| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၈. အာစရိယဝတ္တကထာ
18. Ācariyavattakathā
၇၄. တေန ခော ပန သမယေန အညတရော မာဏဝကော ဘိက္ခူ ဥပသင္ကမိတ္ဝာ ပဗ္ဗဇ္ဇံ ယာစိ။ တသ္သ ဘိက္ခူ ပဋိကစ္စေဝ နိသ္သယေ အာစိက္ခိံသု။ သော ဧဝမာဟ – ‘‘သစေ မေ, ဘန္တေ, ပဗ္ဗဇိတေ နိသ္သယေ အာစိက္ခေယ္ယာထ, အဘိရမေယ္ယာမဟံ 1။ န ဒာနာဟံ, ဘန္တေ, ပဗ္ဗဇိသ္သာမိ; ဇေဂုစ္ဆာ မေ နိသ္သယာ ပဋိကူလာ’’တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ပဋိကစ္စေဝ နိသ္သယာ အာစိက္ခိတဗ္ဗာ။ ယော အာစိက္ခေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဥပသမ္ပန္နသမနန္တရာ နိသ္သယေ အာစိက္ခိတုန္တိ။
74. Tena kho pana samayena aññataro māṇavako bhikkhū upasaṅkamitvā pabbajjaṃ yāci. Tassa bhikkhū paṭikacceva nissaye ācikkhiṃsu. So evamāha – ‘‘sace me, bhante, pabbajite nissaye ācikkheyyātha, abhirameyyāmahaṃ 2. Na dānāhaṃ, bhante, pabbajissāmi; jegucchā me nissayā paṭikūlā’’ti. Bhagavato etamatthaṃ ārocesuṃ. Na, bhikkhave, paṭikacceva nissayā ācikkhitabbā. Yo ācikkheyya, āpatti dukkaṭassa. Anujānāmi, bhikkhave, upasampannasamanantarā nissaye ācikkhitunti.
တေန ခော ပန သမယေန ဘိက္ခူ ဒုဝဂ္ဂေနပိ တိဝဂ္ဂေနပိ ဂဏေန ဥပသမ္ပာဒေန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ဦနဒသဝဂ္ဂေန ဂဏေန ဥပသမ္ပာဒေတဗ္ဗော။ ယော ဥပသမ္ပာဒေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဒသဝဂ္ဂေန ဝာ အတိရေကဒသဝဂ္ဂေန ဝာ ဂဏေန ဥပသမ္ပာဒေတုန္တိ ။
Tena kho pana samayena bhikkhū duvaggenapi tivaggenapi gaṇena upasampādenti. Bhagavato etamatthaṃ ārocesuṃ. Na, bhikkhave, ūnadasavaggena gaṇena upasampādetabbo. Yo upasampādeyya, āpatti dukkaṭassa. Anujānāmi, bhikkhave, dasavaggena vā atirekadasavaggena vā gaṇena upasampādetunti .
၇၅. တေန ခော ပန သမယေန ဘိက္ခူ ဧကဝသ္သာပိ ဒုဝသ္သာပိ သဒ္ဓိဝိဟာရိကံ ဥပသမ္ပာဒေန္တိ။ အာယသ္မာပိ ဥပသေနော ဝင္ဂန္တပုတ္တော ဧကဝသ္သော သဒ္ဓိဝိဟာရိကံ ဥပသမ္ပာဒေသိ။ သော ဝသ္သံဝုဋ္ဌော ဒုဝသ္သော ဧကဝသ္သံ သဒ္ဓိဝိဟာရိကံ အာဒာယ ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ အာစိဏ္ဏံ ခော ပနေတံ ဗုဒ္ဓာနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခော ဘဂဝာ အာယသ္မန္တံ ဥပသေနံ ဝင္ဂန္တပုတ္တံ ဧတဒဝောစ – ‘‘ကစ္စိ, ဘိက္ခု, ခမနီယံ, ကစ္စိ ယာပနီယံ, ကစ္စိ တ္ဝံ အပ္ပကိလမထေန အဒ္ဓာနံ အာဂတော’’တိ? ‘‘ခမနီယံ, ဘဂဝာ, ယာပနီယံ, ဘဂဝာ။ အပ္ပကိလမထေန မယံ, ဘန္တေ, အဒ္ဓာနံ အာဂတာ’’တိ။ ဇာနန္တာပိ တထာဂတာ ပုစ္ဆန္တိ, ဇာနန္တာပိ န ပုစ္ဆန္တိ, ကာလံ ဝိဒိတ္ဝာ ပုစ္ဆန္တိ, ကာလံ ဝိဒိတ္ဝာ န ပုစ္ဆန္တိ; အတ္ထသံဟိတံ တထာဂတာ ပုစ္ဆန္တိ; နော အနတ္ထသံဟိတံ။ အနတ္ထသံဟိတေ သေတုဃာတော တထာဂတာနံ။ ဒ္ဝီဟိ အာကာရေဟိ ဗုဒ္ဓာ ဘဂဝန္တော ဘိက္ခူ ပဋိပုစ္ဆန္တိ – ဓမ္မံ ဝာ ဒေသေသ္သာမ, သာဝကာနံ ဝာ သိက္ခာပဒံ ပညပေသ္သာမာတိ။ အထ ခော ဘဂဝာ အာယသ္မန္တံ ဥပသေနံ ဝင္ဂန္တပုတ္တံ ဧတဒဝောစ – ‘‘ကတိဝသ္သောသိ တ္ဝံ, ဘိက္ခူ’’တိ? ‘‘ဒုဝသ္သောဟံ, ဘဂဝာ’’တိ။ ‘‘အယံ ပန ဘိက္ခု ကတိဝသ္သော’’တိ? ‘‘ဧကဝသ္သော, ဘဂဝာ’’တိ။ ‘‘ကိံ တာယံ ဘိက္ခု ဟောတီ’’တိ? ‘‘သဒ္ဓိဝိဟာရိကော မေ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ တ္ဝံ, မောဃပုရိသ, အညေဟိ ဩဝဒိယော အနုသာသိယော အညံ ဩဝဒိတုံ အနုသာသိတုံ မညိသ္သသိ။ အတိလဟုံ ခော တ္ဝံ, မောဃပုရိသ, ဗာဟုလ္လာယ အာဝတ္တော, ယဒိဒံ ဂဏဗန္ဓိကံ။ နေတံ, မောဃပုရိသ, အပ္ပသန္နာနံ ဝာ ပသာဒာယ ပသန္နာနံ ဝာ ဘိယ္ယောဘာဝာယ’’။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, ဦနဒသဝသ္သေန ဥပသမ္ပာဒေတဗ္ဗော။ ယော ဥပသမ္ပာဒေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဒသဝသ္သေန ဝာ အတိရေကဒသဝသ္သေန ဝာ ဥပသမ္ပာဒေတု’’န္တိ။
