| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
আচরিযৰত্তকথা
Ācariyavattakathā
৭৫. কিন্তাযং ভিক্খু হোতীতি কিং তে অযং ভিক্খু হোতি। অঞ্ঞেহি ওৰদিযো অনুসাসিযোতি অঞ্ঞেহি ওৰদিতব্বো চেৰ অনুসাসিতব্বো চ। বাহুল্লায আৰত্তো যদিদং গণবন্ধিকন্তি গণবন্ধো এতস্স বাহুল্লস্স অত্থীতি গণবন্ধিকং, বাহুল্লং। যং ইদং গণবন্ধিকং নাম বাহুল্লং, তদত্থায অতিলহুং ত্ৰং আপন্নোতি ৰুত্তং হোতি।
75.Kintāyaṃ bhikkhu hotīti kiṃ te ayaṃ bhikkhu hoti. Aññehi ovadiyo anusāsiyoti aññehi ovaditabbo ceva anusāsitabbo ca. Bāhullāya āvatto yadidaṃ gaṇabandhikanti gaṇabandho etassa bāhullassa atthīti gaṇabandhikaṃ, bāhullaṃ. Yaṃ idaṃ gaṇabandhikaṃ nāma bāhullaṃ, tadatthāya atilahuṃ tvaṃ āpannoti vuttaṃ hoti.
৭৬. অব্যত্তাতি পঞ্ঞাৰেয্যত্তিযেন ৰিরহিতা। অঞ্ঞত্তরোপি অঞ্ঞতিত্থিযপুব্বোতি পসূরো পরিব্বাজকো। সো কির ‘‘ধম্মং থেনেস্সামী’’তি উদাযিত্থেরস্স সন্তিকে পব্বজিত্ৰা তেন সহধম্মিকং ৰুচ্চমানো তস্স ৰাদং আরোপেসি। অনুজানামি ভিক্খৰে ব্যত্তেন ভিক্খুনাতিআদিম্হি ব্যত্তো পুব্বে ভিক্খুনোৰাদকৰণ্ণনাযং ৰুত্তলক্খণোযেৰ। যো পন অন্তেৰাসিনো ৰা সদ্ধিৰিহারিকস্স ৰা গিলানস্স সক্কোতি উপট্ঠানাদীনি কাতুং, অযং ইধ পটিবলোতি অধিপ্পেতো। ৰুত্তম্পি চেতং –
76.Abyattāti paññāveyyattiyena virahitā. Aññattaropi aññatitthiyapubboti pasūro paribbājako. So kira ‘‘dhammaṃ thenessāmī’’ti udāyittherassa santike pabbajitvā tena sahadhammikaṃ vuccamāno tassa vādaṃ āropesi. Anujānāmi bhikkhave byattena bhikkhunātiādimhi byatto pubbe bhikkhunovādakavaṇṇanāyaṃ vuttalakkhaṇoyeva. Yo pana antevāsino vā saddhivihārikassa vā gilānassa sakkoti upaṭṭhānādīni kātuṃ, ayaṃ idha paṭibaloti adhippeto. Vuttampi cetaṃ –
‘‘পঞ্চহুপালি , অঙ্গেহি সমন্নাগতেন ভিক্খুনা উপসম্পাদেতব্বং, নিস্সযো দাতব্বো, সামণেরো উপট্ঠাপেতব্বো। কতমেহি পঞ্চহি? পটিবলো হোতি অন্তেৰাসিং ৰা সদ্ধিৰিহারিং ৰা গিলানং উপট্ঠাতুং ৰা উপট্ঠাপেতুং ৰা, অনভিরতং ৰূপকাসেতুং ৰা ৰূপকাসাপেতুং ৰা, উপ্পন্নং কুক্কুচ্চং ধম্মতো ৰিনোদেতুং, অভিধম্মে ৰিনেতুং, অভিৰিনযে ৰিনেতূ’’ন্তি (পরি॰ ৪১৮)।
‘‘Pañcahupāli , aṅgehi samannāgatena bhikkhunā upasampādetabbaṃ, nissayo dātabbo, sāmaṇero upaṭṭhāpetabbo. Katamehi pañcahi? Paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā, uppannaṃ kukkuccaṃ dhammato vinodetuṃ, abhidhamme vinetuṃ, abhivinaye vinetū’’nti (pari. 418).
৭৭. পক্খসঙ্কন্তেসূতি তিত্থিযপক্খসঙ্কন্তেসু। অনুজানামি ভিক্খৰে আচরিযন্তি আচারসমাচারসিক্খাপনকং আচরিযং অনুজানামি। আচরিযো ভিক্খৰে অন্তেৰাসিকম্হীতিআদি সব্বং ‘‘উপজ্ঝাযো ভিক্খৰে সদ্ধিৰিহারিকম্হী’’তিআদিনা নযেন ৰুত্তৰসেনেৰ ৰেদিতব্বং। নামমত্তমেৰ হি এত্থ নানং।
77.Pakkhasaṅkantesūti titthiyapakkhasaṅkantesu. Anujānāmi bhikkhave ācariyanti ācārasamācārasikkhāpanakaṃ ācariyaṃ anujānāmi. Ācariyo bhikkhave antevāsikamhītiādi sabbaṃ ‘‘upajjhāyo bhikkhave saddhivihārikamhī’’tiādinā nayena vuttavaseneva veditabbaṃ. Nāmamattameva hi ettha nānaṃ.
আচরিযৰত্তকথা নিট্ঠিতা।
Ācariyavattakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৮. আচরিযৰত্তকথা • 18. Ācariyavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আচরিযৰত্তকথাৰণ্ণনা • Ācariyavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আচরিযৰত্তকথাৰণ্ণনা • Ācariyavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / আচরিযৰত্তকথাৰণ্ণনা • Ācariyavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮. আচরিযৰত্তকথা • 18. Ācariyavattakathā
