho ṭhitova piṭṭhito apasakkanena pacchimadisāya gacchanto tādisopasaṅkamanaṃ sandhāya ‘‘pacchimadisābhimukho’’ti vutto. ‘‘Mahejavatthu nāma evaṃnāmakaṃ devaṭṭhāna’’nti vadanti.
баж̇ж̇арагзнаад̇и амануссасамудтаабид̇зна баж̇ж̇арагарог̇зна. д̣̇звод̇и мзгхо. ануббавзжчийд̇и вимужжи. виваад̣̇о ход̇ийд̇и зд̇т̇а гирияаагааламабзгкид̇ваа вад̇д̇амаанаббаяог̇о д̣̇адтаб̣б̣о. звам̣ ийд̣̇исзсу саб̣б̣ад̇т̇а. д̇ад̣̇зд̇анд̇и таанам̣ д̇идтад̇ийд̇и самб̣анд̇хо. ‘‘чаннам̣ ван̣н̣аанам̣ самб̣анд̇хабхууд̇аанам̣ рам̣сияо жаа’’д̇и аж̇жхаахарид̇аб̣б̣ам̣, ‘‘чаннам̣ ван̣н̣аанам̣ уд̣̇агад̇хаараа жаа’’д̇и звамбзд̇т̇а самб̣анд̇хам̣ вад̣̇анд̇и. бариниб̣б̣уд̇зби бхаг̇авад̇и д̇ассаанубхаавзна зваруубам̣ баадихаарияам̣ ахоси зваад̇и д̣̇ассзд̇ум̣ звам̣ ажинд̇ияаад̇иаад̣̇иг̇аат̇амааха. рагкам̣ гаронд̇од̇и ад̇д̇анаа убааязна балаабид̇аанам̣ яагкаанам̣ буна аббависанад̇т̇ааяа барид̇д̇аанам̣ гаронд̇о. аавиж̇ж̇ийд̇и барияааяи.
Pajjarakenāti amanussasamuṭṭhāpitena pajjarakarogena. Devoti megho. Anuppavecchīti vimucci. Vivādo hotīti ettha kiriyākālamapekkhitvā vattamānappayogo daṭṭhabbo. Evaṃ īdisesu sabbattha. Tadetanti ṭhānaṃ tiṭṭhatīti sambandho. ‘‘Channaṃ vaṇṇānaṃ sambandhabhūtānaṃ raṃsiyo cā’’ti ajjhāharitabbaṃ, ‘‘channaṃ vaṇṇānaṃ udakadhārā cā’’ti evampettha sambandhaṃ vadanti. Parinibbutepi bhagavati tassānubhāvena evarūpaṃ pāṭihāriyaṃ ahosi evāti dassetuṃ evaṃ acintiyātiādigāthamāha. Rakkhaṃ karontoti attanā upāyena palāpitānaṃ yakkhānaṃ puna appavisanatthāya parittānaṃ karonto. Āvijjīti pariyāyi.
ран̃н̃о бхаад̇аад̇и ран̃н̃о ганидтабхаад̇аа. анул̣аад̣̇звий наама ран̃н̃о ж̇здтабхаад̇у ж̇ааяаа. сарасарам̣сиж̇аалависсаж̇ж̇анагзнаад̇и синид̣̇д̇хад̇ааяа расаванд̇ам̣ ож̇аванд̇ам̣ рам̣сиж̇аалам̣ виссаж̇ж̇знд̇зна. згад̣̇ивасзна аг̇амаасийд̇и самб̣анд̇хо. аббзсийд̇и лзкасаасанам̣ бад̇идтаабзси. уд̣̇игкад̇ийд̇и абзгкад̇и бад̇т̇зд̇и. бхаарияанд̇и г̇аругам̣, анад̇иггаманийяанд̇и ад̇т̇о. мам̣ бадимаанзд̇ийд̇и мам̣ уд̣̇игкад̇и. гаммаараван̣н̣анд̇и ран̃н̃о багад̇исуван̣н̣агаараван̣н̣ам̣. д̇ихад̇т̇авигкамбханд̇и д̇ихад̇т̇авид̇т̇аарам̣. сагалаж̇амб̣уд̣̇ийбараж̇ж̇знаад̇и зд̇т̇а ран̃н̃о ид̣̇анд̇и раж̇ж̇ам̣, сагалаж̇амб̣уд̣̇ийбад̇о уббаж̇ж̇анагаааяо жзва аан̣аад̣̇аяо жа, д̇зна бууж̇змийд̇и ад̇т̇о, на сагалабат̇авийбаасаад̣̇аад̣̇ивад̇т̇унаа д̇асса сад̇д̇аахам̣ д̣̇змийд̇иаад̣̇инаа гаалабарижчзд̣̇ам̣ гад̇ваа д̣̇аад̇ум̣ аяуд̇д̇ад̇д̇аа. зван̃хи