75. Tena kho pana samayena bhikkhū ekavassāpi duvassāpi saddhivihārikaṃ upasampādenti. Āyasmāpi upaseno vaṅgantaputto ekavasso saddhivihārikaṃ upasampādesi. So vassaṃvuṭṭho duvasso ekavassaṃ saddhivihārikaṃ ādāya yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘kacci, bhikkhu, khamanīyaṃ, kacci yāpanīyaṃ, kacci tvaṃ appakilamathena addhānaṃ āgato’’ti? ‘‘Khamanīyaṃ, bhagavā, yāpanīyaṃ, bhagavā. Appakilamathena mayaṃ, bhante, addhānaṃ āgatā’’ti. Jānantāpi tathāgatā pucchanti, jānantāpi na pucchanti, kālaṃ viditvā pucchanti, kālaṃ viditvā na pucchanti; atthasaṃhitaṃ tathāgatā pucchanti; no anatthasaṃhitaṃ. Anatthasaṃhite setughāto tathāgatānaṃ. Dvīhi ākārehi buddhā bhagavanto bhikkhū paṭipucchanti – dhammaṃ vā desessāma, sāvakānaṃ vā sikkhāpadaṃ paññapessāmāti. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘kativassosi tvaṃ, bhikkhū’’ti? ‘‘Duvassohaṃ, bhagavā’’ti. ‘‘Ayaṃ pana bhikkhu kativasso’’ti? ‘‘Ekavasso, bhagavā’’ti. ‘‘Kiṃ tāyaṃ bhikkhu hotī’’ti? ‘‘Saddhivihāriko me, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, aññehi ovadiyo anusāsiyo aññaṃ ovadituṃ anusāsituṃ maññissasi. Atilahuṃ kho tvaṃ, moghapurisa, bāhullāya āvatto, yadidaṃ gaṇabandhikaṃ. Netaṃ, moghapurisa, appasannānaṃ vā pasādāya pasannānaṃ vā bhiyyobhāvāya’’…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, ūnadasavassena upasampādetabbo. Yo upasampādeyya, āpatti dukkaṭassa. Anujānāmi, bhikkhave, dasavassena vā atirekadasavassena vā upasampādetu’’nti.
၇၆. တေန ခော ပန သမယေန ဘိက္ခူ – ဒသဝသ္သမ္ဟာ ဒသဝသ္သမ္ဟာတိ – ဗာလာ အဗ္ယတ္တာ ဥပသမ္ပာဒေန္တိ။ ဒိသ္သန္တိ ဥပဇ္ဈာယာ ဗာလာ, သဒ္ဓိဝိဟာရိကာ ပဏ္ဍိတာ။ ဒိသ္သန္တိ ဥပဇ္ဈာယာ အဗ္ယတ္တာ, သဒ္ဓိဝိဟာရိကာ ဗ္ယတ္တာ။ ဒိသ္သန္တိ ဥပဇ္ဈာယာ အပ္ပသ္သုတာ, သဒ္ဓိဝိဟာရိကာ ဗဟုသ္သုတာ။ ဒိသ္သန္တိ ဥပဇ္ဈာယာ ဒုပ္ပညာ, သဒ္ဓိဝိဟာရိကာ ပညဝန္တော။ အညတရောပိ အညတိတ္ထိယပုဗ္ဗော ဥပဇ္ဈာယေန သဟဓမ္မိကံ ဝုစ္စမာနော ဥပဇ္ဈာယသ္သ ဝာဒံ အာရောပေတ္ဝာ တံယေဝ တိတ္ထာယတနံ သင္ကမိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ကထဉ္ဟိ နာမ ဘိက္ခူ – ဒသဝသ္သမ္ဟာ ဒသဝသ္သမ္ဟာတိ – ဗာလာ အဗ္ယတ္တာ ဥပသမ္ပာဒေသ္သန္တိ။ ဒိသ္သန္တိ ဥပဇ္ဈာယာ ဗာလာ သဒ္ဓိဝိဟာရိကာ ပဏ္ဍိတာ, ဒိသ္သန္တိ ဥပဇ္ဈာယာ အဗ္ယတ္တာ သဒ္ဓိဝိဟာရိကာ ဗ္ယတ္တာ, ဒိသ္သန္တိ ဥပဇ္ဈာယာ အပ္ပသ္သုတာ သဒ္ဓိဝိဟာရိကာ ဗဟုသ္သုတာ, ဒိသ္သန္တိ ဥပဇ္ဈာယာ ဒုပ္ပညာ, သဒ္ဓိဝိဟာရိကာ ပညဝန္တောတိ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ ‘‘သစ္စံ ကိရ, ဘိက္ခဝေ, ဘိက္ခူ – ဒသဝသ္သမ္ဟာ ဒသဝသ္သမ္ဟာတိ – ဗာလာ အဗ္ယတ္တာ ဥပသမ္ပာဒေန္တိ။ ဒိသ္သန္တိ ဥပဇ္ဈာယာ ဗာလာ, သဒ္ဓိဝိဟာရိကာ ပဏ္ဍိတာ, ဒိသ္သန္တိ ဥပဇ္ဈာယာ အဗ္ယတ္တာ သဒ္ဓိဝိဟာရိကာ ဗ္ယတ္တာ, ဒိသ္သန္တိ ဥပဇ္ဈာယာ အပ္ပသ္သုတာ, သဒ္ဓိဝိဟာရိကာ ဗဟုသ္သုတာ, ဒိသ္သန္တိ ဥပဇ္ဈာယာ ဒုပ္ပညာ, သဒ္ဓိဝိဟာရိကာ ပညဝန္တော’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တေ, ဘိက္ခဝေ, မောဃပုရိသာ – ဒသဝသ္သမ္ဟာ ဒသဝသ္သမ္ဟာတိ – ဗာလာ အဗ္ယတ္တာ ဥပသမ္ပာဒေသ္သန္တိ။ ဒိသ္သန္တိ ဥပဇ္ဈာယာ ဗာလာ, သဒ္ဓိဝိဟာရိကာ ပဏ္ဍိတာ, ဒိသ္သန္တိ ဥပဇ္ဈာယာ အဗ္ယတ္တာ သဒ္ဓိဝိဟာရိကာ ဗ္ယတ္တာ, ဒိသ္သန္တိ ဥပဇ္ဈာယာ အပ္ပသ္သုတာ, သဒ္ဓိဝိဟာရိကာ ဗဟုသ္သုတာ, ဒိသ္သန္တိ ဥပဇ္ဈာယာ ဒုပ္ပညာ, သဒ္ဓိဝိဟာရိကာ ပညဝန္တော။ နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, ဗာလေန အဗ္ယတ္တေန ဥပသမ္ပာဒေတဗ္ဗော။ ယော ဥပသမ္ပာဒေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဗ္ယတ္တေန ဘိက္ခုနာ ပဋိဗလေန ဒသဝသ္သေန ဝာ အတိရေကဒသဝသ္သေန ဝာ ဥပသမ္ပာဒေတု’’န္တိ။
