| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஆசரியவத்தகதா²
Ācariyavattakathā
75. கிந்தாயங் பி⁴க்கு² ஹோதீதி கிங் தே அயங் பி⁴க்கு² ஹோதி. அஞ்ஞேஹி ஓவதி³யோ அனுஸாஸியோதி அஞ்ஞேஹி ஓவதி³தப்³போ³ சேவ அனுஸாஸிதப்³போ³ ச. பா³ஹுல்லாய ஆவத்தோ யதி³த³ங் க³ணப³ந்தி⁴கந்தி க³ணப³ந்தோ⁴ ஏதஸ்ஸ பா³ஹுல்லஸ்ஸ அத்தீ²தி க³ணப³ந்தி⁴கங், பா³ஹுல்லங். யங் இத³ங் க³ணப³ந்தி⁴கங் நாம பா³ஹுல்லங், தத³த்தா²ய அதிலஹுங் த்வங் ஆபன்னோதி வுத்தங் ஹோதி.
75.Kintāyaṃ bhikkhu hotīti kiṃ te ayaṃ bhikkhu hoti. Aññehi ovadiyo anusāsiyoti aññehi ovaditabbo ceva anusāsitabbo ca. Bāhullāya āvatto yadidaṃ gaṇabandhikanti gaṇabandho etassa bāhullassa atthīti gaṇabandhikaṃ, bāhullaṃ. Yaṃ idaṃ gaṇabandhikaṃ nāma bāhullaṃ, tadatthāya atilahuṃ tvaṃ āpannoti vuttaṃ hoti.
76. அப்³யத்தாதி பஞ்ஞாவெய்யத்தியேன விரஹிதா. அஞ்ஞத்தரோபி அஞ்ஞதித்தி²யபுப்³போ³தி பஸூரோ பரிப்³பா³ஜகோ. ஸோ கிர ‘‘த⁴ம்மங் தே²னெஸ்ஸாமீ’’தி உதா³யித்தே²ரஸ்ஸ ஸந்திகே பப்³ப³ஜித்வா தேன ஸஹத⁴ம்மிகங் வுச்சமானோ தஸ்ஸ வாத³ங் ஆரோபேஸி. அனுஜானாமி பி⁴க்க²வே ப்³யத்தேன பி⁴க்கு²னாதிஆதி³ம்ஹி ப்³யத்தோ புப்³பே³ பி⁴க்கு²னோவாத³கவண்ணனாயங் வுத்தலக்க²ணோயேவ. யோ பன அந்தேவாஸினோ வா ஸத்³தி⁴விஹாரிகஸ்ஸ வா கி³லானஸ்ஸ ஸக்கோதி உபட்டா²னாதீ³னி காதுங், அயங் இத⁴ படிப³லோதி அதி⁴ப்பேதோ. வுத்தம்பி சேதங் –
76.Abyattāti paññāveyyattiyena virahitā. Aññattaropi aññatitthiyapubboti pasūro paribbājako. So kira ‘‘dhammaṃ thenessāmī’’ti udāyittherassa santike pabbajitvā tena sahadhammikaṃ vuccamāno tassa vādaṃ āropesi. Anujānāmi bhikkhave byattena bhikkhunātiādimhi byatto pubbe bhikkhunovādakavaṇṇanāyaṃ vuttalakkhaṇoyeva. Yo pana antevāsino vā saddhivihārikassa vā gilānassa sakkoti upaṭṭhānādīni kātuṃ, ayaṃ idha paṭibaloti adhippeto. Vuttampi cetaṃ –
‘‘பஞ்சஹுபாலி , அங்கே³ஹி ஸமன்னாக³தேன பி⁴க்கு²னா உபஸம்பாதே³தப்³ப³ங், நிஸ்ஸயோ தா³தப்³போ³, ஸாமணேரோ உபட்டா²பேதப்³போ³. கதமேஹி பஞ்சஹி? படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா உபட்டா²பேதுங் வா, அனபி⁴ரதங் வூபகாஸேதுங் வா வூபகாஸாபேதுங் வா, உப்பன்னங் குக்குச்சங் த⁴ம்மதோ வினோதே³துங், அபி⁴த⁴ம்மே வினேதுங், அபி⁴வினயே வினேதூ’’ந்தி (பரி॰ 418).
‘‘Pañcahupāli , aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetū’’nti (pari. 418).
77. பக்க²ஸங்கந்தேஸூதி தித்தி²யபக்க²ஸங்கந்தேஸு. அனுஜானாமி பி⁴க்க²வே ஆசரியந்தி ஆசாரஸமாசாரஸிக்கா²பனகங் ஆசரியங் அனுஜானாமி. ஆசரியோ பி⁴க்க²வே அந்தேவாஸிகம்ஹீதிஆதி³ ஸப்³ப³ங் ‘‘உபஜ்ஜா²யோ பி⁴க்க²வே ஸத்³தி⁴விஹாரிகம்ஹீ’’திஆதி³னா நயேன வுத்தவஸேனேவ வேதி³தப்³ப³ங். நாமமத்தமேவ ஹி எத்த² நானங்.
77.Pakkhasaṅkantesūti titthiyapakkhasaṅkantesu. Anujānāmi bhikkhave ācariyanti ācārasamācārasikkhāpanakaṃ ācariyaṃ anujānāmi. Ācariyo bhikkhave antevāsikamhītiādi sabbaṃ ‘‘upajjhāyo bhikkhave saddhivihārikamhī’’tiādinā nayena vuttavaseneva veditabbaṃ. Nāmamattameva hi ettha nānaṃ.
ஆசரியவத்தகதா² நிட்டி²தா.
Ācariyavattakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 18. ஆசரியவத்தகதா² • 18. Ācariyavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆசரியவத்தகதா²வண்ணனா • Ācariyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆசரியவத்தகதா²வண்ணனா • Ācariyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆசரியவத்தகதா²வண்ணனா • Ācariyavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 18. ஆசரியவத்தகதா² • 18. Ācariyavattakathā