д̣̇знд̇о д̇аавагаалигам̣ д̣̇зд̇и наама вад̇т̇убарижжааг̇алагкан̣ад̇д̇аа д̣̇аанасса, бат̇аваад̣̇ивад̇т̇убарижжааг̇зна жа буна г̇ахан̣асса аяуд̇д̇ад̇д̇аа. нияамид̇агаалз бана ааяаад̣̇аяо барижжад̇д̇аа зваад̇и д̇ад̇о барам̣ абарижжад̇д̇ад̇д̇аа г̇ахзд̇ум̣ ваддад̇и. д̇асмаа вуд̇д̇анаязнзд̇т̇а ид̇о барамби ааяаад̣̇ид̣̇аанавасзнзва раж̇ж̇ад̣̇аанам̣ взд̣̇ид̇аб̣б̣ам̣. бубпул̣агаа худ̇ваад̇и гзд̇агийбаарохан̇гураа вияа уд̣̇агабубпул̣агаагаараа худ̇ваа. г̇авагкаж̇ааласад̣̇исанд̇и бхааванабум̣сагам̣, ваад̇абаанзсу ж̇аалаагаарзна табид̇ад̣̇аарубадасад̣̇исанд̇и ад̇т̇о, г̇авагкзна жа суд̇д̇аад̣̇имаяаж̇аалзна жа сад̣̇исанд̇и ваа ад̇т̇о.
Raññobhātāti rañño kaniṭṭhabhātā. Anuḷādevī nāma rañño jeṭṭhabhātu jāyā. Sarasaraṃsijālavissajjanakenāti siniddhatāya rasavantaṃ ojavantaṃ raṃsijālaṃ vissajjentena. Ekadivasena agamāsīti sambandho. Appesīti lekhasāsanaṃ patiṭṭhāpesi. Udikkhatīti apekkhati pattheti. Bhāriyanti garukaṃ, anatikkamanīyanti attho. Maṃ paṭimānetīti maṃ udikkhati. Kammāravaṇṇanti rañño pakatisuvaṇṇakāravaṇṇaṃ. Tihatthavikkhambhanti tihatthavitthāraṃ. Sakalajambudīparajjenāti ettha rañño idanti rajjaṃ, sakalajambudīpato uppajjanakaāyo ceva āṇādayo ca, tena pūjemīti attho, na sakalapathavīpāsādādivatthunā tassa sattāhaṃ demītiādinā kālaparicchedaṃ katvā dātuṃ ayuttattā. Evañhi dento tāvakālikaṃ deti nāma vatthupariccāgalakkhaṇattā dānassa, pathavādivatthupariccāgena ca puna gahaṇassa ayuttattā. Niyamitakāle pana āyādayo pariccattā evāti tato paraṃ apariccattattā gahetuṃ vaṭṭati. Tasmā vuttanayenettha ito parampi āyādidānavaseneva rajjadānaṃ veditabbaṃ. Pupphuḷakā hutvāti ketakīpārohaṅkurā viya udakapupphuḷakākārā hutvā. Gavakkhajālasadisanti bhāvanapuṃsakaṃ, vātapānesu jālākārena ṭhapitadārupaṭasadisanti attho, gavakkhena ca suttādimayajālena ca sadisanti vā attho.
д̣̇звад̣̇унд̣̇убхияод̇и зд̇т̇а д̣̇звод̇и мзгхо, д̇асса ажчасугкад̇ааяа аагаасамива кааяамаанасса анимид̇д̇аг̇аж̇ж̇ид̇ам̣ д̣̇звад̣̇унд̣̇убхи наама, яам̣ ‘‘аагаасад̣̇унд̣̇убхий’’д̇иби вад̣̇анд̇и. палим̣сууд̇и т̇аним̣су. баб̣б̣ад̇аанам̣ нажжзхийд̇и бат̇авийгамбзна ид̇о жид̇о жа бхаманд̇аанам̣ баб̣б̣ад̇аанам̣ нажжзхи. вимхаяаж̇аад̇аа яагкаа ‘‘хи’’нд̇исад̣̇д̣̇ам̣ нижчаарзнд̇ийд̇и ааха ‘‘яагкаанам̣ хин̇гаарзхий’’д̇и. сагасагабадибхаанзхийд̇и ад̇д̇ано ад̇д̇ано сиббагосаллзхи. абхисзгам̣ д̣̇ад̇ваад̇и анод̇ад̇д̇ад̣̇аход̣̇агзна абхисзгам̣ д̣̇ад̇ваа.