76. Tena kho pana samayena bhikkhū – dasavassamhā dasavassamhāti – bālā abyattā upasampādenti. Dissanti upajjhāyā bālā, saddhivihārikā paṇḍitā. Dissanti upajjhāyā abyattā, saddhivihārikā byattā. Dissanti upajjhāyā appassutā, saddhivihārikā bahussutā. Dissanti upajjhāyā duppaññā, saddhivihārikā paññavanto. Aññataropi aññatitthiyapubbo upajjhāyena sahadhammikaṃ vuccamāno upajjhāyassa vādaṃ āropetvā taṃyeva titthāyatanaṃ saṅkami. Ye te bhikkhū appicchā…pe… te ujjhāyanti khiyyanti vipācenti – kathañhi nāma bhikkhū – dasavassamhā dasavassamhāti – bālā abyattā upasampādessanti. Dissanti upajjhāyā bālā saddhivihārikā paṇḍitā, dissanti upajjhāyā abyattā saddhivihārikā byattā, dissanti upajjhāyā appassutā saddhivihārikā bahussutā, dissanti upajjhāyā duppaññā, saddhivihārikā paññavantoti. Atha kho te bhikkhū bhagavato etamatthaṃ ārocesuṃ. ‘‘Saccaṃ kira, bhikkhave, bhikkhū – dasavassamhā dasavassamhāti – bālā abyattā upasampādenti. Dissanti upajjhāyā bālā, saddhivihārikā paṇḍitā, dissanti upajjhāyā abyattā saddhivihārikā byattā, dissanti upajjhāyā appassutā, saddhivihārikā bahussutā, dissanti upajjhāyā duppaññā, saddhivihārikā paññavanto’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā – dasavassamhā dasavassamhāti – bālā abyattā upasampādessanti. Dissanti upajjhāyā bālā, saddhivihārikā paṇḍitā, dissanti upajjhāyā abyattā saddhivihārikā byattā, dissanti upajjhāyā appassutā, saddhivihārikā bahussutā, dissanti upajjhāyā duppaññā, saddhivihārikā paññavanto. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena upasampādetabbo. Yo upasampādeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā upasampādetu’’nti.
၇၇. တေန ခော ပန သမယေန ဘိက္ခူ ဥပဇ္ဈာယေသု ပက္ကန္တေသုပိ ဝိဗ္ဘန္တေသုပိ ကာလင္ကတေသုပိ ပက္ခသင္ကန္တေသုပိ အနာစရိယကာ အနောဝဒိယမာနာ အနနုသာသိယမာနာ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ပိဏ္ဍာယ စရန္တိ, မနုသ္သာနံ ဘုဉ္ဇမာနာနံ ဥပရိဘောဇနေပိ ဥတ္တိဋ္ဌပတ္တံ ဥပနာမေန္တိ, ဥပရိခာဒနီယေပိ – ဥပရိသာယနီယေပိ – ဥပရိပာနီယေပိ ဥတ္တိဋ္ဌပတ္တံ ဥပနာမေန္တိ; သာမံ သူပမ္ပိ ဩဒနမ္ပိ ဝိညာပေတ္ဝာ ဘုဉ္ဇန္တိ; ဘတ္တဂ္ဂေပိ ဥစ္စာသဒ္ဒာ မဟာသဒ္ဒာ ဝိဟရန္တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ပိဏ္ဍာယ စရိသ္သန္တိ; မနုသ္သာနံ ဘုဉ္ဇမာနာနံ ဥပရိဘောဇနေပိ ဥတ္တိဋ္ဌပတ္တံ ဥပနာမေသ္သန္တိ, ဥပရိခာဒနီယေပိ – ဥပရိသာယနီယေပိ – ဥပရိပာနီယေပိ ဥတ္တိဋ္ဌပတ္တံ ဥပနာမေသ္သန္တိ; သာမံ သူပမ္ပိ ဩဒနမ္ပိ ဝိညာပေတ္ဝာ ဘုဉ္ဇိသ္သန္တိ; ဘတ္တဂ္ဂေပိ ဥစ္စာသဒ္ဒာ မဟာသဒ္ဒာ ဝိဟရိသ္သန္တိ, သေယ္ယထာပိ ဗ္ရာဟ္မဏာ ဗ္ရာဟ္မဏဘောဇနေ’’တိ။ အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ ။ပေ.။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ သစ္စံ ကိရ, ဘိက္ခဝေ။ပေ.။ သစ္စံ, ဘဂဝာတိ။ပေ.။ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ –
77. Tena kho pana samayena bhikkhū upajjhāyesu pakkantesupi vibbhantesupi kālaṅkatesupi pakkhasaṅkantesupi anācariyakā anovadiyamānā ananusāsiyamānā dunnivatthā duppārutā anākappasampannā piṇḍāya caranti, manussānaṃ bhuñjamānānaṃ uparibhojanepi uttiṭṭhapattaṃ upanāmenti, uparikhādanīyepi – uparisāyanīyepi – uparipānīyepi uttiṭṭhapattaṃ upanāmenti; sāmaṃ sūpampi odanampi viññāpetvā bhuñjanti; bhattaggepi uccāsaddā mahāsaddā viharanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā dunnivatthā duppārutā anākappasampannā piṇḍāya carissanti; manussānaṃ bhuñjamānānaṃ uparibhojanepi uttiṭṭhapattaṃ upanāmessanti, uparikhādanīyepi – uparisāyanīyepi – uparipānīyepi uttiṭṭhapattaṃ upanāmessanti; sāmaṃ sūpampi odanampi viññāpetvā bhuñjissanti; bhattaggepi uccāsaddā mahāsaddā viharissanti, seyyathāpi brāhmaṇā brāhmaṇabhojane’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ …pe… atha kho te bhikkhū bhagavato etamatthaṃ ārocesuṃ. Saccaṃ kira, bhikkhave…pe… saccaṃ, bhagavāti…pe… vigarahitvā dhammiṃ kathaṃ katvā bhikkhū āmantesi –
‘‘အနုဇာနာမိ, ဘိက္ခဝေ, အာစရိယံ။ အာစရိယော, ဘိက္ခဝေ, အန္တေဝာသိကမ္ဟိ ပုတ္တစိတ္တံ ဥပဋ္ဌာပေသ္သတိ, အန္တေဝာသိကော အာစရိယမ္ဟိ ပိတုစိတ္တံ ဥပဋ္ဌာပေသ္သတိ။ ဧဝံ တေ အညမညံ သဂာရဝာ သပ္ပတိသ္သာ သဘာဂဝုတ္တိနော ဝိဟရန္တာ ဣမသ္မိံ ဓမ္မဝိနယေ ဝုဒ္ဓိံ ဝိရုဠ္ဟိံ ဝေပုလ္လံ အာပဇ္ဇိသ္သန္တိ။ အနုဇာနာမိ, ဘိက္ခဝေ, ဒသဝသ္သံ နိသ္သာယ ဝတ္ထုံ, ဒသဝသ္သေန နိသ္သယံ ဒာတုံ။ ဧဝဉ္စ ပန, ဘိက္ခဝေ, အာစရိယော ဂဟေတဗ္ဗော။ ဧကံသံ ဥတ္တရာသင္ဂံ ကရိတ္ဝာ ပာဒေ ဝန္ဒိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘အာစရိယော မေ, ဘန္တေ, ဟောဟိ, အာယသ္မတော နိသ္သာယ ဝစ္ဆာမိ; အာစရိယော မေ, ဘန္တေ, ဟောဟိ, အာယသ္မတော နိသ္သာယ ဝစ္ဆာမိ; အာစရိယော မေ, ဘန္တေ, ဟောဟိ, အာယသ္မတော နိသ္သာယ ဝစ္ဆာမီ’တိ။ ‘သာဟူတိ’ ဝာ ‘လဟူတိ’ ဝာ ‘ဩပာယိက’န္တိ ဝာ ‘ပတိရူပ’န္တိ ဝာ ‘ပာသာဒိကေန သမ္ပာဒေဟီ’တိ ဝာ ကာယေန ဝိညာပေတိ, ဝာစာယ ဝိညာပေတိ, ကာယေန ဝာစာယ ဝိညာပေတိ, ဂဟိတော ဟောတိ အာစရိယော; န ကာယေန ဝိညာပေတိ, န ဝာစာယ ဝိညာပေတိ, န ကာယေန ဝာစာယ ဝိညာပေတိ, န ဂဟိတော ဟောတိ အာစရိယော။
‘‘Anujānāmi, bhikkhave, ācariyaṃ. Ācariyo, bhikkhave, antevāsikamhi puttacittaṃ upaṭṭhāpessati, antevāsiko ācariyamhi pitucittaṃ upaṭṭhāpessati. Evaṃ te aññamaññaṃ sagāravā sappatissā sabhāgavuttino viharantā imasmiṃ dhammavinaye vuddhiṃ viruḷhiṃ vepullaṃ āpajjissanti. Anujānāmi, bhikkhave, dasavassaṃ nissāya vatthuṃ, dasavassena nissayaṃ dātuṃ. Evañca pana, bhikkhave, ācariyo gahetabbo. Ekaṃsaṃ uttarāsaṅgaṃ karitvā pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘ācariyo me, bhante, hohi, āyasmato nissāya vacchāmi; ācariyo me, bhante, hohi, āyasmato nissāya vacchāmi; ācariyo me, bhante, hohi, āyasmato nissāya vacchāmī’ti. ‘Sāhūti’ vā ‘lahūti’ vā ‘opāyika’nti vā ‘patirūpa’nti vā ‘pāsādikena sampādehī’ti vā kāyena viññāpeti, vācāya viññāpeti, kāyena vācāya viññāpeti, gahito hoti ācariyo; na kāyena viññāpeti, na vācāya viññāpeti, na kāyena vācāya viññāpeti, na gahito hoti ācariyo.
၇၈. 3 ‘‘အန္တေဝာသိကေန , ဘိက္ခဝေ, အာစရိယမ္ဟိ သမ္မာ ဝတ္တိတဗ္ဗံ။ တတ္ရာယံ သမ္မာဝတ္တနာ –
78.4 ‘‘Antevāsikena , bhikkhave, ācariyamhi sammā vattitabbaṃ. Tatrāyaṃ sammāvattanā –
‘‘ကာလသ္သေဝ ဥဋ္ဌာယ ဥပာဟနံ ဩမုဉ္စိတ္ဝာ ဧကံသံ ဥတ္တရာသင္ဂံ ကရိတ္ဝာ ဒန္တကဋ္ဌံ ဒာတဗ္ဗံ, မုခောဒကံ ဒာတဗ္ဗံ, အာသနံ ပညပေတဗ္ဗံ။ သစေ ယာဂု ဟောတိ, ဘာဇနံ ဓောဝိတ္ဝာ ယာဂု ဥပနာမေတဗ္ဗာ ။ ယာဂုံ ပီတသ္သ ဥဒကံ ဒတ္ဝာ ဘာဇနံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ပဋိသာမေတဗ္ဗံ။ အာစရိယမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော။
‘‘Kālasseva uṭṭhāya upāhanaṃ omuñcitvā ekaṃsaṃ uttarāsaṅgaṃ karitvā dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti, bhājanaṃ dhovitvā yāgu upanāmetabbā . Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ. Ācariyamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘သစေ အာစရိယော ဂာမံ ပဝိသိတုကာမော ဟောတိ, နိဝာသနံ ဒာတဗ္ဗံ, ပဋိနိဝာသနံ ပဋိဂ္ဂဟေတဗ္ဗံ, ကာယဗန္ဓနံ ဒာတဗ္ဗံ, သဂုဏံ ကတ္ဝာ သင္ဃာဋိယော ဒာတဗ္ဗာ, ဓောဝိတ္ဝာ ပတ္တော သောဒကော ဒာတဗ္ဗော။ သစေ အာစရိယော ပစ္ဆာသမဏံ အာကင္ခတိ, တိမဏ္ဍလံ ပဋိစ္ဆာဒေန္တေန ပရိမဏ္ဍလံ နိဝာသေတ္ဝာ ကာယဗန္ဓနံ ဗန္ဓိတ္ဝာ သဂုဏံ ကတ္ဝာ သင္ဃာဋိယော ပာရုပိတ္ဝာ ဂဏ္ဌိကံ ပဋိမုဉ္စိတ္ဝာ ဓောဝိတ္ဝာ ပတ္တံ ဂဟေတ္ဝာ အာစရိယသ္သ ပစ္ဆာသမဏေန ဟောတဗ္ဗံ။ နာတိဒူရေ ဂန္တဗ္ဗံ, နာစ္စာသန္နေ ဂန္တဗ္ဗံ, ပတ္တပရိယာပန္နံ ပဋိဂ္ဂဟေတဗ္ဗံ။ န အာစရိယသ္သ ဘဏမာနသ္သ အန္တရန္တရာ ကထာ ဩပာတေတဗ္ဗာ။ အာစရိယော အာပတ္တိသာမန္တာ ဘဏမာနော နိဝာရေတဗ္ဗော။
‘‘Sace ācariyo gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo. Sace ācariyo pacchāsamaṇaṃ ākaṅkhati, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā ācariyassa pacchāsamaṇena hotabbaṃ. Nātidūre gantabbaṃ, nāccāsanne gantabbaṃ, pattapariyāpannaṃ paṭiggahetabbaṃ. Na ācariyassa bhaṇamānassa antarantarā kathā opātetabbā. Ācariyo āpattisāmantā bhaṇamāno nivāretabbo.