Devadundubhiyoti ettha devoti megho, tassa acchasukkhatāya ākāsamiva khāyamānassa animittagajjitaṃ devadundubhi nāma, yaṃ ‘‘ākāsadundubhī’’tipi vadanti. Phaliṃsūti thaniṃsu. Pabbatānaṃnaccehīti pathavīkampena ito cito ca bhamantānaṃ pabbatānaṃ naccehi. Vimhayajātā yakkhā ‘‘hi’’ntisaddaṃ nicchārentīti āha ‘‘yakkhānaṃ hiṅkārehī’’ti. Sakasakapaṭibhānehīti attano attano sippakosallehi. Abhisekaṃ datvāti anotattadahodakena abhisekaṃ datvā.
д̣̇звад̇аагулаанийд̇и махааб̣од̇хим̣ бариваарзд̇ваа тид̇анааг̇аяагкаад̣̇ид̣̇звад̇аагулаани д̣̇ад̇ваад̇и самб̣анд̇хо. г̇обагарааж̇агаммино д̇ат̇аа ‘‘д̇аражчаа’’д̇и вад̣̇анд̇и. иминаа бариваарзнаад̇и сахад̇т̇з гаран̣аважанам̣, иминаа бариваарзна сахаад̇и ад̇т̇о. д̇аамалид̇д̇инд̇и звам̣наамагам̣ самуд̣̇д̣̇ад̇ийрз бадданам̣. ид̣̇амасса д̇ад̇ияанд̇и суван̣н̣агадаахз бад̇идтид̇асаакааб̣од̇хияаа раж̇ж̇асамбад̣̇аанам̣ санд̇хааяа вуд̇д̇ам̣. д̇ад̇о бана буб̣б̣з згаваарам̣ раж̇ж̇асамбад̣̇аанам̣ ажчиннааяа саакааяа махааб̣од̇хияаа зва гад̇ам̣, д̇зна сад̣̇д̇хим̣ жад̇угкад̇д̇ум̣ рааж̇аа раж̇ж̇зна бууж̇зси. раж̇ж̇зна бууж̇ид̇ад̣̇ивасзсу гира сагалад̣̇ийбад̇о уббаннам̣ ааяам̣ г̇ахзд̇ваа махааб̣од̇химзва бууж̇зси.
Devatākulānīti mahābodhiṃ parivāretvā ṭhitanāgayakkhādidevatākulāni datvāti sambandho. Gopakarājakammino tathā ‘‘taracchā’’ti vadanti. Iminā parivārenāti sahatthe karaṇavacanaṃ, iminā parivārena sahāti attho. Tāmalittinti evaṃnāmakaṃ samuddatīre paṭṭanaṃ. Idamassa tatiyanti suvaṇṇakaṭāhe patiṭṭhitasākhābodhiyā rajjasampadānaṃ sandhāya vuttaṃ. Tato pana pubbe ekavāraṃ rajjasampadānaṃ acchinnāya sākhāya mahābodhiyā eva kataṃ, tena saddhiṃ catukkhattuṃ rājā rajjena pūjesi. Rajjena pūjitadivasesu kira sakaladīpato uppannaṃ āyaṃ gahetvā mahābodhimeva pūjesi.
батамабаадибад̣̇ад̣̇ивасзд̇и суггабагкабаадибад̣̇ад̣̇ивасз. д̇ан̃хи ган̣хабагкабаадибад̣̇ад̣̇ивасам̣ абзгкид̇ваа ‘‘батамабаадибад̣̇ад̣̇иваса’’нд̇и вуд̇д̇ам̣, ид̣̇ан̃жа д̇асмим̣ д̇амб̣абан̣н̣ид̣̇ийбз вохаарам̣ г̇ахзд̇ваа вуд̇д̇ам̣, ид̇ха бана бун̣н̣амид̇о бадтааяа яаава абараа бун̣н̣амий, д̇аава зго маасод̇и вохааро. д̇асмаа иминаа вохаарзна ‘‘д̣̇уд̇ияабаадибад̣̇ад̣̇ивасз’’д̇и вад̇д̇аб̣б̣ам̣ сияаа ган̣хабагкабаадибад̣̇асса ид̇ха батамабаадибад̣̇ад̇д̇аа. г̇ажчад̇и вад̇арзд̇и зд̇т̇а арзд̇и кзд̣̇з. саманд̇ааяож̇ананд̇и ажжанд̇асам̣яог̇з убаяог̇аважанам̣, яож̇анаббамаан̣з бад̣̇зсз саб̣б̣ад̇т̇аад̇и ад̇т̇о. субан̣н̣аруубзнаад̇и махааб̣од̇хим̣ б̣алаггаарзна г̇ахзд̇ваа нааг̇абхаванам̣ нзд̇угаамаани нааг̇арааж̇агулаани ид̣̇д̇хияаа г̇ахид̇зна г̇арул̣аруубзна санд̇аасзд̇и. д̇ам̣ вибхууд̇им̣ бассид̇ваад̇и д̣̇звад̇аад̣̇ийхи гарийяамаанам̣ бууж̇аамахад̇д̇ам̣, махааб̣од̇хияаа жа аанубхаавамахад̇д̇ам̣ д̣̇исваа саяамби д̇ат̇аа бууж̇зд̇угаамаа т̇зрим̣ яаажид̇ваад̇и яож̇анаа. самуд̣̇д̣̇асаалавад̇т̇усминд̇и яасмим̣ бад̣̇зсз тад̇ваа рааж̇аа самуд̣̇д̣̇з ааг̇ажчанд̇ам̣ б̣од̇хим̣ т̇зраанубхаавзна ад̣̇д̣̇аса, яад̇т̇а жа бажчаа самуд̣̇д̣̇асса д̣̇идтадтаананд̇и багаасзд̇ум̣ самуд̣̇д̣̇асаалам̣ наама саалам̣ агам̣су, д̇асмим̣ самуд̣̇д̣̇асаалааяа вад̇т̇убхууд̇з бад̣̇зсз. т̇зрассаад̇и махаамахинд̣̇ад̇т̇зрасса. бубпааг̇гхияаанийд̇и гуудааг̇аарасад̣̇исаани бубпажзд̇ияаани. ааг̇ад̇о вад̇арзд̇и зд̇т̇а арзд̇и бамод̣̇з. адтахи амажжагулзхи адтахи б̣раахман̣агулзхи жаад̇и сол̣асахи ж̇аад̇исамбаннагулзхи. раж̇ж̇ам̣ вижаарзсийд̇и раж̇ж̇ам̣ вижаарзд̇ум̣ виссаж̇ж̇зси. рааж̇авад̇т̇уд̣̇ваарагодтагадтаанзд̇и рааж̇уяяаанасса д̣̇ваарагодтагадтаанз. анубуб̣б̣авибассананд̇и уд̣̇аяаб̣б̣аяаад̣̇ианубуб̣б̣авибассанам̣. ‘‘саха б̣од̇хибад̇идтаанзнаа’’д̇и гаран̣аважанзна вад̇д̇аб̣б̣з вибхад̇д̇ибарин̣аамзна ‘‘саха б̣од̇хибад̇идтаанаа’’д̇и ниссаггаважанам̣ гад̇ам̣. сад̇и хи сахасад̣̇д̣̇аббаяог̇з гаран̣аважанзнзва бхавид̇аб̣б̣ам̣. д̣̇ассим̣сууд̇и бан̃н̃ааяим̣су. махаааасанадтаанзд̇и буб̣б̣абассз махаасилаасанзна бад̇идтид̇адтаанз. бууж̇зд̇ваа ванд̣̇ийд̇и ааг̇ааминам̣ махаажзд̇ияам̣ ванд̣̇и. буримз бана махаавихаарадтаанз бууж̇аамад̇д̇ассзва гад̇ад̇д̇аа анааг̇ад̇з сан̇гхассаби навагад̇аа аванд̣̇ид̇аб̣б̣ад̇аа жа багаасид̇аад̇и взд̣̇ид̇аб̣б̣аа. анааг̇ад̇з бана мзд̇д̇зяяаад̣̇иб̣уд̣̇д̇хаа бажжзгаб̣уд̣̇д̇хаа жа б̣уд̣̇д̇хабхаавагкан̣ам̣ уд̣̇д̣̇исса ванд̣̇ид̇аб̣б̣аава сабхаавзна висидтабуг̇г̇алад̇д̇аад̇и г̇ахзд̇аб̣б̣ам̣.