‘‘နိဝတ္တန္တေန ပဌမတရံ အာဂန္တ္ဝာ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ, ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟေတဗ္ဗံ, ပဋိနိဝာသနံ ဒာတဗ္ဗံ, နိဝာသနံ ပဋိဂ္ဂဟေတဗ္ဗံ။ သစေ စီဝရံ သိန္နံ ဟောတိ, မုဟုတ္တံ ဥဏ္ဟေ ဩတာပေတဗ္ဗံ, န စ ဥဏ္ဟေ စီဝရံ နိဒဟိတဗ္ဗံ။ စီဝရံ သင္ဃရိတဗ္ဗံ။ စီဝရံ သင္ဃရန္တေန စတုရင္ဂုလံ ကဏ္ဏံ ဥသ္သာရေတ္ဝာ စီဝရံ သင္ဃရိတဗ္ဗံ – မာ မဇ္ဈေ ဘင္ဂော အဟောသီတိ။ ဩဘောဂေ ကာယဗန္ဓနံ ကာတဗ္ဗံ။
‘‘Nivattantena paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘သစေ ပိဏ္ဍပာတော ဟောတိ , အာစရိယော စ ဘုဉ္ဇိတုကာမော ဟောတိ, ဥဒကံ ဒတ္ဝာ ပိဏ္ဍပာတော ဥပနာမေတဗ္ဗော။ အာစရိယော ပာနီယေန ပုစ္ဆိတဗ္ဗော။ ဘုတ္တာဝိသ္သ ဥဒကံ ဒတ္ဝာ ပတ္တံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ဝောဒကံ ကတ္ဝာ မုဟုတ္တံ ဥဏ္ဟေ ဩတာပေတဗ္ဗော, န စ ဥဏ္ဟေ ပတ္တော နိဒဟိတဗ္ဗော။ ပတ္တစီဝရံ နိက္ခိပိတဗ္ဗံ။ ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတ္ဝာ ဧကေန ဟတ္ထေန ဟေဋ္ဌာမဉ္စံ ဝာ ဟေဋ္ဌာပီဌံ ဝာ ပရာမသိတ္ဝာ ပတ္တော နိက္ခိပိတဗ္ဗော။ န စ အနန္တရဟိတာယ ဘူမိယာ ပတ္တော နိက္ခိပိတဗ္ဗော။ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတ္ဝာ ဧကေန ဟတ္ထေန စီဝရဝံသံ ဝာ စီဝရရဇ္ဇုံ ဝာ ပမဇ္ဇိတ္ဝာ ပာရတော အန္တံ ဩရတော ဘောဂံ ကတ္ဝာ စီဝရံ နိက္ခိပိတဗ္ဗံ။ အာစရိယမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ, ပာဒောဒကံ ပာဒပီဌံ ပာဒကထလိကံ ပဋိသာမေတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော။
‘‘Sace piṇḍapāto hoti , ācariyo ca bhuñjitukāmo hoti, udakaṃ datvā piṇḍapāto upanāmetabbo. Ācariyo pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ. Ācariyamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘သစေ အာစရိယော နဟာယိတုကာမော ဟောတိ, နဟာနံ ပဋိယာဒေတဗ္ဗံ။ သစေ သီတေန အတ္ထော ဟောတိ, သီတံ ပဋိယာဒေတဗ္ဗံ။ သစေ ဥဏ္ဟေန အတ္ထော ဟောတိ, ဥဏ္ဟံ ပဋိယာဒေတဗ္ဗံ။
‘‘Sace ācariyo nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘သစေ အာစရိယော ဇန္တာဃရံ ပဝိသိတုကာမော ဟောတိ, စုဏ္ဏံ သန္နေတဗ္ဗံ, မတ္တိကာ တေမေတဗ္ဗာ, ဇန္တာဃရပီဌံ အာဒာယ အာစရိယသ္သ ပိဋ္ဌိတော ပိဋ္ဌိတော ဂန္တ္ဝာ ဇန္တာဃရပီဌံ ဒတ္ဝာ စီဝရံ ပဋိဂ္ဂဟေတ္ဝာ ဧကမန္တံ နိက္ခိပိတဗ္ဗံ, စုဏ္ဏံ ဒာတဗ္ဗံ, မတ္တိကာ ဒာတဗ္ဗာ။ သစေ ဥသ္သဟတိ, ဇန္တာဃရံ ပဝိသိတဗ္ဗံ။ ဇန္တာဃရံ ပဝိသန္တေန မတ္တိကာယ မုခံ မက္ခေတ္ဝာ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရံ ပဝိသိတဗ္ဗံ။ န ထေရေ ဘိက္ခူ အနုပခဇ္ဇ နိသီဒိတဗ္ဗံ။ န နဝာ ဘိက္ခူ အာသနေန ပဋိဗာဟိတဗ္ဗာ။ ဇန္တာဃရေ အာစရိယသ္သ ပရိကမ္မံ ကာတဗ္ဗံ။ ဇန္တာဃရာ နိက္ခမန္တေန ဇန္တာဃရပီဌံ အာဒာယ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရာ နိက္ခမိတဗ္ဗံ။
‘‘Sace ācariyo jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya ācariyassa piṭṭhito piṭṭhito gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati, jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Jantāghare ācariyassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘ဥဒကေပိ အာစရိယသ္သ ပရိကမ္မံ ကာတဗ္ဗံ။ နဟာတေန ပဌမတရံ ဥတ္တရိတ္ဝာ အတ္တနော ဂတ္တံ ဝောဒကံ ကတ္ဝာ နိဝာသေတ္ဝာ အာစရိယသ္သ ဂတ္တတော ဥဒကံ ပမဇ္ဇိတဗ္ဗံ, နိဝာသနံ ဒာတဗ္ဗံ, သင္ဃာဋိ ဒာတဗ္ဗာ, ဇန္တာဃရပီဌံ အာဒာယ ပဌမတရံ အာဂန္တ္ဝာ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ။ အာစရိယော ပာနီယေန ပုစ္ဆိတဗ္ဗော။ သစေ ဥဒ္ဒိသာပေတုကာမော ဟောတိ, ဥဒ္ဒိသာပေတဗ္ဗော။ သစေ ပရိပုစ္ဆိတုကာမော ဟောတိ, ပရိပုစ္ဆိတဗ္ဗော။
‘‘Udakepi ācariyassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā ācariyassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ. Ācariyo pānīyena pucchitabbo. Sace uddisāpetukāmo hoti, uddisāpetabbo. Sace paripucchitukāmo hoti, paripucchitabbo.