Paṭhamapāṭipadadivaseti sukkapakkhapāṭipadadivase. Tañhi kaṇhapakkhapāṭipadadivasaṃ apekkhitvā ‘‘paṭhamapāṭipadadivasa’’nti vuttaṃ, idañca tasmiṃ tambapaṇṇidīpe vohāraṃ gahetvā vuttaṃ, idha pana puṇṇamito paṭṭhāya yāva aparā puṇṇamī, tāva eko māsoti vohāro. Tasmā iminā vohārena ‘‘dutiyapāṭipadadivase’’ti vattabbaṃ siyā kaṇhapakkhapāṭipadassa idha paṭhamapāṭipadattā. Gacchati vatareti ettha areti khede. Samantāyojananti accantasaṃyoge upayogavacanaṃ, yojanappamāṇe padese sabbatthāti attho. Supaṇṇarūpenāti mahābodhiṃ balakkārena gahetvā nāgabhavanaṃ netukāmāni nāgarājakulāni iddhiyā gahitena garuḷarūpena santāseti. Taṃ vibhūtiṃ passitvāti devatādīhi karīyamānaṃ pūjāmahattaṃ, mahābodhiyā ca ānubhāvamahattaṃ disvā sayampi tathā pūjetukāmā theriṃ yācitvāti yojanā. Samuddasālavatthusminti yasmiṃ padese ṭhatvā rājā samudde āgacchantaṃ bodhiṃ therānubhāvena addasa, yattha ca pacchā samuddassa diṭṭhaṭṭhānanti pakāsetuṃ samuddasālaṃ nāma sālaṃ akaṃsu, tasmiṃ samuddasālāya vatthubhūte padese. Therassāti mahāmahindattherassa. Pupphaagghiyānīti kūṭāgārasadisāni pupphacetiyāni. Āgato vatareti ettha areti pamode. Aṭṭhahi amaccakulehi aṭṭhahi brāhmaṇakulehi cāti soḷasahi jātisampannakulehi. Rajjaṃ vicāresīti rajjaṃ vicāretuṃ vissajjesi. Rājavatthudvārakoṭṭhakaṭṭhāneti rājuyyānassa dvārakoṭṭhakaṭṭhāne. Anupubbavipassananti udayabbayādianupubbavipassanaṃ. ‘‘Saha bodhipatiṭṭhānenā’’ti karaṇavacanena vattabbe vibhattipariṇāmena ‘‘saha bodhipatiṭṭhānā’’ti nissakkavacanaṃ kataṃ. Sati hi sahasaddappayoge karaṇavacaneneva bhavitabbaṃ. Dassiṃsūti paññāyiṃsu. Mahāāsanaṭṭhāneti pubbapasse mahāsilāsanena patiṭṭhitaṭṭhāne. Pūjetvā vandīti āgāminaṃ mahācetiyaṃ vandi. Purime pana mahāvihāraṭṭhāne pūjāmattasseva katattā anāgate saṅghassapi navakatā avanditabbatā ca pakāsitāti veditabbā. Anāgate pana metteyyādibuddhā paccekabuddhā ca buddhabhāvakkhaṇaṃ uddissa vanditabbāva sabhāvena visiṭṭhapuggalattāti gahetabbaṃ.
махаааридтод̇и бан̃жабан̃н̃аасааяа бхаад̇угзхи сад̣̇д̇хим̣ жзд̇ияаг̇иримхи баб̣б̣аж̇ид̇ам̣ санд̇хааяа вуд̇д̇ам̣. мзгхаван̣н̣аабхаяаамажжасса баривзн̣адтаанзд̇и мзгхаван̣н̣аабхаяасса ран̃н̃о амажжзна гад̇д̇аб̣б̣асса баривзн̣асса вад̇т̇убхууд̇з таанз. ман̇г̇аланимид̇д̇абхаавзна аагаасз самуббанно манохарасад̣̇д̣̇о аагаасасса раво вияа ход̇ийд̇и вуд̇д̇ам̣ ‘‘аагаасам̣ махаавиравам̣ равий’’д̇и. на хи аагаасо наама гожи д̇хаммо ад̇т̇и, яо сад̣̇д̣̇ам̣ самудтаабзяяа, аагаасаг̇ад̇ауд̇увисзсасамудтид̇ова со сад̣̇д̣̇од̇и г̇ахзд̇аб̣б̣о. батамагад̇д̇игабавааран̣ад̣̇ивасз…бз… винаяабидагам̣ багаасзсийд̇и ид̣̇ам̣ винаяам̣ ваажзд̇ум̣ аарад̣̇д̇хад̣̇ивасам̣ санд̇хааяа вуд̇д̇ам̣. анусидтигараананд̇и анусаасанийгараанам̣. рааж̇инод̇и убаяог̇ад̇т̇з саамиважанам̣, д̣̇зваанам̣бияад̇иссарааж̇аананд̇и ад̇т̇о. ан̃н̃збийд̇и махинд̣̇аад̣̇ийхи адтасадтимахаат̇зрзхи ан̃н̃зби, д̇зсам̣ саруубам̣ д̣̇ассзнд̇о ааха д̇зсам̣ т̇зраананд̇иаад̣̇и. д̇ад̇т̇а д̇зсам̣ т̇зраанам̣ анд̇зваасигаад̇и махинд̣̇ад̇т̇зраад̣̇ийнам̣ адтасадтимахаат̇зраанам̣ аридтаад̣̇аяо анд̇зваасигаа жа махаааридтад̇т̇зрасса анд̇зваасигаа д̇иссад̣̇ад̇д̇агаал̣асуманаад̣̇аяо жаад̇и яож̇зд̇аб̣б̣ам̣. анд̇зваасигаанам̣ анд̇зваасигаад̇и убхаяад̇т̇а вуд̇д̇аанд̇зваасигаанам̣ анд̇зваасигабарамбараа жаад̇и ад̇т̇о. буб̣б̣з вуд̇д̇аббагаараад̇и махинд̣̇о иддияо уд̇д̇ияод̇иаад̣̇иг̇аат̇аахи (баараа. адта. 1.д̇ад̇ияасан̇г̇ийд̇игат̇аа) багаасид̇аа аажарияабарамбараа.
Mahāariṭṭhoti pañcapaññāsāya bhātukehi saddhiṃ cetiyagirimhi pabbajitaṃ sandhāya vuttaṃ. Meghavaṇṇābhayaamaccassa pariveṇaṭṭhāneti meghavaṇṇaabhayassa rañño amaccena kattabbassa pariveṇassa vatthubhūte ṭhāne. Maṅgalanimittabhāvena ākāse samuppanno manoharasaddo ākāsassa ravo viya hotīti vuttaṃ ‘‘ākāsaṃ mahāviravaṃ ravī’’ti. Na hi ākāso nāma koci dhammo atthi, yo saddaṃ samuṭṭhāpeyya, ākāsagatautuvisesasamuṭṭhitova so saddoti gahetabbo. Paṭhamakattikapavāraṇadivase…pe… vinayapiṭakaṃ pakāsesīti idaṃ vinayaṃ vācetuṃ āraddhadivasaṃ sandhāya vuttaṃ. Anusiṭṭhikarānanti anusāsanīkarānaṃ. Rājinoti upayogatthe sāmivacanaṃ, devānaṃpiyatissarājānanti attho. Aññepīti mahindādīhi aṭṭhasaṭṭhimahātherehi aññepi, tesaṃ sarūpaṃ dassento āha tesaṃ therānantiādi. Tattha tesaṃ therānaṃ antevāsikāti mahindattherādīnaṃ aṭṭhasaṭṭhimahātherānaṃ ariṭṭhādayo antevāsikā ca mahāariṭṭhattherassa antevāsikā tissadattakāḷasumanādayo cāti yojetabbaṃ. Antevāsikānaṃ antevāsikāti ubhayattha vuttaantevāsikānaṃ antevāsikaparamparā cāti attho. Pubbe vuttappakārāti mahindo iṭṭiyo uttiyotiādigāthāhi (pārā. aṭṭha. 1.tatiyasaṅgītikathā) pakāsitā ācariyaparamparā.
на баг̇гхарад̇ийд̇и на г̇ал̣ад̇и, на бамуссад̇ийд̇и ад̇т̇о. сад̇иг̇ад̇ид̇хид̇иманд̇зсууд̇и зд̇т̇а сад̇ийд̇и уг̇г̇ахад̇хааран̣з сад̇и. г̇ад̇ийд̇и сад̣̇д̣̇ад̇т̇авибхааг̇аг̇г̇ахан̣з н̃аан̣ам̣. д̇хид̇ийд̇и уг̇г̇ахабарихаран̣аад̣̇ийсу вийрияам̣. гуггужжагзсууд̇и ‘‘габбад̇и на габбад̇ий’’д̇и виймам̣сагуггужжагаарийсу. маад̇аабид̇удтаанияод̇и вад̇ваа д̇амзвад̇т̇ам̣ самад̇т̇зд̇ум̣ ааха д̇ад̣̇ааяад̇д̇аахийд̇иаад̣̇и. винаяабарияад̇д̇им̣ ниссааяаад̇и винаяабидагабарияаабун̣анам̣ ниссааяа. ад̇д̇ано сийлагканд̇хо суг̇уд̇д̇од̇и лаж̇ж̇ино винаяад̇хааран̣асса алаж̇ж̇иан̃н̃аан̣ад̇аад̣̇ийхи чахи аагаарзхи аабад̇д̇ияаа анаабаж̇ж̇анад̇о ад̇д̇ано сийлагканд̇хо кан̣д̣аад̣̇ид̣̇осавирахид̇о суг̇уд̇д̇о сурагкид̇о ход̇и. гуггужжабагад̇аананд̇и габбияаагаббияам̣ ниссааяа уббаннзна гуггужжзна багад̇аанам̣ убад̣̇д̣̇уд̇аанам̣ абхибхууд̇аанам̣ яат̇аавинаяам̣ гуггужжам̣ винод̣̇зд̇ваа суд̣̇д̇ханд̇з бад̇идтаабанзна бадисаран̣ам̣ ход̇и. виг̇ад̇о саарад̣̇о бхаяамзд̇ассаад̇и висаарад̣̇о. ‘‘звам̣ гат̇знд̇асса д̣̇осо звам̣ на д̣̇осо’’д̇и н̃ад̇ваава гат̇анад̇о ниб̣бхаяова сан̇гхамаж̇жхз вохарад̇и . бажжад̇т̇игзд̇и ад̇д̇абажжад̇т̇игз жзва важ̇ж̇ибуд̇д̇агаад̣̇исаасанабажжад̇т̇игз жа. сахад̇хаммзнаад̇и сагааран̣зна важанзна сигкаабад̣̇ам̣ д̣̇ассзд̇ваа яат̇аа д̇з асад̣̇д̇хаммам̣ бад̇идтаабзд̇ум̣ на саггонд̇и, звам̣ суниг̇г̇ахид̇ам̣ гад̇ваа ниг̇г̇ан̣хаад̇и. сад̣̇д̇хаммадтид̇ияаад̇и барияад̇д̇ибадибад̇д̇ибадивзд̇хасан̇каад̇асса д̇ивид̇хассааби сад̣̇д̇хаммасса тид̇ияаа, бавад̇д̇ияаад̇и ад̇т̇о.