‘‘ယသ္မိံ ဝိဟာရေ အာစရိယော ဝိဟရတိ, သစေ သော ဝိဟာရော ဥက္လာပော ဟောတိ, သစေ ဥသ္သဟတိ, သောဓေတဗ္ဗော။ ဝိဟာရံ သောဓေန္တေန ပဌမံ ပတ္တစီဝရံ နီဟရိတ္ဝာ ဧကမန္တံ နိက္ခိပိတဗ္ဗံ; နိသီဒနပစ္စတ္ထရဏံ နီဟရိတ္ဝာ ဧကမန္တံ နိက္ခိပိတဗ္ဗံ; ဘိသိဗိဗ္ဗောဟနံ နီဟရိတ္ဝာ ဧကမန္တံ နိက္ခိပိတဗ္ဗံ; မဉ္စော နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, နီဟရိတ္ဝာ ဧကမန္တံ နိက္ခိပိတဗ္ဗော; ပီဌံ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, နီဟရိတ္ဝာ ဧကမန္တံ နိက္ခိပိတဗ္ဗံ; မဉ္စပဋိပာဒကာ နီဟရိတ္ဝာ ဧကမန္တံ နိက္ခိပိတဗ္ဗာ; ခေဠမလ္လကော နီဟရိတ္ဝာ ဧကမန္တံ နိက္ခိပိတဗ္ဗော ; အပသ္သေနဖလကံ နီဟရိတ္ဝာ ဧကမန္တံ နိက္ခိပိတဗ္ဗံ; ဘူမတ္ထရဏံ ယထာပညတ္တံ သလ္လက္ခေတ္ဝာ နီဟရိတ္ဝာ ဧကမန္တံ နိက္ခိပိတဗ္ဗံ။ သစေ ဝိဟာရေ သန္တာနကံ ဟောတိ, ဥလ္လောကာ ပဌမံ ဩဟာရေတဗ္ဗံ, အာလောကသန္ဓိကဏ္ဏဘာဂာ ပမဇ္ဇိတဗ္ဗာ။ သစေ ဂေရုကပရိကမ္မကတာ ဘိတ္တိ ကဏ္ဏကိတာ ဟောတိ, စောဠကံ တေမေတ္ဝာ ပီဠေတ္ဝာ ပမဇ္ဇိတဗ္ဗာ။ သစေ ကာဠဝဏ္ဏကတာ ဘူမိ ကဏ္ဏကိတာ ဟောတိ, စောဠကံ တေမေတ္ဝာ ပီဠေတ္ဝာ ပမဇ္ဇိတဗ္ဗာ။ သစေ အကတာ ဟောတိ ဘူမိ, ဥဒကေန ပရိပ္ဖောသိတ္ဝာ သမ္မဇ္ဇိတဗ္ဗာ – မာ ဝိဟာရော ရဇေန ဥဟညီတိ။ သင္ကာရံ ဝိစိနိတ္ဝာ ဧကမန္တံ ဆဍ္ဍေတဗ္ဗံ။
‘‘Yasmiṃ vihāre ācariyo viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ; nisīdanapaccattharaṇaṃ nīharitvā ekamantaṃ nikkhipitabbaṃ; bhisibibbohanaṃ nīharitvā ekamantaṃ nikkhipitabbaṃ; mañco nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbo; pīṭhaṃ nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbaṃ; mañcapaṭipādakā nīharitvā ekamantaṃ nikkhipitabbā; kheḷamallako nīharitvā ekamantaṃ nikkhipitabbo ; apassenaphalakaṃ nīharitvā ekamantaṃ nikkhipitabbaṃ; bhūmattharaṇaṃ yathāpaññattaṃ sallakkhetvā nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā sammajjitabbā – mā vihāro rajena uhaññīti. Saṅkāraṃ vicinitvā ekamantaṃ chaḍḍetabbaṃ.
‘‘ဘူမတ္ထရဏံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာပညတ္တံ ပညပေတဗ္ဗံ။ မဉ္စပဋိပာဒကာ ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဌာနေ ဌပေတဗ္ဗာ။ မဉ္စော ဩတာပေတ္ဝာ သောဓေတ္ဝာ ပပ္ဖောဋေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, အတိဟရိတ္ဝာ ယထာပညတ္တံ ပညပေတဗ္ဗော။ ပီဌံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, အတိဟရိတ္ဝာ ယထာပညတ္တံ ပညပေတဗ္ဗံ။ ဘိသိဗိဗ္ဗောဟနံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာပညတ္တံ ပညပေတဗ္ဗံ။ နိသီဒနပစ္စတ္ထရဏံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာပညတ္တံ ပညပေတဗ္ဗံ။ ခေဠမလ္လကော ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဌာနေ ဌပေတဗ္ဗော ။ အပသ္သေနဖလကံ ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဌာနေ ဌပေတဗ္ဗံ။ ပတ္တစီဝရံ နိက္ခိပိတဗ္ဗံ။ ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတ္ဝာ ဧကေန ဟတ္ထေန ဟေဋ္ဌာမဉ္စံ ဝာ ဟေဋ္ဌာပီဌံ ဝာ ပရာမသိတ္ဝာ ပတ္တော နိက္ခိပိတဗ္ဗော။ န စ အနန္တရဟိတာယ ဘူမိယာ ပတ္တော နိက္ခိပိတဗ္ဗော။ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတ္ဝာ ဧကေန ဟတ္ထေန စီဝရဝံသံ ဝာ စီဝရရဇ္ဇုံ ဝာ ပမဇ္ဇိတ္ဝာ ပာရတော အန္တံ ဩရတော ဘောဂံ ကတ္ဝာ စီဝရံ နိက္ခိပိတဗ္ဗံ။
‘‘Bhūmattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ. Mañcapaṭipādakā otāpetvā pamajjitvā atiharitvā yathāṭhāne ṭhapetabbā. Mañco otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāpaññattaṃ paññapetabbo. Pīṭhaṃ otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāpaññattaṃ paññapetabbaṃ. Bhisibibbohanaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ. Nisīdanapaccattharaṇaṃ otāpetvā sodhetvā papphoṭetvā atiharitvā yathāpaññattaṃ paññapetabbaṃ. Kheḷamallako otāpetvā pamajjitvā atiharitvā yathāṭhāne ṭhapetabbo . Apassenaphalakaṃ otāpetvā pamajjitvā atiharitvā yathāṭhāne ṭhapetabbaṃ. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ.