Na paggharatīti na gaḷati, na pamussatīti attho. Satigatidhitimantesūti ettha satīti uggahadhāraṇe sati. Gatīti saddatthavibhāgaggahaṇe ñāṇaṃ. Dhitīti uggahapariharaṇādīsu vīriyaṃ. Kukkuccakesūti ‘‘kappati na kappatī’’ti vīmaṃsakukkuccakārīsu. Mātāpituṭṭhāniyoti vatvā tamevatthaṃ samatthetuṃ āha tadāyattāhītiādi. Vinayapariyattiṃ nissāyāti vinayapiṭakapariyāpuṇanaṃ nissāya. Attano sīlakkhandho suguttoti lajjino vinayadhāraṇassa alajjiaññāṇatādīhi chahi ākārehi āpattiyā anāpajjanato attano sīlakkhandho khaṇḍādidosavirahito sugutto surakkhito hoti. Kukkuccapakatānanti kappiyākappiyaṃ nissāya uppannena kukkuccena pakatānaṃ upaddutānaṃ abhibhūtānaṃ yathāvinayaṃ kukkuccaṃ vinodetvā suddhante patiṭṭhāpanena paṭisaraṇaṃ hoti. Vigato sārado bhayametassāti visārado. ‘‘Evaṃ kathentassa doso evaṃ na doso’’ti ñatvāva kathanato nibbhayova saṅghamajjhe voharati. Paccatthiketi attapaccatthike ceva vajjiputtakādisāsanapaccatthike ca. Sahadhammenāti sakāraṇena vacanena sikkhāpadaṃ dassetvā yathā te asaddhammaṃ patiṭṭhāpetuṃ na sakkonti, evaṃ suniggahitaṃ katvā niggaṇhāti. Saddhammaṭṭhitiyāti pariyattipaṭipattipaṭivedhasaṅkhātassa tividhassāpi saddhammassa ṭhitiyā, pavattiyāti attho.
винаяо сам̣варад̇т̇ааяаад̇иаад̣̇ийсу винаяабарияаабун̣анам̣ винаяо, винаяабан̃н̃ад̇д̇и ваа гааяаважийд̣̇ваарасам̣варад̇т̇ааяа. авиббадисаарод̇и гад̇аагад̇ам̣ ниссааяа виббадисаараабхааво санд̇аабаабхааво. баамож̇ж̇ам̣ д̇арун̣абийд̇и. бийд̇и наама б̣алавабийд̇и. бассад̣̇д̇хийд̇и гааяажид̇д̇абассад̣̇д̇хи. яат̇аабхууд̇ан̃аан̣ад̣̇ассананд̇и саббажжаяанаамаруубабариг̇г̇ахо. ниб̣б̣ид̣̇аад̇и вибассанаа. вирааг̇од̇и арияамаг̇г̇о. вимуд̇д̇ийд̇и аг̇г̇апалам̣. вимуд̇д̇ин̃аан̣ад̣̇ассананд̇и бажжавзгкан̣ан̃аан̣ам̣. анубаад̣̇аад̇и ган̃жи д̇хаммам̣ анубаад̣̇ияид̇ваа барижжаж̇ид̇ваа. бариниб̣б̣аанад̇т̇ааяаад̇и бажжавзгкан̣ан̃аан̣з ануббаннз анд̇араа бариниб̣б̣аанаабхаавзна д̇ам̣бариниб̣б̣аанад̇т̇ааяаад̇и бажжаяад̇д̇зна вуд̇д̇ам̣ ананд̇араад̣̇ибажжаяад̇д̇аа. зд̇ад̣̇ад̇т̇аа гат̇аад̇и аяам̣ винаяагат̇аа наама зд̇асса анубаад̣̇аабариниб̣б̣аанасса ад̇т̇ааяаад̇и ад̇т̇о. манд̇анаад̇и винаяаманд̇анааязва, бхигкуунам̣ ‘‘звам̣ гариссаама, звам̣ на гариссаамаа’’д̇и винаяабадиб̣ад̣̇д̇хаманд̇анаа. убанисаад̇и убанисийд̣̇ад̇и зд̇т̇а паланд̇и убанисаа, гааран̣ам̣. винаяо сам̣варад̇т̇ааяаад̇иаад̣̇игааран̣абарамбарааби зд̇ад̣̇ад̇т̇аад̇и ад̇т̇о. сод̇аавад̇хаананд̇и имиссаа барамбарабажжаяагат̇ааяа ад̇д̇аанам̣ саманад̇т̇ааяа сод̇аавад̇хаанам̣, д̇амби зд̇амад̇т̇ам̣. яад̣̇ид̣̇анд̇и нибаад̇о. яо аяам̣ жад̇уухи убаад̣̇аанзхи анубаад̣̇ияид̇ваа жид̇д̇асса арахад̇д̇амаг̇г̇асан̇каад̇о, д̇абпаласан̇каад̇о ваа вимогко, соби зд̇ад̣̇ад̇т̇ааяа анубаад̣̇аабариниб̣б̣аанад̇т̇ааяа. ат̇а ваа яо аяам̣ ган̃жи д̇хаммам̣ анубаад̣̇аажид̇д̇асса вимогко вимужжанам̣ виг̇амо бариниб̣б̣аанам̣ зд̇ад̣̇ад̇т̇аа гат̇аад̇и звам̣ убасам̣харан̣авасзна яож̇зд̇умби ваддад̇и маг̇г̇апалавимогкасса буб̣б̣з вуд̇д̇ад̇д̇аа. ааяог̇од̇и уг̇г̇ахан̣аад̣̇ивасзна бунаббунам̣ абхияог̇о.
Vinayo saṃvaratthāyātiādīsu vinayapariyāpuṇanaṃ vinayo, vinayapaññatti vā kāyavacīdvārasaṃvaratthāya. Avippaṭisāroti katākataṃ nissāya vippaṭisārābhāvo santāpābhāvo. Pāmojjaṃ taruṇapīti. Pīti nāma balavapīti. Passaddhīti kāyacittapassaddhi. Yathābhūtañāṇadassananti sappaccayanāmarūpapariggaho. Nibbidāti vipassanā. Virāgoti ariyamaggo. Vimuttīti aggaphalaṃ. Vimuttiñāṇadassananti paccavekkhaṇañāṇaṃ. Anupādāti kañci dhammaṃ anupādiyitvā pariccajitvā. Parinibbānatthāyāti paccavekkhaṇañāṇe anuppanne antarā parinibbānābhāvena taṃparinibbānatthāyāti paccayattena vuttaṃ anantarādipaccayattā. Etadatthā kathāti ayaṃ vinayakathā nāma etassa anupādāparinibbānassa atthāyāti attho. Mantanāti vinayamantanāyeva, bhikkhūnaṃ ‘‘evaṃ karissāma, evaṃ na karissāmā’’ti vinayapaṭibaddhamantanā. Upanisāti upanisīdati ettha phalanti upanisā, kāraṇaṃ. Vinayo saṃvaratthāyātiādikāraṇaparamparāpi etadatthāti attho. Sotāvadhānanti imissā paramparapaccayakathāya attānaṃ samanatthāya sotāvadhānaṃ, tampi etamatthaṃ. Yadidanti nipāto. Yo ayaṃ catūhi upādānehi anupādiyitvā cittassa arahattamaggasaṅkhāto, tapphalasaṅkhāto vā vimokkho, sopi etadatthāya anupādāparinibbānatthāya. Atha vā yo ayaṃ kañci dhammaṃ anupādācittassa vimokkho vimuccanaṃ vigamo parinibbānaṃ etadatthā kathāti evaṃ upasaṃharaṇavasena yojetumpi vaṭṭati maggaphalavimokkhassa pubbe vuttattā. Āyogoti uggahaṇādivasena punappunaṃ abhiyogo.
аажарияабарамбарагат̇ааван̣н̣анаанаяо нидтид̇о.
Ācariyaparamparakathāvaṇṇanānayo niṭṭhito.
ид̇и саманд̇абаасаад̣̇игааяа винаяадтагат̇ааяа вимад̇ивинод̣̇анияам̣
Iti samantapāsādikāya vinayaṭṭhakathāya vimativinodaniyaṃ
б̣аахиранид̣̇аанагат̇ааван̣н̣анаанаяо нидтид̇о.
Bāhiranidānakathāvaṇṇanānayo niṭṭhito.