‘‘သစေ ပုရတ္ထိမာ သရဇာ ဝာတာ ဝာယန္တိ, ပုရတ္ထိမာ ဝာတပာနာ ထကေတဗ္ဗာ။ သစေ ပစ္ဆိမာ သရဇာ ဝာတာ ဝာယန္တိ, ပစ္ဆိမာ ဝာတပာနာ ထကေတဗ္ဗာ။ သစေ ဥတ္တရာ သရဇာ ဝာတာ ဝာယန္တိ, ဥတ္တရာ ဝာတပာနာ ထကေတဗ္ဗာ ။ သစေ ဒက္ခိဏာ သရဇာ ဝာတာ ဝာယန္တိ, ဒက္ခိဏာ ဝာတပာနာ ထကေတဗ္ဗာ။ သစေ သီတကာလော ဟောတိ, ဒိဝာ ဝာတပာနာ ဝိဝရိတဗ္ဗာ, ရတ္တိံ ထကေတဗ္ဗာ။ သစေ ဥဏ္ဟကာလော ဟောတိ, ဒိဝာ ဝာတပာနာ ထကေတဗ္ဗာ, ရတ္တိံ ဝိဝရိတဗ္ဗာ။
‘‘Sace puratthimā sarajā vātā vāyanti, puratthimā vātapānā thaketabbā. Sace pacchimā sarajā vātā vāyanti, pacchimā vātapānā thaketabbā. Sace uttarā sarajā vātā vāyanti, uttarā vātapānā thaketabbā . Sace dakkhiṇā sarajā vātā vāyanti, dakkhiṇā vātapānā thaketabbā. Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.
‘‘သစေ ပရိဝေဏံ ဥက္လာပံ ဟောတိ, ပရိဝေဏံ သမ္မဇ္ဇိတဗ္ဗံ။ သစေ ကောဋ္ဌကော ဥက္လာပော ဟောတိ, ကောဋ္ဌကော သမ္မဇ္ဇိတဗ္ဗော။ သစေ ဥပဋ္ဌာနသာလာ ဥက္လာပာ ဟောတိ, ဥပဋ္ဌာနသာလာ သမ္မဇ္ဇိတဗ္ဗာ။ သစေ အဂ္ဂိသာလာ ဥက္လာပာ ဟောတိ, အဂ္ဂိသာလာ သမ္မဇ္ဇိတဗ္ဗာ။ သစေ ဝစ္စကုဋိ ဥက္လာပာ ဟောတိ, ဝစ္စကုဋိ သမ္မဇ္ဇိတဗ္ဗာ။ သစေ ပာနီယံ န ဟောတိ, ပာနီယံ ဥပဋ္ဌာပေတဗ္ဗံ။ သစေ ပရိဘောဇနီယံ န ဟောတိ, ပရိဘောဇနီယံ ဥပဋ္ဌာပေတဗ္ဗံ ။ သစေ အာစမနကုမ္ဘိယံ ဥဒကံ န ဟောတိ, အာစမနကုမ္ဘိယာ ဥဒကံ အာသိဉ္စိတဗ္ဗံ။
‘‘Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo. Sace upaṭṭhānasālā uklāpā hoti, upaṭṭhānasālā sammajjitabbā. Sace aggisālā uklāpā hoti, aggisālā sammajjitabbā. Sace vaccakuṭi uklāpā hoti, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ . Sace ācamanakumbhiyaṃ udakaṃ na hoti, ācamanakumbhiyā udakaṃ āsiñcitabbaṃ.
‘‘သစေ အာစရိယသ္သ အနဘိရတိ ဥပ္ပန္နာ ဟောတိ, အန္တေဝာသိကေန ဝူပကာသေတဗ္ဗော, ဝူပကာသာပေတဗ္ဗော, ဓမ္မကထာ ဝာသ္သ ကာတဗ္ဗာ။ သစေ အာစရိယသ္သ ကုက္ကုစ္စံ ဥပ္ပန္နံ ဟောတိ, အန္တေဝာသိကေန ဝိနောဒေတဗ္ဗံ, ဝိနောဒာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ အာစရိယသ္သ ဒိဋ္ဌိဂတံ ဥပ္ပန္နံ ဟောတိ, အန္တေဝာသိကေန ဝိဝေစေတဗ္ဗံ, ဝိဝေစာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ အာစရိယော ဂရုဓမ္မံ အဇ္ဈာပန္နော ဟောတိ ပရိဝာသာရဟော, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အာစရိယသ္သ ပရိဝာသံ ဒဒေယ္ယာတိ။ သစေ အာစရိယော မူလာယ ပဋိကသ္သနာရဟော ဟောတိ, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အာစရိယံ မူလာယ ပဋိကသ္သေယ္ယာတိ။ သစေ အာစရိယော မာနတ္တာရဟော ဟောတိ, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အာစရိယသ္သ မာနတ္တံ ဒဒေယ္ယာတိ။ သစေ အာစရိယော အဗ္ဘာနာရဟော ဟောတိ, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အာစရိယံ အဗ္ဘေယ္ယာတိ ။ သစေ သင္ဃော အာစရိယသ္သ ကမ္မံ ကတ္တုကာမော ဟောတိ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ ဥက္ခေပနီယံ ဝာ, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော အာစရိယသ္သ ကမ္မံ န ကရေယ္ယ, လဟုကာယ ဝာ ပရိဏာမေယ္ယာတိ။ ကတံ ဝာ ပနသ္သ ဟောတိ သင္ဃေန ကမ္မံ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ ဥက္ခေပနီယံ ဝာ, အန္တေဝာသိကေန ဥသ္သုက္ကံ ကာတဗ္ဗံ – ကိန္တိ နု ခော အာစရိယော သမ္မာ ဝတ္တေယ္ယ, လောမံ ပာတေယ္ယ, နေတ္ထာရံ ဝတ္တေယ္ယ, သင္ဃော တံ ကမ္မံ ပဋိပ္ပသ္သမ္ဘေယ္ယာတိ။
‘‘Sace ācariyassa anabhirati uppannā hoti, antevāsikena vūpakāsetabbo, vūpakāsāpetabbo, dhammakathā vāssa kātabbā. Sace ācariyassa kukkuccaṃ uppannaṃ hoti, antevāsikena vinodetabbaṃ, vinodāpetabbaṃ, dhammakathā vāssa kātabbā. Sace ācariyassa diṭṭhigataṃ uppannaṃ hoti, antevāsikena vivecetabbaṃ, vivecāpetabbaṃ, dhammakathā vāssa kātabbā. Sace ācariyo garudhammaṃ ajjhāpanno hoti parivāsāraho, antevāsikena ussukkaṃ kātabbaṃ – kinti nu kho saṅgho ācariyassa parivāsaṃ dadeyyāti. Sace ācariyo mūlāya paṭikassanāraho hoti, antevāsikena ussukkaṃ kātabbaṃ – kinti nu kho saṅgho ācariyaṃ mūlāya paṭikasseyyāti. Sace ācariyo mānattāraho hoti, antevāsikena ussukkaṃ kātabbaṃ – kinti nu kho saṅgho ācariyassa mānattaṃ dadeyyāti. Sace ācariyo abbhānāraho hoti, antevāsikena ussukkaṃ kātabbaṃ – kinti nu kho saṅgho ācariyaṃ abbheyyāti . Sace saṅgho ācariyassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, antevāsikena ussukkaṃ kātabbaṃ – kinti nu kho saṅgho ācariyassa kammaṃ na kareyya, lahukāya vā pariṇāmeyyāti. Kataṃ vā panassa hoti saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, antevāsikena ussukkaṃ kātabbaṃ – kinti nu kho ācariyo sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘သစေ အာစရိယသ္သ စီဝရံ ဓောဝိတဗ္ဗံ ဟောတိ, အန္တေဝာသိကေန ဓောဝိတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော အာစရိယသ္သ စီဝရံ ဓောဝိယေထာတိ။ သစေ အာစရိယသ္သ စီဝရံ ကာတဗ္ဗံ ဟောတိ, အန္တေဝာသိကေန ကာတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော အာစရိယသ္သ စီဝရံ ကရိယေထာတိ။ သစေ အာစရိယသ္သ ရဇနံ ပစိတဗ္ဗံ ဟောတိ, အန္တေဝာသိကေန ပစိတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော အာစရိယသ္သ ရဇနံ ပစိယေထာတိ။ သစေ အာစရိယသ္သ စီဝရံ ရဇိတဗ္ဗံ ဟောတိ, အန္တေဝာသိကေန ရဇိတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော အာစရိယသ္သ စီဝရံ ရဇိယေထာတိ။ စီဝရံ ရဇန္တေန သာဓုကံ သမ္ပရိဝတ္တကံ သမ္ပရိဝတ္တကံ ရဇိတဗ္ဗံ, န စ အစ္ဆိန္နေ ထေဝေ ပက္ကမိတဗ္ဗံ။
‘‘Sace ācariyassa cīvaraṃ dhovitabbaṃ hoti, antevāsikena dhovitabbaṃ, ussukkaṃ vā kātabbaṃ – kinti nu kho ācariyassa cīvaraṃ dhoviyethāti. Sace ācariyassa cīvaraṃ kātabbaṃ hoti, antevāsikena kātabbaṃ, ussukkaṃ vā kātabbaṃ – kinti nu kho ācariyassa cīvaraṃ kariyethāti. Sace ācariyassa rajanaṃ pacitabbaṃ hoti, antevāsikena pacitabbaṃ, ussukkaṃ vā kātabbaṃ – kinti nu kho ācariyassa rajanaṃ paciyethāti. Sace ācariyassa cīvaraṃ rajitabbaṃ hoti, antevāsikena rajitabbaṃ, ussukkaṃ vā kātabbaṃ – kinti nu kho ācariyassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ, na ca acchinne theve pakkamitabbaṃ.
‘‘န အာစရိယံ အနာပုစ္ဆာ ဧကစ္စသ္သ ပတ္တော ဒာတဗ္ဗော, န ဧကစ္စသ္သ ပတ္တော ပဋိဂ္ဂဟေတဗ္ဗော; န ဧကစ္စသ္သ စီဝရံ ဒာတဗ္ဗံ; န ဧကစ္စသ္သ စီဝရံ ပဋိဂ္ဂဟေတဗ္ဗံ; န ဧကစ္စသ္သ ပရိက္ခာရော ဒာတဗ္ဗော; န ဧကစ္စသ္သ ပရိက္ခာရော ပဋိဂ္ဂဟေတဗ္ဗော; န ဧကစ္စသ္သ ကေသာ ဆေဒေတဗ္ဗာ; န ဧကစ္စေန ကေသာ ဆေဒာပေတဗ္ဗာ; န ဧကစ္စသ္သ ပရိကမ္မံ ကာတဗ္ဗံ; န ဧကစ္စေန ပရိကမ္မံ ကာရာပေတဗ္ဗံ; န ဧကစ္စသ္သ ဝေယ္ယာဝစ္စော ကာတဗ္ဗော; န ဧကစ္စေန ဝေယ္ယာဝစ္စော ကာရာပေတဗ္ဗော; န ဧကစ္စသ္သ ပစ္ဆာသမဏေန ဟောတဗ္ဗံ; န ဧကစ္စော ပစ္ဆာသမဏော အာဒာတဗ္ဗော; န ဧကစ္စသ္သ ပိဏ္ဍပာတော နီဟရိတဗ္ဗော; န ဧကစ္စေန ပိဏ္ဍပာတော နီဟရာပေတဗ္ဗော။ န အာစရိယံ အနာပုစ္ဆာ ဂာမော ပဝိသိတဗ္ဗော, န သုသာနံ ဂန္တဗ္ဗံ, န ဒိသာ ပက္ကမိတဗ္ဗာ။ သစေ အာစရိယော ဂိလာနော ဟောတိ, ယာဝဇီဝံ ဥပဋ္ဌာတဗ္ဗော, ဝုဋ္ဌာနမသ္သ အာဂမေတဗ္ဗ’’န္တိ။
‘‘Na ācariyaṃ anāpucchā ekaccassa patto dātabbo, na ekaccassa patto paṭiggahetabbo; na ekaccassa cīvaraṃ dātabbaṃ; na ekaccassa cīvaraṃ paṭiggahetabbaṃ; na ekaccassa parikkhāro dātabbo; na ekaccassa parikkhāro paṭiggahetabbo; na ekaccassa kesā chedetabbā; na ekaccena kesā chedāpetabbā; na ekaccassa parikammaṃ kātabbaṃ; na ekaccena parikammaṃ kārāpetabbaṃ; na ekaccassa veyyāvacco kātabbo; na ekaccena veyyāvacco kārāpetabbo; na ekaccassa pacchāsamaṇena hotabbaṃ; na ekacco pacchāsamaṇo ādātabbo; na ekaccassa piṇḍapāto nīharitabbo; na ekaccena piṇḍapāto nīharāpetabbo. Na ācariyaṃ anāpucchā gāmo pavisitabbo, na susānaṃ gantabbaṃ, na disā pakkamitabbā. Sace ācariyo gilāno hoti, yāvajīvaṃ upaṭṭhātabbo, vuṭṭhānamassa āgametabba’’nti.
အာစရိယဝတ္တံ နိဋ္ဌိတံ။
Ācariyavattaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အာစရိယဝတ္တကထာ • Ācariyavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာစရိယဝတ္တကထာဝဏ္ဏနာ • Ācariyavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာစရိယဝတ္တကထာဝဏ္ဏနာ • Ācariyavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာစရိယဝတ္တကထာဝဏ္ဏနာ • Ācariyavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၈. အာစရိယဝတ္တကထာ • 18. Ācariyavattakathā
